Silempwale ni Luka 10:1-42
10 Avinyaka, Apwiya aahaathanla arumeyi oopwaha 70 ni aahaarumiha eeli-eeli ohoolo wawe isidade sootheene ni mapuro owo eeraawe arowe muhoolo mwaya.
2 Nto Yesu aaweerela atthareli awe: “Soohepha sohaatta, nto anamuteko eri vakhaaniini. Tivanto, munvekele Mwaneene* ematta weera aaruuhe anamuteko akina.
3 Murowe! Kinnoorumihani ntoko iputtiputthi variyari va miitxi.
4 Muhikuxe musako wa musurukhu, naari murupa wa yootxa, naari isantaaliya, ni muhimuulumihe mutthu mmuseweni.
5 Nivaate nootheene muneeraanyu mphiye, muhime toko: ‘Okhale murettele vaate va.’
6 Nivaate nno wakhala weera ookhalavo nthamwene amurettele, murettele anyu okhale nuuwo. Menento aahikhalavo, murettele owo wootthikeleni.
7 Nto mukhale nivaate nno, mutxaaka ni nwuraka itthu munkelaanyu ovahiwaka. Woona weera ole onvara muteko onnaphwanela oliviwa. Muhimakeleke othaama-othaama.
8 “Opwaha mwa yeeyo, esidade eri yootheene munkelaanyu ophiya ni atthu owaakhelani, mutxeeke itthu muneeraanyu nvahiweke,
9 mwaalamiheke aretta eneera ekhale esidade eyo ni nweereleke atthu: ‘Omwene wa Muluku ori vakhiviru vanyu.’
10 Mene esidade eri poothe munkelaanyu ovolowa atthu ehinawaakhelani, mukhume ni murowe misewe sitokweene, mweeraka weera:
11 ‘Hiyo nnaatathe mpaka ntthupi nri mmanaanini mwahu na esidade anyu ela, weera nooheleleni onamoona weera nohoolaleerani. Mene musuweleke weera, Omwene wa Muluku ori vakhiviru.’
12 Mene miyo kinnooleelani weera, nihiku noothoriha, itthu sinkela okhumelela esidade ela sinkela okhala sootepa oxupa opwaha ele enkela weereya oSodoma.
13 “Ootakhaliwa ti nyuwo atthu oKorazini! Ni atthu oBetisaida! Mwaha wooweera, waari weera atthu oTiro ni oSidoni ahoona miiriira sipakinwe mmittettheni mwanyu, saano awo yaattharunwe khalayi ni ewanreene esaakho* ni ekilantheene vattuurani.
14 Tivawonto, nihiku noothoriha itthu sinkela okhumelela oKorazini ni oBetisaida, sinkela okhala sootepa oxupa opwaha oTiro ni oSidoni.
15 Neereke nyuwo atthu oKafarnawu, munimunnuwihiwa mpaka wiirimu? Nyuwo munkela wuulihihiwa muru.*
16 “Ole onwiiwani onnakiiwa miyo. Ni ole ohinoopwatthani, khankipwattha-tho miyo. Opwaha mwa yeeyo, ole ohinkipwattha miyo khanaapwattha-tho Ale ekirumme.”
17 Arummwa ale 70 yaatthika ehakalanleene yeeraka: “Pwiya, mwaha woovarela muteko nsina nanyu mpaka mademoniyu* ennaniiwelela.”
18 Nto mwaha wa yeeyo, Yesu aaweerela: “Kinnamoona Satana amoraka wiirimu ntoko etari.
19 Mukiiwe: Miyo kohoovahani owera woonyikala inowa ni awalisi, ni owina ikuru sootheene sa amwiittani anyu, ni khiyaavo etthu eneera yookumiherekeni maxupo.
20 Vanonto, muhitteeliweke murima mwaha wooweera minepa soonanara sinnawiiwelelani, menento mutteeliweke murima mwaha wooweera masina anyu aalempwa wiirimu.”
21 Etempu ene yeele, Yesu moorweela mwa munepa wootteela wa Muluku aatteeliwa murima vantxipale ni aaheera: “Tiithi, kinnoovuwihani variyari vaatthu, nyuwo Tiithi, Pwiya a wiirimu ni a elapo ela ya vathi. Mwaha wooweera khamwaasuwelinhe itthu iya anamiruku ni asuweli, menento mwaasuwelinhe atthu eri ntoko anamwane akhaanini. Aani Tiithi, mwaha wooweera nyuwo mootthuna opaka itthu moota ene yoola.
22 Itthu sootheene kohinnyereriwa ni Apapaka. Ni khaavo omusuwenle Mwaana, waapwaha Apapawe; ni khaavo aasuwenle Atiithi, ompwaha Mwanaya ni ale Mwaana ontthunaawe waasuweliha.”
23 Vano Yesu aarukunuwa anaaweha atthareli awe ni anaweerela meekhaayaru: “Oohakalala atthu ale enoona itthu iya nyuwo munoona anyu.
24 Kinnooleelani ekhaikhai weera: Maprofeta mantxipale ni mamwene yannatthuna woona itthu nyuwo munoona anyu, mene khiyonne, yannatthuna wiiwa itthu nyuwo muniiwaanyu mene khayiiwale.”
25 Vano, mulopwana mmoha oosuwela Malamulo aaheemela anamukoha atthunaka omweerera: “Muhusiha, etthu heeni kintthuneyaaka opaka weera kaphwanye ekumi yoohimala?”
26 Owo aamwaakhula amukohaka ha: “Mu Nlamuloni elempwale eheeni? Osoma muneera hayi?”
27 Omwaakhula enre: “‘Omusivele Yehova Muluku aa, ni murima aa wootheene, ni ekumi* aa yootheene, ikuru sa sootheene ni muupuwelo aa wootheene ni mmusiveleke mukhwiinyu ntoko muniisivelaanyuno’.”
28 Yesu aamweerela: “Mohaakhula nnene; nvirelele opaka eyo, mweera haawo, munoophwanya ekumi.”
29 Vano, mulopwana ole atthunaka wiisoonihera weera aari mutthu axariya, aamukoha Yesu: “Mukhwaaka taani?”
30 Yesu waakhula enre: “Mulopwana mmoha aakhuma oYerusalemu arowaka oYerikho, mene, aavariwa ni anamwiiya, awo yaamurula ikuwo sawe, yammana ni yaapwaha enamuhiya ahaleelaka vakhaaniini okhwa.
31 Moothitana, musewe ene yoole, aavira namakeya mmoha, vano aamonnaawe mulopwana owo, aamuxerema.
32 Emoha-moharu-tho, nipuro nene nenne aavira mulevi mmoha, nave aamoona-tho mulopwana owo, amuxerema.
33 Vano, musamariya mmoha aari ni mukwaha awe, aavira musewe ene yoole, amphwanyakaru, ammorela ikharari.
34 Nto, aamwaattamela ahelaka makhura ni eviinyu makhwatta awe, ni aatthuka makhwatta awo. Ni anweliha va puuruni vawe, anamuroiha empa ya aletto ni anamukosoopa.
35 ‘Oxaakaru, aakumiha itenaariyu piili, aamwinnya mwaneene empa ya aletto, ni aaheera: Mmukosoope mulopwana ola, ni musurukhu wootheene munkelaanyu ovarela muteko opwaha ola kiwinnyalaakani, miyo kaatthikaka vale kimmoolivani.’
36 Wa atthu ala araru, taani mummoonaanyu weera ohoonihera okhala mukhwaawe mulopwana ole aavarinwe ni anamwiiya?”
37 Owo aahaakhula: “Ole ammorenle ikharari.” Yesu aamweerela: “Murooke, nyuwo tho mwapake etthu emoha-moharu.”
38 Yeettaka mukwaha aya, Yesu aavolowa muttetthe mmoha. Muttetthe ene yoole, aakhala muthiyana mmoha iitthaniwa Marta, ni owo aamwaakhelela owannyawe.
39 Vano, Marta owo aakhalano munnawe iitthaniwa Maria, nto Maria aakilaathi vamanaanini va Apwiya, aniiwelela etthu yaahimaaya.*
40 Vano, Marta khaakhweñye waatteliwa ovara miteko sintxipale. Vano aamwaattamela Yesu aneera: “Apwiya, khamunoona weera munnaka ookihiyera kivaraka miteko meekhaaka? Vanonto, mmuleele weera awe akikhavihere.”
41 Yesu omwaakhula enre: “Marta, Marta, nyuwo munneeteteya ni itthu sintxipale.
42 Mene itthu vakhaaniini siri sootthuneya, naari etthu emoha paahi. Mene Maria, oothanla epaarte yooreera, ni khanrowa waakhiwa.”
Footnotes
^ Naari: “Pwiya a.”
^ Ni eKereku: “Onimooroihani mmahiye.” Nwehe masu oowiiwanyeihiwa.
^ Naari: “minepa soonanara.”
^ Naari: “aaxuttihaawe. Ni eKereku: “masu awe.”
