Luka 1:1-80
-
Moolumo oopacerya aaroiheliwa Teofilo (1-4)
-
Oyariwa wa Yohani Mpatisa onnihimmwa vahinatthi ni Gabriyeli (5-25)
-
Oyariwa wa Yesu onnihimmwa vahinatthi ni Gabriyeli (26-38)
-
Maria onimuxukurya Elizabeti (39-45)
-
Maria onninvuwiha Yehova (46-56)
-
Yohani onniyariwa ni onnivahiwa nsina (57-66)
-
Eprofesia ya Zakariya (67-80)
1 Atthu anceene aalepa itthu sotheene siiraneyale, seiyo-tho hiyo ninkupali ahu.
2 Akina-tho yoonale itthu iyo siiraneyaka, ni ale anilaleya ihapari sa Muluku, aanihimeerya itthu iya.
3 Tivo, nyuwo Teofilo oottittimiheya, miyo kootokosa itthu iya sotheene, nto koolakela olepa itthu iya mwa enamuna enitthareya.
4 Koopaka eyo wira nyuwo-tho mukupali wira itthu mwiixuntte anyu, ti seekeekhai.
5 Okathi wa Herodi,* mwene a oYudeya, aahikhala namukuttho aihaniwa Zakariya, yoowo iirela mpantta ekrupu ya anamukuttho yiireliwa Abiya. Aahimuthela muthiyana mmosa aihaniwa Elizabeti, a nloko na* Aroni.
6 Anamathelana awo, yaari atthu a xariya vamaithoni va Muluku, ni yaaneettela oratteene sooruma sotheene ni malamulo otheene a Yehova.
7 Masi khiyaarina mwaana, okhala wira Elizabeti khaayara. Nave oowanli aya yaahuuluvala.
8 Vano Zakariya iira ovaraka muteko awe wa onamukuttho ohoolo wa Muluku, okhala wira yaari ekrupu awe yaarowa ovara muteko mutemplo.
9 Ntoko saalimalenle aya anamukuttho, ela yaari ekwaha awe. Tivonto, owo aahikela mutemplo mwa Yehova wira apahe erupani.
10 Okathi aapaha awe erupani, atthu otheene yiira avekelaka vate.
11 Nto nlaikha na Yehova naahimukhumelela, neemela moono woolopwana wa altaari yaapahiwa erupani.
12 Nuumala woona nlaikha nle, Zakariya aahixanka, onoova vanceene.
13 Masi, nlaikha naahimuhimeerya wira: “Nyuwo Zakariya, muhoove, okhala wira Muluku ohiiwa ovekela wanyu. Nave mwaarinyu Elizabeti, onimooyarelani mwaana mwaamulopwana, yoowo onrowa anyu onvaha nsina na Yohani.
14 Nyuwo munootteeliwa murima vanceene, nave atthu anceene anootteeliwa murima ni oyariwa wawe,
15 maana mwaana owo onrowa okhala muulupale vamaithoni va Yehova. Masi khonrowa owuryaka eviinyu, nnakhala etthu ekina yoohapala. Owo onoosareya munepa woowaarya, hata ohinatthi oyariwa.*
16 Nave onimwaakhaliherya aisarayeli anceene omutthikela Yehova, Muluku aya.
17 Muluku onoomuruma mwaninyu ohoolo wawe, orina ene owerya onlikana ni wa Eliya, wira orukunexe mirima sa axipaapa, sikhaleke ntoko sa anamwane, ni orukunuxe mirima sa atthu oohiiwelela, wira akhalane miruku sa anaxariya. Nave, onimwaalokiherya atthu wira anvareleke muteko Yehova”.
18 Vano, Zakariya aahihimeerya nlaikha nle wira: “Kinrowa osuwelexa sai etthu ela? Miyo kihuuluvala, nave amwaaraka ahuuluvala”.
19 Nlaikha naahimwaakhula niiraka: “Miyo ka Gabriyeli, yoowo oneemela ohoolo wa Muluku, nto kirummwale wooleelani ihapari iya sooreera.
20 Masi mwiiwe! Nyuwo khamunrowa owerya olavula mpakha nihiku ninrowa aya wiiraneya itthu iya, maana khamukupanli moolumo aka, yaawo anrowa wiiraneya okathi othanliwe”.
21 Vano, atthu nlelo yaaninwehererya Zakariya. Nto yaahitikinihiwa okhala wira aanipisa vanceene okhuma mpaani mwa Muluku.
22 Okathi aakhumme awe, khaawerya olavula ni atthu ale. Nto awo yaahisuwela wira aahiweha mwiiriirya wootikiniha mpaani mwa Muluku. Vano Zakariya aamuthoonyasa paahi, khaawerya olavula.
23 Okathi aamalinhe awe mahiku a muteko awe mpaani mwa Muluku, aahitthikela owannyawe.
24 Nuuvira mahiku vakhaani, Elizabeti, mwaarawe Zakariya, aahirupala. Nto aahiviriha miyeeri mithanu ohikhumme owannyawe, ohimyaka wira:
25 “Ela ti etthu Yehova okiirenle awe vano. Owo ookuupuwela, wira omalihe wuuliwa waka muru ohoolo wa atthu”.
26 Okathi seetta aya miyeeri 6 Elizabeti orupanle ene, Muluku aahiruma nlaikha Gabriyeli orowa epooma ya oGalileya, yiihaniwa Nazarethi,
27 wira nakumane ni mwali ahaatonko orupa ni mulopwana, yoowo aanoivariwe* ni mulopwana mmosa aihaniwa Yosefe, a nloko na Davidi. Mwali owo aihaniwa Maria.
28 Nlaikha nlo naahikela mpaani mwawe, nnamuhimeerya wira: “Yehova oohakalala ni nyuwo Maria. Owo ori ni nyuwo”.
29 Maria aahitikinihiwa vanceene ni moolumo ale, onaphavela osuwela etthu yaataphulela aya.
30 Nlaikha naahimuhimeerya wira: “Nyuwo Maria, muhoove, maana Muluku ohooreerelani murima.
31 Vano mwiiwe, munoorupala ni munoomuyara mwaana mwaamulopwana, yoowo onrowa anyu onvaha nsina noowi Yesu.
32 Mwaana owo onrowa okhala muulupale, onimwiihaniwa Mwaana a Muluku Muulupalexa. Nave Yehova Muluku, ononvaha ehice ya Davidi, tiithi awe.
33 Owo onrowa olamulela ntoko Mwene mahiku otheene etthoko ya Yakobe, nave Omwene awe khonimala-tho”.
34 Vano, Maria aahikoha nlaikha nle wira: “Vanrowa wiiraneya sai, miyo kihitonko orupa ni mulopwana?”
35 Nlaikha naahimwaakhula wira: “Munepa woowaarya onookhala ni nyuwo, nto owerya wa Muluku Muulupalexa onimookhapelelani. Tivo, ole onrowa anyu omuyara, onookhala oowaarya, ni onrowa wiihaniwaka Mwaana a Muluku.
36 Nave-tho, mmusi inyu Elizabeti oorupala, hata uuluvanle ene. Vano sineetta miyeeri 6 orupanle ene, nnaamwi iireliwa khaniyara.
37 Tthiri, khiivo etthu Muluku onooceela awe”.
38 Nto Maria aahiira: “Miyo ka murumeyi a Yehova! Yiireye ni miyo ntoko sihimme anyu”. Vano, nlaikha naahirowa.
39 Mahiku awo, Maria aahivenya aakuvaka, onarowa muttetthe wa omiyaakoni, epooma ya oYuda.
40 Aahikela vatthokoni va Zakariya, omukhomasa Elizabeti.
41 Nuumala Elizabeti omwiiwa Maria omukhomasaka, mwaana aari mmirimani mwa Elizabeti aahittikinyeya. Vano Elizabeti aahisareya munepa woowaarya,
42 onalavula voorunya oriki: “Ooreelihiwa ti nyuwo eriyari ya athiyana otheene, nave ooreelihiwa ti mwaana ori mmirimani mwanyu!
43 Tthiri eparakha yuulupale oxukuriwa ni maama awe Pwiya aka!
44 Mweekeekhai, kiiwaka-ru makhomaso anyu, mwaana ori mmirimani mwaka oottikinyeya, mwaha wa otteeliwa murima.
45 Oohakalala ti nyuwo mwaaminni, okhala wira sinimwiiraneya voomalela itthu sotheene sihimeeriwe anyu ni Yehova”.
46 Vano Maria aahihimya wira: “Miyo* kinninvuwiha Yehova,
47 nave miyo kinnitteeliwa murima vanceene mwaha wa Muluku, Moopoli aka,
48 maana owo ooweha ohaawa wa murumeyi awe ola mwaamuthiyana. Veekeekhai, okhuma olelo-va, maloko otheene anrowa okihimyaka okhala oohakalala.
49 Tthiri Muluku oowerya, ookipakela itthu suulupale, nave nsina nawe ti noowaarya.
50 Okathi wotheene, onnaamorela ikharari ale animoova.
51 Owo oorumeela ikuru sawe wira opake itthu suulupale. Nave ohaamwarexa atthu oowiisoona.
52 Owo ohaakumiha veehiceni atthu oowerya, ni oowinnuwiha ale aniiyeviha.
53 Ohaavoniha saana ale avoliwe etala, aavahaka itthu sooreera, nave oowoomola matata-ru ale yaari athaaciri.
54 Oomukhaliherya Isarayeli murumeyi awe, oomuupuwela yoowo ommorelaka ikharari,
55 ntoko aahimenrye awe amuhavinre ahu, Abrahamu ni osuulu awe, mahiku otheene”.
56 Maria aahikhala ni Elizabeti etthu yoowiiraka miyeeri miraru. Nuumala-vo, aahitthikela owannyawe.
57 Vano waahiphiya okathi wa Elizabeti oyara. Nto aahimuyara mwaana mwaamulopwana.
58 Okathi anamwaattamanani awe ni amusi awe vaasuwenle aya wira Yehova aahimmorela ikharari vanceene, awo yaahitteeliwa murima nuuwo.
59 Yeettaka mahiku 8, anamwaattamanani awe ni amusi awe, yaahirwa omwinnuwiha mwaana owo. Nto yaaniphavela onvaha nsina na paapa awe, noowi Zakariya.
60 Masi, maama awe aahaaleela wira: “Nnaari, iihaniweke Yohani”.
61 Siiso, awo yaahimuhimeerya wira: “Mweemusini mwanyu, khuuvo mutthu oniihaneliwa nsina nla”.
62 Nto arumeelaka matata, yaahimukoha paapa awe nsina naaphavela awe onvaha mwanawe.
63 Zakariya aahiihaniha ethaapwa yaamukhaani, khulepa wira: “Nsina nawe ti Yohani”. Vano atthu otheene, yaahitikinihiwa vanceene.
64 Niinaano-ru, eyano ya Zakariya yaahitthukuwa, nlumi nawe naahitaphuwa, onapacerya olavula, omuttottopelaka Muluku.
65 Vano, anamwaattamanani awe yaahoova, nave ihapari iya saahilaleiwa muttetthe wotheene wa oYudeya.
66 Nave-tho, atthu otheene yaiwa ihapari iya, yaanuupuwelela, anaikoha ariki: “Khino mwaana ola annuwa onrowa okhala exeeni?” Veekeekhai, owerya wa Yehova waari ni mwaana owo.
67 Muluku aahinvaha munepa woowaarya Zakariya, paapa awe mwaana owo, nto onapacerya olavula moolumo a Muluku, oriki:
68 “Ottottopeliwe Yehova, Muluku a Isarayeli, okhala wira oowoonela othunku ni oowoopola atthu awe.
69 Owo oonikumiherya moopoli oowerya,* okhumme nloko na Davidi, murumeyi awe,
70 ntoko aalavunle awe aarumeelaka maprofeta oowaarya a khalai,
71 wira onoopole mmatatani mwa awanani ihu ni otheene ale anninyokha.
72 Nave aamorele ikharari amuhavinre ahu ni wuupuwela nivarihano nawe noowaarya.
73 Nivarihano nlo aamulaphenle awe Abrahamu, muhavinre ahu,
74 wira onivahe eparakha ya onvarela muteko nihoovaka etthu, nuumala onoopola mmatatani mwa awanani ihu,
75 ni wira nikhale oororomeleya ni a xariya ohoolo wawe, mahiku ahu otheene.
76 Masi nyuwo, mwanaka, munrowa wiitthaniwaka profeta a Muluku Muulupalexa, okhala wira munoorowa ohoolo wa Yehova, wira mulokiherye iphiro sawe,
77 wira mwaasuwelihe woopowa atthu awe, aleveleliwaka itampi saya,
78 mwaha wa othunku wuulupale wa Muluku. Othunku owo onikhuma wiirimu, onrowa onimwaleela ntoko nsuwa ninkhuma voosiisu.
79 Nave onrowa waamwaleela atthu akilanthi mweepiphini ni vamuuttutthini woowiiva, wira oneettiheke ephiro ya murettele”.
80 Nto mwaana owo aahinnuwa ni aahisareya munepa wa Muluku. Nave aanikhala moothakoni mpakha nihiku aixonihenrye awe wa atthu a Isarayeli.
Inoota
^ Nwehe Moolumo Ootthokiheriwa.
^ Ekereku, “anamwane axithiyana a”.
^ Aahiiso, “nlelo ori ene mmirimani mwa maama awe”.
^ Aahiiso, “aakameliwe”.
^ Aahiiso, “okumi aka wotheene”.Nwehe Moolumo Ootthokiheriwa, ani: “Okumi”.
^ Nwehe Moolumo Ootthokiheriwa, ani: “Nnyaka”.
