Matheyo 19:1-30
19 Nuumala Yesu olavula itthu iya, aahivenya oGalileya orowaka omukanoni wa oYudeya, ekhopela ekina ya muro Yordani.
2 Nave-tho, mittitthi suulupale sa atthu saahimutthara, nto weiwo Yesu aahaapenuxa aretta aya.
3 Nave, afarisi yaahimwaattamela Yesu aphavelaka omweehererya, anamukoha wira: “Niireke vanneemereriwa mulopwana omwalana ni mwaarawe mwaha wa khula etthu?”
4 Yesu aahaakhula oriki: “Khamunasome wira ole aapattunxe apinaatamu okhuma woopaceryani, ompattunxe mulopwana ni muthiyana?
5 Nave-tho, khamunasome wira owo aahihimya so: ‘Tivo, mulopwana onimwaahiya apapawe ni amamawe, wira okhaleke* ni mwaarawe, nto oowanli aya anrowa okhala erutthu emosa’?
6 Siiso, awo khahiyo-tho atthu anli, masi ari erutthu emosa. Nto ele Muluku okhalinhe awe emosa, ohikhale mutthu onivalaanya”.
7 Awo yaahimukoha wira: “Nto xeeni Moise ohalaka oruma wira mulopwana onvahe mwaarawe etukumento ya omwalana ni omoomoleke?”
8 Yesu aahiwaakhula wira: “Moise oheemererya wira mmwalaneke ni mwaarinyu, mwaha wa ohiphavela wanyu wiiwa, masi khahiyo waari siiso okhuma woopaceryani.
9 Masi, kinooleelani wira, ole onimwalana ni mwaarawe, ohikhanle mwaha wa orupihana woohiloka,* onamuthela muthiyana mukina, mutthu owo onooraruwa”.
10 Awiixutti awe yaahimuleela wira: “Othelana waari ene siiso, fataari ohithela-tho”.
11 Yesu aahiwaakhula iiraka: “Khahiyo wira atthu otheene anoowerya opaka ele enihimya aka, masi aniwerya paahi taale avahiwe ni Muluku.
12 Tthiri aakhala atthu ahinithela maana ayariwe siiso; aakhala-tho ahinithela mwaha woowi ahuliwe ni atthu. Nave-tho aakhala ahinithela voolakelela, mwaha wa Omwene wa wiirimu. Ole oniwerya okhala siiso, okhaleke”.
13 Nto Yesu aahiruuheliwa anamwane acikhaani wira owiixaatherye matata ni waavekelela, masi awiixutti yaanaapwapwela axipapaya ni aximamaya.
14 Tivo, Yesu aahiwiirela: “Mwaahiye anamwane awo, muhaakhoottiherye okirweela miyo, maana Omwene wa wiirimu ti wawaya”.
15 Nto aahiwiixaatherya matata awe. Nuumala-vo, aahikhuma opuro owo.
16 Vano, mutthu mmosa aahimwaattamela Yesu, onamukoha wira: “Mwiixuttihi, kipake exeeni yooloka wira kiphwanye okumi woohimala?”
17 Yesu aahimwaakhula, iiraka: “Xeeni munikikoha anyu wira ‘kipake exeeni yooloka’? Ooloka ti Muluku paahi. Vano, mwaaphavelaka ophwanya okumi woohimala, muhaana weettela sooruma sa Muluku, voohihiyererya”.
18 Owo aahimukoha-tho wira: “Sooruma xeeni?” Vano, Yesu aahimwaakhula, oriki: “Muhimwiive mutthu, muhiraruwe, muhiiye, muhimootherye mutthu,
19 mwaattittimiheke apapinyu ni amaminyu, ni mumphenteke mukhwiinyu ntoko muniiphenta anyu”.
20 Mmiravo owo, aahiira: “Miyo kinneettela sotheene iyo. Nto exeeni enikihalela?”
21 Yesu aahimwiirela: “Mwaaphavelaka okhala oomalela,* murowe mwatumihe mireerelo sanyu, nto musurukhu ene mwaavahe alipa-oohaawa. Siiso munookhalana muhakhu wiirimu. Nuumala-vo, murwe mukhale mwiixutti aka”.
22 Okathi aiwale awe moolumo ala, mmiravo owo aahirowa oriipiwe ene murima, okhala wira aahikhalana mihakhu sinceene.
23 Vano Yesu aahaahimeerya awiixutti awe wira: “Kinooleelani ekeekhai wira, vanoovila thaaciri okela Moomweneni wa wiirimu.
24 Kinooleelani-tho wira, vanookhweya ekamelo ovira vamwiitheni va akulya, ovikana thaaciri okela Moomweneni mwa Muluku”.
25 Nuumala awiixutti wiiwa eyo, awo yaahixankiheya vanceene, anahimya wira: “Ti pani oniwerya woopowa tthiri?”
26 Yesu aahaawehexexa onaahimeerya wira: “Moonelo wa atthu, etthu ela kheniweryaneya, masi moonelo wa Muluku khahiyo siiso, maana Muluku onniwerya opaka itthu sotheene”.
27 Vano, Pedru aahimuleela Yesu wira: “Hiyo-va, noohiya itthu sotheene nnoottharani. Exeeni enrowa ahu ophwanya?”
28 Yesu aahiwaakhula wira: “Kinooleelani ekeekhai wira, okathi itthu sotheene sinrowa aya okhalihiwa isya, nave Mwaana a mutthu akilaathi veehiceni vawe voowaarya, nyuwo munookilaathi ihice 12 wira mphukeleke mahimo 12 a Isarayeli, okhala wira mwa awiixutti aka.
29 Nave, otheene ale anihiya ipa saya, anaahiya axinnaya, axirokoraya, apapaya, amamaya, anaaya, aahiiso anihiya imatta saya mwaha wa nsina naka, animwaakhela itthu iya voowaatta, nave anoophwanya okumi woohimala.
30 “Anceene ari oopacerya, anrowa okhala ookiserya, nave anceene ari ookiserya anrowa okhala oopacerya.
Inoota
^ Nuulumo na ekereku, nintaphulela “ophitaanya oratteene, ntoko ekoola”.
^ Ekereku, porneía. Nwehe Moolumo Ootthokiheriwa.
^ Eyo piiyo, oomalela vamaithoni va Muluku.
