1. Exeeni yaakhalihenrye alopwana ala okhala oolipa murima?

 OKHALA WENE Biibiliya onnaromola alopwana oororomeleya a khalai yaawo yaari oolipa murima. Masi hata ale yaari ootepexa olipa murima, ikwaha sikina awo khayaixoona siiso. Mwa ntakiheryo, waahikhala okathi mwene Davidi iixoona awe okhala ‘oolipa ntoko mwaako’, masi ikwaha sikina owo “aanoova”. (Esal. 30:8) Nave ti etthu yaamwiranenle Sansoni, aahikhalana ikuru sinceene mwaha wa okhaliheriwa ni munepa woowaarya wa Muluku. Masi hata vari siiso, owo aanisuwela wiira ohikhaliheriwaka ni munepa woowaarya owo aamuyeleela ikuru sawe, nave aarowa olikanaka ni alopwana akina. (Makh. 14:5, 6; 16:17) Tthiri alopwana ala yaari oolipa murima okhala wiira Yehova ahaakhaliherya.

2. Xeeni Paulo aahimmye awe wiira okathi ohinlipa awe tontepa awe olipa? (2 aKorinto 12:9, 10)

² Murummwa Paulo aanisuwela wiira ampirisari okhaliheriwa ni ikuru sa Yehova. (Mmusome 2 aKorinto 12:9, 10.) Sintoko hiyo, Paulo aaniwereiwa. (aGal. 4:13, 14) Nave ikwaha sikina, owo aahaana wiimananiha vanceene wiira opake etthu yooreera. (aRom. 7:18, 19) Ikwaha sikina owo aanoova mwaha wa etthu yaarowa okhumelela. (2 aKor. 1:8, 9) Masi hata vari siiso, okathi aakhulumuwa awe, Paulo aniphwanya ikuru. Okhala wiira Yehova aaninvaha ikuru aapirisari awe wiira ovilele mixankiho.

3. Makoho xeeni ninrowa ahu waakhula mwaha ola?

³ Yehova ooleiherya wiira onoonivaha ikuru nimpirisari ahu wiira nivilele. (1 Ped. 5:10) Masi wiira nikhaliheriwe nihaana opaka mpantta ahu. Mwa ntakiheryo,wiira ekaaro yeette enikhaliheriwa ni mutooro. Masi akhala wiira mulipa-oneettiha khommunyakela aseleratoore, ekaaro eyo khenrowa okhuma opuro eri aya. Moolikanasa, Yehova onniphavela onivaha ikuru  nimpirisari ahu, masi nihaana opaka etthu wiira nikhalane. Exeeni Yehova onnivaha awe wiira onlipihe? Etthu xeeni nimpirisari ahu opaka wiira nikhalane ikuru? Nnoorowa oweha waakhuliwa wa makoho ala okathi ninrowa ahu othokoreryaka moota Yehova aamulipinhe awe profeta Yona, Maria maama awe Yesu ni murummwa Paulo. Nave nnooweha moota Yehova ohinihiya awe waalipiha arumeyi awe olelo-va.

4. Moota xeeni Yehova onnivaha awe ikuru?

⁴ Enamuna emosa Yehova onnivaha awe ikuru, ori omwaattamela ninvekelaka. Owo onimwaakhula mavekelo ahu onivahaka “owerya onivikana wa mutthu”. (2 aKor. 4:7) Nave nnimwaakhela ikuru nimpirisari ahu nimusomaka Biibiliya ni wuupuwelela ele ninsoma ahu. (Esal. 86:11) Muhupi wa Yehova ori mbiibiliyani, wookhalana “owerya wuulupale”. (aHeeb. 4:12) Okathi muninvekela anyu Yehova ni osoma Nuulumo nawe, munniphwanya ikuru munipirisari anyu. Nave munniwerya ovilela, munnihakalala ni munnimaleliha yoothanleliwa anyu yooxankiha. Vano nwehe moota Yehova aamulipinhe awe profeta Yona.

5. Xeeni Yona aapirisari awe olipa murima?

⁵ Profeta Yona aanipirisari olipa murima. Yehova aahimuruma orowa oNiinive, masi aanoova nto eyo yaahimwiiriha otthyawa orowaka muttetthe mukina. Mwaha waivaavo, owo aahanle okhwa ni munamukhaya nave aahaakumiherya maxakha atthu akina aarina awe. Okathi kapitawu aaruminha awe ovonyeriwa mmaasini, owo aahirowa opuro aahuupuwela awe, eyo piiyo, mmirimani mwa ehopa yuulupale. Yona oonenle sai? Niireke owo uupuwela wiira aamookhwa mmirimani mwa ehopa? Niireke uupuwela wiira aahinyanyaliwa ni Yehova? Woonasa wene, Yona aahixanka vanceene.

6. Moovarihana ni Yona 2:1, 2, 7, exeeni yaamulipinhe okathi ari awe mmirimani mwa ehopa?

⁶ Exeeni Yona aapanke awe wiira okhalane ikuru okathi aari awe mmirimani mwa ehopa? Etthu yoopacerya aapanke awe, yaari onvekela Yehova. (Mmusome Yona 2:1, 2, 7.) Yona khaamwiiwelenle Yehova, masi hata vari siiso owo aanikupali wiira Yehova anwiriyana nivekelo nawe. Nave aanuupuwelela soolepa sikina sa mbiibiliyani. Masi ninsuwela sai eyo? Okhala wiira nivekelo niri eliivuru ya Yona ekapiitulu 2, owo onnirumeela masu ari eliivuru ya Esaalimo. (Mwa ntakiheryo, mulikanyihe eliivuru ya Yona 2:2, 5 ni Esalimo 69:2; 86:7.) Vannooneya wiira Yona aanisuwela saana soolepa. Okathi Yona samphwanya aya mixankiho aanuupuwela soolempwa iyo, nto eyo yaahimukhaliherya osuwela wiira Yehova ammukhaliherya. Yehova aahimoopola Yona, muhoolo mwaya owo aari oolikana ene wiira omalelihe muteko ole aarummwale awe. — Yona 2:10–3:4.

7-8. Exeeni yaamulipinhe Anderson okathi samphwanya aya mixankiho?

⁷ Ntakiheryo na Yona pooti onikhaliherya okathi sinniphwanya aya mixankiho. Mwa ntakiheryo, munna mmosa onikhala oTaiwan, oniitthaniwa Anderson, onniwereyasiwa vanceene. b Ohiya-vo, mwaha wookhala Namoona a Yehova, amusi awe annimuthokorerya moohiloka. Etthu enimukhaliherya okhalana ikuru ori onvekela Yehova ni osoma Nuulumo nawe. Owo onihimya so: “Ikwaha sikina, okathi mixankiho sinikhala aya wiira khasinimala, miyo kinnixanka vanceene ni kihinawerya opaka yoosoma aka ya Biibiliya”. Hata vari siiso, munna Anderson khonikhulumuwa. Owo onitthokiherya so: “Wanipacerya, kinnivekela Yehova. Nuumala-vo, kinniwara ifooni saka kinawiriyana isipo sa Omwene. Ikwaha sikina,  kinniipa vathi-vathi mpakha omaaleleya. Moottharelana kinnipacerya osoma”.

⁸ Okhalana yoosoma ya omwaneene yoomukhaliherya vanceene Anderson. Mwa ntakiheryo, nuumala wooperariwa, meediku aahimuleela wiira ikoloobulu sawe sooxeerya khisaakhanle saana nto aanireerela oheleliwa ephome. Masi ohiyu omosa ohinatthi wooperariwa, Anderson aahisoma yoowiiraneya ya murokora mmosa yoowo aarina muxankiho waalikana ni aawawe. Ikoloobulu sooxeerya sa murokora ole khisaakhanle saana ovikana sa munna ole. Masi hata vari siiso, murokora ole kheemerenrye oheleliwa ephome ni aahiwerya openuwa. Yoowiiraneya ele yaahimulipiha Anderson ni khaahiyale ororomeleya.

9. Akhala wiira munniriipiwa murima mwaha wa mixankiho, exeeni mukhanle anyu oopaka? (Nwehe efootu.)

⁹ Niireke mootoko oxanka muhinawerya onvekela Yehova? Niireke mootoko okhulumuwa, muhinawerya osoma? Muhiliyale wiira Yehova onnisuwela saana mixankiho sanyu. Hata mpakaka nivekelo nookhuveya, mukupaliki wiira Yehova onimoovahani itthu mumpirisari anyu. (aEef. 3:20) Akhala wiira erutthu enimoowereyani aahiiso mookhalana muxankiho mukina muhinawerya omusoma Biibiliya, mmananiheke onwiriyana audiyu a Biibiliya ookaravariwa aahiiso a iliivuru sikina sinimutthokiherya Biibiliya. Nave owiriyana isipo sa Omwene aahiiso oweha iviidiyu mu jw.org pooti wookhaliheryani. Okathi munninvekela anyu Yehova ni ophavelasa waakhuliwa waya mbiibiliyani ni iliivuru sinimutthokiherya Biibiliya, vanikhala ntoko wiira munimulatthula Yehova wiira oolipiheni. Nave owo onoopaka eyo.

10. Anna ni arokora annilipiha sai?

¹⁰ Yehova pooti waarumeela anna ni arokora wiira anilipihe. Nave anna awo pooti ‘onilipiha vanceene’ okathi sinniphwanya aya mixankiho aahiiso vaavo nihinwerya ahu omaleliha yoothanleliwa ahu. (aKol. 4:10, 11) Hiyo ninnaapirisari apatthani, otepexa wene “okathi w’oxanka”. (Mir. 17:17) Okathi nintteettheya ahu, anna ni arokora pooti onikhaliherya anivahaka itthu sinnithowa ni onikhaliherya okhalana waataana wooloka ni Yehova. Nrowe niwehe  moota Maria maama awe Yesu, aalipihiwa awe ni atthu akina.

11. Xeeni Maria aapirisari awe ikuru?

¹¹ Maria aanipirisari ikuru wiira opake ele Yehova aamurumme awe. Nkuupuwelani moota axankale awe nuumala waakhela muhupi wooxankiha ni nlaikha Gabriel. Owo khaatheliwe, masi aarowa orupala. Nave khaatonko waakhapelela anamwane, masi hata vari siiso, aarowa omukhapelelaka mwaana yoowo muhoolo mwaya aarowa okhala Mesiya. Okhala wiira aari ehaarusi aahiiso khaatonko orupa ni mulopwana, Maria aarowa omutthokiherya sai mwaha ole noivo awe, Yosefe? — Luka 1:26-33.

12. Moovarihana ni Luka 1:39-45, Maria aawenrye sai ophwanya ikuru?

¹² Maria aawenrye sai ophwanya ikuru wiira owerye omaleliha yoothanleliwa ele yooxankiha? Owo aahaavekela atthu akina wiira amukhaliherye. Mwa ntakiheryo, aahivekela nlaikha Gabriel wiira nimutthokiherye moota woomaleliha yoothanleliwa ele. (Luka 1:34) Moohipisa Maria aahivenya orowaka “muttetthe wa omiyaakoni” wa oYuda, wiira amuxukurye mmusi awe, Elizabeti. Tthiri oxukurya iwe, yaari eparakha yuulupale. Elizabeti aahimutthotthopela Maria, okhala wiira aahuupuxeriwa eprofesia yaalavula voohimya sa mwaana a Maria. (Mmusome Luka 1:39-45.) Maria ohimmye wiira Yehova ‘aahirumeela ikuru sawe wiira opake itthu suulupale’. (Luka 1:46-51) Yehova aahirumeela nlaikha Gabriel vamosa ni Elizabeti wiira omulipihe Maria.

13. Exeeni yiiraneyale nuumala murokora Dasuri a oBolivia waavekela anna ni arokora nikhaliheryo?

¹³ Moolikanasa ni Maria, nave nyuwo munoowerya ophwanya ikuru mukhaliheriwaka ni atthu animurumeela Yehova. Dasuri, murokora mmosa onikhala oBolivia, aanipirisari okhaliheriwa. Okathi paapa awe aaphwanyaniwa awe eretta yuulupale ni aapaxari ospitaali, Dasuri aahilakela omukhapelela paapa awe ole mekhawe. (1 Tim. 5:4) Masi opaka eyo khahiyo yaari etthu yookhweya. Owo onihimya so: “Ikwaha sikina kaanoona wiira nkaarowa ovilela”. Niireke owo aahivekela okhaliheriwa? Wanipacerya nnaari. Owo onitthokiherya so: “Miyo nkaaphavela waaxankiha anna ni arokora. Kuupuwela so: ‘Yehova tonrowa okivaha ikuru kinipirisari aka’. Nuumala-vo miyo kaahoona wiira wiivalaanya ni anna ni arokora waanikiiriha ophuka mixankiho saka meekhaka”. (Mir. 18:1) Dasuri aahilakela waalepela mensaaxe apatthani awe atthokiheryaka muxankiho awe. Owo ohimmye so: “Miyo nkinoona yoohimya moota anna akikhalihenrye aya ni okilipiha. Awo yaahiruuha eyoolya ospitaali ni yaanisoma ni miyo soolepa sa mbiibiliyani soolipiha. Tthiri vaari voohakalaliha vanceene osuwela wiira miyo nkaakhanle mekhaka. Hiyo nniirela mpantta emusi yuulupale ya Yehova. Emusi eyo eri yoolikana ene wiira enikhaliherye, wunla ni hiyo ni onlipiha wiira nimurumeeleke Yehova hoothe”.

14. Xeeni ninreerela ahu weemereryaka nikhaliheryo na axitokweene?

¹⁴ Yehova onnaarumeela axitokweene wiira anilipihe. Awo yoovaha, Yehova onirumeela awe wiira onilipihe ni onikhaliherye ovilela mixankiho sahu. (Yes. 32:1, 2) Okathi sinoophwanyayani mixankiho, mwaaleeleke axitokweene itthu sootheene sinooxankihani. Mweemereryeke okathi axitokweene anookhaliheryayani. Aarumeelaka axitokweene Yehova onimoovahani ikuru.

15. Nlipelelo xeeni makristau ootheene arina aya?

¹⁵ Nlipelelo nahu na mbiibiliyani pooti onikhaliherya okhala atthu oolipa murima ni a ikuru. (aRom. 4:3, 18-20) Makristau ootheene aakhalana nlipelelo na okhala mahiku ootheene, okhale mparayiisu valaponi vaava aahiiso moomweneni wa Muluku  wiirimu. Nlipelelo nahu ninninikhaliherya ovilela mixankiho, olaleya ihapari sooreera ni omaleliha yoothanleliwa ahu mmulokoni. (1 aTes. 1:3) Tthiri nlipelelo nenlo naamulipinhe murummwa Paulo.

16. Xeeni Paulo aapirisari awe ikuru?

¹⁶ Paulo aanipirisari ikuru sinceene. Ekarta aalepenle awe anna a muloko wa oKorinto, aahiilikanyiha ni mwaapu woowaakuva ophweeya. Owo aahimmye wiira ‘aaniphunyiwa’, ‘aahitthukweliwa’, ‘aanilupatthiwa’ ni aaniixoona ‘onyanyaliwa’. Nave ikwaha sikina aahaala vakhaani okhwa. (2 aKor. 4:8-10) Paulo aahilepa ikarta iye mukwaha awe wa neeraru wa omisionaario. Masi hata vari siiso, aanisuwela wiira saamumphwanya mixankiho sootepa woopiha. Owo aamwaakiritiriwa, aamutthukiwa, aamumphwanya munamukhaya mmaasini ni anviriha okathi munceene ori ene mukhatteya.

17. Moovarihana ni 2 aKorinto 4:16-18, etthu xeeni yaamulipinhe Paulo okathi samphwanya aya mixankiho?

¹⁷ Okhala wiira Paulo aniwehexexa nlipelelo nawe, aahiphwanya ikuru wiira owerye ovilela. (Mmusome 2 aKorinto 4:16-18.) Owo aahaaleela akorinto wiira erutthu awe yanwerya ‘ohononeya’, masi hata vari siiso khaarowa otthikela ottuli. Paulo aawehexexa paahi itthu sa muhoolo. Nave aanoona nlipelelo nawe okhala “etthu ya faita yuulupale” mookumini mwawe. Nto eyo yaahimukhaliherya wiira ovilele khula muxankiho wamphwanya. Paulo aanuupuwelela nlipelelo nawe, ti maana aya aixoona awe okhala ‘musya khuta nihiku’.

18. Okhalana nlipelelo waamulipinhe sai Tihomir ni emusi awe?

¹⁸ Nlipelelo na muhoolo naahimulipiha munna Tihomir a oBulgaria. Iyaakha vakhaani sivinre, muhima awe ookiseriwa, Zdravko ohookhwa mwaha wa asitenti. Nto eyo yaahimuriipiha vanceene murima Tihomir. Wiira ovilele oriipiwa murima, owo ni emusi awe yaahipacerya wuupuwelela moota ohihimuxiwa waarowa aya okhala. Owo ohimmye so: “Mwa ntakiheryo, hiyo nimmakela wuupuwela opuro ninrowa ahu omphwanya Zdravko, eyoolya ninrowa ahu oomwaapeela, atthu ninrowa  ahu waalattula wiira nipake efesta awe ahihimuxiwa ni itthu nikhanle ahu oomuleela siiraneyale mahiku ala ookiserya”. Tihomir ohimmye wiira etthu enaakhaliherya amusi awe ohihiya ovilela ni olipelela okathi wooreerela, Yehova onrowa awe omuhihimuxa muhima awe, owehexexa nlipelelo na muhoolo.

19. Itthu xeeni mukhanle anyu oopaka wiira mulipihe nlipelelo nanyu? (Nwehe efootu.)

¹⁹ Munrowa olipiha sai nlipelelo nanyu? Vakhala wiira nlipelelo nanyu ti na okhala mahiku ootheene valaponi vaava, musomeke soowiiraneya sa mbiibiliyani sinlavula woohimya sa eparayiisu. (Yes. 25:8; 32:16-18) Muupuweleke moota okumi onrowa aya okhala elapo esya ni muupuweleke muri ene wuuwu. Mwa ntakiheryo, ti pani muninweha anyu? Itthu xeeni muniwiriyana anyu? Nyuwo munoonela sai? Wiira nwerye wuupuwela muri ene mparayiisu, nwehe ifootu siri irevista sahu aahiiso iviidiyu sa muusika ntoko: No Mundo Que Aí Vem, Tthiri Ehaattamela! aahiiso Imagina um Mundo Sem Dor. Akhala wiira nnookhalana okathi wiira nuupuwelele moota okumi onrowa aya okhala elapo esya, mixankiho sahu sinrowa okhala sa ‘okathi vakhaani ni ohikhala etthu’. (2 aKor. 4:17) Mwaha wa nlipelelo Yehova onivanhe awe, ninnikhala okhala atthu oolipa murima.

20. Ninrowa owerya sai okhalana ikuru, hata niixoonaka okhala ootteettheya?

²⁰ Hata okathi ninkhulumuwa ahu, nikupaliki wiira ‘Muluku ori ni hiyo’. (Esal. 108:14) Yehova onninivaha itthu sootheene nimpirisari ahu wiira nikhalaneke ikuru. Akhala wiira muniphavela okhaliheriwa wiira mmalelihe yoothanleliwa anyu, oxintta muxankiho aahiiso ohihiya ohakalala, mmutthukuleleke murima anyu Yehova orweela wa nivekelo. Nave mphaveleke malakiheryo mpakaka yoosoma anyu ya omwaneene. Mweemereryeke okhaliheriwa ni olipihiwa ni anna ni arokora. Mwiivaheke okathi wiira muupuwelele moota okumi onrowa aya okhala muhoolo. Ntoko sinihimya awe aKolosi 1:11 nyuwo munrowa ‘olipihiwa voomalela’. Nave Yehova onoorumeela “owerya wawe woovuwa, wira nweryeke ovilela, mpixaka murima ni otteeliwa murima”.