Nela Bìblia, la parola tradusida come “ressuression” la vien dela parola greca anàstasis, che la vol dir “levar su”, o “restar in pié nantra volta”. Quando una persona la ze ressussitada, ela la leva su dei morti e la torna a esser la persona che la era vanti. — 1 Corinti 15:12, 13.

 No catemo la parola “ressuression” nele Scriture Ebraiche, anca ciamade de Vècio Testamento. Ma la promessa dela ressuression la ze lì. Par esémpio, par meso del profeta Osea, Dio el ga prometesto: “Del poder del sepolcro mi vao libertarli; dela morte mi vao risgatarli.” — Osea 13:14; Giò 14:13-15; Isaia 26:19; Daniel 12:2, 13.

 Ndove le persone le sarà ressussitade? Arquante persone le sarà ressussitade par viver ntel cielo e governar come rè insieme a Gesù. (2 Corinti 5:1; Apocalisse 5:9, 10) Nela Bìblia, questa la ze ciamada “prima ressuression” e “la ressuression che la vegnarà vanti”. Alora se pol capir che ghen sarà nantra ressuression dopo. (Apocalisse 20:6; Filipensi 3:11) Questa altra ressuression, che la pi granda parte dele persone le gavarà, la sarà par viver qua ntela tera. — Salmo 37:29.

 Come le persone le sarà ressussitade? Dio el ga dato a Gesù el poder par levar su i morti. (Gioani 11:25) Gesù el darà la vita nantra volta “a tuti quei che i ze ntele tombe memoriai”, cada un cola so personalità e cole so memòrie. (Gioani 5:28, 29) Quei che i sarà ressussitadi par viver ntel cielo i riceverà un corpo spiritual, e quei che i sarà ressussitadi par viver ntela tera i ndarà ricever un corpo fìsico, novo e con salute. — Isaia 33:24; 35:5, 6; 1 Corinti 15:42-44, 50.

 Chi che sarà ressussità? La Bìblia la dise “che ghen sarà una ressuression tanto dei giusti, come dei ingiusti.” (Ati 24:15) I “giusti” i ze quei che i ga fato la volontà de Dio, come Noè, Sara e Abraon. (Génesi 6:9; Ebrei 11:11; Tiago 2:21) I “ingiusti” i ze quei che no i ga mia obedio a Dio, parché no i ga bio la oportunità de cognosserlo.

 Ma arquante persone le ze tanto rugne che mai le va cambiar. Lore le more sensa la speransa de esser ressussitade. — Mateo 23:33; Ebrei 10:26, 27.

 Quando che sarà la ressuression? La Bìblia la dise che la ressuression nel cielo la ndaria suceder dopo de Gesù deventar rè nel cielo, che l’è stà nel ano 1914. (1 Corinti 15:21-23) La ressuression par viver ntela tera la ndarà suceder durante el Regno de Mila Ani de Gesù Cristo, quando la tera la deventarà un paradiso. — Luca 23:43; Apocalisse 20:6, 12, 13.

 Parché che podemo creder nela ressuression? La Bìblia la parla con detali de nove ressuression, che le ga sucedesto davanti de tante persone. (1 Rè 17:17-24; 2 Rè 4:32-37; 13:20, 21; Luca 7:11-17; 8:40-56; Gioani 11:38-44; Ati 9:36-42; 20:7-12; 1 Corinti 15:3-6) La ressuression de Làsaro la ze stata spessial parché fea belche quatro giorni che lu l’era morto e Gesù el ga fato questo miràcolo davanti de una mùcia de gente. (Gioani 11:39, 42) Fin i nemighi de Gesù i gavea de ricognosser quel che lu el gavea fato, tanto che i ga volesto copar Gesù e Làsaro. — Gioani 11:47, 53; 12:9-11.

 La Bìblia la mostra che Dio el pol e el vol dar nantra volta la vita a quei che i ze morti. Nela so memòria sensa fin, Dio el se ricorda de tuto sora cada persona che el ndarà ressussitar col so grando poder. (Giò 37:23; Mateo 10:30; Luca 20:37, 38) Dio el ga el poder de ressussitar i morti, e lu el vol farlo! Quando la parla dela ressuression che la vegnarà, la Bìblia la dise che Dio l’è ‘tanto premoso del laoro dele so man’. — Giò 14:15.

Idee sbaliade sora la ressuression

 Idea sbaliada: La ressuression la ze meter insieme nantra volta la ànima col corpo.

 Verità: La Bìblia la insegna che la ànima la ze la persona intiera, nò una parte de ela che la seita a viver dopo dela morte. (Génesi 2:7, nota; Ezechiel 18:4) Cossita, la ressuression no la ze mia meter nantra volta la ànima insieme col corpo, ma l’è crear la persona nantra volta.

 Idea sbaliada: Arquante persone le sarà ressussitade par esser destrute pena dopo.

 Verità: La Bìblia la dise che “quei che i ga praticà robe rugne” i riceverà “una ressuression de giulgamento”. (Gioani 5:29) Ma questo giulgamento el sarà de acordo con quel che lori i ndarà far dopo dela so ressuression, e nò vanti. Gesù el ga dito: “I morti i scoltarà la voce del Fiol de Dio, e quei che i ga dato atension i viverà.” (Gioani 5:25) Quei che i ‘dà atension’, o sia, quei che i obedisse ale robe che i impara dopo de esser ressussitadi, i gavarà i so nomi scriti nel “rolo dela vita”. — Apocalisse 20:12, 13.

 Idea sbaliada: La persona ressussitada la ndarà ricever el stesso corpo che la gavea vanti de morir.

 Verità: Dopo dela morte, el corpo de una persona el torna ala polver, o sia, el sparisse. — Eclesiasti 3:19, 20.