A hu na muthu o no vhonaho Mudzimu nga maṱo. (Ekisoda 33:20; Yohane 1:18; 1 Yohane 4:12) Bivhili i amba uri “Mudzimu ndi Muya,” vhathu vha nga si kone u mu vhona nga maṱo.​—Yohane 4:24; 1 Timotheo 1:17.

 Fhedzi vharuṅwa vha kona u vhona Mudzimu ngauri ndi zwivhumbiwa zwa muya. (Mateo 18:10) Zwiṅwe hafhu, hu na vhathu vhane vha ḓo vuselwa ṱaḓulu vhe na mivhili i fanaho na ya vharuṅwa nahone vha ḓo kona u vhona Mudzimu.​—Vhafilipi 3:20, 21; 1 Yohane 3:2.

 Kanzhi Bivhili i tshi amba nga ha u vhona i vha i tshi khou amba nga lwa pfanyisedzo zwi tshi imela u pfesesa. (Yesaya 6:10; Yeremia 5:21; Yohane 9:39-41) Muthu a nga vhona Mudzimu zwino nga u “vula mbilu” yawe a vha na lutendo na u dzhiela nṱha zwine Mudzimu a vha zwone. (Vhaefesa 1:18) Bivhili i a sumbedza uri ri nga vha hani na lutendo lwo raloho.

•   Gudani nga ha zwine Mudzimu a vha zwone u fana na lufuno lune a vha nalwo, mafunda, vhuṱali na maanḓa zwine ra zwi vhona kha tsiko yawe. (Vharoma 1:20) Musi Yobo o no humbudzwa nga ha tsiko ya Mudzimu, o pfa u nga u khou tou vhona Mudzimu nga maṱo awe.​—Yobo 42:5.

•   Gudani Bivhili u itela u ḓivha Mudzimu. Bivhili i khwaṱhisedza uri ‘arali na ṱoḓa Mudzimu, ene u ḓo ita uri ni mu wane.’​—1 Koronika 28:9; Phisalema 119:2; Yohane 17:3.

•   Gudani nga ha Mudzimu kha zwe Yesu a ita. Yesu o kona u amba o vhofholowa uri: “A vhonaho nṋe o vhona Khotsi” ngauri o tshila nga nḓila ine ya sumbedza zwine Khotsi awe a vha zwone kokotolo.​—Yohane 14:9.

•   Tshilani nga nḓila ine ya takadza Mudzimu ni vhone uri u ḓo ni itela mini. Yesu o ri: “Hu takala vha mbilu dzo ṱambaho, ngauri vha ḓo vhona Mudzimu.” Samusi zwo sumbedzwa mathomoni a ino thero, vhane vha ḓo vuselwa ṱaḓulu vha ḓo “vhona Mudzimu” henengei.​—Mateo 5:8; Phisalema 11:7.

 Kha zwiitea zwine ha nga vhonala u nga vhathu vho vhona Mudzimu nga maṱo, dziṅwe vese dzi sumbedza uri vho vhona muruṅwa we a vha o imela Mudzimu kana u vhona bono.

 Vharuṅwa.

Zwifhingani zwa kale, Mudzimu o rumela vharuṅwa kha vhathu uri vha mu imelele na u amba dzinani ḽawe. (Phisalema 103:20) Sa tsumbo, Bivhili i amba uri musi Mudzimu e vhukati ha tshiṱaka tshi dugaho a tshi khou amba na Mushe, Mushe o “fukedza tshifhaṱuwo tshawe, ngauri o vha a tshi khou ofha u sedza Mudzimu wa ngoho.” (Ekisoda 3:4, 6) Fhedzi Mushe ho ngo vhona Mudzimu nga maṱo ngauri dziṅwe vese dzi sumbedza uri o vhona “muruṅwa wa Yehova.”​—Ekisoda 3:2.

 Nga hu fanaho, musi Bivhili i tshi amba uri Mudzimu o “amba na Mushe vho livhana zwifhaṱuwo,” i vha i tshi khou amba uri Mudzimu o amba na Mushe sa dzikhonani. (Ekisoda 4:10, 11; 33:11) Mushe ho ngo vhona tshifhaṱuwo tsha Mudzimu ngauri mafhungo a sumbedza uri Mudzimu o ṋea mulayo “vharuṅwa uri vha u pfukise.” (Vhagalata 3:19; Mishumo 7:53) Fhedzi lutendo lwa Mushe lwo vha lwo khwaṱha vhukuma lwe Bivhili ya amba uri o vha “a tshi nga u khou vhona Ane a si vhonale.”​—Vhahevheru 11:27.

 Samusi Mudzimu o amba na Mushe a tshi shumisa vharuṅwa, o ita zwi fanaho na kha Abrahamu. Ngoho ndi uri wa sa vhala Bivhili nga vhuronwane, zwi nga vhonala u nga Abrahamu o vhona Mudzimu nga maṱo. (Genesi 18:1, 33) Naho zwo ralo, dziṅwe vese dzi sumbedza uri “vhanna vhararu” vhe vha ya kha Abrahamu, vho vha vhe vharuṅwa vha Mudzimu. Abrahamu o zwi ḓivha uri ndi vhaimeleli vha Mudzimu nahone a amba navho u tou nga u khou amba na Mudzimu.​—Genesi 18:​2, 3, 22, 32; 19:1.

 Mabono.

Mudzimu o dovha a ḓivhonadza kha vhathu a tshi shumisa mabono. Sa tsumbo, musi Bivhili i tshi amba uri Mushe na vhaṅwe Vhaisiraele vho “vhona Mudzimu wa Isiraele,” vho vha “vho vhona bono ḽa Mudzimu wa ngoho.” (Ekisoda 24:9-11) Nga hu fanaho, nga zwiṅwe zwifhinga Bivhili i amba uri vhaṅwe vhaporofita vho “vhona Yehova.” (Yesaya 6:1; Daniele 7:9; Amosi 9:1) Kha eneo mafhungo hu sumbedzwa uri a vho ngo vhona Mudzimu nga ho livhaho, fhedzi vho tou vhona bono.​—Yesaya 1:1; Daniele 7:2; Amosi 1:1.