1. Parché che ghemo de ringrassiar a Geovà che el ne giuta a gaver fede?

LA FEDE la ze una qualità che la ga tanto valor, sol che gnanca tuti i ga questa qualità. (2 Tes. 3:2) Ma Geovà el dà a cada un dei so servi una quantità de fede. (Rom. 12:3; Gàl. 5:22) Volemo sempre ringrassiar a Geovà che el ne giuta a gaver questa qualità.

2, 3. (a) Che benedission le persone che le ga fede le pol ricever? (b) Che domande ndaremo risponder in questo stùdio?

² Par meso de Gesù, Geovà el fà le persone de cuor sinsiero vegner fin lu. (Gioani 6:44, 65) E, quando queste persone le scomìnsia a gaver fede in Gesù, le pol gaver el perdon dei so pecati. Questo el fà che le persone le sìpie amighe de Dio par sempre. (Rom. 6:23) Sol podemo gaver questa benedission par causa de Geovà. Par causa del pecato, gavarìssino la condana dela morte. (Sal. 103:10) Ma Geovà el ga visto che semo boni de far robe bone. Par causa dela so granda bontà el ga fato che le bone notìssie le rivesse fin al nostro cuor. Alora, ghemo scominsià a dimostrar fede in Gesù e a gaver speransa de viver par sempre. — Ledi 1 Gioani 4:9, 10.

³ Ma cossa zela la fede? L’è sol saver dele promesse de Dio? E, pi importante ancora, come che podemo dimostrar che ghemo fede?

4. Parché che ghemo de gaver fede nel cuor e nò sol saver quel che Dio el va far nel futuro?

⁴ Gaver fede l’è de pi che saver quel che Dio el va far nel futuro. La fede la ze una forsa poderosa che fà la persona voler far la volontà de Dio. Ghemo de gaver la fede nel cuor. Ela la fà anca la persona voler insegnar le bone notìssie ai altri. El apòstolo Paolo el ga dito: “Parché se cola boca ti te disi publicamente che Gesù l’è Signor e col cuor ti te ghè fede che l’è stà ressussità dei morti, ti te sarè salvo. Parché col cuor se ga fede par esser consideradi giusti, ma cola boca se fà declarassion pùblica par la salvassion.” — Rom. 10:9, 10; 2 Cor. 4:13.

5. Parché che l’è importante gaver fede? (b) Come che la fede la pol someiarse a una pianta?

⁵ L’è ciaro che se volemo gaver la vita eterna nel novo mondo de Dio, ghemo de gaver una forte fede. La fede la ze come una pianta. Una pianta la ghe ocore de àqua. La pianta la pol esser fiapa o morbia de acordo de come la ze tendesta. Se no la ga la àqua che la ga de bisogno, una pianta che la era sana la pol fin morir. Dela stessa maniera, se no tendemo dela nostra fede, la va restar fiapa e dopo la more. (Luc. 22:32; Ebr. 3:12) Noantri ghemo de far la nostra parte parché la nostra fede la seite a esser ‘cada volta pi granda’, cossita restaremo “sani nela fede”. — 2 Tes. 1:3; Tito 2:2.

6. De acordo con Ebrei 11:1, che due robe gala la fede?

⁶ La Bìblia la dise cossa che la ze la fede in Ebrei 11:1. (Ledi.) De acordo con questo testo la fede la ga due robe che no se pol mia vederle: (1) “quel che se speta” e (2) ‘le robe che le ze vere che no se le vede’. “Quel che se speta” pol esser le robe che Dio el ga prometesto par el futuro, ma che gnancora no le ga sucedesto, come el fin dele persone rugne e el novo mondo. Le ‘robe che le ze vere che no se le vede’ le ze robe o persone che no se le vede ma che le esiste, come Geovà, Gesù, i àngeli e el Regno nel cielo. (Ebr. 11:3) Anca se no podemo veder queste “robe”, ghemo “prove sicure” che le esiste. El verbo greco tradusio “prova sicura” in Ebrei 11:1 el pol esser anca tradusio “ciara dimostrassion”. Come che mostremo che ghemo una vera speransa e che credemo nele robe che no vedemo che parla la Bìblia? Par meso de quel che femo e disemo. Sensa questo la nostra fede no la saria completa.

7. Come che el esémpio de Noè el ne giuta a capir cossa che ghe vol dir gaver fede? (Vedi la stampa nel scomìnsio del stùdio.)

⁷ Ebrei 11:7 el parla dela fede che Noè el ga dimostrà. Paolo el ga dito che Noè, “dopo de gaver ricevesto aviso de Dio dele robe che ancora no se le vedea, el ga bio tanto rispeto par Dio e el ga fato su una arca par la salvassion dela so fameia”. Noè el ga dimostrà fede parché el ga fato una granda arca. Sicuro che i visigni i ghe ga domandà a Noè parché che l’era drio far tuto quel laoro. Te pol imaginar Noè sensa parlar gnente o dirghe ale persone che lore le tendesse dela so vita? Sicuro che nò! Par causa dela so fede, lu el ga predicà con coraio a quele persone e el ghe ga dito che Dio el ndaria finir fora con tuto par meso del Dilùvio. Pol esser che lu el ghe gàpia dito quel che Geovà el ghe gavea dito: “Mi go dessidio finir fora tute le persone, parché la tera la ze piena de violensa par causa de lori. . . . Mi vao mandar un dilùvio de àque par finir fora tute le creature soto i cieli che le ga el fià dela vita. Tuto quel che ghen’è sora la tera ndarà morir.” Anca, sicuro che el ghe ga dito ale persone che sol le ndaria salvarse se le ndesse rento nela arca, come Dio lo gavea mandà. Cossita, Noè el ga dimostrà che el gavea fede parché l’era un “predicador dela giustìssia”. — Gén. 6:13, 17, 18; 2 Pie. 2:5.

8. Cossa che Tiago el ga parlà sora la vera fede?

⁸ Anca Tiago el ga parlà dela fede. Fursi lu el ga scrito la so carta poco dopo de Paolo scriver la so carta ai ebrei. E, come Paolo, Tiago el ga spiegà che la vera fede l’è de pi che sol creder, ma ghe vol dir far qualcossa. Lu el ga scrito: “Mostrame la to fede sensa òpere, e mi te mostrarò la me fede par meso dele me òpere.” (Tia. 2:18) Par assar ben ciaro la difarensa intrà sol creder in qualcossa e dimostrar fede, Tiago el ga dito quel che sucede coi demoni. Lori i crede che Dio el esiste ma sarà che i ga la vera fede? Sicuro che nò. Invesse, lori i fà de tuto parché le promesse de Dio no le se realise. (Tia. 2:19, 20) Dopo, Tiago el ga fato una comparassion col esémpio de Abraon: “No l’è mia vera che el nostro Pare Abraon l’è stà dechiarà giusto par via dele so òpere dopo che lu el ga oferessesto so fiol Isache nel altar? L’è sicuro che Abraon el ga dimostrà la so fede cole so òpere e, par via dele so òpere, la so fede la ze deventada completa.” Alora, par mostrar che la fede sensa òpere no la val gnente, Tiago el ga dito: “Come che un corpo sensa spìrito l’è morto, cossita anca la fede sensa òpere la ze morta.” — Tia. 2:21-23, 26.

9, 10. Come che el apòstolo Gioani el ne giuta a capir che l’è importante dimostrar fede?

⁹ De pi de 30 ani dopo, el apòstolo Gioani el ga scrito el so Vangelo e tre carte. Cossita come altri che i ga scrito parte dela Bìblia, lu el capia cossa che volea dir la vera fede. Gioani el ga doperà el verbo greco, che dele volte l’è tradusio “dimostrar fede”, de pi de qualche altro scritor dela Bìblia.

¹⁰ Par esémpio, Gioani el ga spiegà: “Quel che el dimostra fede nel Fiol el riceve vita eterna. Quel che el desobedisse al Fiol no’l gavarà vita, ma la ràbia de Dio la restarà sora lu.” (Gioani 3:36) La vera fede la ghe vol dir obedir ai comandamenti de Gesù. Nel Vangelo de Gioani, Gesù el ga dito arquante volte che ghemo bisogno de dimostrar fede. Le parole de Gesù le ne fà capir che ghemo de seitar a “dimostrar fede”. — Gioani 3:16; 6:29, 40; 11:25, 26; 14:1, 12.

11. Come che podemo dimostrar che semo grati de gaver imparà la verità?

¹¹ Restemo tanto contenti de Geovà gaver doperà el so spìrito santo par gaverne giutà imparar la verità e par giutarne a gaver fede nele bone notìssie. (Ledi Luca 10:21.) L’è importante sempre ringrassiar a Geovà de assarne rivar darente a lu par meso de Gesù, “el Lìder Prinsipal e quel che el fà la nostra fede completa”. (Ebr. 12:2) Come che podemo dimostrar che semo grati par questa granda bontà de Geovà? Ghemo de far pi forte la nostra fede par meso dela orassion e del stùdio dela Parola de Dio. — Efe. 6:18; 1 Pie. 2:2.

12. Come che dimostremo che ghemo fede?

¹² Quel che femo el ga de assar ciaro che ghemo fede nele promesse de Geovà. Par esémpio, seitemo a predicar el Regno de Dio e anca giutemo nel laoro de far dissìpoli. Anca, seitemo a far “quel che l’è bon par tuti, ma de maniera spessial a quei che par meso dela fede i ze nostri fradei e sorele”. (Gàl. 6:10) E ghemo de far sforso par ‘cavarse via la vècia personalità cole so pràtiche’, e far de pi che podemo par mantegner la nostra amicìssia con Geovà. — Col. 3:5, 8-10.

13. (a) Quanto importante elo gaver “fede in Dio”? (b) Come che la Bìblia la parla dela fede? Parché?

¹³ La Bìblia la dise che “sensa fede no se pol contentar a Dio. Parché quei che i riva darente de lu i ga de creder che lu el esiste e che el ricompensa quei che fà sforso par ndar in serca de lu.” (Ebr. 11:6) La Bìblia la parla dela “fede in Dio” come parte del nostro “fondamento” come seghidori de Cristo. Sensa fede una persona no la pol deventar e seitar a esser un vero seghidor de Cristo. (Ebr. 6:1) I seghidori de Cristo i ga de dontar ala fede altre qualità importante ‘par mantegnerse nel amor de Dio’. — Ledi 2 Piero 1:5-7; Giuda 20, 21.

14, 15. Parché che gaver amor l’è pi importante che sol gaver fede?

¹⁴ Quei che i ga scrito la Bìblia i ga parlà tante volte sora la fede mostrando che questa qualità la ze tanto importante. Sol la fede la ze stata mensionada tante volte cossita. Sarà che la fede la ze la qualità pi importante che un seghidor de Cristo el ga de ver?

¹⁵ Comparando la fede col amor, Paolo el ga scrito: “Se go tuta la fede fin mover montagne ma no go amor, mi no son gnente.” (1 Cor. 13:2) Quando i ghe ga domandà a Gesù qual che l’era el pi grando comandamento dela Lege, lu el ga dito che l’era amar a Dio. (Mat. 22:35-40) El amor l’è una qualità che el ga tante altre qualità importante insieme, come la fede. La Bìblia la dise che “el amor . . . el crede in tute le robe”. Alora, el amor el ne giuta a gaver fede nele robe che Dio el ga dito nela so Parola, la Bìblia. — 1 Cor. 13:4, 7.

16, 17. (a) La fede e el amor i ze mensionadi tante volte insieme nela Bìblia. Mensiona esempi. (b) Quale de queste qualità la ze la pi importante? Parché?

¹⁶ La fede e el amor le ze qualità tanto importante. Nela Bìblia, queste due qualità le ze mensionade tante volte insieme. Par esémpio, Paolo el ghe ga dito ai seghidori de Cristo che i doperesse “la corassa dela fede e del amor”. (1 Tes. 5:8) Parlando de Gesù, Piero el ga scrito: “Anca se valtri no lo gavé mai visto, valtri lo amé. Anca se valtri no lo vedé adesso, gavé fede in lu.” (1 Pie. 1:8) Tiago el ghe ga domandà ai so fradei untadi: “No l’è vera che Dio el ga scoliesto quei che i ze poareti par el mondo parché i sìpie siori nela fede e i riceva el Regno che lu el ga prometesto a quei che lo ama?” (Tia. 2:5) Gioani el ga scrito che ‘el comandamento de Dio l’è che ghemo de ver fede nel nome del so Fiol, Gesù Cristo, e che ghemo de amarse un al altro’. — 1 Gioani 3:23.

¹⁷ Ghemo visto che la fede la ze tanto importante. Ma ghen’è serte robe dela fede che le ndarà finirse. Come cossita? Nel futuro, no gavaremo pi bisogno de gaver fede nele promesse de Dio parché le se gavarà belche realisà. Ma el amor el ghen sarà par sempre, parché sempre ndaremo amar a Dio e ai nostri fradei. Par quela, Paolo el ga scrito: “Ma adesso le resta queste tre robe: la fede, la speransa e el amor. Sol che el pi importante l’è el amor.” — 1 Cor. 13:13.

18, 19. (a) Come che el pòpolo de Geovà el dimostra che el ga fede nel Regno de Dio? (b) Chi che ga el mèrito del paradiso spiritual?

¹⁸ Ancoi, el pòpolo de Geovà el dimostra che el ga fede nel Regno de Dio. De pi de 8 milioni de persone le vive in pace e union come se le fusse belche nel Paradiso, parché le dimostra le qualità del spìrito de Dio. (Gàl. 5:22, 23) L’è questo che ciamemo de paradiso spiritual. L’è maraveioso de veder quel che la vera fede e el amor i ze boni de far!

¹⁹ Chi che ga el mèrito de questo? Qualche umano? Nò. Ghemo questo paradiso spiritual sol par causa de Dio. Questo el dà “onor a Dio” e el “sarà un segnal eterno, che no’l se finirà mai”. (Isa. 55:13) Geovà el vol la nostra salvassion par meso dela fede, e semo tanto grati par questo presente de Dio. (Efe. 2:8) El nostro paradiso spiritual el seitarà esser cada volta pi grando e pi bel, fin che tuta la tera la sìpia piena de persone perfete, giuste e felice, e lodando par sempre par Geovà. Alora, seitemo a dimostrar che ghemo fede nele promesse de Geovà!