1-2. (a) Mwaha wa heeni murummwa Paulo ahimmaawe weera nsivelo ‘mukhalelo’ wootepa otthuneya wa mikhalelo sootheene? (b) Makoho heeni ninrowaahu waakhula?

 VAAVO murummwa Paulo uulumaawe woohima sa nroromelo, yooweherera ni nsivelo, nto owo aahima weera ‘etokokweene wa mikhalelo seiya, ti nsivelo.’ (1 Akor. 13:13) Mwaha wa heeni Paulo uulummaawe hiiho? Mwaha wooweera Yehova muhoolo onookwanihera anatiri aamannaawe. Nto mwa etempu ene yeeyo, khonrowa otthuneya okhalano nroromelo ni yooweherera, mene hiyo oneereke otthuneya omusivela Yehova ni atthu. Mweekhaikhai nsivelo nahu ni Yehova ni atthu nneereke ovirelela mpaka khalayi.

² Okhala weera nsivelo mukhalelo wootepa otthuneya mweekumini mwahu, nnoorowa waakhula makoho mararu. Noopatxera, mwaha wa heeni nintthuneyaahu osivelana mukina ni mukhwaawe? Nanaaveli, hiyo nnoonihere hayi weera ninnasivelana mukina ni mukhwaawe? Nanaararu, moota heeni ninrowaahu olipiha nsivelo nraahuno mukina ni mukhwaawe?

3. Etthu heeni enneeriha osivelana mukina ni mukhwaawe?

³ Wa hiyo mwaha wa heeni oraaya wootthuneya osivelana mukina ni mukhwaawe? Vaavo nnooniheranaahu nsivelo mukina ni mukhwaawe, ninnoonihera weera hiyo akristu eekhaikhai. Yesu aaweerela oohuseraawe: “Ti mwemmo atthu ootheene eneeraaya esuwele wi muri oohuseraaka mwarino osivelana mukina ni mukhwaawe.” (Yoh. 13:35) Nsivelo ninnaneeriha okhala oowiiraana. Paulo enre: “Nsivelo mukhalelo onniiraaniha.” (Akol. 3:14) Nave-ho yookhala etthu etokweene, enneeriha osivelana mukina ni mukhwaawe. Murummwa Yohani olempe ha: “Ole onamusivela Muluku amusivele mukhwaawe.”  (1 Yoh. 4:21) Vaavo nnooniheranaahu nsivelo mukina ni mukhwaawe, ninnoonihera weera ninnamusivela Muluku.

4-5. Muthalihe moota nsivelo nahu ni Muluku ninvarihanaaya ni nsivelo ninwooniheraahu asinna ni arokora?

⁴ Mwa mukhalelo heeni nsivelo nimmooniheraahu Muluku ninvarihanaaya ni nsivelo ninwooniheraahu asinna? Muupuwele moota envarihanaaya murimaahu ni iparte ikina sa erutthu ahu. Ikwaha ikina mameediku ennavarihela muteko moono ahu woothiyana weera ewehe otthimaka wa murima ahu, yeera haawo awo ennasuwela waari weera murima onnatthimakaxa naari hooye. Ntakihero nna ninnixuttiha eheeni woohima sa nsivelo?

⁵ Hiihaale ntoko meediku onweraawe osuwela otthimaka wa murima wa mutthu mukina ovarihelaka muteko moono awe, hiyo pooti osuwela waakhanle weera nsivelo nahu wa Yehova noolipa noonaka moota nnaasivelaahu atthu akina. Noonelela vale weera nsivelo nahu ni asinna ninnariira, eyo pooti woonihera weera nsivelo nahu wa Yehova ninnavukuwa tho, mene wakhala weera ninnavirelela owoonihera nsivelo asinna eyo ennoonihera weera nsivelo nahu ni Yehova ninnalipa.

6. Mwaha wa heeni nintthuneyaahu oxupeyaka vaavo nnoonelelaahu weera nsivelo nahu ni asinna ninnavukuwa? (1 Yohani 4:7-9, 11)

⁶ Wakhala weera nsivelo nahu wa asinna ninnariira, awo maxupo matokweene. Mwaha wa heeni? Mwaha wooweera eyo ennoonihera weera nsivelo nahu ni Yehova ninnariira, murummwa Yohani ohoonihera eyo nnene sene eeraka: ‘Veekhaikhai ole ohinamusivela mukhwaiye onamoonaiye khanwera omusivela Muluku ohinamoonaiye.’ (1 Yoh. 4:20) Ninxuttera eheeni? Ninxuttera weera paahiru nnoomusiveliha Yehova wakhala weera ‘ninnasivelana mukina ni mukhwaawe.’ — Mmusome 1 Yohani 4:7-9, 11.

7-8. Mwa mukhalelo heeni ninrowaahu woonihera weera ninnasivelana mukina ni mukhwaawe?

⁷ Mbiblyani, hiyo ninnaphwanya nlamulo ‘noosivelana mukina ni mukhwaawe.’ (Yoh. 15:12, 17; Arom. 13:8; 1 Ates. 4:9; 1 Ped. 1:22; 1 Yoh. 4:11) Menento nsivelo mukhalelo wa va murimani, mukhalelo yoowo nihinwerahu woona ni maitho ahu mwaha wooweera mukhalelo wa va murimani. Nto moota heeni ninrowaahu owoonihera atthu akina weera ninnaasivela? Menento nnaawere woonihera mukhalelo owo, moorweela mwa masu ahu ni soopaka sahu.

⁸ Aakhala makhalelo mantxipale oowoonihera weera ninnaasivela asinna ni arokora. Moone matakihero ala: ‘Muulumeke ekhaikhai mukina ni mukhwaawe.’ (Zak. 8:16) ‘Mukhaleno murettele mukina ni mukhwaawe.’ (Mar. 9:50) ‘Muttittimihaneke mukina ni mukhwaawe.’ (Arom. 12:10) ‘Mwaakhelaneke mukina ni mukhwaawe.’ (Arom. 15:7) ‘Mulevelelaneke mukina ni mukhwaawe.’ (Akol. 3:13) ‘Mureyaneke muritti mukina ni mukhwaawe.’ (Agal. 6:2) ‘Muhakalalihaneke mukina ni mukhwaawe.’ (1 Ates. 4:18) ‘Munnuwihaneke . . . mukina ni mukhwaawe.’ (1 Ates. 5:11) ‘Nvekelelaneke mukina ni mukhwaawe.’ — Yak. 5:16.

9. Mwaha wa heeni oraaya wootthuneya waamaaliha asinna? (Nwehe efootu.)

⁹ Ninrowa woona moota nneeraahu noonihereke nsivelo ni akina. Eparagrafu evinre, nohoona ele Paulo ohimmaawe: ‘Muhakalalihaneke mukina ni mukhwaawe.’ Menento mwaha wa heeni oraaya wootthuneya waamaaliha asinna ni arokora? Ereferensiya emoha ya Biblya, ehimme weera masu Paulo ovarihenlaawe muteko ooweera ‘omaaliha,’ entaphulela ‘okhala vakhiviru va mukhwiihu  weera nimulipihe.’ Aani, vaavo nnaamaalihaahu asinna, ninnaakhavihera weera evinye ni evirelele weettela ephiro ya ekumi. Emaara yootheene hiyo nnaapwatthaahu asinna ninlaka naawo, ninnoonihera weera ninnaasivela vantxipale. — 2 Akor. 7:6, 7, 13.

10. Olikana heeni okhanle eriyari ya omoriwa ikharari ni omaaliha?

¹⁰ Omoriwa ikharari ni omaaliha itthu soolikana. Mwa mukhalelo heeni? Vaavo mutthu onammorelaawe ikharari mutthu onviriha maxupo, owo onnatthuna ommaaliha ni omukhavihera mutthu owo. Mene etthu yoopatxera nimpakaahu ori ommorela ikharari, avinyaka ninnapaka etthu weera nimmaalihe. Nrowe noone moota Paulo uupuwelenlaawe ikharari sa Yehova ni nimaaliho owo onnivahaawe. Paulo ohimme ha woohima sa Yehova, Paulo ohimme weera Yehova, ‘Tiithi a ikharari ni animaaliho.’ (2 Akor. 1:3) Enoota ya yoosoma ya eversu ela, ennahima weera Paulo oovarihela muteko masu ooweera Tiithi a ikharari weera oonihere mukhalelo wa ikharari onwooniheraawe atthu akina. Menento Muluku onniitthaniwa okhala Tiithi naari naapwiipwi a ikharari, mwaha wa mukhalelo ola woomoriwa ikharari onwooniheraawe atthu akina. Mukhalelo ola woomoriwa ikharari, onnaneeriha ‘waahakalaliha ale eri moohaawani mwaya mootheene.’ (2 Akor. 1:4) Hiihaale ntoko ehime ya maahi ooreera emmutthikiheraaya ikuru mutthu aavolinwe ntthona, Yehova tho onnanivaha ikuru vaavo ninvirihaahu maxupo. Menento ninrowa omutakiha hayi Yehova okhalano mukhalelo ola woomoriwa ikharari ni waamaaliha atthu akina? Moota woopaka eyo, ori wunnuwihera mukhalelo owo mmurimani mwahu weera onikhavihereke waamaaliha atthu akina. Menento mukhalelo heeni?

11. Moovarihana ni Akolosi 3:12 ni 1 Pedru 3:8, mikhalelo heeni sikina nintthuneyaahu okhalano weera nivirelele owoonihera nsivelo ni waamaaliha asinna?

¹¹ Eheeni enrowa onikhavihera nihiku ti nihiku, ovirelela osivelana ni ‘omaalihana mukina ni mukhwaawe?’ Nintthuneya woonihera mikhalelo ntoko, omoriwa ikharari, nsivelo ni wiiyeviha. (Mmusome Akolosi 3:12; 1 Pedru 3:8.) Moota heeni mikhalelo iya sinrowaaya onikhavihera? Vaavo nnaamorelaahu ikharari asinna ni murima ahu wootheene, nneereke otthuna waamaaliha vaavo envirihaaya maxupo. Hiihaale ntoko Yesu enraawe: ‘Tthiri eyano enuuluma sa yeeyo esareñye mmurimani. Mutthu ooreera murima, mmuhakhuni mwawe mooreera, onnakumiha sooreera.’ (Math. 12:34, 35) Waamaaliha asinna ni asirokora enviriha maxupo, moohihovela etthu yootepa otthuneya weera niwoonihere nsivelo nahu.

12. (a) Nintthuneya wiikosoopa ni eheeni? (b) Makoho heeni ninrowaahu waakhula?

¹² Ootheene hiyo, nintthuneya ‘ovirelela wooniherana nsivelo mukina ni mukhwaawe.’ (1 Yoh. 4:7) Mene nintthuneya wuupuwelela weera Yesu aahima weera ‘osivelana wa atthu antxipale wanvukuwa.’ (Math. 24:12) Yesu khaatthuna ohima weera nsivelo na oohuseraawe naamuriira. Mene nintthuneya wiikosoopa vaavo nnaathokororaahu asinna weera nihihapuxiwe ni elapo ela ehinoonihera nsivelo. Nuupuwelelaka eyo, ninrowa waakhula nikoho nimoha nootepa otthuneya: Neereke wookhala moota woowoona wakhala weera nsivelo nraahuno ni asinna ti noolipa?

13. Eheeni enkela weerera nsivelo nahu ni asinna?

¹³ Moota woosuwela waari weera nsivelo ninwooniheraahu asinna ti noolipa, ori owehexexa  mota ninwoonelaahu vaavo enkhumelelaaya maxupo mweekumini. (2 Akor. 8:8) Eyo ennooneya ni masu ala a murummwa Pedru aalempaawe eeraka: ‘Opwaha soothesene, musivelaneke mukina ni mukhwaawe voohihiyerereya niwoko osivelana onnakhuneela sootheka sintxipale.’ (1 Ped. 4:8) Sookhulumula sa atthu akina naari ohimalela waya, pooti oneeriha ohoonihera nsivelo.

14. Moovarihana ni 1 Pedru 4:8 nsivelo heeni nintthuneyaahu okhalano? Nvahe ntakihero.

¹⁴ Nrowe nthokorore masu Pedru uulummaawe. Eparte yoopatxera ya eveersu 8, ennahima nsivelo nintthuneyaahu okhalano, “nsivelo noohihiyerereya.” Masu Pedru aavarihenlaawe muteko ooweera, “voohihiyerereya,” entaphulela “ekuwo yoonyomowa.” Ni eparte yanaaveeli, ennahima etthu ninrowaahu opaka nakhalano nsivelo noohihiyerereya. Nnoorowa okhuneela naari ohipwattha soottheka sa asinna. Hiyo pooti wuupuwela ha: Onkhala ntoko nsivelo nahu, ninlikana ni ekuwo yoonyomowa, vaavo ninvirelelaahu onyomola, eyo ennakhuneela ‘ohiya paahi yoottheka emoha naari piili, menento soottheka sintxipale.’ Mwa mukhalelo ola, “okhuneela” onlikana ni olevelela. Ntoko hiihaale ekuwo ele yoonyomowa enweraaya okhuneela  soottheka sa atthu, nsivelo nahu pooti okhuneela sookhulumula ni ohimalela wa asinna.

15. Nsivelo nahu ni asinna nalipa vale, ninrowa owera opaka eheeni? (Akolosi 3:13)

¹⁵ Nsivelo nahu nintthuneya nikhaleke noolipa ni nneeriheke olevelela soottheka sa asinna, nnaamweera ikwaha ikina oxupaka opaka eyo. (Mmusome Akolosi 3:13.) Vaavo nnaalevelelaahu atthu akina, ninnoonihera weera nsivelo nahu ti noolipa nave-tho ninnamuhakalaliha Yehova. Mene etthu heeni ekina enrowa onikhavihera ohiwehexexa soottheka sa asinna?

16-17. Etthu heeni ekina enrowa onikhavihera ohiwehexexa soottheka sa atthu akina? Nvahe ntakihero. (Nwehe efootu.)

¹⁶ Nintthuneya owehexexaka itthu sooreera sa asinna, ohiya ohimalela waya. Nkuupuwelani nyuwo mureene ofeestani vamoha ni asinna. Nyuwo munnahakalala ni okhwipi wa efeesta ele, nyuwo munnatirari ifootu ni asinna ootheene. Nto nyuwo munnatirari ifootu piili wakhala weera efootu yoopatxera, khekhumme nnene. Vanonto nyuwo mookhalano ifootu iraru. Mene mwa ifootu sene seiya nyuwo munnoonelela weera munna mmoha khakhumme nnene. Nyuwo munrowa otekela heeni efootu eyo? Nyuwo munnatxipiha efootu eyo mwaha wooweera mookhalano ikina piili, seiyo atthu ootheene ekhummaaya etheyaka omuhela mpuwa munna ole.

¹⁷ Vano, nkeererani wuupuwelela ifootu nyuwo muraanyuno ni nyuupuwelelo. Moohihovela,  nyuwo mookhalano nyuupuwelo sooreera, nyuupuwelo seiyo moonihenraanyu vaavo mwaaraanyu ni asinna ni asirokora. Mene pooti weeraka, ekwaha mwaaraanyu ootheene, munna naari murokora aahuuluma etthu yoohireera. Etthu heeni mwaarowaanyu opaka ni yoowuupuwelela eyo? Heeni muhineereraanyu otxipiha yoowuupuwelela eyo ntoko muntxipihaanyu efootu ehoosivenleni? (Mir. 19:11; Aef. 4:32) Wakhala weera nyuwo munimuupuwelela itthu sooreera mwaavirinhaanyu ni asinna, nyuwo khamunrowa wuupuwelelaka itthu saakhumelenle vaavo mwaaraanyu ni asinna. Mwaha wooweera, sooweereya sooreera tiseiyo muntthuneyaanyu wiiyaathiki mmuupuweloni mwanyu.

18. Eheeni nyuwo muxuttenraanyu woohima sa nsivelo mwa yoosoma ene yeela?

¹⁸ Mwaha wa heeni nintthuneyaahu olipiha nsivelo nahu mukina ni mukhwaawe? Ntoko nonnaahu, vaavo nnaasivelaahu asinna ni asirokora hiyo ninnoonihera nsivelo wa Yehova. Nto ninkela olipiha hayi nsivelo nahu ni asinna? Moota woopaka eyo, ori waamaaliha. Omoriwa wahu ikharari, onoorowa onikhavihera ‘omaalihana mukina ni mukhwaawe.’ Mene moota heeni ninkelaahu olipiha nsivelo mukina ni mukhwaawe? Nipakaka ele ninweraahu weera nlevelele soottheka sa asinna, nnaamweera opaka eyo, ohikhanle wookhweya.

19. Mwaha wa heeni olelo oraaya wootepa otthuneya okhalano nsivelo mukina ni mukhwaawe?

¹⁹ Mwaha wa heeni olelo va oraaya wootepa otthuneya wooniherana nsivelo mukina ni mukhwaawe? Pedru ohoonihera otthuneya waya oriki: ‘Vano okota wa itthu soothesene woohaattamela, Vanonto . . . musivelaneke mukina ni mukhwaawe voohihiyerereya.’ (1 Ped. 4:7, 8) Okhwipi wa elapo ela yoonanara onnakhuveela. Nsuwelaka eyo,niweherereke eheeni? Yesu aahaaleela oohuseraawe: ‘Muni musondiwe ni amalapo ootheene mwaha wa nsina naka.’ (Math. 24:9) Weera niwere ovilela ohasuliwa iwo, hiyo nintthuneya ovirelela wiiraana. Napaka eyo, Satana khanrowa owera onimwalanyiha mwaha wooweera nri oowiiraana mwa nsivelo nenno nri ‘nlutte noomalelihera.’ — Akol. 3:14; Af. 2:1, 2.