Nò, no le ze tute le religion che le mena a Dio. Ntela Bìblia ghen’è esempi de religion che le assa Dio disgustà. Podemo dir che ghen’è due tipi de queste religion.

El primo tipo l’è: religion che adora dèi falsi

 La Bìblia la dise che la adorassion a dèi falsi la ze “inùtile” e che ‘no la serve par gnente’. (Geremia 10:3-5; 16:19, 20) Geovà a Dio el ga dato questa òrdine ala antiga nassion de Israel: “No stà gaver altri dèi. Adora sol a mi.” (Ésodo 20:3, 23; 23:24) Quando i israeliti i ga adorà altri dèi, “Geovà l’è restà inrabià.” — Nùmeri 25:3; Levìtico 20:2; Giuisi 2:13, 14.

 Dio no’l ga cambià la so opinion sora adorar “quei che i ze ciamadi dèi”. (1 Corinti 8:5, 6; Gàlati 4:8) Lu el ga ordinà a tuti quei che i vol adorarlo che i se ferme de star insieme con quei che i fà parte dela religion falsa: “Ndé via de in meso de lori e separeve.” (2 Corinti 6:14-17) Se tute le religion le fusse bone e le menesse a Dio, parché che el ga dato questa òrdine?

El secondo tipo l’è: religion che adora el vero Dio de una maniera che no’l ghe piase

 Dele volte i israeliti i adorea a Dio doperando costumi e credense che i ga copià dela adorassion a dèi falsi. Ma Geovà el ga rigetà meter insieme la vera religion cola falsa. (Ésodo 32:8; Deuteronómio 12:2-4) Gesù el ga condanà i lìderi religiosi dei so giorni par via dela maniera come i adorea a Dio. Lori i volea mostrar che i era religiosi, ma i era ipòcriti e ‘no i badea i assunti pi importanti dela Lege, o sia, la giustìssia, la misericòrdia e la fidelità.’ — Mateo 23:23.

 Dela medèsima maniera ancoi, le persone sol le pol rivarse a Dio par meso de una religion che la insegna la verità. Questa verità la catemo ntela Bìblia. (Gioani 4:24; 17:17; 2 Timòteo 3:16, 17) Le religion che le insegna robe difarente de quel che la Bìblia la dise le fà le persone restar distante de Dio. Tanti dei insegnamenti che le persone le cata che i ze ntela Bìblia — come la trinità, la imortalità dela ànima e el sofrimento eterno ntel inferno — i ze vegnesti dela adorassion a dèi falsi. Questo tipo de adorassion l’è par gnente o sensa valor, parché el obedisse le tradission dele religion invesse dei comandamenti de Dio. — Marco 7:7, 8.

 Dio el ga òdio dela ipocrisia ntele religion. (Tito 1:16) Par giutar le persone a rivarse a Dio, una religion la ghe ocore gaver influensa ntele so dessision e in tuto quel che le fà, e nò sol obedir a costumi e tradission. Par esémpio, la Bìblia la dise: “Se qualchedun el cata che el adora a Dio ma no’l tende la so léngua, lu l’è drio imbroiar el so pròpio cuor e la so maniera de adorar no la val gnente. La religion che la ze pura e giusta par lu la ze: tender dei òrfani e dele védove nele so dificoltà e seitar distante dele robe sbaliade del mondo.” (Tiago 1:26, 27; note) L’è giusto che la Bìblia la dopere la spression “religion pura”, parché l’è questo tipo de adorassion che l’è sensa ipocrisia.