aEefeso 3:1-21
3 Nto miyo, Paulo, kitthukweliwe mwaha wookhala murumeyi a Kristu Yesu, ni mwaha wa wookhaliheryani nyuwo, muhikhanle ayuda— *
2 Kinoona wira muhiiwa tthiri wira kihaakhela muritti wa wookhaliheryani ottottela mureerelo, oreera murima wuulupale wa Muluku.
3 Aayo, Muluku ookisuweliha esiiri awe. Nto kaahoolepelani ni moolumo vakhaani.
4 Vano, mwasoma epaphelo ela, munimoona enamuna ensuwela aka esiiri ya Muluku enimuhimya Kristu.
5 Atthu a maloko a khalai khiyaasuwelihiwe esiiri ela, ntoko aasuwelihale awe vano arummwa ni maprofeta awe oothanliwa, orumeelaka munepa awe.
6 Esiiri eyo tiila: Ale ahikhanle ayuda ni yiiraanale ni Kristu Yesu, animwaakhela ele Kristu aakhenle awe, ni anookhala ekrupu emosa-ru.* Animwaakhela itthu simosa-ru Muluku onileihenrye awe mwaha wa ihapari sooreera.
7 Mwaha wa oreera murima wuulupale wa Muluku, miyo kookhala murumeyi a esiiri ela ya Muluku. Owo ookivaha muteko ola orumeelaka owerya wawe.
8 Kinaamwi kiri mutthu mwaamukhaanixa mwa atthu otheene oororomeleya,* kihooniheriwa oreera murima wuulupale wa Muluku, wira kaalaleerye ale ahikhanle ayuda, ihapari sooreera sa mareeliho anikhuma wa Kristu, yaawo ahinitthokihereya.
9 Muluku yoowo opattunxe itthu sotheene, ookivaha muteko wowaasuweliha atthu enamuna oneettiha awe esiiri awe, yeeyo yiipithihiwe okhuma khalai.
10 Eyo ehiiraneya wira vano, orumeelaka muloko, Muluku aaphavela waasuweliha anamalamulela ni makhulupale ari wiirimu, ankhili awe, yaawo anooneya mwa inamuna sinceene soovirikana.
11 Eyo ennivarihana ni yoolakela yoohimala, yeeyo Muluku orina awe moovarihana ni Kristu Yesu, Pwiya ahu.
12 Mwa yoowo, hiyo ninniwerya olavula nihoovaka etthu ni ninnimwaattamela Muluku ni ororomela, maana ninnimwaamini Yesu.
13 Tivonto, kinnoovekelani wira muhikhulumuwe, okhala wira ohaawa waka mwaha wa nyuwo, onoowiirihani ottittimihiwa.
14 Mwaha wa yeeyo, kinnikokhora ohoolo wa Tiithi,
15 okhala wira owo tokumihenrye imusi sotheene wiirimu ni valaponi.
16 Kinnivekela wira Muluku, yoowo orina ovuwa wowaatta, orumeele munepa awe, wira olipihe mirima sanyu,
17 ni kinnivekela-tho wira Kristu, vamosa ni niphento, sikhale vamurimani vanyu, mwaha wa waamini wanyu. Nave-tho, wira mulipe ntoko mitathaari soolipa, muthipeliwe ene saana.
18 Siiso, nyuwo vamosa ni otheene ale oororomeleya,* munoosuwela moota ori aya wuulupale, wowunnuwa, woorakama ni wowiixerya,
19 ophenta wa Kristu, weiwo orina efaita yuulupale ovikana osuwela, wira musareye mikhalelo seiyo Muluku onivaha awe.
20 Vano, okhala wira owerya wa Muluku ori ni hiyo, nto owo otepeke oniirela itthu soowaatta, ovikana iye sininvekela ahu ni sinuupuwela ahu.
21 Muluku yoowo, ovuwihiweke mwaha wa muloko ni mwaha wa Kristu Yesu, mahiku otheene ni voohimala. Amen.
Inoota
^ Vanikhala wira muupuwelo wa eversiikulu 1, onitthikela eversiikulu 14.
^ Aahiiso, “ipantte sa erutthu emosa-ru”.
^ Ekereku, “oowaarya”.
^ Ekereku, “ale oowaarya”.
