Niireke mootoko wuupuwela wira khimwaawerya omukhaliherya mutthu aakhweliwe ole amphenta awe? Ikwaha sikina hiyo pooti ohoonaka yoopaka aahiiso yoohimya. Masi sookhala itthu sookhaliherya nikhanle ahu oopaka.

Ikwaha sinceene, etthu enitthuneya ti orwa ntthoko na ole okhweliwe. Nto nyuwo pooti ohimya masu vakhaani ntoko “kinnoona othunku”. Mittetthe sikina, omukupaarela mutthu okhweliwe wala onvaha ntata ti enamuna yooloka enooniherya wira nyuwo munnimphenta. Akhala wira ole okhweliwe onniphavela ovaanela, munwiriyaneke saana. Etthu ekina yootepa oreera, woonasawene ori okhaliherya emusi ekhweliwe, ntoko waapeyasa, waakhapelela anamwane wala okhaliherya mareheryo a masikho akhala wira vanootthuneleya. Itthu iyo pooti okhala soolipiha ovikana moolumo ooreera.

Nuuvira okathi nyuwo pooti woonaka okhala vootthuneya olavula itthu voohimya sa ole okhwiiye, woonasa wene mikhalelo sooloka ni soohakalaliha. Ovaanela iwo pooti omuhakalaliha ole okhweliwe. Mwa ntakiheryo, Pam, yoowo okhweliwe aiyawe iyaakha 6 sivinre, oni: “Ikwaha sikina atthu annikileela itthu sooloka aiyaka yaapaka aya seiyo kahaasuwela aka, nto itthu iyo sinnikihakalaliha.

 Anamatokosa anihimya wira atthu akhweliwe annikhaliheriwa vanceene ekhumelakaru ehasara eyo, masi moohipisa anniliyaliwa ni apatthani aya vaavo anitthikela aya miteko saya sa khula nihiku. Nto mwiimananihe ovikaniha ovaanela ni ole okhweliwe. * Anamunceene akhweliwe annirumeela okathi owo wira evukule oriipiwa waya murima.

Muthokorerye ntakiheryo na mwali mmosa oJapão oniitthaniwa Kaori, yoowo okhweliwe amamawe, nto nuuvira myeeri 15 khukhweliwa-tho muulupale awe. Moohakalaliha aahikhaliheriwa ni apatthani awe oororomeleya. Mmosa a apatthani awo ti Ritsuko yoowo orina iyaakha sinceene onvikana Kaori. Aahiivahererya okhala mpatthani awe. Kaori, oni: “Ohimya ekeekhai, kaahiriipiwa murima vanceene. Nkaaphavela wira mutthu mukina aaranttele amaama, ni koona wira khuuvo aarowa owerya opaka eyo. Masi mwaha wa moota onikithokorerya awe Mama Ritsuko kihaataana vanceene ni yena. Khuta esumana ninnirowa hoothe mmutekoni woolaleerya ni orowa mithukumano sa eKristau. Owo onnikilattula wira niwurye exa hoothe, okiruuhela eyoolya, ni ikwaha sinceene onnikilepela ipaphelo. Moonelo wooloka wa Mama Ritsuko onnikikhaliherya vanceene”.

Soovira iyaakha 12 nuumala okhwa amamawe Kaori, nto vano owo ni iyawe aakela muteko wa Muluku wa okathi wotheene. Owo oni: “Mama Ritsuko, onnivikaniha okithokorerya. Okathi kinitthikela aka elapo eyariwe aka, kinnimuxukurya nto ninnilipihana mukina ni mukhwaawe”.

Poli, yoowo ori Namoona a Yehova oChipre, ottottela-tho mureerelo nikhaliheryo na atthu akina. Iyawe Poli aitthaniwa Sozos ni aanivaha ntakiheryo nooloka mmulokoni mwa eKristau ntoko makampusi. Owo aanaalattula anamwane ikwaasuni ni anaamukhweli wira erowe owannyawe yatthekuleke ni olya hoothe. (Yakobo 1:27) Mooriipiha murima, orina ene iyaakha 53, Sozos aahikhwa mwaha wa oretta wa tumor cerebral. Poli, ohimmye so: “Koomuyeleela iyaka ooreera murima yoowo kimalihanne aka iyaakha 33 okithenle ene”.

Nuumala opakiwa masikho, Poli aahithaamela oCanada hoothe ni mwanawe, Daniel, yoowo aarina iyaakha 15. Nto yaahipacerya othukumana ni muloko wa Anamoona a Yehova, muttetthe ole. Poli onihimya so: “Apatthani aka a muloko musya khiyaasuwela itthu sinceene sa okumi ahu wa khalai ni mixankiho saanikhumelenle. Masi eyo khiyawiirinhe ohiphavela opatthana ni hiyo ni onimaaliha ni moolumo aya oovareleya muteko ni oolipiha. Vaari voohakalaliha, maana waari okathi mwanaka aawunlela awe apapawe! Anna yaahoolela muloko ole yaanimucalela vanceene Daniel. Munna mmosa aanimulattula Daniel okathi aatthekula awe ni anna akina aahiiso aarowa awe ommana boola”. Maama ole ni mwanawe olelo-va annihakalala.

Sookhala inamuna sinceene nikhanle ahu oowaakhaliherya ni waamaaliha ale akhweliwe. Nave-tho Biibiliya onninimaaliha orweela wa nlipelelo nootteeliha murima na muhoolo.