MWAHA ONTHOKORORIWA 39
ETXIPO 125 Atthu “Òmoriwa Ikharari” Anoohakalala
Mphwanye ohakalala onkhumelela mwaha wa ovaha
“Ovaha ti etthu yorera opwaha wakhela.” — MIT. 20:35.
ELE NINKELA AHU OXUTTERA
Ninrowa woona mikhalelo sa olipiha ni waatxeerera ohakalala nimphwanyaahu mwaha wa ovaha.
1-2. Mwaha wa heeni ninttottelaahu mureerelo vaavo nipattuxinwaahu ni mukhalelo woohakalala vantxipale mwaha woovaha opwaha waakhela?
EMAARA Yehova aapakaawe atthu, owo ohaapaka ni owera woophwanya ohakalala mwaha wa ovaha ohiya mwaha wa ovahiwa. (Mit. 20:35) Neereke eyo entthuna ohima weera hiyo khaninhakalala vaavo ninvahiwaahu etthu? Hooye. Hiyo ninnahakalala vaavo ninvahiwaahu etthu. Mene hiyo ninnahakalala vantxipale vaavo ninvahaahu. Ni ohima ekhaikhai, Yehova oonipaka ni mukhalelo ola weera nttotteleke mureerelo asineene ahu. Moota heeni?
2 Mwaha woonipaka mwa mukhalelo ene yoola, ninnawera waatxeerera ohakalala wahu. Hiyo pooti waatxeerera ohakalala iwo naasaaseraka iparakha soovaha. Ola mukhalelo wootepa oreera wa moota hiyo nipakinwaahu. — Nsal. 139:14.
3. Mwaha wa heeni Yehova onhimmwaawe okhala ‘Muluku oohakalala’?
3 Soolepa sinnahima weera ovaha onnaniphwanyiha ohakalala, mwa yeeyo, khanintikhina vaavo Biblya ommuhimaawe Yehova okhala “Muluku [oohakalala].” (1 Tim. 1:11) Owo opatxerinhe ovaha. Ntoko murummwa Paulo ohimmaawe, mwaha wa yoowo “ninnakhala n’okumi ni ninnètta ni ninnahala.” (Mit. 17:28) Mweekhaikhai, “eparakha eri yothene ni yovaha eri yothene yomalela” enkhuma wa Yehova. — Yak. 1:17.
4. Etthu heeni enrowa onikhavihera okhala oohakalala?
4 Ootheene hiyo, ninnatthuna woona ohakalala onkhumelela mwaha wa ovaha. Hiyo pooti opaka eyo ntakihaka ovaha wa Yehova. (Aef. 5:1) Emaara ninrowaahu othokororaka eyo, nnoorowa woona etthu nintthuneyaahu opaka wakhala weera nnoona weera ovaha wahu khonxukureliwa. Itthu iyo sinoorowa olipiha ni waatxeerera ohakalala nimphwanyaahu mwaha wa ovaha.
MUTAKIHEKE OVAHA WA YEHOVA
5. Itthu heeni sa weerutthuni Yehova onnivahaawe?
5 Mikhalelo heeni sinoonihera ovaha wa Yehova? Moone matakihero vakhaani. Yehova onnanivaha itthu sa weerutthuni. Khaiyene ikwaha sootheene hiyo ninnakhalano itthu soorika, mene mwaha wa Yehova, antxipale a hiyo ninnakhalano iye ninhaawelaahu. Mwa ntakihero, owo onnanivaha yootxa, ikuwo ni nipuro nookhala. (Nsal. 4:9 [4:8, Tradução do Novo Mundo]; Math. 6:31-33; 1 Tim. 6:6-8) Neereke Yehova onnivaha itthu sa weerutthuni mwaha wooweera onimwiikhanyerera? Hooye! Mwaha wa heeni Yehova ompakaawe eyo?
6. Eheeni ninxutteraahu ni Matheyo 6:25, 26?
6 Ohima mookwasa, Yehova onnanivaha itthu sa weerutthuni mwaha wooweera owo onnanisivela. Moone masu a Yesu emphwanyeya va Matheyo 6:25, 26. (Mmusome.) Yesu aavarihela matakihero a soopattuxiwa. Awuulumaka asipalame, Yesu enre: “Khanàla, khanahepha ni khanìyathi mukhwokweni.” Moone ele ohimmaawe moottharelana: “Nto Atith’inyu a wirimu annàtxiha.” Moottharelana onnapaka nikoho: “Vano nyuwo ni asipalame, mutokwene tani?” Yesu aatthuna ohima eheeni? Yehova onnaavaha mwiitti ale emmukokhorela waapwaha asipalame. Wakhala weera Yehova onnakosoopa soohaawela sa asinama, nroromeleke weera owo onahala onikhavihera-tho! Ntoko tiithi ookosoopa, Yehova onnakhavihera emusi awe mwa nsivelo. — Nsal. 145:16; Math. 6:32.
7. Mwa mukhalelo heeni ninrowaahu otakiha ovaha wa Yehova? (Nwehe efootu.)
7 Ntoko Yehova, hiyo-tho pooti ovaha ni itthu sa weerutthuni. Mwa ntakihero, neereke nyuwo moomusuwela munna naari murokora onhaawela yootxa naari yoowara? Yehova pooti woovarihelani muteko nyuwo weera akosoope yoohaawela awe. Atthu a Yehova ennasuweliwa mwaha wookhala oovaha emaara yeeyo enkhumeleyaaya maxupo. Mwa ntakihero, mpuwa mwa eretta ya COVID-19, asinna ni asirokora yaahaavaha eyootxa, ikuwo ni itthu ikina ale yaahaawela. Antxipale yaahivaha ele yaaraayano weera ekhavihere muteko wa elapo yootheene, eyo yaahaakhavihera asinna ootheene yaaviriha maxupo. Awo yaavarihela muteko masu eri va Aheberi 13:16: “Muhittuwale opanka sorera ni okawana, wona wi amakeya si yala annamusivela Muluku.”
Ootheene ahu nintthuneya otthara ntakihero na Yehova na ovaha (Nwehe eparagrafu 7)
8. Mwa mukhalelo heeni ninttottelaahu mureerelo owera wa Yehova? (Afilipi 2:13)
8 Yehova onnanivaha ikuru. Yehova onnahakalala waavaha ikuru arumeyi awe oororomeleya emmukokhorela. (Mmusome Afilipi 2:13.) Neereke nyuwo mootoko opaka nivekelo nvekelaka weera nwine yooweereriwa naari nvekelaka weera nwere ovilela maxupo? Pooti weera nyuwo mootoko opaka nivekelo, nvekaka ikuru weera nvirelele opaka itthu sa vanihikuni. Vaavo nivekelo nanyu naakhulinwaaya, pooti weera munnaakhulela ele murummwa Paulo olempaawe: “Kinnawera sothesene mwa yowo onakilipiha.” — Afil. 4:13.
9. Moota heeni ninrowaahu otakiha moota Yehova onvarihelaawe muteko owera wawe? (Nwehe efootu.)
9 Nnaamweera nreene atthu oohimalela, hiyo pooti omutakiha Yehova nivarihelaka muteko ikuru sahu. Hiyo khaninwera waavaha atthu akina ikuru ntoko Yehova oneeraawe. Mene hiyo pooti ovarihela muteko ikuru sahu weera naakhavihere atthu akina. Mwa ntakihero, hiyo pooti opaka miteko sa vaate naari waakhavihera asinna oowuuluvala, naari envoreiwa opaka miteko sa vaate. Wakhala weera mikhalelo sahu sinnanaakhulela, hiyo pooti wiivaherera weera nikhavihere olimpari naari oreherera Empa ya Omwene. Ovarihela muteko ikuru sahu mwa mikhalelo sene seiya, onoorowa waakhavihera atthu akina yaawo emmukokhorela Yehova.
Hiyo pooti ovarihela muteko ikuru sahu weera naakhavihere atthu akina (Nwehe eparagrafu 9)
10. Moota heeni ninrowaahu ovarihela muteko owera wa masu, weera naakhavihere atthu akina?
10 Nave-tho muhittuwale weera masu aakhalano owera. Neereke nyuwo moomusuwela mutthu aarowa ottottela mureerelo masu oolipiha? Naari nyuwo moomusuwela mutthu onhaawela nimaaliho? Mwa itthu iya, munoonela hayi nyuwo opatxeriha omwaasa mutthu owo? Nyuwo pooti omuxekura owannyawe, omuligarela ni telefooni naari omulepela emensagem. Etthu nyuwo muntthuneyaanyu ohima, khontthuneya okhala yoowaatta. Masu vakhaaniini paahi, ookhweya enkhuma va murimani, pooti okhala yaawo mutthu owo onhaawelaawe weera avirelele okhala oororomeleya nihiku nno naari wiisoona nnene mwa itthu onvirihaawe. — Mir. 12:25; Aef. 4:29.
11. Moota heeni Yehova onvarihelaawe muteko osuwela wawe?
11 Yehova onnavaha miruku. Murummwa Yakobe olepa enre: “Akhalá mutthu onathoiwa miruku, anvekeleke Muluku, owo onàvaha atthu othene n’ohakalala ni ahiruwanaka, ni anavahiwe.” (Yak. 1:5; enoota) Ntoko masu ala enooniheraaya, Yehova khanvitha osuwela wawe. Owo onnaavaha atthu akina. Moone-tho weera Yehova onnapaka eyo ‘ahuulumelaka’. Owo khantthuna weera nooveleleke onvekela miruku. Veekhaikhai owo onnanooperera weera ninvekeleke miruku. — Mir. 2:1-6.
12. Iparakha heeni nraahuno soowaaleela atthu akina itthu nxuttenraahu?
12 Nankha hiyo? Neereke hiyo pooti omutakiha Yehova naaxuttihaka atthu akina ele nsuwenlaahu? (Nsal. 32:8) Atthu a Yehova aakhalano iparakha sintxipale soowaaxuttiha atthu akina ele exuttenraaya. Mwa ntakihero, ikwaha sintxipale ninnaaxuttiha anamalaleera anyowani mmutekoni moolaleera. Asitokweene a mmulokoni ennaakhavihera moopixa murima arumeyi ookhavihera opaka nnene soothanleliwa saya mmulokoni. Nave ale erinono osuwela voohima sa muteko wooteka, ennaaxuttiha ale ehisuwenle weera ekhumeleke nnene mmutekoni mmo.
13. Emaara nnaaxuttihaahu atthu akina, moota heeni ninrowaahu otakiha moota Yehova onvahaawe miruku sawe?
13 Ale enxuttiha ennapaka nnene otakiha moota Yehova onvahaawe miruku. Muupuweleke weera Yehova onnavaha miruku mooreera murima. Moolikana ni eyo, hiyo nintthuneya waaxuttiha atthu akina ele nxuttenraahu. Hiyo khaninhiya waaxuttiha atthu akina noovaka weera ole nimmuxuttihaahu anoosuwela vantxipale onipwaha hiyo. Nave-tho hiyo khontthuneya weera: ‘Khaavo okixuttinhe! Owo-tho axuttereke meekhaawe.’ Mukhalelo ola khontthuneya okhala variyari va atthu a Yehova. Opwaha mwa yeeyo, hiyo onnatthuneya opaka ele ninweraahu weera naaxuttihe atthu akina mooreera murima. (1 Ates. 2:8) Ninweherera weera awo “enelikane wàhusiha akina tho.” (2 Tim. 2:1, 2) Mwa mukhalelo ene yoola, vaavo hiyo ninvirelelaahu oxuttihana mukina ni mukhwaawe ninnaatxeerera osuwela wahu nave ninnakhala oohakalala.
WAKHALA WEERA SOOVAHA SAHU KHASINXUKURELIWA
14. Moota heeni atthu akina enoonelaaya itthu nnaavahaahu?
14 Vaavo nnaavahaahu asinna ni asirokora, imaara sintxipale awo ennanxukurela. Awo pooti oninviyarela emensagem enxukurelaka naari pooti woonihera oxukurela waya mwa mukhalelo mukina. (Akol. 3:15) Oxukurela iwo onnaatxeerera ohakalala wahu.
15. Etthu heeni nintthuneyaahu wuupuwelaka vaavo atthu akina ehinxukurelaaya?
15 Veekhaikhai, atthu akina khenoonihera oxukurela. Imaara ikina hiyo pooti oviriha etempu, ovarihela ikuru sahu, ni ovaha itthu sahu. Mene moottharelana mutthu owo nimpakenlaahu ohoonihera oxukurela. Wakhala weera eyo yooheereya, moota heeni ninrowaahu osepa oyeleela ohakalala wahu ni oxupeya? Muupuwelele yoolepa ya mwaha onthokororiwa Miteko 20:35. Ohakalala wahu mwaha woovaha khonlipa ni ele nnaakhelaahu. Hiyo pooti ohakalala mwaha woovaha nnaamweera atthu akina ehinxukurelaka. Moota heeni? Moone itthu vakhaani.
16. Itthu heeni nintthuneyaahu owehexexaka vaavo ninvahaahu?
16 Nimutakiheke Yehova. Owo onnaavaha atthu itthu sooreera nnaamweera akina ehimuxukurelaka. (Math. 5:43-48) Yehova oolaihera weera vaavo hiyo ninvahaahu ‘nihiwehereraka waakhela etthu, nlivo [nahu] nnaakhale ntokotoko.’ (Luka 6:35) ‘Etthu eri poothe’ pooti ohela mpuwa oxukureliwa. Nnaamweera nxukureliwaka naari nihixukureliwaka, ikwaha sootheene Yehova onoorowa onireeliha mwaha wa itthu nimpakaahu weera naakhavihere atthu akina, mwaha wookhala atthu ‘oovaha nootteeliwa murima.’ — Mir. 19:17; 2 Akor. 9:7.
17. Moota heeni ninrowaahu ovirelela okhalano moonelo wooreera? (Luka 14:12-14)
17 Vaavo ninkhalaahu ni moonelo wooreera woohima sa ovaha, ninnaphwanya miruku soovareleya muteko va Luka 14:12-14. (Mmusome.) Khaiyene ti woonanara owaakhela atthu naari waavaha etthu atthu ale nsuwenlaahu weera enoowera ontthikihera. Vanonto, nankha noonelela weera ninnavaha niwehereraka otthikiheriwa? Waamukhala wooreera weerera otthara miruku sa Yesu. Hiyo pooti onvaha etthu mutthu nsuwenlaahu weera khanrowa owera onitthikihera. Mwa mukhalelo ene yoola, hiyo nnoorowa okhala oohakalala mwaha wooweera nimmutakiha Yehova. Nave-tho mukhalelo ene yoola onoorowa onikhavihera ovirelela okhala oohakalala nnaamweera atthu akina ehinxukurelaka.
18. Eheeni enrowa onikhavihera waavaha atthu akina?
18 Musepeke waavaha mathowa atthu akina. (1 Akor. 13:7) Wakhala weera atthu akina khennixukurela, hiyo pooti wiikoha ha: ‘Neereke awo mweekhaikhai toohixukurela, naari aroottiwala onxukurela?’ Pooti weera aakhala mathowa mantxipale enweeriha ohoonihera oxukurela. Akina pooti oxukurela vantxipale, mene onnaaxupa woonihera oxukurela waya iwo. Awo pooti woona wuuliha muru okhaviheriwa, otepaxa wene wakhala weera khalayi awo ti yaakhavihera atthu akina. Nihipwatthaka etthu, nsivelo nnooneeriha waavaha asinna ni ovirelela ohakalala mwaha woovaha. — Aef. 4:2.
19-20. Mwaha wa heeni opixa murima onnikhaviheraaya vaavo nnaavahaahu atthu akina? (Nwehe efootu.)
19 Mpixeke murima. Uulumaka woohima sa ovaha, mwene oosuwela Salomoni olempe ha: “Ovonyere mukatthe vasulú va mahini, niwoko evinrene mahiku mantxipale, onophwanya tho.” (Koh. 11:1) Ntoko enooniheraaya masu ala, atthu akina pooti onxukurela mwaha wa etthu nipankaahu, “evinrene mahiku mantxipale.” Moone yooweereya emoha yeeyo eniiwanyeiha ekhaikhai ela.
20 Mwa iyaakha sintxipale, mwaarawe mutokweene mmoha a esirkwiitu, aamulepela ekarta murokora aapatisinwe viinaanoru amoopereraka ovirelela okhala oororomeleya. Sivinreene iyaakha 8, aahaakhula ekarta ele eeraka: “Miyo kinoona weera kintthuneya paahi olepa nikhavihero nyuwo mukivanhaanyu moota nikikhavihenraaya mpuwa mwa iyaakha sintxipale nnaamweera nyuwo muhisuwelaka.” Owo onnavirelela eeraka: “[Ekarta anyu] yaari ya nsivelo mene etthu mulempaanyu, yookivara murima ni miyo nkinttuwala.” a Ahimakaru maxupo aavirihaawe, murokora ole enre: “Ikwaha ikina miyo kannatthuna ohiya ekhaikhai ni miritti kaaraakano. Mene ekarta nyuwo mukilepenlaanyu, yookivara murima. Nave yookikhavihera . . . ovirelela orowa ohoolo.” Owo onnaatxeerera oriki: “Mpuwa mwa iyaakha iya 8, khiyaavo etthu ekina ekikhavihenre ehikhanle ekarta mukilepenlaanyu.” Nkuupuwelani moota mwaarawe mutokweene a esirkwiitu aahakalanlaawe emaara aakhenlaawe ekarta ela, “evinrene mahiku mantxipale”! Nave hiyo pooti oxukureliwa evinreene etempu yintxipale mwaha wa etthu nipankaahu.
Hiyo pooti oxukureliwa mwaha wa etthu nivanhaahu evinreene etempu yintxipale (Nwehe eparagrafu 20) b
21. Mwaha wa heeni nyuwo muraanyu oolikaneene ovirelela otakiha ovaha wa Yehova?
21 Ntoko nihimmaahu woopatxerani, Yehova oonipattuxa ni mukhalelo woothanleya. Nnaamweera onisivelaka ovahiwa, ninnahakalala otepaxa wene vaavo nnaavahaahu atthu akina. Ninnahakalala vaavo ninweraahu waakhavihera asinna. Nave ninnahakalala vaavo awo ennixukurelaaya. Menento nnaamweera mutthu ninvanhaahu ooniheraka oxukurela naari hoye, nintthuneya ohakalala mwaha woopaka etthu yooreera. Muhittuwale weera itthu sootheene munvahaanyu, ‘Yehova onoowera woovahani opwaha seiyo.’ (2 Sow. 25:9) Hiyo khaninwera ovaha ompwaha Yehova! Ni etthu enniphwanyiha ohakalala, otthuveliwa ni Yehova. Mwa yeeyo nikhale oolikaneene, ovirelela omutakiha Tiithi ahu a wiirimu yoowo ori oovaha.
ETXIPO 17 “Kinnitthuna”
a Yoolepa aalepelinwaawe murokora ole, yaari 2 Yohani 8, yoowo oneera: “Mwìkhapelele wera sihoriheyeni seiyo mwènranyu, mene mwàkhele ntthuvelo nomalela.”
b OTAPHULELA WA EFOOTU YA : Efootu ela, amwaarawe mutokweene mmoha a esirkwiitu yaamulipiha murokora mmoha ni yaahixukureliwa sivinreene iyaakha sintxipale.
