Ndovhedzo Ndi Mini?
Bivhili i a fhindula
U lovhedza ndi musi muthu a tshi mbwandamedzwa tshoṱhe maḓini a dovha a bviswa khao. a Ndi ngazwo na Yesu o lovhedzwa mulamboni u re na maḓi manzhi. (Mateo 3:13, 16) Nga hu fanaho, munna wa Muetopia o humbela u lovhedzwa musi a tshi swika hu re na “tivha ḽa maḓi.”—Mishumo 8:36-40.
Zwi amba mini u lovhedzwa?
Bivhili i vhambedza ndovhedzo na u vhulungwa. (Vharoma 6:4; Vhakolosa 2:12) U lovhedzwa maḓini zwi sumbedza uri no fa nga lwa pfanyisedzo na uri a ni tsha ḓo tshila nga nḓila ye na vha ni tshi tshila ngayo kale nahone ni ḓo shumela Mudzimu u bva zwino u ya phanḓa. Zwithu zwine muthu a zwi ita uri a fhedzisele o lovhedzwa ndi ndugiselo ya Mudzimu ine ya mu thusa uri a vhe na luvalo lwo kunaho. Zwenezwo zwi konadzea nga u vha na lutendo kha tshiṱhavhelo tsha Yesu Kristo. (1 Petro 3:21) Ndi ngazwo Yesu o vhudza vhafunziwa vhawe uri vha tea u lovhedzwa.—Mateo 28:19, 20.
Naa u lovhedzwa maḓini zwi ṱanzwa zwivhi?
Hai. Bivhili i funza uri ndi malofha a Yesu fhedzi ane a nga ri ṱanzwa zwivhi. (Vharoma 5:8, 9; 1 Yohane 1:7) Uri muthu a vhuyelwe nga tshiṱhavhelo tsha Yesu, u tea u vha na lutendo kha Yesu, u tea u shandula nḓila ine a tshila ngayo, a tshile u tendelana na zwe Yesu a zwi funza nahone a lovhedzwe.—Mishumo 2:38; 3:19.
Ndovhedzo ya vhana vhaṱuku (Christening) ndi mini?
Bivhilini a hu ambiwi nga ha ndovhedzo ya vhana vhaṱuku (christen kana christening). Zwenezwi zwi itwa nga dziṅwe kereke. Dziṅwe kereke dzi “lovhedza” ṅwana wa lutshetshe (nga u mu shasha maḓi kana u mu shela maḓi kha ṱhoho) nahone a irwa dzina.
Naa Bivhili i a funza nga ha u lovhedzwa ha lutshetshe?
Hai. Ndovhedzo ya Vhakriste ndi ya vhathu vho aluwaho lune vha pfesesa na u tenda “mafhungo maḓifha a Muvhuso wa Mudzimu.” (Mishumo 8:12) U itela uri muthu a lovhedzwe, u tea u pfa ipfi ḽa Mudzimu, a ḽi ṱanganedze nahone a rembuluwe. Zwenezwo ndi zwithu zwine lutshetshe lu nga si kone u zwi ita.—Mishumo 2:22, 38, 41.
Zwiṅwe hafhu, Bivhili i sumbedza uri Mudzimu u dzhia vhana vha Vhakriste vhe vhakhethwa kana vho kuna phanḓa hawe nga nṱhani ha u fhulufhedzea ha vhabebi vhavho. (1 Vhakorinta 7:14) Arali zwo vha zwo tea uri ṅwana wa lutshetshe a lovhedzwe, vhenevho vhana vho vha vha sa ḓo ḓitika nga u fhulufhedzea ha muṅwe muthu. b
Mahumbulele o khakheaho nga ha ndovhedzo ya Vhakriste
Mahumbulele o khakheaho: U shashiwa kana u shelwa maḓi zwi a fana na u mbwandamedza tshoṱhe maḓini.
Ngoho: Ndovhedzo dzoṱhe dze ha ambiwa nga hadzo Bivhilini dzi katela u mbwandamedza tshoṱhe maḓini. Sa tsumbo, musi mufunziwa Filipi a tshi lovhedza munna wa Muetopia, vho “dzhena maḓini” a mu lovhedza. Musi a tshi fhedza u mu lovhedza, vho ”bva maḓini.”—Mishumo 8:36-39. c
Mahumbulele o khakheaho: Bivhili i amba uri na vhana vhaṱuku vho lovhedzwa musi muṱa woṱhe u tshi lovhedzwa. Sa tsumbo, Bivhili i amba zwi tevhelaho nga ha mulindi wa dzhele wa Filipi, i ri: “Ene na vha muṱa wawe woṱhe vha lovhedzwa.”—Mishumo 16:31-34.
Ngoho: Mafhungo a u rembuluwa ha mulindi wa dzhele a sumbedza uri vhe vha lovhedzwa vho pfesesa “ipfi ḽa Yehova” nahone vha “takala zwihulu.” (Mishumo 16:32, 34) Eneo mafhungo a ita uri ri phethe nga ḽa uri vhenevho vhana vhe vha vha vhe muṱani wa mulindi wa dzhele a vho ngo lovhedzwa ngauri vho vha vha nga si kone u pfesesa ipfi ḽa Yehova.
Mahumbulele o khakheaho: Yesu o funza nga ha ndovhedzo ya vhana vhaṱuku musi a tshi amba uri Muvhuso ndi wa vhana vhaṱuku.—Mateo 19:13-15; Marko 10:13-16.
Ngoho: Musi Yesu a tshi amba nga ha eneo mafhungo, o vha a sa khou amba nga ha ndovhedzo. Nṱhani hazwo, Yesu o vha a tshi khou sumbedza uri vhane vha ḓo dzhena Muvhusoni wa Mudzimu vha tea u nga vhana, vha ḓiṱukufhadze nahone vha tende u gudiswa.—Mateo 18:4; Luka 18:16, 17.
a Ipfi ḽa Tshigerika ḽo ṱalutshedzelwaho nga uri “u lovhedzwa,” ḽi amba “u mbwandamedzwa tshoṱhe maḓini.” Sedzani bugu ine ya pfi Theological Dictionary of the New Testament, Volume I, siaṱari 529.
b Bugu ine ya pfi The International Standard Bible Encyclopedia i ri: “Kha Thestamennde Ntswa a hu ambiwi nga ndovhedzo ya vhana vhaṱuku.” Yeneyo bugu i dovha ya amba uri wonoyo mukhuvha wo thoma “nga nṱhani ha mahumbulele o khakheaho na o kaludzwaho a nḓila ine u lovhedzwa zwa vha zwa ndeme ngayo,” ane a amba uri ndovhedzo i ṱanzwa zwivhi.—Volume 1,masiaṱari 416-417.
c Nga fhasi ha tshiṱoho tshine tsha ri “ndovhedzo” (Bivhilini), bugu ine ya pfi New Catholic Encyclopedia i ri: “Zwi khagala uri kha Kereke ya u thoma, ndovhedzo yo vha i tshi itwa nga u mbwandamedza tshoṱhe maḓini.”—Volume 2, siaṱari 59.
You May Also Like
MBUDZISO DZA BIVHILI DZO FHINDULWA
Naa Vhurabeli Hoṱhe Vhu A Fana? Naa Hoṱhe Vhu A Takadza Mudzimu?
Hu na zwithu zwivhili zwo ambiwa Bivhili zwine zwa ri thusa u wana phindulo.
MBUDZISO DZA BIVHILI DZO FHINDULWA
Ndi Nga Wana Hani Vhurereli Ha Ngoho?
Naa vhu sokou vha vhurereli vhuṅwe na vhuṅwe kha nṋe?
ESSENTIAL BIBLE TEACHINGS
Naa Mudzimu U Ṱanganedza Mifuda Yoṱhe Ya Vhurabeli?
Vhathu vhanzhi vha tenda uri a zwi na ndavha uri u kha vhurereli vhufhio.
MBUDZISO DZA BIVHILI DZO FHINDULWA
Zwi Amba Mini U Tshidzwa?
Ri fanela u ita mini uri ri tshidzwe? Nahone muthu u tshidzwa kha mini?
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.