aGalasia 5:1-26
5 Kristu oonoopola wira nikhale ootaphuwa. Tivo, mwiilipihe, nave muhitthikele okhala epottha.
2 Mukiwiriyane! Miyo, Paulo, kinooleelani wira mwannuwihiwa, Kristu khonrowa woophwanyihani mureerelo.
3 Kinnitthikela-tho wooleelani wira, khula mulopwana oninnuwihiwa, ohaana weettela Nlamulo notheene.
4 Nyuwo muneererya ohimmwa okhala naxariya mwaha wa weettela Nlamulo, moovalaana ni Kristu. Nyuwo mookhootta oreera murima wuulupale wa Kristu.
5 Hiyo, neettihiwaka ni munepa wa Muluku, ninnilipelela vanceene exariya enikhumelela mwaha wa waamini.
6 Ale yiiranne ni Kristu Yesu, winnuwihiwa aahiiso ohinnuwihiwa khahiyo etthu, masi etthu yuulupale, okhalana waamini onooniheriwa ni ophenta.
7 Nyuwo mwaaneetta saana mweekeekhaini.* Ti pani ookhoottihenryeni wiiwelelaka ekeekhai?
8 Soowiixuttiha sa ale yookhoottihenryeni, khasinikhuma wa Muluku, yoowo owihanneni.
9 Eferemento vakhaani, enniiriha otthu wotheene wooweetheiwa* opuhuwa.
10 Miyo kinnikupali wira nyuwo muri awiixutti a Pwiya, munookupali ele enihimya aka. Masi, ole onooxankihani, onimwaakhela ehukhumu oniphwanela awe.
11 Axinnaka, vakhala wira miyo nlelo kinilaleya winnuwihiwa, xeeni nlelo kinilupatthiwa aka? Vakhala wira nlelo kinilaleya winnuwihiwa, weeso mwiri wa nihaaxeryo* wa Yesu, khahiyo-tho etthu enaakwattuliha atthu.
12 Miyo kaaniphavela wira alopwana yaale aneererya wooxankihani, yiihule* mmansaya.
13 Axinnaka, nyuwo muhiihaneliwa otaphuwa. Nto, muhirumeeleke otaphuwa nno wira mpakeke itthu siniphavela aya erutthu anyu yoottheka. Masi, ophenta owiirihekeni waavarela muteko akhwiinyu.
14 Nlamulo notheene ninnimaliheriwa* ni yooruma emosa, yeeyo eni: “Mumphenteke mukhwiinyu ntoko muniiphenta anyu”.
15 Mwaathipelelaka olumana ni okhuurana, mwiipasoope wira muhipwetexane.
16 Masi kinihimya wira: Muhihiye weettihiwa ni munepa wa Muluku, nto khamunrowa opakaka nnakhala vakhaani itthu siniphavela aya erutthu yoottheka.
17 Tthiri, erutthu ennivirikanya munepa wa Muluku ni itthu munepa owo siniphavela aya, nave munepa wa Muluku onnivirikanya erutthu. Siiso, iyo khasinivarihana. Tivo, khamunipaka itthu seiye muniphavela anyu opaka.
18 Ohiya-vo, vakhala wira muneettihiwa ni munepa wa Muluku, nyuwo khamunikhanyereriwa weettela Nlamulo.
19 Itthu siniphavela aya erutthu yoottheka sinnooneya oratteene. Itthu sene tiiya: orupihana woohiloka,* itthu soonanara, mweettelo woohiloka onooniherya ohuuliwa muru,*
20 waakokhorela amuluku eethiru, okhwiri,* onyokhana, owana, okhalelana ehace, waakuva onanariwa, ohiiwanana, okumiherya okawanyeya, otthara soowiixuttiha sa atthu,
21 nrima, ohapaliwa, ifesta sootakhala,* ni itthu sikina sinlikana ni iya. Miyo kinnoolopolani mwaha wa itthu iya, ntoko kooloponlyaakani wira, ale animakela opaka itthu iya, khanrowa waakhela Omwene wa Muluku.
22 Ohiya-vo, mikhalelo* sinikumiheriwa ni munepa woowaarya, tiiya: ophenta, otteeliwa murima, murettele, opixa murima, oreera murima, oloka, waamini,
23 omaala, wiihiiha. Khanikhanle Nlamulo ninvirikanya mikhalelo iya.
24 Nave-tho, awiixutti a Kristu Yesu, aakhomela vamwirini erutthu aya yoottheka, vamosa ni itthu saasivela ni yaaphavela aya.
25 Akhala wira ninneettihiwa ni munepa woowaarya wa Muluku, nihaana othipelelaka weettihiwa ni munepa owo wa Muluku.
26 Nihiittottopeke, nave nihiphaveleke owiiriha akina oxinttana, hata nihikhalelaneke nrima.
Inoota
^ Ekereku, “Nyuwo mwaanitthimaka saana”.
^ Aahiiso, “ephepa yotheene yooweetheiwa”.
^ Nwehe Moolumo Ootthokiheriwa.
^ Eyo yanwiiriha ohiphwanelela weettela Nlamulo, nenlo yaakiherya aya.
^ Aahiiso, woonasa wene: “ninnuuluuliwa”.
^ Ekereku, porneía. Nwehe Moolumo Ootthokiheriwa.
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
^ Aahiiso, “olowa; onamirette”.
^ Ifesta seiye khula mutthu onipaka awe etthu oniphavela awe.
^ Ekereku, “muhokorokho”.
