STÙDIO 40
CÀNTICO 30 Me Dio, me Amigo e me Pupà
Geovà ‘el tende de quel che el ga el cuor spacà’
‘Lu el tende de quel che el ga el cuor spacà, el cura le so feride.’ — SAL. 147:3.
COSSA CHE NDAREMO IMPARAR?
Geovà l’è atento e el tende con amor de quei che i sofre e che i ga el cuor spacà. In questo stùdio, ndaremo veder come che Geovà el ghe dà forsa e come che noantri podemo giutar quei che i ze drio sofrir.
1. Cossa che Geovà el sente quando el varda i so servi?
GEOVÀ el vede pròpio tuto quel che sucede coi so servi. Lu el sa quando semo contenti e quando semo drio sofrir. (Sal. 37:18) E cossa che Geovà el sente? Quando lu el vede che femo el nostro meio par seitar a servirlo quando infrontemo dificoltà, lu el resta tanto contento. E quando sofrimo, lu el resta premoso par giutarne e consolarne.
2. Cossa che Geovà el fà par le persone che le ga el cuor spacà, e cossa che ghemo de far par ricever el so aiuto?
2 El Salmo 147:3 dise che Geovà el ‘el tende de quei che i ga el cuor spacà’. Geovà el tende con tanta bontà de quei che i ga bruti sentimenti. Ma cossa che ghemo de far par ricever el so aiuto? Proa pensar nte un bravo dotor, che l’è drio tender de una persona che la se ga fato mal. Par restar meio, ela la gavarà de far tuto quel che el dotor el ghe dise. Podemo dir che Geovà l’è compagno a questo dotor. In questo stùdio, ndaremo veder cossa che Geovà el dise che quei che i ga el cuor spacà i ga de far e anca ndaremo veder come che podemo meter in pràtica i so bei consili che catemo nela Bìblia.
GEOVÀ EL NE RICORDA CHE SEMO PRESSIOSI PAR LU
3. Parché che arquanti i pensa che no i ga mia valor?
3 Tante persone ancoi no le mostra amor ai altri. Par quela, arquanti i pensa che no i ga mia valor. Una sorela de nome Helen a la ga dito: “I me genitori no i ne mostrea amor. El me pare l’era violento, el ne disea su e el ne fea de poco.” Fursi, compagno a Helen, te ghè scoltà brute parole e te pensi che no te ghè mia valor. Alora, pol esser che te fè fadiga creder che qualchedun el te vol ben.
4. De acordo con Salmo 34:18, de cossa che podemo esser sicuri?
4 Anca se qualchedun te ga fato sofrir, te pol esser sicuro che Geovà el te ama e che te sì tanto pressioso par lu. La Bìblia la dise che “Geovà l’è darente de quei che i ga el cuor pien de tristessa”. (Ledi Salmo 34:18. b) E se te sì ‘desanimà’, ricòrdate che Geovà el ga visto bone qualità in ti e che l’è stà lu che el ga volesto esser to amigo. (Gio. 6:44) Geovà l’è sempre pronto par giutarte parché el te vol tanto ben.
5. Cossa che podemo imparar de come Gesù el tratea quei che i era drio sofrir?
5 La personalità de Gesù la ze pròpio compagna a de so Pare. (Gio. 14:9) Par quela, quando pensemo nel esémpio de Gesù, podemo imparar tanto sora quel che Geovà el sente. Intanto che l’era qua nela Tera, Gesù l’era atento e el tratea con tanta bontà a quei che i era drio sofrir. (Mat. 9:9-12) Par esémpio, quando una dona la ga tocà la so roba par esser curada de una bruta malatia, Gesù la ga consolada e la ga lodada par la so fede. (Mar. 5:25-34) Cossita, te pol esser sicuro che te sì pressioso par Geovà e che lu l’è atento ale to bone qualità, come la to fede e amor par lu.
6. Cossa che te pol far se ancora te senti che no te ghè mia valor?
6 Ma cossa che te pol far se ancora te senti che no te ghè mia valor? Ledi testi dela Bìblia che i mostra che te sì pressioso par Geovà e pensaghe sora questi testi. c (Sal. 94:19) E se no te sì bon de far tuto quel che i altri i fà par Geovà o tuto quel che te volei, no stà pensar sol sora quel che no te pol far. Invesse, ricòrdate che Geovà el resta contento con quel che ti te sì bon de far par lu. (Sal. 103:13, 14) Se qualchedun te ga tratà mal, te ga dito su o se te sì stà violentà, no stà mai pensar che l’è stà colpa toa o che te meritei esser tratà cossita. Ricòrdate che Geovà el ndarà giulgar quei che i ga tratà mal i altri, e no quei che i ga sofrio. (1 Pie. 3:12) Sandra la ze stata maltratada quando la era picinina. Ela la ga dito: “Mi sempre domando che Geovà el me giute a veder le qualità che lu el vede in mi.”
7. Come che te pol doperar quel che te ghè sofrio par giutar i altri?
7 Ricòrdate anca che Geovà el pol doperarte par giutar i altri. Noantri ghemo la alegria de laorar insieme de lu nela predicassion. (1 Cor. 3:9) E tuto quel che te ghè sofrio pol giutarte a capir come che le persone le se sente. Alora, sìpia sicuro che te pol giutarle pròpio tanto. Helen la ga ricevesto aiuto quando la era drio sofrir. Adesso ela la serve come pioniera regolar e la ze contenta de giutar i altri. Helen la la ga dito: “Mi pensea che ero poco gnente, ma Geovà el me ga mostrà el so amor e el me ga doperà par giutar i altri.”
GEOVÀ EL VOL CHE ACETEMO EL SO PERDON
8. Cossa che Geovà el ne dise in Isaia 1:18?
8 Tanti servi de Geovà ancoi i resta desanimadi par causa dei sbali che i ga fato. Arquanti i se sente in colpa par causa dei sbali che i ga fato ancora vanti de batesarse. Ma ghemo de ricordarse che Geovà el ga mandà Gesù par dar la so vita par noantri parché el ne ama tanto. Geovà el vol che acetemo questo bel presente. Podemo esser sicuri che dopo che ‘ghemo metesto a posto le robe’ d intrà noantri e Geovà, lu el ne perdona del tuto. (Ledi Isaia 1:18. e) L’è tanto bel saver che lu no’l se ricorda dei nostri sbali del passà, ma che ghe piase tanto ricordarse dele bele robe che ghemo fato. — Sal. 103:9, 12; Ebr. 6:10.
9. Parché che ghemo de pensar in quel che podemo far de adesso avanti invesse de pensar nel passà?
9 Se te sì desanimà par causa dei sbali che te ghè fato nel passà, sfòrsate de pensar in quel che te pol far de adesso avanti. Pensa sora el esémpio del apòstolo Paolo. Sicuro che lu el se ciamea gramo de gaver perseghio i dissìpoli de Gesù. Ma lu el savea che Geovà lo gavea perdonà. (1 Tim. 1:12-15) Sarà che el seitea a pensar in quel che el gavea fato? Sicuro che lu no’l pensea nel onor che el gavea quando l’era un fariseo gnanca nei sbali che el gavea fato. (Fil. 3:4-8, 13-15) Invesse, Paolo el se sforsea de far el so meio nela predicassion e de star atento a quel che el podaria far pi avanti. Compagno a Paolo, no podemo cambiar quel che ghemo belche fato, ma podemo far el nostro meio a Geovà ancoi e esser premosi de veder le bele promesse che lu el ga fato realisarse.
10. Cossa che te pol far se te ghè fato qualchedun sofrir?
10 Pol esser che te sì disgustà parché te ghè fato qualchedun sofrir. Alora cossa che te pol far? Proa domandar scusa e ‘meter a posto le robe intrà de valtri’. (2 Cor. 7:11) Domanda che Geovà el giute la persona che la ga sofrio par causa de ti. Lu el pol giutarve a gaver pace nantra volta.
11. Cossa che imparemo de quel che ga sucedesto col profeta Giona? (Varda anca la ilustrassion.)
11 Varda quel che ga sucedesto col profeta Giona. Quando Geovà ghe ga dito de ndar a Nìnive, Giona el ga scampà par nantra banda. Geovà lo ga dissiplinà, e lu el ga imparà del so sbàlio. (Giona 1:1-4, 15-17; 2:7-10) Geovà el ga seità a doperar Giona come el so profeta. E nela seconda volta che Geovà el ga domandà che Giona el fusse par Nìnive, lu el ghe ga obedio. Giona no’l ga mia assà che el so sbàlio lo intrighesse de seitar a servir a Geovà. (Giona 3:1-3) Cossa che imparemo? Ghemo de imparar coi nostri sbali e assar che Geovà el seite a doperarne come lu el vol.
Dopo che el profeta Giona el ga infrontà una bruta situassion rento el grando pesse, Geovà el ghe ga domandà nantra volta de ndar a Nìnive par parlar quel che el ghe gavea dito (Varda el paràgrafo 11.)
GEOVÀ EL NE CONSOLA PAR MESO DEL SO SPÌRITO SANTO
12. Come che Geovà el pol darne pace quando semo drio infrontar un bruto colpo? (Filipensi 4:6, 7)
12 Par meso del so spìrito santo, Geovà el ne consola quando semo drio infrontar bruti colpi. Varda el esémpio de Ron e Carol. Dopo che el so caro fiol el se ga copà, lori i ga dito: “Ghemo infrontà bruti colpi nela vita, ma quel che ga sucedesto col nostro fiol l’è stà el pedo. In tante note, no èrino mia boni de dormir. Alora, ghemo pregà tanto e ghemo sentio la pace che la Bìblia la dise in Filipensi 4:6, 7.” (Ledi. f) Se anca ti te sì drio infrontar bruti colpi e te ghè el to cuor spacà, contaghe a Geovà quel che te sì drio sentir. Parla con lu sempre che te ocore e par el tempo che te vol. (Sal. 86:3; 88:1) Seita a domandar spìrito santo a Geovà, e sìpia sicuro che el ndarà sempre giutarte. — Luc. 11:9-13.
13. Come che el spìrito santo pol giutarte a seitar leal a Geovà? (Efesi 3:16)
13 Sito drio infrontar un bruto colpo e te par che no te ghè forsa de ndar avanti? Alora, el spìrito santo el pol darte la forsa che te ocore par seitar leal a Geovà. (Ledi Efesi 3:16. g) Varda quel che ga sucedesto con una sorela de nome Flora. Ela e so omo i era drio servir come missionari quando lu la ga tradia, e lori i se ga divorsià. Ela la ga dito: “Son restada pròpio disgustada con quel che lu el me ga fato e no ero bona de pensar in nantra roba. Alora, go pregà che Geovà el me desse spìrito santo par esser bona de perseverar. Pensea che no saria bona de dàrghene fora con quela situassion. Ma Geovà el me ga dato pròpio quel che me ocorea.” Geovà el ga giutà Flora a fidarse ancora de pi in lu, e ela la ze sicura che lu sempre el ndarà giutarla a infrontar qualche dificoltà. Ela la ga dito: “Quel che dise in Salmo 119:32 spiega ben come che Geovà el me ga giutà: ‘Farò presto in obedir i to comandamenti, parché te verdi un posto par questo nel me cuor.’”
14. Come che podemo ricever de pi spìrito santo?
14 Cossa che te pol far dopo de domandar spìrito santo a Geovà? Sfòrsate de far robe che ndarà giutarte a ricever de pi spìrito santo. Par esémpio, ndar ale riunion e ala predicassion coi fradei e sorele. Te pol anca sforsarte de leder la Bìblia tuti i giorni par esser bon de capir come che Geovà el pensa. (Fil. 4:8, 9) Intanto che te ledi la Bìblia, stà atento a servi fedeli del passà che i ga infrontà dificoltà e come che Geovà li ga giutadi. Sandra, che ghemo parlà prima, la ga infrontà bruti colpi. Ela la ga dito: “La stòria de Giusepe del Egito me incoraia tanto. Anca con tante dificoltà, lu no’l ga assà che i problemi intrighesse la so amicìssia con Geovà.” — Gén. 39:21-23.
GEOVÀ EL DOPERA I FRADEI PAR CONSOLARNE
15. De chi che podemo ricever consolo, e come che i pol giutarne? (Varda anca el ritrato.)
15 Quando semo drio infrontar un bruto colpo, i fradei i pol esser una “fonte de grando consolo”. (Col. 4:11) Par meso de quel che lori i fà, te podarè sentir pròpio el amor de Geovà par ti. Cossa che i fradei i pol far? Lori i pol scoltarte con atension e seitar dela to banda. Lori anca i pol lederte un testo dela Bìblia o pregar insieme a ti. h (Rom. 15:4) Dele volte, un fradel o una sorela i pol ricordarte de come Geovà el pensa e giutarte a restar pi calmo. Cossita, te sarè bon de ndar avanti. Lori anca i pol far dele robe par ti, come par esémpio, pareciarte un magnar par mostrar che i te vol ben.
Boni amighi che se fidemo e che i ama a Geovà i pol darne tanto consolo e aiuto (Varda el paràgrafo 15.)
16. Cossa che ghemo de far par ricever aiuto dei altri?
16 Ma par ricever aiuto dei altri, pol esser che te gavarè de domandarghelo. I to fradei e le to sorele i te ama tanto e i vol giutarte. (Pro. 17:17) Ma lori no i sa mia quel che te senti o quel che te ghè de bisogno. (Pro. 14:10) Alora, se te sì drio sofrir, proa dir a un caro amigo quel che te sì drio sentir e dighe come che el pol giutarte. Te pol anca dir a un o due ansiani che i ze boni amighi par ti. Arquante sorele fursi le volerà discorer con una brava sorela.
17. (a) Cossa che fursi ne toca far par ricever aiuto dei altri? (b) Cossa che arquanti i ga fato par dàrghene fora con questi bruti sentimenti?
17 Pol esser che, par causa dei to sentimenti, no te ghè voia de star insieme dei altri. E dele volte, i to cari fradei fursi no i ze boni de capirte o i pol dir qualcossa che ndarà disgustarte. (Tia. 3:2) Ma no stà assar che queste robe le te fae restar distanti dei to fradei e sorele, parché Geovà li dopera par incoraiarte. Cossa che arquanti i ga fato par dàrghene fora con questi sentimenti? Varda due esempi. Gavin, un ansiano che el ga depression, el ga dito: “Dele volte, la ùltima roba che mi vui la ze restar insieme dei me amighi.” Ancora cossita, Gavin el seita a sforsarse par restar insieme dei so fradei e el se sente tanto meio dopo. Una sorela de nome Amy la ga dito: “Par causa de arquante robe che ga sucedesto, fao fadiga fidarme nei altri. Ma son drio imparar a amar e a fidarme nei me fradei e sorele compagno a Geovà. Mi sò che Geovà el resta contento con mi. Par quela, anca mi resto contenta.”
LE PROMESSE DE GEOVÀ PAR EL FUTURO LE NE CONSOLA
18. Cossa che sucederà nel futuro, e cossa ghemo de far adesso?
18 Semo sicuri che nel futuro, Geovà el ndarà finir fora con tuto quel che ne fà sofrir. (Apo. 21:3, 4) Cossita, tute le brute robe che ghemo infrontà no le ‘sarà ricordade gnanca le tornarà al cuor’. (Isa. 65:17) Come ghemo visto, Geovà el ‘cura le nostre feride’ belche adesso. Alora, dopera tuto quel che Geovà el te dà par consolarte e giutarte. E sìpia sicuro che lu sempre ‘el ndarà tender de ti’. — 1 Pie. 5:7.
CÀNTICO 7 Geovà, nostra forsa e poder
a Arquanti nomi i ze stati cambiadi.
b (Salmo 34:18) Geovà l’è darente de quei che i ga el cuor pien de tristessa. Lu el salva quei che i ze desanimadi.
c Varda el quadro “ Ti te ghè tanto valor par Geovà”.
d Par ‘meter a posto le robe’ con Geovà, ghemo de mostrar che se ghemo pròpio ciamà grami. Par quela, ghemo de domandar perdon a Geovà par i nostri sbali e assar de far quel che l’è sbalià. Ma se ghemo fato un bruto pecato, ghemo anca de domandar el aiuto dei ansiani dela congregassion. — Tia. 5:14, 15.
e (Isaia 1:18) Geovà el dise: “Alora, vegné e ndemo meter tuto a posto intrà de noantri. Anca se i vostri pecati i ze come un pano rosso, i deventarà bianchi come la neve. Anca se i ze come una pessa de roba rosso scuro, i deventarà bianchi come la lana.
f (Filipensi 4:6, 7) No sté preocuparve de gnente, ma domandé el aiuto de Dio in tute le cose par meso de orassion e sùpliche, insieme a ringrassiamento. 7 E la pace de Dio, che la ze pi granda de quel che podemo capir, la protegerà el vostro cuor e la vostra mente par meso de Cristo Gesù.
g (Efesi 3:16) Mi prego che lu, par via dela So granda glòria, el ve asse pi forte in quel che sì par rento, col poder del so spìrito.
