Miyo kiyariwe muttetthe mwaamukhaani wa oSaxony, oRepública Democrática Alemã (RDA). Owaani hiyo naaniphentiwa vanceene ni anamuyari ahu. Nave okathi wotheene anamuyari aka yaahikiixuttiha okhalana mikhalelo sooloka. Okhala wira elapo ele yaari Comunista, atthu anceene a oSaxony khiyaaphavela etiini. Miyo nkaakupali wira Muluku ookhala. Mpakha okathi kaarina aka iyaakha 18, mookumini mwaka kaakupali itthu piili paahi: Muluku khokhanle ni wira atthu otheene anoolikana.

Etthu xeeni yaakiiriha osiveliwa ni Comunista? Okhala wira muupuwelo woowi atthu otheene anoolikana onnikisivela vanceene. Miyo koona wira mihakhu sotheene sikhanle mulaponi saahaana okaiwa mwa enamuna emosaru, niire so, mwa xariya. Nto opaka eyo, khiyaarowa okhala atthu oohaawa. Nto kaahipacerya okhaliherya mutthenkeso Comunista wa amiravo. Okathi kaarina aka iyaakha 14, kaahipacerya ovara muteko wa ottikiherya epaphelo sa khalai okhala isya. Makhulupale a epooma ya wAue, epooma yeeyo kaakhala aka, yaanisiveliwa vanceene wiimananiha waka ni yaahikitthuvela. Nnaamwi kaari mmiravo kaanaasuwela makhulupale anceene a epoliitika a elapo aka. Nto koona wira kamphwanya itthu sotheene kaaphavela aka.

Masi moohipisa itthu sotheene saahiturukeya. Mwaakha wa 1989, Muro de Berlim waahimora. Nto ikuvernu sotheene Comunista sa wEuropa saahipwata. Masi saahikhala-tho itthu sikina. Moohipisa kaahoona wira ekuvernu ya elapo aya yaanipaka itthu sinceene soohixariya. Mwa ntakiheryo, atthu otheene yahaakhaliherya makomunista, khiyaarina ihakhi simosaru yaarina aya ale yaakhaliherya. Eyo yiiraneyale sai? Niireke makomunista khiyaakupali wira atthu otheene anoolikana? Niireke Comunista yaari etthu ya ethiru? Itthu iyo sotheene saahikiiriha oriipiwa murima.

Nto kaahipacerya wiipa ni opintari. Okathi ole miyo kaasoma exikola ya muusika ni kaaphavela orowa wuniversidade wira kasomeke muusika. Maana yoolakela aka waari okhala mulipa-oowiipa ni oopintari. Nto kaahihiya otthara mikhalelo sooloka kiixuttihiwe aka kiri ene mwaana. Etthu yuulupale kaaphavelaka ottekula ni waarupiha athiyana anceene. Nnaamwi kiipa ni opaka itthu sikina mootaphuwa, saahikhala itthu sikina saakixankiha. Hata itthu kaapintari aka saanooniherya wira saahikhala itthu koova aka vanceene. Itthu xeeni sinrowa wiiraneya muhoolo? Tiivi eri yoolakela ya okumi?

 Nuumala ophwanya waakhuliwa wa makoho aka, kaahihakalala vanceene. Ohiyu omosa kiri ene oxikola, miyo ni anaxikola akhwaaka naathokorerya itthu sinrowa wiiraneya muhoolo. Hiyo naari vamosa ni Mandy *, yoowo aari Namoona a Yehova. Ohiyu ole, owo aahikivaha miruku sooloka. Owo akilenle so: “Andreas, mwaaphavelaka waakhuliwa wa makoho anyu otheene voohimya sa okumi ni itthu sinrowa wiiraneya muhoolo, muhaana omutokosa oratteene Biibiliya”.

Miyo nkaakupali vanceene etthu aahimmye awe, masi kaahilakela omusoma Biibiliya. Mandy aahikooniherya Daniyeli ekapiitulu 2, nto ele kaasomme aka yaahikivara murima. Eprofesia ele yaalavula ikuvernu sa apinaatamu saarowa olamulelaka mahiku ahu ala. Nave Mandy aahikooniherya iprofesia sikina sinilavula itthu sinrowa wiiraneya muhoolo. Nto kaahiphwanya waakhuliwa wa makoho aka! Nuumala-vo kaaniikoha so: Tani olempe iprofesia iyo? Owenrye sai olepa oratteene itthu sinrowa wiiraneya muhoolo? Tani oniwerya ohimya oratteene itthu sinrowa wiiraneya muhoolo?

Mandy aahikisuweliha anamathelana Anamoona a Yehova Horest ni Angelika, yaawo yaakikhalihenrye omwiiwexexa oratteene Biibiliya. Nto kaahoona wira Anamoona a Yehova etiini emosa paahi eniwiixuttiha atthu nsina na Muluku, Yehova. (Esalimo 83:19; Matheyo 6:​9) Nave kaahiixutta wira Yehova oonivaha nlipelelo na okhala mahiku otheene mparayiisu valaponi. Esalimo 37:9, enihimya so: “Ale animuroromela Muluku anokhala ni murettele vathí-va”. Kaahihakalala vanceene osuwela wira atthu otheene animwiiwelela Muluku ntoko Biibiliya onihimya awe, anrowa okhalaka mahiku otheene.

Khivaakhweyale opaka marukunuxo wira kipakeke ele Biibiliya onihimya awe. Kaahaana wiixutta okhala mutthu oowiiyeviha, mwaha woowi wiipa ni opintari waahikiiriha okhala mutthu oowiixinnuwiha vanceene. Nave waanikivila ohiya mweettelo aka woohiloka wa khalai. Kinnimuxukhurela vanceene Yehova mwaha wookhala Muluku oopixa murima, oomoriwa ikharari, yoowo oniweha wiimananiha wa atthu ale aniphavela wiiwelela ele Biibiliya oniixuttiha awe!

Okathi kaarina aka iyaakha 18 kaakupali paahi wira Muluku khokhanle ni wira atthu otheene anoolikana. Masi Biibiliya oorukunuxa okumi aka. Itthu kiixuntte aka sookikhaliherya ohiya woova itthu sinrowa wiiraneya muhoolo ni kookhalana nlipelelo nooloka. Mwaakha wa 1993 kaahipatisiwa kikhala Namoona a Yehova. Nto mwaakha wa 2000 kaahimuthela Tabitha, Namoona a Yehova ooluttuweliwa. Ninniviriha okathi munceene naakhaliheryaka atthu omwiiwexexa Biibiliya. Atthu anceene ntoko miyo okathi yaari aya mwaana yaakupali wira Muluku khokhanle ni yaari makomunista. Kinnihakalala waakhaliherya omusuwela oratteene Yehova.

Okathi kaapacenrye aka omusoma Biibiliya ni Anamoona a Yehova, anamuyari aka yaahixanka vanceene. Masi nuuvira okathi, yaahoona wira omusoma Biibiliya waanikikhaliherya opaka marukunuxo mookumini mwaka. Etthu enkihakalaliha, omusoma Biibiliya ni orowela mithukumano sa Anamoona a Yehova.

Miyo ni Tabitha ekasamento ahu ti yoohakalaliha vanceene. Ninniimananiha otthara oratteene malakiheryo a mBiibiliyani anaahimya anamathelana. Mwa ntakiheryo, Biibiliya onnaatumererya anamathelana ohiraruwa ni ohihiya olipiha ekasamento aya.​—aHeeberi 13:4.

Olelo-va, miyo nkinoova itthu sinrowa wiiraneya muhoolo. Kinnihakalala vanceene wiirela mpantta emusi yowiiraana ni ya murettele ya Anamoona a Yehova olumwenku wotheene. Otheene ahu nnoolikana. Eyo ti etthu kaaphavela aka, nto vano ehiiraneya mookumini mwaka.