Masaalimu 115:1-18
115 Yehova, hiyo khanimphwanela etthu, nnaari, hiyo khanimphwanela etthu.Masi nsina nanyu nivuwihiwe,Mwaha wa ophenta wanyu ni ororomeleya wanyu.
2 Xeeni munihiya anyu maloko ahimyaka wiira:
“Muluku aya ori vai?”
3 Muluku ahu ori wiirimu,Owo onnipaka etthu oniphavela awe.
4 Ilatarato saya ti sa eparatha ni sa eweero,Iyo sipakiwe ni apinaatamu.
5 Sookhalana eyano, masi khasiniwerya olavula;Sookhalana maitho, masi khasiniwerya woona;
6 Sookhalana maaru, masi khasiniwerya wiiwa;Sookhalana ephula, masi khasiniwerya wiimurya;*
7 Sookhalana matata, masi khasiniwerya ovara etthu;Sookhalana metto, masi khanisiwerya weetta;Sookhalana mmilo, masi khasiniwerya okumiha nsu.
8 Atthu apanke ilatarato iyo, anrowa olikanaka ni seiyo,Vamosa ni ale ootheene aniroromela seiyo.
9 Nyuwo Isarayeli, mmuroromeleke Yehova,Owo tonookhaliheryani ni tori nikula nanyu na wiixaakihana.*
10 Nyuwo osuulu wa Aroni, mmuroromeleke Yehova,Owo tonookhaliheryani ni tori nikula nanyu na wiixaakihana.*
11 Nyuwo munimoova Yehova, mmuroromeleke Yehova,Owo tonookhaliheryani ni tori nikula nanyu na wiixaakihana.*
12 Yehova onninuupuwela ni onrowa onireeliha;Owo onooreeliha osuulu wa Isarayeli;Onooreeliha osuulu wa Aroni.
13 Yehova onimwaareeliha ale animoova,Onimwaareeliha aalupale ni acikhaani.
14 Yehova onoowiirihani waatta,Nyuwo ni aniinyu.*
15 Mureelihiwe ni Yehova,Mpattuxa a erimu ni a elapo ya vathi.
16 Erimu ti ya Yehova,Masi elapo ya vathi ohaavaha atthu.
17 Atthu akhwiiye, khanimuttottopela Yah;Nnakhala khuuvo ori mmahiye oniwerya opaka eyo.
18 Masi hiyo nnoomuttottopelaka Yah,Okhuma olelo-va mpakha mahiku ootheene.
Mmuttottopeleke Yah!*
Inoota
^ Aahiiso, “woona wunkha wala wunkhela”.
^ Aahiiso, “eskuutu anyu”.
^ Aahiiso, “eskuutu anyu”.
^ Aahiiso, “eskuutu anyu”.
^ Eheeperi, “aniinyu axilopwana”.
^ Aahiiso, “Aleluya!” “Yah” ti enamuna yookhuveya ya nsina na Yehova.
