La sùplica par la giustìssia la sarà scoltada?
La ingiustìssia la ze in tuto el mondo. Varda due esempi de ingiustìssia nel sistema criminal:
Nei Stati Unidi un omo l’è stà metesto in preson sensa gaver fato gnente e l’è stà là par 38 ani. In genaro de 2018 un giuis lo ga molà dopo che un esame de DNA ga provà che lu no’l gavea colpa de gnente.
In setembre de 1994, tre gióveni de un paese dela Àfrica i ze stati metesti in preson parché no i ga volesto ndar al esèrsito par via dela so cossiensa. In setembre de 2020, fea belche 26 ani che i era in preson, ma mai i ze stati acusadi davanti un tribunal.
Se te ghè belche sofrio ingiustìssia, fursi te te senti come Giò, che el ga dito: ‘Domando aiuto ma no ghen’è giustìssia.’ (Giò 19:7) Anca se someia un sogno viver nte un mondo giusto, la Bìblia la promete che vegnarà el giorno ndove tuti gavaremo la vera giustìssia. Anca, quel che la Bìblia la dise pol giutarte a darghene fora cola ingiustìssia de ancoi.
Parché che ghen’è ingiustìssia?
La ingiustìssia la vien par via de quei che no i vol seghir le orientassion de Dio. La Bìblia la mostra che la vera giustìssia la vien de Dio. (Isaia 51:4) Nela Bìblia la parola “giustìssia” la ga de veder cola parola “integrità”, o sia, far quel che l’è giusto. (Salmo 33:5) Quando le persone le fà quel che l’è giusto de acordo con quel che Dio el pensa, lore le trata i altri con giustìssia. Invesse, la ingiustìssia la vien del pecato, o sia, dela desobediensa ale lege e ai giusti prinsipi de Dio. Varda arquanti esempi:
Egoismo. Le voie egoiste le ga una forte ligassion col pecato. (Tiago 1:14, 15) Tanti i trata i altri de maniera ingiusta par gaver benefissi e par esser boni de gaver quel che i vol. Ma invesse, Dio el vol che metemo in primo posto i interessi dei altri. — 1 Corinti 10:24.
No cognosser quel che l’è giusto. Arquanti i trata i altri de maniera ingiusta sensa nicorderse, ma, par Dio anca questo l’è un pecato. (Romani 10:3) In verità, no cognosser quel che l’è giusto l’è stà la causa de una dele pi grande ingiustìssie del mondo — la morte de Gesù Cristo. — Ati 3:15, 17.
I sistemi che i òmini i ga fato no i funsiona. I sistemi polìtichi, comersiai e religiosi del mondo i gavaria de giutar tute le persone a gaver i medèsimi diriti e giustìssia. Sol che in verità questi sistemi i ze pieni de sbali, corussion, preconceto, ganànsia, difarense intrà siori e poareti e opression. Par via de tute queste cose ghen’è la ingiustìssia. L’è vera che arquante persone che le apoia questi sistemi le ga bone intension. Ma se no i fà quel che Dio el dise, tuto el so sforso l’è par gnente. — Eclesiasti 8:9; Geremia 10:23.
Cossa che Dio el pensa dela ingiustìssia?
Dio el òdia la ingiustìssia e tute le robe che la ingiustìssia la causa. (Proverbi 6:16-18) Lu el ga ispirà el profeta Isaia a scriver: ‘Mi, Geovà, a amo la giustìssia. Go òdio del ciavar e dela ingiustìssia.’ — Isaia 61:8.
La lege che Dio el ga dato ai israeliti nel passà la mostrea che lu el volea che el so pòpolo el fusse giusto. Lu el ga ordinà che i giuisi no i acetasse presenti e altre robe che i podesse rovinar la giustìssia. (Deuteronómio 16:18-20) Dio el ga condanà i israeliti che i ga desobedio ale so òrdine e che i volea benefissiarse dei poareti e dei ùmili, e par fin, el ga rigetà questi israeliti parché no i ga seghio i So prinsipi e le So lege. — Isaia 10:1-3.
Dio el ndarà finir fora cola ingiustìssia?
Si. Par meso de Gesù Cristo, Dio el ndarà finir fora col pecato, che l’è la causa dela ingiustìssia, e Dio farà i umani deventar perfeti come che lu el ga sempre volesto. (Gioani 1:29; Romani 6:23) Dio anca el ga stabilio un Regno che el portarà un novo mondo giusto ndove che tuti i sarà tratadi con giustìssia. (Isaia 32:1; 2 Piero 3:13) Par saver de pi sora questo Regno nel cielo, varda el vìdeo Cossa che l’è el Regno de Dio?
Come che sarà la vita in questo novo mondo giusto?
Quando gavarà la giustìssia nela tera, tute le persone le gavarà pace e seguransa. (Isaia 32:16-18) Par Dio tute le persone le ga el medèsimo valor, par quela, tuti i sarà tratadi compagni. Tuta la tristessa, el dolor e el piander causadi par la ingiustìssia no i ghen sarà pi, e no gavaremo pi le brute ricordassion dele ingiustìssie che ghemo sofrio nel passà. (Isaia 65:17; Apocalisse 21:3, 4) Par saver de pi, varda el artìcolo “O que o Reino de Deus vai fazer no futuro?”
Podemo fidarse nela promessa de Dio de finir fora cola ingiustìssia?
Si. L’è stà belche provà che le professie dela Bìblia le ze de fidarse, che la Bìblia la ze de acordo cola stòria e cola siensa e che tute le so parte le ze de acordo una col altra. Tuto questo el mostra che podemo fidarse nele so promesse. Par saver de pi sora parché podemo fidarse nela Bìblia, varda i artìcoli:
Ghemo de lotar adesso contra la ingiustìssia?
Nei tempi bìblichi, persone bone le ga fato quel che le ga podesto par no esser tratade de maniera ingiusta. Par esémpio, una volta el apòstolo Paolo l’è stà quasi menà a un giulgamento ingiusto ndove el podaria esser morto. Invesse de acetar questa ingiustìssia, Paolo el ga doperà le lege de quel tempo e el ga apelà par Cèsar. — Ati 25:8-12.
Ma no vol dir quel che le persone le fà, lore mai le ndarà finir con tuta la ingiustìssia nel mondo. (Eclesiasti 1:15) Ancora cossita, tante persone le ze bone de dàrghene fora col sofrimento causà par la ingiustìssia e gaver pace, parché le ga fede nela promessa de Dio de portar un novo mondo giusto.
a Geovà l’è el nome de Dio. — Salmo 83:18.
Te piaserà de veder anca questo
DOMANDE CHE LA BÌBLIA LA RISPONDE
Cossa che l’è pecato?
Sarà che un pecato el pol esser pedo del altro?
