“KARERA orooke, masi muChina ola ohaleke!” Ala ti masu Alexandra aiwale awe okilaathale ene mukarerani, ophavelaka orowa elapo ekina ya Epantte Enikela Nsuwa ya wAmerica. Owo aahikhuruwa wira awehe ele yaakhumelela, nto khimphwanya mmiravo muChina omananihaka otthokiherya ni Espanyola awe yoohilokasa ohoolo wa poliisia. Okhala wira Alexandra eetta muloko wa Anamoona a Yehova anilavula eChina, aahiivahererya otaphulela.

Mulopwana ole aahimya wira aari mutthu ooloka masi aarimwiiyeriwa idukumento ni musurukhu awe. Wanipacerya poliisia ole khaamini eyo, nave aahipacerya wuupuwela wira Alexandra aaronvara mutthu ole wira amutumihe. Nuuvira okathi, aheemererya ele yaahimya awe, masi ahaana oliva musurukhu mwaha woweetta ohirina idukumento. Okhala wira khaarina musurukhu, Alexandra aahimukophiha idoolare 20. Mulopwana ole aahihimya wira aarowa omuliva musurukhu munceene ohiya idoolare 20 paahi mwaha woomuxukhuru. Alexandra aahimuhimeerya wira khaaphavela otthuveliwa; aaphavela omukhaliherya paahi mwaha woosuwela wira eyo yaari etthu yooloka opaka. Owo aahinvaha iliivuru vakhaani sinimutthokiherya Biibiliya, nto khimutumererya mulopwana ole wira ahaana omusoma Biibiliya ni Anamoona.

Tthiri ti voovara murima woona oreereliwa murima amalapo, ni voohaaniherya aakhala atthu akina anipaka itthu soolikana ni iyo, akhale anatiini wala ale ahineettela etiini. Niireke nyuwo mootoko wiivahererya wira mukhaliherye mwa enamuna eyo? Nikoho nla ti nootthuneya okhala wira Yesu aalavunle so: “Mulipa-òvaha onoreriwa onvikana mulipa-òvahiwa”. (Miteko 20:35) Nave masientista ahoona oreera waya okhala oovaha okhala wira onnimukumiherya mireerelo ole onivaha. Vano nrowe niwehe inamuna sene.

Sowiiraneya sinnooniherya wira ovaha onnivarihana vanceene ni ohakalala wa mutthu. Murummwa Paulo aalempe wira: “Muluku onsiveliwa n’ule onvaha murima omuttenlene”. Owo aahimya maKristau ale yaavanhe mireerelo saya wira yaakhaliherye annaya yaathoiwe. (2 aKorinto 8:4; 9:7) Paulo khonihimya wira awo yaapanke eyo mwaha wootteeliwa murima. Eveersu ela enihimya wira, awo yaahitteeliwa murima mwaha wa owerya ovaha.

Tthiri, moovarihana ni erelatoorio emosa, ovaha “onnikwannya mpantta mmosa wa oramattha onivarihana ni ohakalala wa mutthu, wiiraana ni waaroromela atthu akina okumiheryaka ‘mireerelo mweekumini’ mwa mutthu owo”. Erelatoorio ekina enihimya wira “waavaha musurukhu atthu akina waahiwiiriha atthu yaavaha okhala ootteeliwa murima ovikana ale yaalya musurukhu aya mekhaya”.

Mootoko wiixoona wira makhalelo anyu khaniweemereryani waakhaliherya atthu akina ntoko saaphavela anyu? Ekeekhai tiila: Khula mutthu onoowerya okhala namavaha ‘otteeliwa  murima’. Mutthu onivaha ni murima wooloka, khonitthuneya ovaha musurukhu munceene. Namoona a Yehova mmosa aahaaroihela epaphelo axineene erevista ela vamosa ni musurukhu ohimyaka so: “Iyaakha iya sotheene kaanivaha musurukhu vakhaani Empa ya Omwene. Yehova ookittikiherya musurukhu munceene ovikana ole kinvanhe aka. . . . Kooxukhurela okeemererya miyo opaka yoovaha aka, eyo ennikiphwanyiha ohakalala”.

Itthu sinivahiwa khahiyo musurukhu paahi. Sookhala inamuna sinceene sa ovaha.

Biibiliya oohimya wira: “Mutthu a nlema onnireriha eroho awe; mutthu òwali onimwitakhaliha”. (Miruku 11:17) Atthu ooreera murima toovaha, oowiivahererya orumeela okathi ni ikuru saya, wira yaakhapelela akina ni itthu sikina. Tthiri enamuna eyo ennaaphwanyiha mireerelo soovirikana, nrowe niwehe mireerelo sene.

Asomi anceene anihimya wira mutthu oniivahererya waakhaliherya akina khoniwereyasiwa vanceene ni khonikhala ooriipiwa murima. Okhala wene onikhala mukumi. Ovaha ni murima wotheene onnivukula othunku wa atthu arina eretta ehinivoniwa, supiyaana wala SIDA. Eyo ennooniherya-tho wira atthu ale aniphavela ottharuwa owurya anaakhaliherya akina, annitepa waakuva oxintta yoolema eyo.

Nto eyo enikhumelela sai? Vanihimmwa wira “owoonela othunku atthu akina, waapixerya murima ni waaphenta onnikumiha mmuruni mwa mutthu miyuupuwelelo soohiloka”. Ovaha onnivukula oxankiheya ni oretta wa tensau. Nave atthu ale anikhweliwa ole yaathelanne aya, annisyaka okhala ootepexa oriipiwa murima vakhala wira annaakhaliherya atthu akina.

Tthiri khivanivaanyihaniwa. Ovaha onimoophwanyihani mireerelo.

Yesu ahaatumererya atthareli awe oriki: “Mwavaheke akhw’inyu; siso Muluku onimovahani nyuwo. Munimwittheleliwa vakuwoni vanyu mphimo worera, wosarya, wokhitteliwa mpakha ovakareya. Mweryo onrowanyu waphimela akhw’inyu, Muluku onrowa wophimelani yowo”. (Luka 6:38) Okathi onaavaha anyu atthu akina, eyo pooti owiiriha atthu awo wooxukhurelani ni opacerya okhala atthu oovaha nave. Tthiri ovaha onnilipiha omusi ni opatthani.

Anamatokosa anisoma makhalelo a atthu ahoona wira “atthu ale animakela waareerela murima akhwaaya annaalipiherya awo opaka etthu emosaru”. Tthiri “hata osoma paahi yoohimmwa ya atthu anaareerela murima akhwaaya, enniwiiriha atthu akina okhala ooreera murima”. Veekeekhai, moovarihana ni erelatoorio emosa, mutthu mmosa eriyari ya atthu anceene pooti waavara murima atthu miloko wala imiya sinceene, akina ahinaasuwela awe wala ahinaawe awe”. Ohimya mookhweya, mutthu mmosa onivaha pooti owiiriha atthu akina a muttetthe wotheene opacerya ovaha. Niireke nyuwo khimwaaphavela okhala nipuro moota owo? Tthiri, saamukhumelela mireerelo sinceene  yaakhanle atthu anceene oreera murima.

Yowiiraneya emosa enooniherya eyo yaakhumelenle oFlorida EUA. Egrupu emosa ya Anamoona a Yehova yaarimwiivahererya wira yaakhaliherye atthu yaaphwanyiwe ni munamukhaya muulupale. Okathi yaawehererya aya ikaruma sa olokiherya empa ya munna, awo yahoona wira ekintaali ya mutthu mmosa aattamenle vaavo yaahimora, nto yaahiivahererya olokiherya. Nuuvira okathi, mutthu owo aahilepela oseedi wa olumwenku wotheene wa Anamoona a Yehova oriki: “Kinimooxukhurelani ekumi aka yotheene. Atthu ala aatepa oreera murima nkinaawehe atthu siisa”. Oxukhurela wawe waahimwiiriha ovaha musurukhu munceene wira ovareliweke muteko oniirela awe, muteko muulupalexa wa Anamoona.

Etthu emosa yuulupale yiixuntte aya masientista ti yoowi “apinaatamu osiveliwa waakhaliherya akhwaaya”. Erelatoorio ekina eni: “Anamwane annipacerya oreera murima hata ahinatthi wiixutta olavula”. Nthowa xeeni? Biibiliya onnaakhula nikoho nla vaavo vanihimya awe wira: “Muluku ompattuxale mutthu, aìlikanyihaka mmansawe”, tivonto varina ahu makhalelo mamosaru arina awe.—Maphattuwelo 1:27.

Mukhalelo muulupalexa orina awe Mpattuxa ahu Yehova Muluku, ti ovaha. Owo oonivaha ekumi ni itthu sotheene wira nikhale ohakalala. (Miteko 14:17; 17:26-28) Hiyo nnoowerya osuwela mikhalelo sa Tiithi ahu a wiirimu ni yoolakela awe yoophenta nasoma Nuulumo nawe, Biibiliya. Eliivuru eyo ennihimya wira Muluku oopaka marehereryo wira nikhale atthu ohakalala muhoolo. * (1 Yohani 4:9, 10) Okhala wira Yehova, Muluku oovaha ni hiyo nipattuxiwe nilikanyihiwaka yoowo, tivonto ovaha nimutakihaka owo onoonikumiherya mireerelo ni onikhaliherya wataana ni yena.—aHéberi 13:16.

Munnimuupuwela Alexandra, oromoliwa wanipacerya wa muru ola? Yowiiraneya awe yaamanle sai? Nnaamwi mutthu mukina aarina awe mukarerani aamuhimeeryale wira aahipweteiwa musurukhu ole, mulopwana ole aamukhalihenrye awe aahilavula ni apatthani awe yaari ohoolo waarowa weemela karera ole, nto aahimuliva musurukhu awe. Ohiya-vo, mulopwana ole aahittharihela miruku sa Alexandra nto khupacerya omusoma Biibiliya. Nto vaari vootteeliha murima otthikela okumaana ni mulopwana ole nuuvira myeeri miraru paahi aryeene okongresuni a Anamoona a Yehova a eChina, oPeru. Moophavela omuxukhuru Alexandra, mulopwana ole aahimulattula owo ni atthu yaarina awe wira yalye orestaurante wawe.

Waavaha ni waakhaliherya atthu akina onnikumiherya ohakalala. Tthiri vanrowa otepa oreera, vakhala wira munimwaakhaliherya atthu wira amusuwele oratteene namavaha Muulupale—Yehova Muluku! (Yakobo 1:17) Niireke nyuwo munnittottela mureerelo yoovaha eyo?