1 Pedru 3:1-22
3 Nave, nyuwo athiyana ootheliwa, nwiiweleleke axiiyanyu voohinlaseya. Vano, awo yaahiiweleleke Nuulumo na Muluku, mweettelo anyu owiirihe wiiwelela, hata muhilavunle etthu,
2 okhala wira aaweha mweettelo anyu wooloka ni nttittimiho nanyu nuulupale.
3 Oreera wanyu ohikhaleke wa weerutthuni, ntoko otthava ikharari, owara ipulseera* sa eweero ni ikuwo sa musurukhu munceene,—
4 masi okhaleke wa vamurimani, weiwo ohinooneya, ohinintta, onooniheriwa ni murima woomaala ni woowiiyeviha. Nto oreera iwo torina efaita yuulupale vamaithoni va Muluku.
5 Ti siiso yaiphwaneliha aya athiyana oowaamini a khalai, yaawo yaamulipelela Muluku, awiiwelelaka axiiyaya voohinlaseya.
6 Sara aahiira siiso. Owo aanimwiiwelela Abrahamu, amwiirelaka pwiyaka. Nave nyuwo munookhala anaawe, mwaahihiye-ru opaka itthu sooreera ni mwaahooveke etthu.
7 Siiso-tho, nyuwo alopwana oothela, musuweleke saana makhalelo a axaarinyu wira mukhaleke naawo vookhalela. Mwaattittimiheke athiyana awo, ntoko siisaale munikhapelela anyu mwaapu woowaakuva ophweeya, okhala wira Muluku ohaareerela murima, khwaavaha okumi, ntoko nyuwo nvahiwe anyu nuuwo. Mwaahiire siiso, Muluku khonrowa owiriyana mavekelo anyu.
8 Nto, otheene anyu mwiiwananeke, moonelaneke othunku, mphentaneke ntoko anna, mmorelaneke ikharari ni mwiiyeviheke.
9 Muhiliveryeke yootakhala ni yootakhala ekhwaaya, aahiiso mwaaruwaniwaka, muhiruwaneke. Masi, nwiireleke sooreera akina, okhala wira mwiihaneliwe yeeyo ni Muluku, nto owo onrowa woovahani itthu sooreera.
10 Tthiri, “ole oniphavela okhala mukumi ni okhala mahiku manceene, ohaana okasoopa nlumi nawe, ohilavulaka itthu sootakhala, ni ohaana osyaka olavula itthu soowootha.
11 Otthyaweke sootakhala ni opakeke itthu sooreera; ophaveleke murettele ni eetteleke yoowo.
12 Tthiri, maitho a Yehova annaaweha anaxariya, maaru awe anniwiriyana oxonttela waya. Masi, Yehova onnaanyokha ale aniira sootakhala”.
13 Nto, ti pani onrowa owiirelani sootakhala, mwaakhalelaka nthiti ovara itthu sooreera?
14 Masi, hata muhaawaka mwaha wa exariya, muhakalaleke. Muhooveke etthu anoova aya,* nnakhala oxanka.
15 Vano, vamurimani vanyu, mmuttittimiheke Kristu, ntoko Pwiya anyu. Nave, okathi wotheene, mukhaleke oolikana ene wira nwaakhule saana otheene ale anookohani mwaha wa nlipelelo murina anyu. Masi, mwaakhuleke vooreerela murima, ni nttittimiho.
16 Mukhalaneke murima* wooloka, wira okathi munihimyaniwa anyu itthu sootakhala, ale anihimya itthu iyo, yuuliwe muru, mwaha wa mweettelo anyu wooreera, ntoko atthu animutthara Kristu.
17 Halaali ohaawa mwaha woopaka itthu sooreera, vakhala wira oniphavela awe Muluku ti yeeyo, ohiya ohaawa mwaha woopaka itthu sootakhala.
18 Tthiri Kristu, yoowo ori naxariya, ohookhwa ekwaha emosa paahi, mwaha wa itampi sa atthu ahikhanle anaxariya, wira ooroiheni wa Muluku. Owo aahiiviwa ntoko pinaatamu, masi khukhalihiwa mukumi ntoko munepa.
19 Nto, aahirowa olaleya moolumo oophukela, olaleeryaka malaikha yaatthukweliwe.
20 Malaikha awo, khiyaamwiiwelenle Muluku, okathi aawehererya awe ni opixa murima, mahiku a Nowe, etekiwaka ekalawa. Atthu vakhaani, eyo piiyo, atthu 8, yaahikela mukalawani, yoopoliwa mmaasini.
21 Etthu enlikana ni ela, ti opatiso, yoowo oniwoopolani vano, mwaha wa ohihimuxiwa Yesu Kristu. Opatiso, khahiyo orapiha soonanara sa erutthu, masi onithoonyerya onvekela Muluku murima* wooloka.
22 Kristu owo, ori moono woolopwana wa Muluku, maana oowela wiirimu, weiwo malaikha, makhulupale ni owerya wotheene animwiiwelela aya.
Inoota
^ Aahiiso, “maniya a”.
^ Aahiiso, woonasa wene: “muhooveke etthu aniwoopopihanaayani”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
