Bivhilini, ipfi ḽo ṱalutshedzelwaho nga uri mvuwo, ḽi bva kha ipfi ḽa Tshigerika ḽine ḽa vha anaʹstasis. Ḽeneḽi ipfi ḽi amba “u vuwa” kana u “dovha wa ima.” Musi muthu o lovha, u vuswa a dovha a tshila, sa muthu we a vha e ene musi a sa athu lovha.​—1 Vhakorinta 15:12, 13.

 Ipfi “mvuwo” a ḽi ho kha Maṅwalo a Tshihevheru, ane kanzhi a vhidzwa Thestamennde Ya Kale. Fhedzi ri a guda nga ha yeneyi pfunzo kha enea Maṅwalo. Mudzimu a tshi shumisa muporofita Hosea, o fhulufhedzisa uri: “Ndi ḓo vha rengulula kha maanḓa a Vhiḓa; ndi ḓo vha vusa lufuni.”​—Hosea 13:14; Yobo 14:13-15; Yesaya 26:19; Daniele 12:2, 13.

 Vho lovhaho vha ḓo vuselwa ngafhi? Vhaṅwe vhathu vha vuselwa ṱaḓulu uri vha vhuse sa mahosi na Yesu Kristo. (2 Vhakorinta 5:1; Nzumbululo 5:9, 10) Bivhili i amba uri vha ḓo “vuswa kha u vuswa ha vhafu ha u thoma” na uri “vha ḓo thoma u vuswa.” Zwenezwi zwi sumbedza uri hu na iṅwe mvuwo ine ya ḓo tevhela. (Nzumbululo 20:6; Vhafilipi 3:11) Yeneyi mvuwo ya vhuvhili, ndi ya vhane vha ḓo tshila kha ḽifhasi. Vhunzhi ha vhathu vha ḓo vuswa uri vha ḓiphiṋe nga vhutshilo kha ḽifhasi.​—Phisalema 37:29.

 Vho lovhaho vha vuswa nga nḓila-ḓe? Mudzimu o ṋea Yesu maanḓa a u vusa vhafu. (Yohane 11:25) Yesu u ḓo vusa “vhoṱhe vha re mavhiḓani,” muṅwe na muṅwe wavho u ḓo vha e onouḽa muthu we vhathu vha vha vha tshi mu ḓivha nahone u ḓo vha a tshi humbula zwe a vha a tshi zwi ḓivha musi a sa athu lovha. (Yohane 5:28, 29) Vhane vha vuselwa ṱaḓulu, vha vuswa vhe na muvhili wa muya. Vhane vha ḓo vuselwa u tshila kha ḽifhasi, vha vuswa vhe na muvhili wa ṋama nahone vhe na mutakalo wavhuḓi.​—Yesaya 33:24; 35:5, 6; 1 Vhakorinta 15:42-44, 50.

 Ndi vhafhio vhane vha ḓo vuswa? Bivhili i amba uri “Mudzimu u ḓo vusa vho lugaho na vha songo lugaho.” (Mishumo 24:15) Vho lugaho vha katela vhathu vho fhulufhedzeaho vha ngaho sa Noaxe, Sara na Abrahamu. (Genesi 6:9; Vhahevheru 11:11; Yakobo 2:21) Vha songo lugaho vha katela vhathu vhe vha si wane tshibuli tsha u guda uri Mudzimu u ṱoḓa mini na u tevhedza zwine a ṱoḓa.

 Naho zwo ralo, vhaitazwivhi vhe vha hana u shanduka a vha nga vuswi. Vhathu vho raloho a vha na fhulufhelo ḽa uri vha dovhe vha vuswe.​—Mateo 23:33; Vhahevheru 10:26, 27.

 Vhathu vho lovhaho vha ḓo vuswa lini? Bivhili yo amba uri vhane vha vuselwa ṱaḓulu vha ḓo thoma u vuswa nga tshifhinga tsha u vha hone ha Kristo, zwenezwi zwo thoma u itea nga 1914. (1 Vhakorinta 15:21-23) Vhane vha ḓo vuselwa kha ḽifhasi vha ḓo vuswa hu tshi khou Vhusa Yesu Kristo Lwa Miṅwaha Ya Tshigidi, musi ḽifhasi ḽi tshi khou itwa pharadiso.​—Luka 23:43; Nzumbululo 20:6, 12, 13.

 Ndi ngani zwi tshi pfala u tenda uri vhafu vha ḓo vuswa? Bivhili i amba nga ha vhathu vha ṱahe vhe vha vuswa vhaṅwe vhathu vha tshi khou zwi vhona. (1 Dzikhosi 17:17-24; 2 Dzikhosi 4:32-37; 13:20, 21; Luka 7:11-17; 8:40-56; Yohane 11:38-44; Mishumo 9:36-42; 20:7-12; 1 Vhakorinta 15:3-6) Mvuwo yo khetheaho, ndi ya musi Yesu a tshi vusa Lazaro. O vha o no fhedza maḓuvha maṋa o lovha musi a tshi vuswa nahone Yesu o ita honovhu vhuṱolo phanḓa ha vhathu vhanzhi. (Yohane 11:39, 42) Na vhapikisi vha Yesu vho kundelwa u zwi hanedza, vha ri ndi khwiṋe u vhulaya Yesu na Lazaro.​—Yohane 11:47, 53; 12:9-11.

 Bivhili i sumbedza uri Mudzimu u na maanḓa a u vusa vhafu na uri u ṱoḓa u zwi ita. U vhulunga zwidodombedzwa zwoṱhe nga ha muthu muṅwe na muṅwe ane a ḓo mu vusa a tshi shumisa maanḓa awe mahulu. (Yobo 37:23; Mateo 10:30; Luka 20:37, 38) Mudzimu a nga si kundelwe u vusa vho lovhaho nahone u ṱoḓa u zwi ita. Bivhili i tshi amba nga ha mvuwo ya tshifhingani tshi ḓaho, i ri: “U ḓo ṱuvha mushumo wa zwanḓa zwau.”​—Yobo 14:15.

Maṅwe mazwifhi nga ha u vuswa ha vhafu

 Mazwifhi: Musi muthu a tshi vuswa, muya u vha u tshi khou vhuyelele kha muvhili.

 Ngoho: Bivhili i funza uri muthu a lovha ha tsha vha hone nahone a hu na muya une wa bva khae wa bvela phanḓa u tshi khou tshila.​—Genesi 2:7; Muhuweleli 9:5, 10.

 Mazwifhi: Vhaṅwe vhathu vha vuswa vha dovha vha vhulawa nga u bonya ha iṱo.

 Ngoho: Bivhili i amba uri “vhe vha ita zwivhi vha ḓo vuswa uri vha haṱulwe.” (Yohane 5:29) Naho zwo ralo, vha haṱulwa u ya nga zwe vha zwi ita musi vho no vuswa hu si zwe vha zwi ita vha sa athu lovha. Yesu o ri: “Vhafu vha ḓo pfa ipfi ḽa Murwa wa Mudzimu, vhoṱhe vhe vha thetshelesa vha ḓo tshila.” (Yohane 5:25) Vhane vha ḓo “thetshelesa” kana u tevhedza zwine vha ḓo zwi guda musi vho no vuswa, madzina avho a ḓo ṅwalwa kha “mupombo wa vhutshilo.”​—Nzumbululo 20:12, 13.

 Mazwifhi: Musi vho lovhaho vha tshi vuswa, vha vha vhe na muvhili u fanaho na wa musi vha sa athu lovha.

 Ngoho: Musi muthu o no lovha, u a sina a vha zwipiḓa-piḓa.—Muhuweleli 3:19, 20.