1. Olelo-va, etthu xeeni atthu anipaka aya?

 OLELO-VA, atthu annitepa wiithokorerya mmensaya paahi ohiya waathokorerya atthu akina. Mwa ntakiheryo, atthu akina annimurumeela redes sociais aphavelaka wiittottopa aahiiso wiira yooniherye etthu anivara aya. Masi atthu vakhaani paahi taniphavela onvuwiha Yehova Muluku. Mwaha ola, ninrowa othokorerya ele enitaphulela aya onvuwiha Yehova ni etthu enniiriha opaka eyo. Nave-tho, ninrowa wiixutta moota wonvaha Muluku ovuwa oniphwanela awe, ni moota owo onrowa awe ovuwiha nsina nawe moohipisa-va.

ONITAPHULELA EXEENI ONVAHA OVUWA YEHOVA?

 2. Yehova oonihenrye sai ovuwa wawe omwaako Sinayi? (Nwehe eteseenyu ya vakaapani.)

² Nuulumo noowi ovuwa, nintaphulela exeeni? Mbiibiliyani, nuulumo noowi “ovuwa”, pooti otaphulela etthu enimwiiriha mutthu owo osuweliwa vanceene. Yehova aahipaka etthu yootikiniha, yeeyo yooniherya ovuwa wawe nuumala nloko na Isarayeli woopoliwa wExiitu, weiwo naari aya ipottha. Nkahaya muupuwele ela: Imilyau sinceene sa aisarayeli, yaahithukumana mukerekhere mwa mwaako Sinayi, wiira awiriyane etthu Muluku aarowa awe waaleela. Nto neeku nooriipa, naahikhuneela mwaako ole. Niinaano-ru, waahikhumelela mwiixi waakhunenle mwaako wootheene. Nave-tho, yaahikhumelela etetere yuulupale, vaahiverunya ni naahiiwanyeya nsu nuulupale naalikana ni etari ni nlope. (Okhum. 19:​16-18; 24:17; Esal. 68:8) Okathi Yehova aapanke awe itthu iya, aisarayeli yaahitikinihiwa vanceene nuumala oweha owerya Muluku orina awe.

 3. Onitaphulela exeeni onvuwiha Yehova?

³ Nave-tho, apinaatamu anoowerya onvuwiha Yehova. Enamuna  emosa nikhanle ahu onvaha Yehova ovuwa, ori waaleela atthu akina voohimya sa owerya wuulupale orina awe ni mikhalelo sawe sikina sooreera. Nave ninninvuwiha Muluku, okathi nnooniherya ahu wiira tonikhalihenrye opaka etthu eyo. (Yes. 26:12) Mwene Davidi, ti ntakiheryo nooloka na mutthu anvahale ovuwa Yehova. Okathi aavekela awe ohoolo wa nloko na aisarayeli, owo aahimuleela Muluku ohimyaka so: ‘Khoo Yehova, okhulupale, owerya, ovuwa, waarya ni ottittimiheya ti wawinyu, okhala wiira itthu sootheene siri wiirimu ni valaponi ti sawinyu’. Okathi Davidi aamalihale awe ovekela, “atthu a nloko nootheene yaahimuttottopela Yehova”. — 1 Wah. 29:​11, 20.

 4. Yesu anvuwihale sai Yehova?

⁴ Okathi Yesu aari awe valaponi, owo aahinvuwiha Tiithi awe, ooniheryaka wiira Yehova taamukhaliherya opaka miiriirya iye. (Mar. 5:18-20) Nave-tho, Yesu aahinvuwiha Yehova, mwa enamuna aamulavula awe Tiithi awe ni moota aawoonela awe atthu akina. Ekwaha emosa, Yesu iira iixuttihaka musinagoga. Mmosa a atthu ale yanwiriyana, aari muthiyana yoowo aavariwe ni nlaikha nootakhala mwa iyaakha 18. Nto nlaikha nle naahiiriha erutthu ya muthiyana ole wuurama, ohiinawerya weemela moowookololowa. Tthiri eyo yaari etthu yooriipiha murima! Omoonelaka othunku, Yesu aahimwaattamela muthiyana ole onamulavuliha mooreerela murima, iiraka: “Muthiyana, moopenuxiwa eretta anyu”. Moottharelana, Yesu aahimwiixaatherya matata awe. Okathi ene yoole, muthiyana ole aahookololowa “khupacerya onvuwiha Muluku”. Muthiyana ole, aahiimuxukhurela Muluku mwaha woomukhaliherya okhala saana! (Luka 13:10-13) Nto okhala wiira aahikhaliheriwa, eyo yaahimwiiriha onvuwiha Yehova. Ni hiyo, sookhala itthu sinniiriha onvuwiha.

ITTHU XEENI SINNIIRIHA ONVUWIHA YEHOVA?

 5. Itthu xeeni sinniiriha onvuwiha Yehova?

⁵ Hiyo ninninvuwiha Yehova okhala wiira ninnimuttittimiha vanceene. Tthiri, sookhala itthu sinceene sinniiriha omuttittimiha. Yehova ookhalana owerya wa opaka etthu eniphavela awe, nave khonitemwa. (Esal. 96:​4-7) Itthu sipattunxe awe, sinnooniherya wiira ookhalana miruku sinceene. Owo oonivaha okumi ni itthu sootheene sinnikhaliherya okhala akumi. (Wiis. 4:11) Muluku toororomeleya. (Wiis. 15:4) Itthu sootheene sinipaka awe sinneetta saana. Nave khula okathi itthu sootheene onileiherya awe, onnimaliherya. (Yoox. 23:14) Tivonto, olavulaka sa Yehova, profeta Yeremiya aahimmye so: “Nathanla atthu òsuwelexa a mulaponi mothene, walá atthu òweryexa a makhulupale aya, khannimphwanya onlikanananyu”! (Yer. 10:​6, 7) Mweekeekhai, sookhala itthu sinceene sinniiriha omuttittimiha Tiithi ahu a wiirimu. Yehova khahiyo paahi oniphwanela ottittimihiwa. Masi-tho, owo ookhalana mikhalelo sootepa oreera, seiyo sinniiriha omphenta vanceene.

 6. Xeeni nnimphenta ahu Yehova?

⁶ Hiyo ninninvuwiha Yehova okhala wiira ninnimphenta vanceene. Nrowe nithokorerye mikhalelo sinceene sinniiriha omphenta Yehova. Owo toomoriwa ikharari ni onniwooniherya othunku atthu. (Esal. 103:13; (Yes. 49:15) Yehova onnaathokorerya saana atthu. (Zak. 2:8) Yehova onninikhaliherya omusuwela wiira nikhale apatthani awe. (Esal. 25:14; Mit. 17:27) Nave Muluku toowiiyeviha ni “owo onnuurama wiira owehe erimu ni elapo ya vathi, owo onninvenxa mutthu oowiiyeviha aari vantthupini”. (Esal. 113:​6, 7) Mwaha wa mikhalelo iya nimanle ahu olavula, niireke khasinniiriha ophavela onvuwiha Muluku ahu muulupale? — Esal. 86:12.

 7. Eparakha xeeni nrina ahu?

⁷ Hiyo ninninvuwiha maana nimphavela wiira  atthu akina amusuwele. Atthu anceene khanimusuwela Yehova oratteene. Mwaha wa xeeni? Mwaha woowi Satana onnimootherya Yehova. Nave-tho, atthu annikupali itthu soowoothiwa Satana onihimya awe. (2 aKor. 4:4) Satana, ohaakupaliha atthu awo wiira Yehova toonanariwa vanceene, khonaathokorerya apinaatamu ni tonikumiherya ohaawa ohireere moolumwenkuni. Masi hiyo ninnimusuwela oratteene Muluku ahu! Vakhala wiira nnimwaaleela atthu akina ekeekhai voohimya sa Yehova, awo anoophavelaka onvuwiha. (Yes. 43:10) Esaalimu 96 ennitumererya onvuwihaka Yehova. Okathi ninrowa ahu othokoreryaka moolumo makina ari esaalimu ela, mweererye oweha moota mukhanle anyu onvaha Yehova ovuwa oniphwanela awe.

NINROWA ONVAHA SAI YEHOVA OVUWA ONIPHWANELA AWE?

 8. Enamuna xeeni emosa nninvuwiha ahu Yehova? (Esaalimu 96:​1-3)

⁸ Musome Esaalimu 96:​1-3. Nnoowerya onvuwiha Yehova nilavulaka itthu sinimuhimya yena. Iveersu iya, atthu a Yehova annilattuliwa wiira ‘amwiipeleke Yehova’, ‘attottopeleke nsina nawe’, ‘alaleyeke ihapari sooreera sa moota oniwoopola awe atthu’ ni ‘eriyari ya maloko, alaleyeke ovuwa wawe’. Iya inamuna nikhanle ahu onvuwiha Tiithi ahu a wiirimu. Arumeyi a Yehova a okathi ovinre, khiyoovelela waaleela atthu akina voohimya sa Yehova ni itthu sinceene aawiirenle awe. (Dan. 3:​16-18; Mit. 4:29) Ninrowa owerya sai opaka etthu emosa-ru?

9-10. Exeeni mwiixuntte anyu ni yoowiiraneya ya Angelena? (Nwehe efootu.)

⁹ Nrowe nthokorerye yoowiiraneya ya Angelena, a yoowo onikhala wAmerica. Owo moolipa murima, aahilavula voohimya sa Yehova. Okhala wiira aapacenrye niinaano ovara muteko empereesa emosa, Angelena aahilattuliwa muthukumano yoowo yaari aya anamuteko akina. Nto muthukumano ole, anamuteko ootheene yaahivahiwa eparakha ya olavula voohimya sa okumi aya. Angelena aahuupuwela wooniherya ifootu, seiyo sinooniherya ohakalala orina awe mwaha wookhala Namoona a Yehova. Masi, ohinatthi opacerya olavula, namuteko mukina aahipacerya ohimya wiira annunwe etthoko ya anamoona a Yehova. Namuteko owo aahipacerya olavula itthu soohiloka voohimya sa Anamoona a Yehova ni itthu anikupali aya. Angelena onihimya so: “Miyo kaahixanka vanceene. Nto kaahiikoha so: ‘Kiireke miyo kinoomaala kinamuhiya mutthu omootheryaka Yehova?  Aahiiso kinrowa omwaakiherya Yehova kaaleelaka atthu ala ekeekhai?’”

¹⁰ Okathi namuteko ole aamalihale awe olavula, niinaano-ru Angelena aahipacerya ovekela voohiiwanyeya. Mooreerela murima aahilavula ni namuteko ole, ohimyaka so: “Yoowiiraneya aka enoolikana ni yawinyu. Miyo kinnuwale etthoko ya Anamoona a Yehova, nave mpakha olelo-va, ka Namoona a Yehova”. Nnaamwi aaxankale, owo aahimaaleleya. Angelena, aahiwerya owooniherya anamuteko akhwaawe ifootu, seiyo yena aari awe ni apatthani awe amurumeelaka Yehova moohakalala. Mwa nttittimiho, aahaatthokiherya itthu onikupali awe. (1 Ped. 3:15) Etthu xeeni yaakhumelenle? Okathi Angelena aamalihale awe olavula, namuteko ole aahimaaleleya. Nave namuteko ole aahihimya itthu saamwiiranenle okathi aari awe mmiravo ni eetta awe ni Anamoona a Yehova. Angelena, onihimya so: “Yehova onnireerela waakiheriwa. Eparakha yuulupale ovuwiha nsina na Muluku”. Nave-tho, hiyo nookhala eparakha ya onvuwiha ni omuttottopela Yehova, hata atthu akina ahimuttittimihaka.

11. Arumeyi a Yehova a khalai yaatthanre sai malakiheryo ari Esaalimu 96:8?

¹¹ Musome Esaalimu 96:8. Hiyo nnoowerya onvuwiha Yehova ni mireerelo sahu. Okhuma khalai, arumeyi eekeekhai a Yehova annirumeela mireerelo saya wiira anvuwihe. (Mir. 3:9) Mwa ntakiheryo, aisarayeli yaahivaha musurukhu wiira akhaliherye olokiheriwa ni otekiwa etemplo. (2 Mam. 12:​4, 5; 1 Wah. 29:​3-9) Awiixutti akina a Yesu, yaahivaha “mireerelo saya” wiira amukhaliherye Yesu ni arummwa akina itthu yaapirisari aya. (Luka 8:​1-3) Nave-tho, Biibiliya onihimya wiira okathi makristau yaahaawa aya mwaha wa etala, anna ni arokora a mapuro makina, yaahaavaha musurukhu. (Mit. 11:​27-29) Olelo-va, hiyo nnoowerya onvuwiha Yehova nivahaka mireerelo sahu ni murima wootheene.

12. Mireerelo ninvaha ahu, sininvuwiha sai Yehova? (Nwehe efootu.)

¹² Nrowe niwehe yoowiiraneya emosa, enooniherya moota mireerelo ninvaha ahu sininvuwiha aya Yehova. Mwaakha wa 2020, waahivira okathi munceene ehirupaka epula oZimbábwe. Atthu imilyau sinceene, yaahala okhwa etala mwaha wa ohikhala eyoolya, omuhela muhina murokora oniitthaniwa Prisca. Nnaamwi itthu saari sooxankiha, nlelo Prisca aaniwerya olaleerya khula namararu ni namathanu, hata okathi woolima. Atthu aattamanne awe, yaanimutheya mwaha woorowa olaleerya  ohiya orowa omatta, ahimyaka so: “Nyuwo munimookhwa etala”. Prisca aanikupali wiira Yehova ammukhapelelaka. Tivonto, okathi wootheene aakhula wiira: “Yehova khonaanyanyala arumeyi awe”. Ohivinre okathi munceene, mutthenkeso wa Yehova waahimukhaliherya. Prisca aahivahiwa itthu sootheene aapirisari awe mwaha wa musurukhu ninvaha ahu. Atthu ale aattamanne awe murokora ole yaahitikinihiwa, ni yaahimuleela murokora ole wiira: “Mweekeekhai Muluku khoonyanyanleni. Tivonto, hiyo nimphavela wiira munileele itthu sikina voohimya sa yena”. Nto atthu oowiiraka 7 aattamanne awe, yaahipacerya orowela mithukumano.

13. Mweettelo ahu oninvuwiha sai Yehova? (Esaalimu 96:9)

¹³ Musome Esaalimu 96:9. Hiyo nnoowerya onvuwiha Yehova ni mweettelo ahu. Anamukuttho yaavara mutemplo mwa Yehova, yaahaana okhala ooratta mmukhalelo wa weerutthuni. (Okhum. 40:​30-32) Hiyo nave nihaana okhala ooratta, ohiya paahi mmukhalelo wa weerutthuni, masi nisyakaka opaka itthu Yehova oninyokha awe. (Esal. 24:​3, 4; 1 Ped. 1:​15, 16) Hiyo nihaana wiimananiha wiira nirule ‘omutthu wa khalai’, eyo piiyo, omananiha osyaka miyuupuwelo ni opaka itthu sihinimusivela Yehova. Nave-tho, nihaana ‘owara omutthu musya’, eyo piiyo, wiixutta wuupuwela ni ovara itthu sinooniherya wiira nintakiha mikhalelo sooreera sa Yehova. (aKol. 3:​9, 10) Okhaliheriwaka ni Yehova, hata mutthu yoole ootepa otakhala, onoowerya oturuka mukhalelo awe wiira oware omutthu wa niinaano.

14. Exeeni mwiixuntte anyu ni yoowiiraneya ya Jack? (Nwehe efootu.)

¹⁴ Nrowe nithokorerye yoowiiraneya ya Jack, mulopwana yoowo aari ootepa otakhala ni aavahiwe nsina noowi Satana. Mwaha wa ikrime aapanke awe, Jack aahilamuliwa wiiviwa. Masi okathi aalipelela awe wiiviwa, Jack aaheemererya osomihiwa Biibiliya ni munna mmosa aaxukurya ekhatteya memmo aatthukweliwe awe Jack owo. Nnaamwi aapanke itthu sinceene sootakhala, owo aahiwerya oturuka mweettelo awe. Muhoolo mwaya, aahipatisiwa ntoko Namoona a Yehova. Jack aahituruka vanceene mweettelo awe. Nihiku aarowa awe wiiviwa, aperesu akhwaawe yaahipacerya omoroxa maithori. Kumantanti mmosa a ekhatteya ele, aahimmye so: “Jack aari peresu ootepa otakhala a ekhatteya ela, masi vano owo mutthu orina mikhalelo sooreera”. Nuumala esumana emosa Jack iiviwe ene, anna yaawo yaarowa  wiiriha mithukumano mukhatteya, yaahinweha mulopwana mmosa aapacerya orowela mithukumano. Etthu xeeni yaamwiirihale orowela muthukumano ole? Okhala wiira aahitikinihiwa moota Jack aaturunke awe mweettelo awe. Owo aaphavela osuwela etthu enipirisari para omukokhorela Yehova. Mweekeekhai, mweettelo ahu pooti onvuwiha Tiithi ahu a wiirimu! — 1 Ped. 2:12.

MOOTA YEHOVA ONROWA AWE OVUWIHA NSINA NAWE VOOHIPISA

15. Voohipisa-va, Yehova onrowa ovuwiha sai nsina nawe? (Esaalimu 96:​10-13)

¹⁵ Musome Esaalimu 96:​10-13. Iveersu sookiserya sa Esaalimu 96, sinnimuhimya Yehova okhala Mwene ni Mulipa-oophuka a xariya. Yehova onrowa ovuwiha sai nsina nawe voohipisa-va? Onoorowa opaka eyo, oruuhaka exariya. Moohipisa, owo onoorowa ompwetexa Babiloonia Muulupale mwaha woowi, itiini sinnimootherya Yehova siwiixuttihaka atthu itthu soowootha. (Wiis. 17:​5, 16; 19:​1, 2) Okathi Babiloonia Muulupale onrowa awe opwetexiwa, atthu akina pooti opacerya omukokhorela Yehova ni hiyo. Okathi wa Armagedoni, Yehova onoorowa opwetexa olumwenku wootheene wa Satana, ni waapwetexa atthu ootheene animootherya. Masi onrowa owoopola atthu ootheene animphenta ni animwiiwelela, yaawo aninvuwiha. (Mar. 8:38; 2 aTes. 1:​6-10) Nuumala weehereriwa wookiserya, weiwo onrowa wiiraneya nuuvira Iyaakha 1.000 sa Olamulela wa Kristu, Yehova onrowa wooniherya wiira yena paahi tonireerela okokhoreliwa ni atthu ootheene. (Wiis. 20:​7-10) Okathi owo, “elapo enosareya osuwela w’ovuwa w’Apwiya, ntoko vansareyaya màsi mphareya”. — Hab. 2:14.

16. Okhuma olelo-va, exeeni mulakenle anyu opaka? (Nwehe eteseenyu.)

¹⁶ Vanrowa okhala voohakalaliha okathi atthu ootheene anrowa aya onvahaka Yehova ovuwa oniphwanela nsina nawe! Nlipelelaka ophiya okathi owo, nrowe niimananihe onvuwiha Yehova khula okathi vaniweryaneya aya opaka eyo. Wiira onikhaliherye ovaha efaita mwaha ola, Nikhuuru Noolamulela noothanla Esaalimu 96:​8, wiira ekhale yoolepa ya mwaakha wa 2025, yeeyo eni: ‘Ninvahe Yehova ovuwa oniphwanela nsina nawe’.