Masaalimu 80:1-19
Para tiretoore a isipo. Nsipo ninlavula sa “Ifilori”. Nsipo na Asaafi para wuupuxerya.
80 Nyuwo Makampusi a wIsarayeli, nwiriyane!Nyuwo muniweettiha atthu a nihimo na Yosefe, ntoko nikoto na inama.
Nyuwo munikilaathi veehiceni vanyu, vasulu va* makerubi,Mooniherye ovuwa wanyu.
2 Mooniherye owerya wanyu,Ohoolo wa Efrayimi, Beniyamini ni Manase;Murwe munoopole.
3 Khoo Muluku, mutthikele-tho onaakhela;Munimorele ikharari ni munoopole.
4 Nyuwo Yehova, Muluku a anakhotto,
Munrowa onanariwa ni atthu anyu mpakha silini,
Ni okhootta owiriyana mavekelo aya?
5 Ohiya waavaha eyoolya, nyuwo munoowunliha,Munniwiiriha wunla okathi wootheene.
6 Munnaahiya ale anaattamenle aniwanelaka;Awanani ihu animakela onitheya, khula okathi aniphavela aya.
7 Khoo Muluku a anakhotto, mutthikele-tho onaakhela;Munimorele ikharari ni munoopole.
8 Nyuwo muhaakumiha atthu anyu wExiitu,
Ntoko mutthu oniphela mwiri wa ewuuva.
Nuumala-vo, muhoomola maloko mulaponi mwaya,
Mphatteya mwiri owo memmo.
9 Mwaahaaverya nipuro mwiri owo,Nto owo waahikhalana mitathaari ni waahisareya mulaponi.
10 Miyaako saahikhuneeliwa ni muuttutthi wa mwiri owo,Nave miri sa eseeturu Muluku anle awe, saahikhuneeliwa ni iritta saya.
11 Iritta saya saahiphiya mpakha ophareya,Nave maphuwela aya yaahiphiya omuro.*
12 Xeeni muhalaka opwexa exiri ya maluku,Yeeyo erukurenrye ematta ya ewuuva,
Nto atthu ootheene anivira anarukula mihokorokho saya?
13 Ikuluwe sa mutakhwani* sinnihonona ematta eyo,Nave inama sa mutakhwani sinnoolya memmo.
14 Khoo Muluku a anakhotto, mutthikele-tho onaakhela.
Wiirimu muri anyu, nwehe vathi-va!
Mukhapelele ematta ela ya ewuuva,
15 Eyo piiyo, mwiri ola wa ewuuva mwaalale anyu ni ntata nanyu noolopwana,Nave mukhapelele eritta ela mulipinhe anyu para nyuwo.
16 Ohiikitthiwa, khupahiwa ni mooro.
Atthu annookhwa yapwapweliwa-ru ni nyuwo.
17 Ntata nanyu nimukhaliherye mulopwana ori moono anyu woolopwana,Mwaana a mutthu, yoowo mmulipinhe anyu para nyuwo.
18 Siiso, hiyo khaninrowa woohiyani.
Munikhalihe akumi, wiira nttottopeleke nsina nanyu.
19 Khoo Yehova, Muluku a anakhotto, mutthikele-tho onaakhela;Munimorele ikharari ni munoopole.
