aHeeberi 5:1-14
5 Khula mutthu onithanliwa wira okhale namukuttho muulupale, onnaavarela muteko atthu, aakhaliheryaka myaha sinivarihana ni omukokhorela waya Muluku. Nto, owo onnivaha itthu ni mikuttho mwaha wa itampi saya.
2 Onniwerya waareerela murima ale anittheka* ahisuwelaka, okhala wira nave-tho owo tootteettheya.
3 Mwaha wa yeeyo, owo ohaana ovaha mikuttho mwaha wa itampi sawe, siisaale onivaha awe mwaha wa itampi sa atthu akina.
4 Khuuvo oniwerya wiikhaliha namukuttho muulupale mmansawe, masi Muluku paahi tonimuthanla, ntoko aamuthanlale awe Aroni.
5 Siiso-tho, Kristu khaivuwinhe mmansawe, aikhalihaka namukuttho muulupale. Masi, aahivuwihiwa ni Muluku, yoowo aamuhimenrye wira: “Nyuwo mwa mwanaka. Olelo, miyo ka tiithi inyu”.
6 Ti siiso-tho onihimya awe opuro mukina, wira: “Nyuwo mwa namukuttho a mahiku otheene, ntoko Melikhisedeki”.
7 Okathi Kristu aari awe elapo ya vathi, aahimuxonttela ni onvekela Muluku, yoowo aawerya omoopola mookhwaani, okhuwelaka vanceene ni inlaka. Nto aahiwiriyaniwa, okhala wira aanimoova Muluku.
8 Nnaamwi aari mwaana a Muluku, aahiixutta wiiwelela mwaha wa itthu aahaawale awe.
9 Nuumala okhalihiwa oomalela, otheene ale animwiiwelela anoowerya woopowa,
10 okhala wira oothanliwa ni Muluku wira okhale namukuttho muulupale, ntoko Melikhisedeki.
11 Nookhalana itthu sinceene sa Kristu naaphavela ahu woohimeeryani, masi vannivila wootthokiheryani, maana muhiikhaliha atthu oopisa wiiwa.
12 Mweekeekhai, okathi ola nyuwo mwaahaana okhala alipa-oowiixuttiha, masi muhaana otthikela-tho wiixuttihiwa itthu soopacerya sa nuulumo noowaarya na Muluku. Nave-tho, mootthikela ophavela waamwa nipele, ohiya olya yoolya yoolipa.
13 Tthiri, ole onaamwa nipele, khonisuwela nuulumo na Muluku, nenno nniixuttiha etthu yooreera, okhala wira owo mwaana mwaamukhaani.
14 Masi atthu arina waamini woolipa, tanilya yoolya yoolipa. Nto, mwaha woowi aalimalela orumeela saana muupuwelo aya,* annisuwela ovirikanyiha etthu yooloka ni yoohiloka.
