1. Moota heeni akristu ontthuneyaaya okhala ntoko mwiri woowakuva opintteya? (Nwehe efootu.)

 ATTHU akina annahima ha: “Epheyo khemmoriha mwiri ompintteya.” Masu ala annoonihera weera miri sikina, weera sivirelele weemela emaara enviraaya epheyo, sintthuneya weera sikhaleke soowaakuva opintteya. Emoha-moharu, weera niwere ovirelela onvarela Yehova moohakalala, hiyo nintthuneya okhala atthu oowiisaakuviha emaara ekhumelelaaya maxupo mweekumini mwahu. Weera niwere wiikhoveleliha matxentxo a mweekumini ni ottittimiha miruku ninvahiwaahu ni atthu akina, ti wootthuneya okhala oopixa murima.

2. Mikhalelo heeni sinrowa onikhavihera wiikhoveleliha matxentxo, ni eheeni ninrowaahu woona mwa yoosomeene yeela?

² Ntoko arumeyi a Yehova, hiyo nintthuneya okhalano mukhalelo woopixa murima. Opwaha mwa yeeyo nintthuneya okhala atthu oowiiyeviha ni ooreera murima. Mwa yoosomeene yeela, nnoorowa woona moota mikhalelo iya saakhavihenraaya akristu a khalayi emaara yaakhumelelaaya matxentxo a mweekumini. Nave nnoorowa woona moota mikhalelo iya sinrowaaya onikhavihera tho. Yoopatxera, nnoorowa oxuttera ni ntakihero na Yehova ni Yesu, yaawo yoonihenre opixa waya murima moomalela.

3. Ninsuwela moota heeni weera Yehova toopixa murima?

³ Yehova onniitthaniwa okhala ‘eyuuma’ mwaha wooweera, owo toolipa ni toohittikinyeya. (Ola. 32:4) Mwa etempu emoharu, Yehova toopixa murima. Itthu sineereya mulaponi sinnatxentxa moowaakuveya mene eyo khaiyene maxupo wa Yehova, mwaha wooweera owo toowiisaakuviha ni onnanilaihera weera itthu sootheene onilaihenraawe onookwanihera. Yehova ohaapaka  atthu mwa enenero awe nto mwaha wa yeeyo hiyo nookhalano owera woowiikhoveleliha maxentxo ankhumelela mweekumini mwahu. Nave mBiblyani hiyo ninnaphwanya miruku sinnikhavihera opaka soothanla sooreera, nihiphwatthaka maxupo heeni ankhumelela. Ntakihero nooreera na Yehova ni miruku onnivahaawe sinnanikhavihera wiiwexexa weera, nnaamweera owo areene ‘eyuuma’ nto toowiyeviha.

4. Nvahe ntakihero na moota Yehova oraawe oopixa murima. (Onamakeya 5:7, 11)

⁴ Itthu sootheene Yehova opattunxawe ti soomalela. Ni sinnoonihera opixa wawe murima. Yehova khaiyono oowuuma murima ni atthu. Mwa ntakihero, owo aari oopixa murima ni ana a Israeli. Owo khaavekela mukuttho mmoha-moharu anamuhakhu ni anamuhaawi weera envahe. Ikwaha ikina, Yehova annahiya weera mutthu ori poothe, avaheke mukuttho moovarihana ni ele aaweraawe.—Mmusome Onamakeya 5:7, 11.

5. Nvahe ntakihero na moota Yehova oonihenraawe wiiyeviha ni omoriwa ikharari.

⁵ Omoriwa ikharari wa Yehova ni wiiyeviha wawe onnamweeriha owo okhala oopixa murima. Mwa ntakihero, wiiyeviha wa Yehova waahooneya vaavo aalakenlaawe onyaanya ecidade ya oSodoma. Aavarelaka muteko malaika awe, Yehova aamweerela Lothi weera atthawele omwaako. Mene nto Lothi annoova otthawela omwaako. Nto owo anvekela Yehova weera atthawele ecidade ya oZowari, ele Yehova aalakenlaawe tho onyaanya. Mene waari wookhweya Yehova ohimwaakhulela Lothi ni omweerela weera atthare miruku iye anvanhaawe. Nto Yehova ohiya opaka eyo, owo aamwaakhulela Lothi weera atthawele ecidade ele aalakenlaawe onyaanya. (Eph. 19:18-22) Sivinreene iseeculu sintxipale, Yehova aawoonihera omoriwa ikharari atthu oNinive. Owo aamuruma mprofeti Yona weera aaleele atthu oNinive weera ecidade ele enoonyaanyiwa. Mene nto, vaavo Yehova aawonnaawe atthu oNinive ettharunweene, Yehova aahaamorela ikharari ni aalakela ohinyaanya tho ecidade ele.—Yona 3:1, 10; 4:10, 11.

6. Nvahe matakihero anoonihera weera Yesu annatakiha opixa murima wa Yehova.

⁶ Yesu aatthara ntakihero na Yehova na opixa murima. Owo aarumihinwe weera alaleereke “iputtiputthi siriheñye sa empa ya Israeli.” Mene nto owo aahipixa murima ni annalaleera mittetthe mikina. Mwa ntakihero, ekwaha emoha, muthiyana mmoha ahaakhanle mwIsraelita anvekela Yesu weera amulamihe mwanawe, mooreera murima, Yesu aamulamiha mwaana a muthiyana ole ntoko anvekenlaawe. Mwaha wa omoriwa ikharari, Yesu aamulamiha mwaana a muthiyana ole. (Math. 15:21-28) Moone ntakihero nikina, emaara aapatxenraawe muteko woolaleera, Yesu aahimme ha: “Vano yole anakirune . . . , miyo tho kini kimurune.” (Math. 10:33) Nnaamweera Pedru aamukhontteene vararu, Yesu khaamukhontte Pedru, owo aasuwela weera Pedru aattharuwa ni aari mulopwana ooreera murima. Emaara Yesu aavinyererihiwaawe, owo aarowa wa Pedru, ni moohihovela owo aamuleela weera owo annamusivela.—Luka 24:33, 34.

7. Moovariha ni Afilipi 4:5, mukhalelo heeni nintthuneyaahu okhalano?

 ⁷ Mpaka va hiyo nohoona weera Yehova ni Yesu ikwaha sootheene awo annoonihera opixa murima. Ankha hiyo? Yehova ontthuna weera hiyo nipakeke ettthu emoha-moharu. (Mmusome Afilipi 4:5.) Hiyo ‘nsuweliweke okhala atthu oopixa murima.’ Niikoheke ha: ‘Keereke atthu annakisuwela weera miyo kamutthu oopixa murima, ootthekuleya, ni oowiiwelela? Naari atthu ekisuwenle okhala mutthu ooxupa ni oottiya maaru? Naari kinnaanyeserera atthu opaka itthu ettharaka paahi moonelo aka? Neereke miyo kinniiwelela miruku saatthu akina, ni wiikhoveleliha weettela miruku iyo?’ Nihipwatthaka waari weera naatthu oopixa murima, nneereke ovirelela omutakiha Yehova ni Yesu. Nrowe noone mathowa meeli ankela onikhavihera woona ikwaha heeni nintthuneyaahu okhala atthu oopixa murima, vaavo ankhumelelaaya matxentxo. Naapakaka soothanla sahu, naari vaavo nikhanlaahuno myuupuwelo soovirikana ni akina.

8. Etthu heeni enkela onikhavihera okhala oopixa murima emaara ankhumelelaaya matxentxo? (Nwehe enoota.)

⁸ Emaara enkhumelelaaya matxentxo, ninnatthuneya okhala oopixa murima ni oowiisaakuviha. Matxentxo awo pooti okumihera maxupo yaawo naahuupuwelaahu weera naamukhalano. Mwa ntakihero, moowaakuveya hiyo pooti okhalano maxupo a mweekumini. Naari othoiwa musurukhu, nyaha sa epoliitika pooti ovolowela ekumi ahu ni okumihera maxupo. (Koh. 9:11; 1 Akor. 7:31) Naari okhumelela matxentxo a soothanleliwa sahu sa moota wonvarela wahu Yehova. Nihipwatthaka etthu enkela weereya, ninnatthuneya okhala atthu oowiikhoveleliha ni itthu inyowani sinkela onikhumelela ntoko sooweereya iya ixexe: (1) waakhulela yooweereya eyo, (2) owehexexa itthu sa muhoolo, (3) owehexexa itthu sooreera, ni (4) waakhavihera atthu akina. b Nnookela woona itthu iya moota sineeraaya sinikhavihere mweekumini mwahu.

9. Moota heeni ntheli nimoha na mamisiyonaariyu naawenraaya ovilela maxupo yahaawehereraaya?

⁹ Mwaakhuleleke yooweereya eyo. Emanuele ni Francisca yaathanleliwa okhala mamisiyonaariyu elapo ekina. Vaavo yaapatxenraaya ovara muteko wa omisiyonaariyu ni oxuttera nuulumo nikina ni waasuwela nnene asinna ni asirokora, mootutuxera yaapatxera eretta ya corona viru. Nto khawaawereya awosa okhala vamoha ni asinna. Mwa etempu ene yeeyo, Francisca mootutuxera aahaayeleela ameyawe mookhwaani. Owo annatthuna vantxipale okhala ni amusi awe, mene nto mwaha wa eretta ele owo khaakhuleliwa opaka mukwaha. Eheeni yaamukhavihenre Francisca oviriha maxupo ale? Etthu yaamukhavihenre Francisca yaari mavekelo Emanuele aapakaawe, anvekelaka Yehova weera anvahe miruku okhala nihiku ti nihiku. Yehova aahaakhula mavekelo aya moorweela mwa eyootxa ya omunepani yaakhelaaya mwa iwoora sooreerela. Mwaha ntakihero, awosa yaalipihiwa ni munna mmoha aahimme ha mu entrevistani mwawe: “Emaara hiyo nnaakhulelaahu moowaakuveya sookhumelela, moowaakuveya tho ninnaphwanya ohakalala ni ovirelela opaka ele ninweraahu.” c Awo tho yaalakela moota woowiireherera emaara yaavaraaya muteko woolaleera envarelaka muteko telefooni, ni yookhumelela aya yaapatxeriha yoosoma emoha ya Biblya. Opwaha mwa yeeyo, yaahaakhulela nikhavihero noolipiha yaakhenlaaya ni asinna a muttetthe ene yoole. Mwaha wa yeeyo, yaaxukurela mwaha wa itthu yaapakelinwaaya.  Mwa ntakihero, mahiku ootheene murokora mmoha, annaarumihela emensage alempene eversu emoha ya mBiblyani. Murokora ole aavirelela opaka eyo mwa eyaakha emoha. Wakhala weera hiyo nnimwaakhulela matxentxo enkhumelela mweekumini mwahu, hiyo tho nnoophwanya ohakalala ni ovirelela opaka ele ninweraahu mwa etempu ene yeeyo.

10. Moota heeni murokora mmoha, iikhovelelinhaawe emaara yaakhumelenlaaya matxentxo mweekumini mwawe?

¹⁰ Muupuweleleke itthu samuhoolo ni nwehexexeke itthu sooreera. Murokora mmoha onkhala oJapao oniitthaniwa Cristina, aakhala ooxupeya vantxipale vaavo muloko awe wa nuulumo na english waawaliwaaya. Mene nto owo, khaamakela wuupuwelela paahi etthu ele yeereñye. Mwa yeeyo owo, aapatxera woonela mithukumano mwa nuulumo na ejapones ni annapaka ele aaweraawe weera avare muteko woolaleera. Owo anvekela koleekaawe awe mmoha weera amuxuttihe nuulumo na ejapones ni owera wuuluma. Owo aamweerela weera anvariheleke muteko Ebroxura Mukhaleno ekumi yoohimala! ni Biblya a nuulumo na ejapones ni owo aahaakhulela. Omamaliheroni Cristina khaiyene aaxuttenre nuulumoru paahi na eJapones mene koleekaawe awe ole, yaamusivela ekhaikhai ni annatthuna oxuttera sintxipale. Nakhala weera khannuupuwelela itthu samuttuli paahi, nto nnakhalano muupuwelelo wooreerela, ninrowa woonelela weera matxentxo ootutuxera enoonivaha mareeliho yaawo nahaawehereraahu.

11. Moota heeni emusi emoha ewenraaya ovilela maxupo oothowa musurukhu?

¹¹ Mwaakhavihereke akina. Emusi emoha yeeyo enkhala elapo muteko ahu onkhoottihiwaaya, elapo eyo yaapatxera oviriha maxupo oothowa musurukhu. Vanonto emusi ele yaarowa wiireherera hayi? Yoopatxera, awo yaakhweihera ekumi aya. Muhoolo mwaya, awo yaahoonelela weera ohiya opwattha sa maxupo aya, wannatthuneya olakela oviriha etempu yintxipale yaakhaviheraka atthu akina ni muteko woolaleera. (Mit. 20:35) Munna owo enre, “Ovirelela ovara muteko woolaleera ohiya paahi oyeleela etempu awe ohoona okhala etthu yooreera, waakhaviha atthu ni owehexexa yootthuna ya Yehova.” Emaara enkhumelelaaya matxentxo mweekumini mwahu, ninnatthuneya wuupuwelelaka etthu yootepa otthuneya, nivirelelaka waakhavihera atthu akina, otepaxa wene ni muteko woolaleera.

12. Ntakihero na murummwa Paulo ninrowa onikhavihera moota heeni wiikhoveleliha emaara enkhumelelaaya matxentxo a moota woolaleera?

¹² Mpuwa mwa muteko woolaleera, nintthuneya okhala oowiisaakuviha. Ninnaaphwanya atthu amapuro oovirikana, sookhovelela soovirikana, ni soororomela soovirikana. Murummwa Paulo annasuwela moota woowiikhoveleliha, hiyo pooti otthara ntakihero nawe. Yesu aamuruma Paulo weera akhale “murumwa àmalapo.” (Arom. 11:13) Paulo annaalaleera aYuda, Agrego, atthu oosomaxa, atthu oohisomaxa, anamalamulela, mamwene, weera aavare murima atthu ootheene. Paulo ‘anniipaka soothesene wa ootheene.’ (1 Akor. 9:19-23) Owo annavaha mwiitti wa itthu iye atthu yaaroromelaaya, nto eyo yannamweeriha waakuva wiikhoveleliha weera aalaleere. Hiyo tho pooti opaka eyo wakhala weera ninnahela mwiitti wa ele atthu anhaawelaaya.

13. Moovarihana ni 1 Akorinto 8:9 etthu heeni nintthuneyaahu osepa emaara ninttittimihaahu moonelo wa atthu akina?

¹³ Okhala oopixa murima, onoonikhavihera tho ottittimiha moonelo wa atthu akina. Mwa ntakihero, asirokora akina onnaasivela wiihela makeyaxe mene tho akina khonaasivela. Ni asinna akina annawura vakhaaneene, mene nto akina khenwura. Ootheene ahu ninnatthuna weera nikhaleno ekumi yooreera.  Mene ninnathanla moovirikana moota nneeraahu nikosoopiweke hospitaale. Naamakelaka wuupuwelela weera hiyo moonelo ahu ti wooreera, ni owooperera akina weera epakeke itthu hiyo nimpakaahu, hiyo pooti waakwattuliha. Ni okumihera okawanyeya mmulokoni. Mweekhaikhai, hiyo khanintthuna weera eyo yeereye. (Mmusome 1 Akorinto 8:9; 10:23, 24) Nrowe noone itthu piili sinoonihera wakhala weera hiyo ninnatthara miruku sa mBiblyani nnoowera okhala eriyari-neeriyari, ni ovirelela okhala a murettele.

14. Etthu heeni nintthuneyaahu wuupuwelelaka emaara ninthanlaahu soowara sahu ni moota woowiireherera?

¹⁴ Mawarelo ni moota ninreheraahu maihi ahu. Yehova khannileela moota hiyo nneeraahu niwareke, mene nto owo onnanivaha miruku weera hiyo nitthareke. Hiyo nintthuneyaka owara weiwo onkela onvuwihaka Yehova, niwaraka mwa nnene sene, ‘moowiiyeviha’ ni moohikhulumula. (1 Tim. 2:9, 10; 1 Ped. 3:3) Hiyo khontthuneya weera mawarelo ahu yaakhulumuleke atthu akina. Miruku sa mBiblyani pooti waakhavihera asitokweene a mmulokoni weera ehikumihere malamulo a moota woowara ni wiirehera. Mwa ntakihero, asitokweene a muloko mmoha, yaahaawela waakhavihera asinna a mmulokoni yaawo yaapatxera owara woohireerela wa mukhalelo wa elapo. Vanonto asitokweene ale yaakela waakhavihera hayi, asinna ale amiravo ehikumiheraka malamulo? Moohakalaliha, mutokweene a esirkwiitu mmoha aahaavaha miruku asitokweene weera yeereke ha: “waakhanle weera nyuwo muri ohoolo mpakaka mwaha naari etthu eri poothe, munoona weera atthu ohiya wiiwexexa mwaha enoowehexexani nyuwo, mene nto vawo musuwele weera yookhala ehikhanle nnene, mawarelo anyu ni moota mwiirehenraanyu.” Miruku iya sooyeva ni vakhaani saawera ovaha miruku ni omaliha maxupo yaakela weeriha ohela malamulo mmulokoni. d

15. Malamulo heeni a mBiblyani enkela onikhavihera emaara ninkelaahu opaka soothanla sa moota wookosoopiwa ekumi ahu? (Aroma 14:5)

 ¹⁵ Othokorora ekumi. Mukristu ori poothe ontthuneya othanla meekhaawe moota woothokororiwa ekumi awe. (Agal. 6:5) Vaavo mukristu onthanlaawe etratamentu eri poothe itthu ontthuneyaawe otthara ti malamulo a mBiblyani woohima sa ephome, ni onamunepani. (Mit. 15:20; Agal. 5:19, 20) Asinna akina anaakhulela paahi otxa mirette sa hospitaale ni akina annaakhulela otxa mirette sa mmawaani. Hiyo nintthuneya ottittimiha etratamentu eri poothe asinna enthanlaaya, nihipwatthaka waari weera ninnaakhulela, naari hooye. Ni hiyo nintthuneya wuupuwelela ipontu iya: (1) Omwene wa Muluku paahi tonrowa omaliha iretta sootheene. (Yes. 33:24) (2) Mukristu ontthuneya ‘ohihovela’ ele eri yootthuneya wa yoowo. (Mmusome Aroma 14:5.) (3) Muhaathoriheke asinna emaara empakaaya soothanla saya naari muhaakattuliheke. (Arom. 14:13) (4) Akristu ennoonihera nsivelo, mwaha wooweera wiiraana wa mmulokoni teeri etthu yootepa otthuneya opwaha miyoonelo saya. (Arom. 14:15, 19, 20) Wakhala weera ninnuupuwelela ipontu iya, hiyo nnoowera okhalano onthamwene woolipa ni asinna ni okhavihera weera muloko okhale wa murettele.

16. Asitokweene a mmulokoni anoonihera moota heeni weera toopixa murima emaara enthukumanaaya ni asitokweene akina? (Nwehe efootu.)

¹⁶ Ontthuneya okhala matakihero ooreera aatthu oopixa murima. (1 Tim. 3:2, 3) Mwa ntakihero, mutokweene mmoha khontthuneya oweherera ikwaha sootheene weera miruku sawe saakhuleliweke mwaha woowera owo toowunnuwa waapwaha asitokweene akina. Owo onnasuwela weera munepa woottela wa Yehova pooti onvarela mureko mutokweene ori poothe okumihera miruku saakela okhala yoothanla yooreera. Ni wakhala weera asitokweene antxipale a mmulokoni ennaakhulela yoothanla emoha, ehintupha malamulo a mBiblyani, mutokweene oopixa murima onookela okhavihera yoothanla eyo, nnaamweera aakhalanne moonelo mukina.

17. Mareeliho heeni enkhumelela wakhala weera hiyo toopixa murima?

¹⁷ Akristu oopixa murima ennaakhela mareeliho mantxipale. Mwa ntakihero, hiyo ninnakhalano onthamwene woolipa ni asinna ni asirokora, ni eyo ennakumihera murettele mmulokoni. Hiyo ninnahakalala mwaha wooweera nookhalano eparakha yoowaasuwela asinna a mikhalelo ni sookhovelela soovirikana. Ti woohakalaliha osuwela weera, nnaamweera nivirikanneene vantxipale, ootheene ahu nimmukokhorela Yehova moowiiraana. Ni etthu ekina ennihakalaliha ori osuwela weera nimmutakiha Yehova, yoowo ikwaha sootheene ori oopixa murima ni oowiisaakuviha.