YOMARA ni asinnawe eeli yaawo eniitthaniwa—Marcelo ni Hiver—enkhala muttetthe mmoha oneeriwa Guatemala. Yomara aapatxera omusoma Biblya ni Anamoona a Yehova, nto moottharelana asinnawe tho yaapatxera omusoma Biblya. Mene nto yaakhala maxupo. Ooraaru aya khaanoona ni khayaawera osoma ni matata (ebraille). Nto munna aasomiha wannatthuneya osoma iparagrafu sootheene ohela mpuwa iversu sa mBiblyani wa yeele eri yoosoma.

Orowa omithukumanoni waakhala wooxupa. Meekhaayasa awo khayaawera weetta mpaka Empa ya Omwene yoowaattamela owannyaya. Mene nto asinna yannaakhavihera orowela mithukumano sootheene. Nto awo epatxerakaru okhalano iparte saya mmithukumanoni, asinna yannaakhavihera oreherera iparte saya weera ehittiwale.

Eyaakha ya 2019 mweeri wa Maio, mithukumano saapatxera opakiwa muttetthe aya, mwa etempu ene yeele ntheli nimoha na mapiyoneru anthiti yaathamela muttetthe ole. Ntheli nne naakhalano yooluluwanya yoowaakhavihera asinna ale araru oxuttera osoma ni matata eyo tiiyo, ebraille. Mene nto, ntheli nne khanaasuwenle etthu woohima sa ebraille. Nto awo yaarowa oBiblioteka weera yaxuttere osoma ebraille nave weera ewere waaxuttiha asinna ale.

Nto sivinreene miyeeri vakhaaneene asinna ale araru yannawera osoma ni matata eyo tiiyo, ebraille woohaaxupa. Nto eyo, yaahaakhavihera olipiha onthamwene ayasa ni Yehova. a Vaanaano va, Yomara, Marcelo ni Hiver ennakhavihera ntoko mapiyoneiru anthiti. Marcelo murumeyi oorumeela. Awosa toolutthuweliwa miteko sa omunepani isemana sootheene. Ohakalala wayasa onnaneeriha tho hiyo ohakalala.

Asinna ala araru enneera asantte vantxipale mwaha wa nikhavihero muloko woonihenraaya. Yomara oneera: “Okhuma nihuku noopatxera hiiva naasuwenlaahu Anamoona a Yehova, awo ennoonihera nsivelo neekhaikhai nenno nri neekristu mpaka olelo va.” Nave Marcelo onnaatxeerera: “Hiyo nookhalano asinthamwene ooreera murima mmulokoni nave ninnawera ohima weera hiiva niineerela eparte emusi ela ya elapo yootheene yoowiiraana ni ya nsivelo.”Yomara vamoha ni asinnawe ennawehererasa woona elapo ela etatuxinweene eparadiso. Nsal. 37:10, 11; Yes. 35:5.