Emusi aka yaakhala oTellancourt muttetthe mwaamukhaani epantte enikhuma nsuwa oFrança. Apaapa yaayariwe oFrança ni amaama wItália. Kirina ene iyaakha 8, naahithaamela muttetthe waavara aya muteko atthu oohaawa, oRoma, wItalia. Okumi ahu waakhala wooxankiha. Anamuyari aka yaamakela onyakulihana mwaha wa othowa musurukhu.

Kirina ene iyaakha 15, amaama yaahikitumererya waapaka apatthani asya. Nto kaahipacerya oviriha iwoora sinci kihikhanle owaani. Moohipisa kaahipatthana ni atthu oohiloka. Nihiku nimosa, aahikaattamela mulopwana aakhala ntoko mpatthani. Nto kaaheemya mirette soohapala aakivanhe awe, maana kaaphavela okhala ntoko mutthu muulupale. Mowaakuveya kaahipacerya osiveliwa ni mirette iyo ni orupihana woohiloka. Kaamakela otupheliwa wira kiirihiwe itthu soohiirya. Nkaavaha efaita okumi, ni okhwa khiwaakoopiha. Moohipisa, waahikiphwanya omeekha. Kirina ene iyaakha 16 kaahimananiha wiixiiva, nto kaahiwurya egarafa emosa ya wiskhi ni kiirihela vatthiyani. Mwaha wa yeeyo, kaahiviriha mahiku 3 kihisuwelaka etthu.

Nto kaahipacerya ovaha efaita okumi, masi kaari mutthu ootakhala ni mulavilavi. Kaanirupa ni atthu yaakiveka, kaanaavaha mirette soohapala, nuumala-vo kaaniwiiyerya itthu saya. Igrupu sinci sa anakirime saanikiruma oroiha mirette soohapala mapuro manceene a wItália. Kaamakela okhalana mulattu ni mapoliisia. Okumi aka waamutepa otakhala. Masi kaanikupali wira okumi waahikhalana yoolakela. Nto kaahinvekela Muluku kiriki: “Mukivahe mwaakha mmosa paahi wa murettele ni ohakalala”.

Kirina ene iyaakha 24, kaahilakela othaamela wInglaterra, maana nkaakhala saana mwaha wa muteko aka wa otumiha mirette. Masi kihinatthi othaama, kaahirowa waaxukurya amaama, ni kaahitikinihiwa omoona mulopwana Annunziato Lugarà, avaanelaka naawo voohimya sa Biibiliya. * Okhala wira kaahisuwela wira khalai aari nakirime, kaanoova ni kaahimukoha etthu arweela awe opuro ole.  Aahikileela wira aahirukunuxa murima awe khukhala Namoona a Yehova. Nto aahikitumererya ovaanela ni Anamoona nuumala ophiya wInglaterra, nto kaaheemya. Masi nuumala ophiya elapo ele, kaahitthikela mweettelo aka wootakhala.

Nihiku nimosa, kaahikumana ni Anamoona a Yehova ekawaka irevista Owehaweha ni Despertai! ephiro emosa enivira atthu anceene, oLondres. Kaahuupuwela etthu kaamuleihenyre aka Annunziato, nto kaahiveka yoosoma ya Biibiliya.

Ele kaaxutta aka mBiibiliyani yaanikisivela. Mwa ntakiheryo, yoolepa ya 1 Yohani 1:9 yaahikivara murima yeeyo enimulavula Muluku eriki: “Nahimyaka wira: ‘Nottheka’, Muluku onomaliherya sihimyalyawe, ettelaka exariy’awe: eyo p’iyo, ononlevelela itampi sahu, ononrapiha wa sotakhala sothene”. Eversu eyo yaahikivara murima vanceene maana kaanixankiheya mwaha wa mweettelo aka woonanara. Moohipisa kaahipacerya orowa mithukumano empa ya Omwene ya Anamoona a Yehova. Awo yaahikaakhela moohakalala. Okathi koonale aka wira yaaniiwanana ni ophentana kaahiimananiha wiirela mpantta emusi eyo yowiiraana.

Nnaamwi kahaarina mixankiho sinceene wira kihiye olya mirette ni orupihana woohiloka, vaanikivila orukunuxa mweettelo aka. Nto kaahoona wira kaahaana opacerya waattittimiha ni waavaha efaita atthu. Tthiri, nlelo kinniwanana ni soolema sikina soohiloka. Masi kikhaliheriwaka ni Yehova koowerya marukunuxo. Nuuvira myeeri 6 kimusomaka Biibiliya, kaahibatiziwa khukhala Namoona a Yehova. Eyo yiiraneyale eyaakha ya 1997.

Nuumala obatiziwa, kaahimuthela mwali mmosa Barbara yoowo-tho aabatiziwe niinano khukhala Namoona a Yehova. Okathi mpatthani aka a khalai oonale awe wira kaahirukunuxa mweettelo aka, owo-tho aahipacerya omusoma Biibiliya. Nuuvira okathi aahibatiziwa khukhala Namoona a Yehova hoothe ni murokorawe. Nave-tho murokoraka oowuuluvala yoowo aarina iyaakha 80, aahibatiziwa-tho ahinatthi okhwa.

Vano ka mutokweene a mmulokoni. Nave-tho miyo ni mwaaraka ninvara muteko wa Muluku wa okathi wotheene wInglaterra, naakhaliheryaka atthu anilavula nttaava na wItália. Ikwaha sikina kinniriipiwa murima mwaha wa mweettelo aka wa khalai, masi Barbara tonikilipiha ikwaha sotheene. Nave-tho kookhalana etthu yeele kaaphavela aka okhuma khalai, eyo piiyo: emusi yoohakalala ni Tiithi oophenta. Kaahinvekela Muluku wira okivahe mwaakha mmosa paahi wa murettele ni ohakalala, masi owo ookivaha itthu sinceene ovikana iye kanvekenle aka!