Kiyariwe oLondres, wInglaterra ni kihuuwale oPaddington muttetthe wowaatta atthu. Miyo kaakhala ni maama aka vamosa ni axuulupale aka araru. Paapa aka aamakela okhuma owaani mwaha woowi aari namuhapaliwa.

Okathi kaari aka mwaana, maama aka aahikiixuttiha wira kaahaana ovekela khula ohiyu. Kaahikhalana Biibiliya mwaamukhaani, yoowo aarina eliivuru ya Esalimo paahi, nto miyo kaanipakelela melodia wira kiweryeke wiipa. Nihiku nimosa kaahisoma efrase emosa eliivuru ya mulaponi kaarina aka, nto nkaaliyala efrase ele yaahimya wira: “Nihiku nno, khonirowa okhala meelo”. Nto nihiku nne nkaarumpe kaamakela wuupuwela mukhalelo aka wa muhoolo. Miyo kuupuwela so: ‘Tiivi eri yoolakela ya okumi? Xeeni niri ahu valaponi?’ Miyo nkaaphavela okhwa!

Kaahipacerya ophavela osuwela minepa. Kaaniimananiha olavula ni alipa-ookhwa, kaanirowa oxukurya omahiye ni anaxikola akhwaaka ni naaniweha iviidiyu sootakhala. Hiyo noona wira saari soohakalaliha, masi okathi omosaru naanoova.

Okathi karina aka iyaakha 10 kaahipacerya ohiiwananeya. Miyo kaahipacerya ompaha soona ni aahikilema. Muhoolo mwaha kaahipacerya opaha isuruma. Kirina ene iyaakha 11, kaahipacerya owurya ni ohapaliwa. Nnaamwi yaahaakisivela eviinyu, masi waanikisivela ohapaliwa. Nave waanikisivela owiriyana muusika ni wiina. Nto waanikisivela vanceene orowa ofestani ni okulupi ohiyu. Nto kaanirowa ohiyu kinatthika oxaka. Kaanipaka itthu sotheene mwa mwiitiho wira kihooniwe. Okhala wira kaanikhulumuwa, kaamakela ohirowa oxikola. Okathi kaarowa aka oxikola kaamakela owurya okathi wa intervalo.

Mwakha wookiserya kaasoma aka, nkaaphwanya inoota sooloka. Maama aka aaniweha mweettelo aka woohiloka ni khiwaamusivela, nto aaninanariwa vanceene. Naamakela onyakulihana, nto kaahikhuma owaani. Mwa okathi munceene kaakhala ni namorato aka Tony, nave owo aarina mweettelo woohiloka. Maana Tony aaniiya, aanitumiha mirette soohapala ni aanisuweliwa okhala mutthu otakhala. Nuuvira okathi vakhaani kaahirupala kirina ene iyaakha 16, nto kaahimuyara mwanaka mwaamulopwana.

Okathi woopacerya kaasuwenle aka Anamoona a Yehova naari nipuro yaakhala aya aximaama arina anamwane acikhaani ni ahitheliwe. Kaahivahiwa ekwaartu ni makhulupale a muttetthe ole. Athiyana anli Anamoona a Yehova yaamakela orwa waaxukurya aximaama akina. Nihiku nimosa, miyo-tho kaahipacerya ovaanela ni Anamoona ale. Miyo kaaphavela owooniherya wira yaari anawoothe. Masi moopixa murima, awo yaahaakhula makoho aka otheene amurumeelaka Biibiliya. Awo yaari ooreera murima ni oopatthaneya, nto eyo yaahikivara murima vanceene. Nto kaahemererya okisomiha Biibiliya.

Moohipisa, kaahiixutta etthu yaaturunke okumi aka. Okhuma onamwane aka, miyo kaanoova okhwa. Masi vano kaahiixutta ele Yesu aahimmye awe wira onookhala ohihimuxiwa wa alipa-ookhwa! (Yohani 5:28, 29) Nave kaahiixutta wira Muluku onnikithokorerya. (1 Pedru 5:7) Yoolepa yahaareere okivara murima ti ya Yeremiya 29:11, yeeyo enihimya wira: “Miyo kinnisuwela entthunaka owirelani. Kinimophwanyihani murettele, ohiya otakhaliwa. Miyo k’Apwiya: nkinotha! Kinimovahani oholo wororomeleya”. Kaahipacerya okupali wira onoophiya okathi kinrowa aka okhalaka mahiku otheene mParayiisu valaponi.​—Esalimo 37:29.

Anamoona a Yehova yaahooniherya wira yaanikiphenta ni murima wotheene. Nihiku noopacerya kaarowenle aka mithukumano saya, kaahoona wira anniwaakhela saana atthu ni toopatthaneya! (Yohani 13:34, 35) Moota kaathokoreriwe aka waahivirikana vanceene ni ekerexa kaaronwe aka. Anamoona yaahikaakhela ni murima wotheene nnaamwi kaarina mweettelo woohiloka. Awo yaaniviriha okathi ari ene ni miyo, okithokorerya, okivaha efaita ni okikhaliherya ovilela mixankiho saka. Nto kaahoona wira kiniirela mpantta emusi yuulupale ni yoophenta.

Okathi kaamusoma aka Biibiliya, kaahoona wira kaahaana opaka marukunuxo maalupale mookumini mwaka wira kimuhakalaliheke Muluku. Khivaakhweyale ohiya ompaha soona. Nuuvira okathi kaahoona wira muusika kaawiriyana aka waanikiiriha ophavela opaha isuruma. Nto kaahihiya owiriyana muusika owo. Okhala wira nkaaphavela owurya ni ohapaliwa, kaahihiya orowa ofestani ni okulupi. Maana mapuro awo yaamukiiriha ophavela ohapaliwa. Nave kaahaapaka apatthani asya yaarowa okikhaliheryaka opaka marukunuxo mookumini mwaka.—Miruku 13:20.

Okathi ole, Tony aahipacerya omusoma Biibiliya ni Anamoona a Yehova. Vaavo Anamoona a Yehova yaakhula aya makoho awe amurumeelaka Biibiliya, Tony aahoona wira iixutta ekeekhai. Owo aahipaka marukunuxo manceene mookumini: aahihiya weetta ni apatthani awe ootakhala murima, aahihiya opaka ikrime ni opaha isuruma. Otheene ahu naahoona wira naaphavelaka omusiveliha Yehova, naahaana opaka marukunuxo mookumini mwahu ni omuhuwa saana mwanihu. Nto naahithelana mwaakha wa 1982.

Kinnuupuwela wira kaamakela otokosa irevista Owehaweha ni Nvenye! * seiyo saalavula sowiiraneya sa atthu yaawo yaapanke marukunuxo manceene mookumini mwaya ntoko miyo kaaphavela aka opaka marukunuxo. Sowiiraneya saya saahikilipiha vanceene. Nave saahikivaha ikuru wira kihihiye opaka marukunuxo. Kaamakela onvekela Yehova wira ohikinyanyale. Miyo ni Tony naahipatisiwa mwaakha wa 1982, nikhala Anamoona a Yehova.

Okhala mpatthani a Yehova ohoopola ekumi aka. Miyo ni Tony naanoona wira Yehova aaninikhaliherya okathi wa mixankiho. Nihiixutta omuroromela Yehova hata nirina ene mixankiho ni nihoona wira okathi wotheene onninikhaliherya ni okathi wotheene onnikhapelela etthoko ahu.​—Esalimo 55:22.

Ninnihakalala omukhaliherya mwanihu mwaamulopwana ni mwaamuthiyana okhala mpatthani a Yehova. Nave oweha osuulu ahu wiixuttaka voohimya sa Yehova, onninihakalaliha vanceene.

Vano khonikiphwanya naawalaphile mwaha wa wupuwela mukhalelo aka wa muhoolo ni woova okhwa. Miyo ni Tony nookhalana eparakha khula esumana ya weetta mikwaha nrowaka oxukurya miloko ni waalipiha anna ni arokora. Hiyo vamosa ni anna awo ninniwiixuttiha atthu akina ekeekhai, nto annooniherya omwaamini waya Yesu wira aphwanye okumi woohimala.