Emaara ninkhalaahu ni asinna ninnoonela ntoko mwene Davidi oonenlaawe: “Nkonani orera ni osivela eneraya asinna ekilanthene murima mmosa!” (Nsalmu 133:1) Nto weera eyo yeereye, ontthuneeya weera yoole ori mutthu a hiyo apakeke eparte awe.

1. Etthu heeni yootikiniha eriyari ya atthu a Yehova?

Wakhala weera nyuwo munoroowa woonela mithukumano sahu elapo ekina, nyuwo munimoona weera, nnaamweera muhiweeraka wuuluma nuulumo na elapo eyo, khaamunrowa wiisoona okhala meekhiinyu. Mwaha wa heeni? Mwaha wooweera, hiyo nimmusoma Biblya nivarihelaka muteko iliivuru imoha-moharu, elapo yootheene. Nave tho niniilipihera wooniheraana nsivelo mukina ni mukhwaawe. Nihipwatthaka elapo ninkhumaahu, otheene ahu ‘ninniitthana nsina na Yahvéh weera nimukokhorele.’—Sofoniya 3:9, enoota.

2. Etthu heeni nyuwo munkelaanyu opaka weera nvirelelihe okhala oowiiraana?

“Musivelaneke mukina ni mukhwaawe ni murima worapihiwa ni vohihiyereya.” (1 Pedru 1:22) Nyuwo munkela opaka moota heeni eyo? Nyuwo munoowera opaka eyo, nwehexexaka mikhalelo sooreera sa asinna ohiya soonanara. Ohiya okhalano asinthamwene arino mikhalelo imoha-moharu ni sawinyu, mweerere waasuwela asinna oovirikana. Nave-tho, onnatthuneya wiilipiheera weera nivinxe muupuwelo ori poothe wa nthalu.—Mmusome 1 Pedru 2:17. a

3. Eheeni nyuwo munkelaanyu opaka wakhala weera khamuniiwanana ni munna?

Hiyo atthu oowiiraana. Mene nto, naatthu oohimalela. Ikwaha ikina, hiyo pooti onyonyihana ni mutthu mukina. Mwa yeeyo, Biblya oneera, ‘nvireleleke olevelelana mukina ni mukhwaawe.’ Nave-tho oohima weera: “Sawasawa Apwiya yolevelenlayani, siso nyuwo tho mulevelelaneke.” (Mmusome Akolosi 3:13.) Hiyo khaninwera wuupuwela ikwaha ikavi nimunyoonyiihaahu Yehova. Nnamweera vareene hiiho, owo onnanlevelela. Mwa yeeyo, owo ontthuna weera hiyo tho, naaleveleleke asinnihu. Wakhala weera hiyo nihoonelela weera noomunyoonyiha munna, nipatxeriheke orowa wuuluma nuuwo weera niiraane.—Mmusome Matheyo 5:23, 24. b

 WEERA MUXUTTERE SINTXIPALE

4. Muhikhaleno nthalu

Hiyo nintthuneya waasivela asinna ootheene. Mene nto, pooti okhala wooxupa omusivela mutthu onhiyana ni hiyo. Etthu heeni enrowa onikhavihera? Musome Miteko 10:34, 35. Avinyaka mutthekule ni ipontu sintharelana:

• Yehova khakhalanne nthalu, yoole ori mutthu pooti omukokhorela. Eyo eñhela mpuwa hayi moonelo anyu ni ale arino mikhalelo soovirikaana ni sawinyu?

• Mikhalelo heeni sa nthalu siri muttetthe anyu? Nyuwo mwaha wa heeni muntthuneya anyu wiikosoopa?

Mmusome 2 Akorinto 6:11-13. Avinyaka mutthekule ni epontu enttharelana:

• Nyuwo munkela okhalano hayi onthamweene ni munna orinono mikhalelo soovirikana ni nyuwo?

5. Mulevelelaneke ni murima wootheene

Yehova khannitthekela hiyo weera nimulevelele. Nnamweera vareene hiiho, owo onnanlevelela. Musome Nsalmu 86:5. Avinyaka mutthekule ni ipontu sinttharelana:

• Neereke olevelela wa Yehova onnakota?

• Mwaha wa heeni nyuwo munxukurenlaanyu olevelela wa Yehova?

• Hiyo nintthuneya weera niiraane ni atthu otheene. Etthu heeni enkela waakanyeera wiiraana iwo?

Moota heeni ninkelaahu omutakiha Yehova niiwananaka ni asinna ni asirokora? Musome Miruku 19:11. Avinyaka mutthekule ni epontu entharelana:

• Wakhala weera moonyoonyihiwa, etthu heeni munkelaanyu opaka weera nvirihe etthu eyo?

 Emaara ekina, hiyo ninnaanyoonyiha atthu akina. Nto wakhala weera eyo yookhumelela ninkela opaka heeni? Moone EVIIDIYU. Avinyaka mutthekule ni epontu enthaarelanas.

• Nviidiyuni murokora aapanke heeni weera aase murettele?

 NYAHA SOOTTHUNEYA

Hiyo nnoovireleliha wiiwanana mmulokoni, wakhala weera ninnaalevelela atthu akina nave niwooniheraka nsivelo atthu ootheene.

Wuuluula

• Ninkela owina hayi nthalu?

• Munkela opaka eheeni wakhala weera khamuniiwaanana ni munna mmoha?

• Mwaha wa heeni muntthuneyaanyu omutakiha Yehova weera mulevelele?