1-2. (a) Maxupo heeni oolikana ni awihu aYuda evirinhaaya emaara yaatthikenlaaya oYerusalemu? (b) Muthalihe maxupo aYuda yaavirinhaaya. (Nwehe ekwaadru “ Mahiku a Hagayo, Zakariya ni Ezra.”)

 NEEREKE nyuwo mwa ikwaha ikina munnaxupeya ni itthu sa muhoolo? Apaale nyuwo mooyeleela muteko anyu ni khamunsuwela moota munrowaanyu otxihaka emusi anyu, nyuwo munnaxupeya ni ovareleleya wa emusi anyu vaavo enkumanaayano maxupo a epolitika, othoiwa musurukhu naari ottharatthariwa omutekoni woolaleera. Neereke nyuwo munnaviriha maxupo ntoko ala? Wakhala weera aani, onoorowa woosivelani woona moota Yehova aakhavihenraawe ana Israeli vaavo yaavirihaaya maxupo ntoko ala.

² Ayuda yaakhala oBabiloniya wannatthuneya okhala oolipa murima weera ehiye ekumi yooreera yaaraayano oBabiloniya ni weetta mukwaha erooka elapo yeeyo yahaasuwelaaya. Ni emaara yaaphiñyaaya awosa yaapatxera oviriha maxupo a epoliitika, a othoiwa musurukhu ni ottharatthariwa. Menento atthu akina wannaaxupa wiikhoveleliha ovara muteko wooteka etemplu. Mwa yeeyo eyaakha ya 520 Kristu ahinaaye owa, Yehova aahaarumiha maprofeti eeli weera yaakhavihere atthu a Yehova otthikela wiilipihera waya. Hagayo ni Zakariya. (Hag. 1:1; Zak. 1:1) Ntoko ninrowaahu woona, muteko ole wa maprofeti waakhumela nnene. Sivinreene iyaakha 50 aYuda ale yaatthikenle oYerusalemu, wannatthuneya olipihiwa veeli. Namalepa a malamulo itthaniwa Ezra aakhuma oBabilonia mpaka oYerusalemu weera aalipihe atthu a Muluku, weera ehele nipuro noopatxera mweekumini mwaya omukokhorela Muluku. — Ezra 7:1, 6.

3. Makoho heeni ninkelaahu woona? (Miruku 22:19)

 ³ Iprofesiya sa Hagayo ni Zakariya, saahaakhavihera attthu a Muluku ovirelela omuroromela Yehova vaavo yaavirihaaya maxupo. Iprofesiya iya, pooti onikhavihera ororomela weera Yehova onoonikhavihera nihipwatthaka maxupo ninvirihaahu. (Musome Miruku 22:19.) Vaavo ninrowaaahu othokororaka mitthenka Hagayo ni Zakariya yaahimmaaya ni woona ntakihero na Ezra, muupuwele makoho ala. Moota heeni aYuda yaavoleelinwaaya ni maxupo ale? Mwaha wa heeni nintthuneyaahu ohela nipuro noopatxera mweekumini mwahu yootthuna ya Yehova vaavo enkhumelelaaya maxupo? Ni moota heeni ninkelaahu omuroromela Yehova etempu ninkumanaahuno maxupo?

4-5. Etthu heeni yaakhulumunle aYuda vaavo yaatekaaya etemplu?

⁴ Ayuda ale ephiyakaru oYerusalemu, awo yaakhalano muteko mwintxipale woopaka. Mwa etempu vakhaani awo yaapaka enkuwa ya Yehova ni awo yaahimpaka alisersi a etemplu. (Ezra 3:1-3, 10) Mene wiilipihera yaaraayano woopatxerani, waapatxera ovukuwa. Mwaha wa heeni? Mwaha wooweera, ohiya paahi opaka etemplu awo yannatthuneya tho opaka impa saya oweherera milako ni otxiha imusi saya. (Ezra 2:68, 70) Ni weera yaatxeerereye, awosa yannaviriha maxupo a ottharatthariwa ni amwiittani aya yaawo yaatthuna owootxeeliha opaka etemplu. — Ezra 4:1-5.

⁵ Opwaha mwa yeeyo awosa tho yannaviriha maxupo a othoiwa musurukhu ni epoliitika. Ohiya paahi eyo, nipuru nne yaakhalaaya yaapatxera olamuleliwa ni atthu oPersia. Vaavo aakhwiiyaawe mwene oPersia eeriwa Kiro, eyaakha ya 530 Kristu aahinaaye owa, mwene aattharelana eeriwa Cambises, aaheerera omutuphela Exipitu ni emaara yeeyo aarowaawe wExipitu, anakhotto awe yaahaavekela ana Israeli weera yaavahe eyootxa ni maahi etepihaka watxeerera maxupo a aYuda. Ni mwene mukina eeriwa Dario, apatxerakaru olamulela yaakhumelela maxupo a ohiiwanana. Itthu iya saaweeriha aYuda oxupeya ni moota yaakelaaya waatxihaka amusi aya. Mwaha wa maxupo ootheene ala yaavirihaaya, atthu akina yannuupuwelela weera, etempu ele khayaari yoorerela otthikela oteka etemplu. — Hag. 1:2.

6. Moovarihana ni Zakariya 4:6, 7, maxupo heeni makina aYuda yaavirinhaaya, ni etthu heeni Zakariya aaroromelinhaawe?

⁶ Mmusome Zakariya 4:6, 7. Ohiya paahi oviriha maxupo oothoiwa musurukhu ni epoliitika, aYuda tho yannattharatthariwa. Eyaakha ya 522, amwiittani yaaheeriha weera olamulelo wa aPersia, okhoottihe opakiwa etemplu. Mene Zakariya aahaaroromeliha aYuda weera Yehova aamwaavaha ikuru weera evirelele oteka etemplu nnaamweera ettharatthariwaka. Eyaakha ya 520 mwene Dario aahaakhulela weera aYuda etthikele oteka etemplu ni mpaka aavaha musurukhu weera muteko ole wooteka ovirelele. Owo tho aahima weera anamalamulela yaakhala muttetthe ole ekhavihere tho muteko ole. — Ezra 6:1, 6-10.

7. Mareeliho heeni aYuda yaakhenlaaya mwaha woohela nipuro noopatxera yootthuna ya Yehova?

 ⁷ Yehova aahaaroromeliha atthu awe, envarelaka muteko Hagayo ni Zakariya weera aamwaakhavihera yatthikela vale oteka etemplu. (Hag. 1:8, 13, 14; Zak. 1:3, 16) Ayuda yaalipihiwa vantxipale ni ele maprofeti yaahimmaaya ni yaatthikela opaka etemplu, eyaakha ya 520 awo yaamaliha etemplu ele sihivinre iyaakha 5. Awo yaahaakhela nikhavihero na Yehova ni mareeliho a mukhalelo wa weerutthuni ni woomunepani. Mwaha wooweera, yaapaka yootthuna ya Yehova ohiya oweha maxupo aya. Mwaha wa yeeyo awo yaawera omukokhorela Yehova ni ohakalala. — Ezra 6:14-16, 22.

8. Moota heeni masu a Hagayo eri va 2:4 ennikhaviheraaya ovirelela opaka yootthuna ya Yehova? (Nwehe enoota.)

⁸ Vaavo maxupo matokweene enaattamelaaya, nintthuneya wiiwelela nlamulo na olaleya mitthenka sooreera. (Mar. 13:10) Mene hiyo pooti woona okhala wooxupa ovara muteko woolaleera waakhala weera ninnaviriha maxupo oothoiwa musurukhu naari ovaanyihiwa omutekoni woolaleera. Eheeni enrowa onikhavihera ohela nipuro noopatxera muteko wa Yehova? Nintthuneya ororomelaka weera, ‘Muluku aanakhotto’ b ori vakhiviru vahu ni onoorowa onikhavira wakhala weera ninnahela nipuro noopatxera omwene awe ohiya soohaawela sahu, mwa yeeyo hiyo khanintthuneya woova etthu. — Mmusome Hagayo 2:4.

9-10. Moota heeni ntheli nimoha nonnaaya weera masu eri va Matheyo 6:33 ti a ekhaikhai?

⁹ Nwehe ntakihero na Oleg ni Irina, c Awosa anamathelana envara ntoko mapiyoneiro. Awosa aathaama weera yaakhavihere muloko mmoha eteritoriyo ekina, mene moottharelana awo yaayeleela muteko aya mwaha wooweera othowa musurukhu elapo ele waatepa, awo yaaviriha eyaakha emoha ehiphwannye muteko. Nnaamweera vareene hiiho, awosa yaahoona nikhavihero na Yehova ni ikwaha ikina awosa yannaakhela nikhavihero na asinna. Moota heeni yaawenraaya owina maxupo ala? Oleg yoowo woopatxerani aakhulumunwe ohimme ha, “waatteliwa ovara muteko woolaleera waanikhavihera owehexexa itthu sootepa otthuneya mweekumini mwahu.” Vaavo owo ni amwaariye yaasaaya muteko, awosa yannaatteliwa ni muteko woolaleera.

¹⁰ Nihiku nimoha etthikaka omutekoni woolaleera, awosa yaahoonelela weera nthamwene aya yaamusivelaaya vantxipale aaheetta mukwaha  wa ikilometru 160, weera aavahe isakola piili sa eyootxa. Oleg ohimme ha: “Nihiku nne, hiyo naahoona moota Yehova onnikosoopaawe ni moota asinna a mmulokoni ennisivelaaya, hiyo ninnaroromela weera Yehova, khonaahiya arumeyi awe nnaamweera nivirihaka maxupo yaawo nnuupuwelelaahu weera khanrowa omala.” — Math. 6:33.

11. Nakhala oolikaneene weera nipake yootthuna ya Yehova nroromeleke eheeni?

¹¹ Yehova ontthuna weera niwehexexeke muteko yoowo onoopola ikumi ori muteko woolaleera. Ntoko nonnaahu  eparagrafu ya 7 Hagayo aahaalipiha atthu a Yehova ohiya ottuli iyaakha sootheene iye muteko wooteka weemenlaaya ni weera epatxere ovara muteko ni ohakalala. Wakhala weera awosa yaampaka eyo, Yehova aahaalaihera weera ‘aamwaareeliha.’ (Hag. 2:18, 19) Nave hiyo tho, pooti ororomela weera Yehova anooreeliha wiilipihera wahu. Wakhala weera nnoovirelela ohela nipuro noopatxera muteko yoowo onivanhaawe.

12. Mwaha wa heeni Ezra ni aYuda akina aapankaaweno mukwaha yaatthuneyaaya okhalano nroromelo noolipa?

¹² Eyaakha ya 468 Ezra aaheetta mukwaha ni egrupu yanaaveeli ya aYuda okhuma oBabilonia mpaka oYerusalemu, Ezra ni aYuda ale yaamutthanre yaatthuneya okhalano nroromelo noolipa weera epake mukwaha ole mwaha, wooweera awosa yaanvira iphiro soowoopiha ni awosa yaakuxa muritti wa itxikuku ni eparata seiyo yaakelaaya ovaha otemplu, nto awo yannoova vantxipale wiiyeriwa. (Ezra 7:12-16; 8:31) Mootharelana, awosa yaahoonelela weera Yerusalemu khaakhanle oovareleleya ni khiyaakhanle atthu antxipale yaakhala weiwo nave milako sannatthuneya orehereriwa. Eheeni ninxutteraahu ni ntakihero na Ezra woohima sa olipiha nroromelo nahu ni Yehova?

13. Ezra aalipinhe moota heeni nroromelo nawe wa Yehova? (Nwehe enoota.)

¹³ Ezra aahoona moota Yehova onaakosoopawe atthu awe emaara yeeyo envirihaaya maxupo. Eyaakha ya 484 sa muttuli, onooneya weera Ezra aakhala oBabiloniya vaavo mwene Asuero aakumihenraawe nlamulo nooweera aYuda ootheene waatthuneya wiiviwa. (Esth. 3:7, 13-15) Ezra ni aYuda ootheene yaari veerisani, vaavo awosa yaasuwenlaaya etthu yereñye, yaaxupeya vantxipale ni yaapatxera otthuka ni wiikhupanyera envekelaka Yehova nikhavihero. (Esth. 4:3) Muupuwele moota Ezra ni aYuda akina yoonenlaaya vaavo itthu saatxentxalaaya ni ale yaatthuna owiiva aYuda yaahikhwa! (Esth. 9:1, 2) Itthu iya saamweeriha Ezra wiireherera wa maxupo yaawo yeera ekhumelele muhoolo, nave sannamuroromeliha weera Yehova pooti waakosoopa atthu awe nave saamweeriha ororomela weera Yehova onimwaakosoopa atthu awe. d

14. Murokora mmoha oxuttenre eheeni vaavo onnaawe nikhavihero na Yehova vaavo aavirihaawe maxupo?

¹⁴ Vaavo nnoonaahu moota Yehova onnikosoopaawe etempu ya maxupo, nroromelo nahu nuuwo ninnakhala noolipa. Moone ntakihero na Anastasia yoowo onkhala wEuropa. Owo aalakela ohiya muteko awe mwaha wooweera makolegaawe yannamukhanyerera weerela eparte epoliitika, owo ohimme ha: “Ela yaari ekwaha yoopatxera mweekumini mwaka kahaakhalannaaka musurukhu, miyo kaamuhiyera mwaha ole Yehova ni kaahoona moota aakikosompaawe. Wakhala weera kinooyeleela veeli muteko, nkinrowa tho woova, wakhala weera tiithi aka a wiirimu onnakikosoopa olelo, moohihovela onoorowa tho okikosoopa omaalo.”

15. Eheeni yaamukhavihenre Ezra ovirelela omuroromela Yehova? (Ezra 7:27, 28)

 ¹⁵ Ezra aahoona ntata na Yehova mweekumini mwawe. Vaavo Ezra uupuwelaawe moota Yehova aamukhavihenraawe khalayi, owo annaroromela weera Yehova aamurowa omukhavihera. Nkawehani masu ala ‘ntata na Yehova Muluku aka naari ni miyo.’ (Mmusome Ezra 7:27, 28.) Ezra aahuuluma masu mamoha-moharu mwa ikwaha 6 mwa eliivuru yeeyo uupuxerinwaawe weera alepe. — Ezra 7:6, 9; 8:18, 22, 31.

16. Etempu heeni ninrowaahu woona ntata na Yehova mweekumini mwahu? (Nwehe efootu.)

¹⁶ Yehova pooti onikhavihera vaavo ninvirihaahu maxupo. Mwa ntakihero, vaavo nnanvekelaahu patarau ahu weera anivahe iferiya vakhaani weera niwere omoonela kongresu naari vaavo nnanvekelaahu patarau ahu weera atxentxe iwoora ninvaraahu muteko weera niwere woonela mithukumano, hiyo ninnakhalano eparakha yoowoona ntata na Yehova mweekumini mwahu ni yookhumelela pooti okhala yooreera opwaha ele naawehereraahu. Nto nroromelo nahu ni Yehova nnoorowa okhala noolipa.

17. Moota heeni Ezra oonihenraawe wiiyeviha vaavo aavirihaawe maxupo? (Nwehe efootu ya vakaapani.)

¹⁷ Ezra aahiiyeviha ni aanvekela Yehova nikhavihero moorweela wa nivekelo. Ikwaha sootheene owo aakhalaawe ooxupeya mwaha wa itthu aakelaawe opaka, moowiiyeviha Ezra annavekela nikhavihero wa Yehova. (Ezra 8:21-23; 9:3-5) Ana Israeli akina, yannoona moota Ezra aamuromelaawe Yehova ni yaapatxera omukhavihera ni otakiha nroromelo nawe. (Ezra 10:1-4) Vaavo ninxupeyaahu mwaha wa maxupo ntoko othoiwa musurukhu ni moota emusi ahu enkelaaya okhala oovarelelaya hiyo nintthuneya onvekela Yehova ni omuroromela owo.

18. Eheeni enrowa onikhavihera olipiha nroromelo wa Yehova?

¹⁸ Nakhala oowiiyeviha ni waasa nikhavihero na Yehova ni ohiya weera asinna enikhavihere, nroromelo nahu nnoorowa okhala noolipa. Erika yoowo arinono anamwane araru, annaroromela weera Yehova aamurowa omukosoopa nnaamweera yaakhumelenle erisa. Mwa etempu vakhaani owo aamuyeleela mwanawe ahaakunve omuyara nave tho aahaayeleela aiyawe oosiveleya, uupuwelelaka itthu seereñye owo ohimme ha: “Khonwereya osuwela vahinaaye itthu sootheene Yehova onrowaawe opaka weera onikhavihere, mwaha wooweera nikhavihero pooti ophiya mootutuxera. Yehova ohaakhula mavekelo aka moorweela mwa itthu asinthamwene aka yaahimaaya ni yaapakaaya. Vaavo kinaahulelaaka murima asinthamwene aka onnakhala wookhweya awo okikhavihera.”

19-20. Eheeni ninxutteraahu ni aYuda yahaawenre otthikela oYerusalemu?

¹⁹ Hiyo tho pooti oxuttera ni ntakihero na aYuda yaawo yahaatthikenle oYerusalemu, akina a yaawo khiyaawenre otthika mwaha wooweera yaari oowuuluvala, oovoreiwa ni akina yaakosoopa imusi saya, nnaamweera vareene hiiho, awo yahaavaha nikhavihero aYuda ale yaatthikela oYerusalemu. (Ezra 1:5, 6) Sivinreene iyaakha 19, aYuda yaahanle oBabiloniya, yannavirelela oveleela soovaha oYerusalemu. — Zak. 6:10.

²⁰ Nnaamweera nihiweraka opaka itthu sintxipale omutekoni wa Yehova, nroromeleke weera owo onnoona wiilipihera wahu ni eyo ennahakalaliha murima awe. Ninsuwela moota heeni eyo? Mwaha wooweera mahiku a Zakariya Yehova anvekela mprofeti awe weera apaka ekorowa ya etxikuku ni eparata seiyo saarumihinwe ni aYuda yaahanle oBabiloniya. (Zak. 6:11) “Ekorowa” ele yaathoonyera “muupuxero” wa sooveleela iye. (Zak. 6:14, enoota.) emoha-moharu, Yehova khanrowa ottiwala wiilipihera wahu onvarela mwa etempu yooxupa. — Aheb. 6:10.

21. Eheeni enrowa onikhavihera owehexexa ohoolo ni nroromelo?

²¹ Moohihovela, hiyo nneereke oviriha maxupo mahiku ala oomalihera, ni maxupo awo eneereke waatxeerereya erowaka muhoolo. (2 Tim. 3:1, 13) Mene khanintthuna weera maxupo enikhulumuleke mweekumini mwahu. Muupuweleke masu Yehova aalenlaawe atthu awe mahiku a Hagayo: ‘Miyo kiri ni nyuwo . . . Muhoove.’ (Hag. 2:4, 5) Nave hiyo khaninhovela weera Yehova onookhala vakhiviru vahu wakhala weera ninnapaka ele ninweraahu weera nipaake yootthunaawe. Naavarihelaka muteko ele ninxutteraahu ni maprofeti Hagayo ni Zakaria, ni otthara ntakihero na Ezra, nnoovirerelela omuroromela Yehova nihipwatthaka maxupo enrowa okhumelela muhoolo.