Masaalimu 55:1-23
Para tiretoore a isipo. Nihaana otthariwaka ni ikaruma sa isipo sirina mikhoyi. Maskiili.* Nsipo na Davidi.
55 Khoo Muluku, nwiriyane ovekela waka,Muhittiyele maaru okathi kinivekela aka okhaliheriwa.
2 Mukiwiriyane oratteene ni mukaakhule.
Koovelavela, mwaha wa mixankiho saka,Nkinoona yoowiira,
3 Mwaha wa etthu awanani aka anihimya aya,Ni mwaha wa atakhali anikihaaxa.
Awo annikikumiherya maxakha,Ni annithipelela okinyokha.
4 Murima aka wookiriipa,Miyo kinnoova okhwa.
5 Kinnoova ni kinnithukumela,Kinnoona oriirya.
6 Kinimakela ohimya wiira: “Kaarina mapupha ntoko epompa!*
Kanvavela ottaiwene, kakhaleke weiwo ni murettele.
7 Kanvavela ottaiwene.
Kaamurowa weemela moothakoni. (Selahi)
8 Kaamutthimakela nipuro noowiipitha,Kaamurakamela epheyo yootupa, ni kammurakamela munamukhaya”.
9 Khoo Yehova, mwaavirikanye atakhali, ni mwaahonone apalano aya,Okhala wiira kinnaaweha atthu awanaka ni yaatuphelaka akhwaaya mpooma.
10 Othana ni ohiyu, awo anneetta vasulu va ixiri arukureryaka epooma,Mpooma-mmo, moosareya otakhala ni onyakulihana.
11 Epooma eyo yoosareya itthu sootakhala;Mapuro anithukumana atthu a epooma eyo, khonthowa ohaaxana ni owokana.
12 Ole onikiruwana khahiyo nwanani aka;Vaakhanle wiira ti yoowo, miyo kanwerya ovilela.
Ole onikivirikanya khahiyo nwanani aka;Vaakhanle wiira ti yoowo, miyo kaamwiipitha.
13 Masi ti nyuwo, pinaatamu ntoko miyo,Mpatthani aka kinimusuwela aka oratteene.
14 Hiyo naari apatthani aalupale;Naaneetta hoothe ni muttitthi wa atthu, nrowaka empa ya Muluku.
15 Atthu awo apwetexiwe!
Akhuruwele Mmahiye* ari ene akumi;Mapuro anikhala aya woosareya otakhala, nave murima aya ti wootakhala.
16 Miyo kinonvekela Yehova Muluku;Nto owo onookoopola.
17 Voosiisu, othana eriyari ni makaaripi, kinnixanka ni wuupulela;Nto Muluku onnikiiwa.
18 Owo onookoopola ni onookivaha murettele mwaha wa atthu aniwana ni miyo,Okhala wiira atthu anikivirikanya khareere waatta.
19 Muluku onoowiiwa ni onoowaakhula atthu awo,Ti yoowo okilanthi veehiceni vawe okhuma khalai. (Selahi)
Awo anookhootta orukunuxa mirima saya,Ti yaawo ahinimoova Muluku.
20 Mpatthani aka ohaatuphela apatthani awe;Owo oohonona nivarihano naya.
21 Moolumo awe tooreera wiiwa, ntoko mutthu onilya manteeka,Masi vamurimani vawe, oniphavela owana.
Moolumo awe tooreera ovikana makhura,Masi anlikana ni ispaata soowiitha.*
22 Mmurihele Yehova muritti anyu woolemela,Nto owo onimookhaliheryani.
Khonrowa omuhiya naxariya omoraka.
23 Masi nyuwo, Muluku, munimwaarihela atakhali mulittini moowiixa.
Anawiive ni anawoothe, animookhwa nlelo ari ene amiravo.
Masi miyo, kinimoororomelani nyuwo.
Inoota
^ Nwehe Moolumo Ootthokiheriwa.
^ Aahiiso, “ekhuntta”.
^ Nwehe Moolumo Ootthokiheriwa.
^ Aahiiso, “axoowa oowiitha”.
