Khanintthuneya wuupuwela weera, okhala weera oohusera ale 70 khiyaakhanlevo vaavo Yesu aapakaawe yootxa ya Apwiya ohiyu, Yesu aaroohiwaakhulela naari yaaroomutthawa. Yesu aatthuna weera etempu ele akhale paahi vamoha ni arummwa awe ale 12.

Yesu aahiwaakhulela oohusera 12 nave-tho ale 70. Woopatxerani owo aahaathanla variyari va oohusera ale antxipale alopwana 12, yaawo aavanhaawe nsina na arummwa. (Luka 6:12-16) Owo aari oGalileya vaavo aawiitthannaawe “òhusera mulokó orwa eli” ni “àhavaha yawo ikuru ni owera wowomola minepa sonanara ni wopenuxa iretta.” (Luka 9:1-6) Muhoolo mwaya oYudeya, Yesu “[aahaathanla] òhusera akina milokó mithanu ni mili orwa òhusera eli [70], ni yàhàruma yawo eli eli.” (Luka 9:51; 10:1) Onooneya weera Yesu aakhalano atthareli mapuro oovirikana mwemmo saalaleeriwaayamo mitthenka sooreera.

Ayuda yaari atthareli a Yesu yaaheereke omutxa mpasika vayaakhani apaale vamoha ni amusi aya. (Ott. 12:6-11, 17-20) Vaavo Yesu aahalelaawe okhwa, owo vamoha ni arummwa awe ale 12 yaahirowa oYerusalemu. Mene owo khaawompe arummwa ootheene oGalileya, oYudeya ni oPereya weera emutxe mpasika. Onooneya weera emaara ele, Yesu aatthuna okhala paahi ni arummwa awe 12. Owo aalenle ha: “Kòhawela ni murima wothene omutxa mpasika ola ni nyuwo, kihàkuvale ohawa.” — Luka 22:15.

Yaahikhala mathowa ooreera weera eyo yeereye. Yesu aamurowa okhwa ntoko “Mwaputtiputthi a Muluku, onvinxa yottheka ya elapo.” (Yoh. 1:29) Eyo yaakela weereya oYerusalemu weiwo aavahiwaawe Muluku amakeya khalayi. Okhwa wa Yesu waamukumihera ovuluxiwa opwaha ovuluxiwa waakhanle mwaha wa eyootxa ya mwaaputtiputthi ya imusi sa Israeli, emaara yaakhumaaya wExipitu ohiyu. (1 Akor. 5:7, 8) Etthu Yesu aapankaawe yaamweeriha weera arummwa ale 12, ekhale atthu yaakela okumihera muloko weekristu. (Aef. 2:20-22) Ni-tho ecidade yootteela, Yerusalemu, ookhalano “mathipelo mulokò orwa meli” mwemmo elempwalaayamo “masina mulokò orwa meli Àrummwa a Mwaputtiputthi.” (Apok. 21:10-14) Aani, arummwa oororomeleya, yaamukhalano muritti mutokweene weera ekwanele yootthuna ya Muluku. Mwa yeeyo, ninniiwexexa mwaha wa heeni Yesu aatthunaawe okhala vamoha naawo mpasika ole oomalihera ni ele yaattharelana, yootxa ya Apwiya.

Arummwa 70 ni arummwa akina, khayaakhanle vamoha emaara Yesu aapakaawe yootxa ele. Nnaamweera vareene hiiho, arummwa ootheene yeera ekhale oororomeleya, yaamurowa ottottela mureerelo etthu ele Yesu aarummaawe opakiwa, eyootxa ya Apwiya. Ootheene ale moovira etempu yaakhanle akristu oothanliwa, yaamurowa ovolowa mwa nivarihano na Omwene nenno Yesu aalenlaawe oohusera awe ohiyu ole. — Luka 22:29, 30.