Matheyo 1:1-25
1 Eliivuru ya nloko na Yesu Kristu,* mwaana a Davidi, mwaana a Abrahamu.
2 Abrahamu aahimuyara Isaakhi;Isaakhi aahimuyara Yakobe;Yakobe aahimuyara Yuda ni annawe;
3 Yuda ni Thamari yaahimuyara Peresi ni Zerahi;Peresi aahimuyara Esironi;Esironi aahimuyara Arami;
4 Arami aahimuyara Aminadabi;Aminadabi aahimuyara Naasoni;Naasoni aahimuyara Salimoni;
5 Salimoni ni Rahabi yaahimuyara Bowazi;Bowazi ni Ruthi yaahimuyara Obedi;Obedi aahimuyara Yese;
6 Yese aahimuyara mwene Davidi;Davidi ni mwaara a Uriya yaahimuyara Salomoni;
7 Salomoni aahimuyara Robowamu;Robowamu aahimuyara Abiya;Abiya aahimuyara Asa;
8 Asa aahimuyara Yosafati;Yosafati aahimuyara Yorami;Yorami aahimuyara Oziya;
9 Oziya aahimuyara Yotami;Yotami aahimuyara Akhazi;Akhazi aahimuyara Ezekiya;
10 Ezekiya aahimuyara Manase;Manase aahimuyara Amoni;Amoni aahimuyara Yosiya;
11 Yosiya aahimuyara Yekoniya ni annawe, okathi ayuda yaaroihiwe aya oBabilonia.
12 OBabilonia, Yekoniya aahimuyara Salathiyeli;Salathiyeli aahimuyara Zorobabeli;
13 Zorobabeli aahimuyara Abiyudi;Abiyudi aahimuyara Eliyakimi;Eliyakimi aahimuyara Azori;
14 Azori aahimuyara Sadoki;Sadoki aahimuyara Akimi;Akimi aahimuyara Eliyudi;
15 Eliyudi aahimuyara Eleyazari;Eleyazari aahimuyara Mathani;Mathani aahimuyara Yakobe;
16 Yakobe aahimuyara Yosefe. Nto Yosefe aahimuthela Maria, maama awe Yesu. Yesu owo oniitthaniwa-tho Kristu.
17 Maloko otheene okhuma Abrahamu mpakha Davidi yaari 14; okhuma Davidi mpakha okathi ayuda yaaroihiwe aya oBabilonia, yaari maloko 14; ni okhuma okathi yaaroihiwe aya oBabilonia mpakha Kristu, yaari maloko 14.
18 Oyariwa wa Yesu Kristu wiiraneyale so: Maria, maama awe Yesu, aahinoivariwa* ni Yosefe. Nto ohinatthi otheliwa ni Yosefe, Maria aahirupala ni owerya wa munepa woowaarya.*
19 Masi Yosefe, iyawe Maria, aari naxariya. Okhala wira khaaphavela omuulihiha muru Maria, tivo, aahuupuwela omuhiya ni mwiitiho.*
20 Nuumala wuupuwela itthu iya, nlaikha na Yehova* naahimukhumelela moolohani, nimuleelaka wira: “Nyuwo Yosefe, mwaana a Davidi, muhoove omukuxa mwaarinyu Maria, okhala wira owo oorupala ni owerya wa munepa woowaarya.*
21 Owo onoomuyara mwaana mwaamulopwana, yoowo onrowa anyu onvaha nsina noowi Yesu.* Tthiri Yesu owo, onoowoopola atthu awe itampi saya”.
22 Mweekeekhai, itthu iya sotheene sihiiraneya wira simaliherye ele Yehova aalavunle awe omurumeelaka profeta awe, oriki:
23 “Mwiiwe! Mwali ohitonko orupana mulopwana, onoorupala, omuyare mwaana mwaamulopwana, yoowo anrowa aya onvaha nsina na Emanuweli”. Nsina nno nintaphulela: “Muluku ori ni hiyo”.
24 Nuumala-vo, Yosefe aahivenya vaarupa awe, aahitthara malakiheryo a nlaikha na Yehova, khimukuxa mwaarawe onamuroiha owaani.
25 Masi khaarupanne, mpakha Maria omuyara mwaana mwaamulopwana, ni aahinvaha nsina noowi Yesu.
Inoota
^ Aahiiso, “Mesiya; Oothanliwa”.
^ Aahiiso, “aahaakameliwa”.
^ Aahiiso, “ikuru sa Muluku”.
^ Aahiiso, “omuhiya voohisuweliwa”.
^ Ikwaha 237 nsina na Muluku noowi Yehova, ninrwa aya Soolempwa sa Ekereku sa Ekristau mBiibiliyani-mu, ola opuro onipacerya aya orwa nsina nlo.
^ Aahiiso, “ikuru sa Muluku”.
^ Nsina nla, nttaava na eheeberi nniiriwa Yexuwa aahiiso Yoxuwa, nenlo nintaphulela “Yehova ti woopowa”.
