Bivhili i ṱuṱuwedza u ṋea nga u ḓifunela nahone nga zwiitisi zwi pfalaho. I sumbedza uri honoho u ṋea a hu vhuyedzi fhedzi o ṋewaho, fhedzi hu vhuyedza na muṋei. (Mirero 11:25; Luka 6:38) Yesu o ri: “U ṋea zwi ḓisa dakalo ḽihulu u fhira u ṋewa.”​—Mishumo 20:35.

•  Ndi lini hune u ṋea zwa takadza Mudzimu?

•  Ndi lini hune u ṋea zwa sa takadze Mudzimu?

•  Ndimana dza Bivhili dzine dza amba nga ha u ṋea

 U ṋea zwi a vhuyedza musi zwo itwa nga u ḓifunela. Bivhili i ri: “Muṅwe na muṅwe nga a ite zwe a phetha mbiluni yawe, a songo zwi ita o ṱungufhala kana nga u tou kombetshedzea, ngauri Mudzimu u funa ane a ṋea o takala.”​—2 Vhakorinta 9:7.

 U ṋea zwi tshi bva mbiluni ndi “Mufuda wa vhurabeli” une Mudzimu a u ṱanganedza. (Yakobo 1:27) Muthu ane a ṋea vhaṅwe nga u ḓifunela u vha a tshi khou shumisana na Mudzimu, ane a dzhia honoho u ṋea hu adzima ene. (Mirero 19:17) Bivhili i amba uri Mudzimu u lambedza muthu ane a ṋea.​—Luka 14:12-14.

 Arali zwo itwa u tshi khou humbulela iwe muṋe fhedzi. Tsumbo dza hone khedzi:

•   U itela u vhonwa nga vhathu.​—Mateo 6:2.

•   U ṋea u tshi lavhelela uri na vhone vha u ṋee.​—Luka 14:12-14.

•   U ṋea u itela u renga u tshidzwa.​—Psalme ya 49:6, 7.

 Arali zwi tshi shumiselwa u ita zwine Mudzimu a zwi vhenga. Sa tsumbo, zwi ḓo vha zwo khakhea u ṋea muthu tshelede u itela uri a gembuḽe kana u shumisa luvhi zwikambi na zwidzidzivhadzi. (1 Vhakorinta 6:9, 10; 2 Vhakorinta 7:1) Nga hu fanaho, a zwo ngo tea u ṋea muthu ane a nga kona u ḓishumela, fhedzi a sa funi u shuma.​—2 Vhathesalonika 3:10.

 Arali u ṋea zwi tshi ita uri ri si tsha kona u ṱhogomela muṱa waṋu. Bivhili i funza uri ṱhoho dza miṱa dzi fanela u ṱhogomela miṱa yadzo. (1 Timotheo 5:8) Zwi ḓo vha zwi songo tea uri ṱhoho ya muṱa a ṋee vhaṅwe lune a si tsha kona u ṱunḓela muṱa wawe. Nga hu faho, Yesu o sasaladza vhe vha vha tshi hana u ṱunḓela vhabebi vhavho vho no vhaho vhalala nga u amba uri zwoṱhe zwine vha vha nazwo ndi “tshifhiwa tsho ṋekedzwaho Mudzimu.”​—Marko 7:9-13.