Matheyo 5:1-48
-
MWAHA YESU AALAVUNLE AWE VAMWAAKO (1-48)
5 Nuumala Yesu oweha mittitthi sa atthu, aahiwela vamwaako, khukilaathi vaavo. Vano, awiixutti awe yaahimwaattamela.
2 Owo aahipacerya olavula, owiixuttihaka wira:
3 “Oohakalala taale anisuwela wira ahaana omusuwela Muluku, okhala wira Omwene wa wiirimu ti wawaya.
4 “Oohakalala taale ariipiwe murima, okhala wira anrowa omaalihiwa.
5 “Oohakalala taale oomaala,* okhala wira animwaakhela elapo.
6 “Oohakalala taale aniphavela vanceene* exariya, okhala wira animwaakhela exariya eyo voomalela.
7 “Oohakalala taale oomoriwa ikharari, okhala wira anoomoreliwa ikharari.
8 “Oohakalala taale a murima wooreera, okhala wira anonweha Muluku.
9 “Oohakalala taale anikhaliha murettele, okhala wira animwiireliwa anamwane a Muluku.
10 “Oohakalala taale anlupatthiwa mwaha wa exariya, okhala wira Omwene wa wiirimu ti wawaya.
11 “Oohakalala ti nyuwo, mwaaveehiwaka, mwaalupatthiwaka ni mootheriwaka itthu sotheene sootakhala mwaha wa miyo.
12 Mutteeliweke murima ni muhakalaleke vanceene, okhala wira otthuveliwa wanyu wiirimu ti wuulupale. Tthiri, ti siiso yaalupatthinwe aya maprofeta muhinatthi nyuwo.
13 “Nyuwo mwa maakha a mulaponi. Masi, maakha yahiya osiva waya, niireke ohaavo oniwerya ottikiherya osiva waya maakha awo? Maakha awo kharina-tho muteko; masi anooriheliwa ota, anyakeliweke ni atthu.
14 “Nyuwo mwa muthuko wa mulaponi. Epooma etekiwe vamwaako kheniipithiheya.
15 Atthu khampattiha muthuko, anakhuneela ni ettanka,* masi annipweha osulu-sulu, wira waamwaleeleke atthu otheene ari mpaani.
16 Siiso, waarya wanyu waamwaleeleke atthu, wira yooneke miteko sanyu sooreera, ni anvuwiheke Tiithi inyu, yoowo ori wiirimu.
17 “Muhuupuweleke wira kirwenle omaliha Nlamulo na Moise, aahiiso soowiixuttiha sa Maprofeta. Nnaari, nkirwenle omaliha, masi kirwenle omaliherya.
18 Kinooleelani ekeekhai wira: vanookhweya erimu ni elapo omala. Masi, khivaniweryaneya omala eleetera yaamukhaanixa, aahiiso mpantta mwaamukhaanixa wa eleetera ya Nlamulo, itthu sotheene sihiiraneyale.
19 Tivo, ole ohinrowa wiiwelela yooruma emosa yaamukhaanixa ni oniwiixuttiha akhwaawe ohiiwelela yooruma eyo, mutthu owo onookhalihiwa ooyevexa Moomweneni wa wiirimu. Vano, ole oniiwelela ni oniwiixuttiha akhwaawe wiiwelela, onookhalihiwa muulupale Moomweneni wa wiirimu.
20 Miyo kinooleelani wira, exariya anyu yaahivikane ele ya alipa-oowiixuttiha Nlamulo ni ya afarisi, tthiri khamunkela Moomweneni wa wiirimu.
21 “Muhiiwa ele yaahimeeriwe aya atthu a khalai wira: ‘Muhimwiive mutthu. Ole onimwiiva mutthu, onooroihiwa otripunaale’.
22 Masi, miyo kinooleelani wira ole onithipelela onviruwela munnawe, onimwaakhula otripunaale. Ole onimulavulela munnawe moolumo ooveeha, onoophwanya mulattu Etripunaale Yuulupale.* Nto ole onimwiirela munnawe wira: ‘Mulolo ohirina efaita’, onniphwanela oriheliwa oGehena* onipatta mooro.
23 “Mwaaruuhaka yoovaha anyu valtaari, nto muupuwela* wira munninyu oonanariwa ni nyuwo,
24 muhiye yoovaha anyu ohoolo wa altaari, murooke. Mwapacerye toko waataana ni munninyu, nuumala-vo, murweeke ovaha mukuttho anyu.
25 “Mwaakuveleke ophuka mwaha ni ole orina anyu mulattu, muhinatthi ophiya otripunaale iwo, wira ole omutthekenle anyu ohoovahereryeni mulipa-oophuka, nave mulipa-oophuka owo, ohoovahereryeni kwarta ookhatteya, wira ooriheleni mukhatteya.
26 Kinooleelani ekeekhai wira: Khamunikhuma mukhatteya-mmo, muhilinve musurukhu wotheene.*
27 “Muhiiwa ele yaahimmwale wira: ‘Muhiraruwe’.
28 Masi kinooleelani wira: Ole oninwehexexa muthiyana mpakha ophavela orupana, mutthu owo ooraruwana muthiyana owo vamurimani.
29 Nto, akhala wira niitho nanyu noolopwana ninnootthekihani,* musyoole,* murihele ottaiwene. Fataari ohikhalana mpantta mmosa wa erutthu anyu, ohiya erutthu anyu yotheene oriheliwa oGehena.*
30 Nave-tho, akhala wira ntata nanyu noolopwana ninnootthekihani,* mwiikitthe, murihele ottaiwene. Fataari ohikhalana mpantta mmosa wa erutthu anyu, ohiya erutthu anyu yotheene oriheliwa oGehena.*
31 “Nave-tho, vaahihimmwa wira: ‘Mulopwana onimwalana ni mwaarawe, onvaheke etukumento ya omwalana’.
32 Masi, kinooleelani wira: Ole onimwalana ni mwaarawe, ohikhanle mwaha wa orupihana woohiloka,* pooti omwiiriha oraruwa, akhala wira onootheliwa ni mulopwana mukina. Vano, ole onimuthela muthiyana owo omwalaniwe, nave onooraruwa.
33 “Muhiiwa-tho ele yaahimeeriwe aya atthu a khalai wira: ‘Muhilapheke mahala ene, nto muhaana omutaphula natiri ommanenle anyu Yehova’.
34 Masi, kinooleelani wira: Muhilapheke, muromolaka erimu, okhala wira erimu ehice ya Muluku.
35 Nave, muhilapheke muromolaka elapo, maana elapo ti opuro Muluku onipweherya awe inawu sawe; nnakhala muhilapheke muromolaka oYerusalemu, okhala wira ti epooma ya Mwene muulupale.*
36 Muhilapheke muromolaka muru anyu, okhala wira khamunwerya otatuxa ekharari anyu emosa wira ekhale yootteela aahiiso yooriipa.
37 Masi olavula wanyu woowi ‘aayo’, okhaleke aayo, ‘nnaari’, okhaleke nnaari. Moolumo anincererya anyu, anikhuma wa Mutakhali.
38 “Muhiiwa ele yaahimmwale wira: ‘Ole onipwexa niitho na mukhwaawe, nave niitho nawe nipwexiwe. Ole onikhula niino na mukhwaawe, nave niino nawe nikhuliwe’.
39 Masi, kinooleelani wira: Muhiwane ni mutthu ootakhala. Mutthu onoomanani nlaku noolopwana, munvahererye* nlaku nikina.
40 Akhala mutthu oniphavela wooroihani otripunaale wira owaakheeni nlaya nanyu na muhina, mmuhiyerye-tho nlaya nanyu na ota.
41 Nave, akhala mutthu orina okhulupale onookhanyereryani omuhoola ekiloomo emosa, mmuhoole ikiloomo piili.
42 Ale anoovekelani etthu, mwaavaheke. Nave, muhaatthyaweke* ale aniphavela wookophelani.*
43 “Muhiiwa ele yaahimmwale wira: ‘Mumphenteke mukhwiinyu ni mmunyokheke nwanani inyu’.
44 Masi, kinooleelani wira: Muthipeleleke waaphenta awanani inyu ni mwaavekeleleke ale anoolupatthani.
45 Siiso, munimooniherya wira mwa anamwane a Tiithi inyu, ori wiirimu. Owo onnaakumiherya nsuwa atthu ootakhala murima ni atthu ooreera murima; nave onnaavaha epula anaxariya ni ale ahikhanle anaxariya.
46 Nto, mwaaphentaka paahi ale anoophentani, muniphwanya-ni? Niireke alipa-ooliviha mpoosito khaniira siiso?
47 Nave, mwaakhomasaka atthu a nloko nanyu paahi, munoona wira munipaka etthu yooloka? Niireke atthu ahikhanle aisarayeli, khaniira siiso?
48 Muhaana okhala atthu oomalela, ntoko Tiithi inyu ori wiirimu ori awe oomalela.
Inoota
^ Aahiiso, “oowiiyeviha”.
^ Ekereku, “anivoliwa etala ni ntthona”.
^ Aahiiso, “esestu”.
^ Eyo piiyo, eSineedrio ya ayuda.
^ Opuro waapahiwa ikokhola, ota wa oYerusalemu. Nwehe Moolumo Ootthokiheriwa.
^ Aahiiso, “mutthokelela”.
^ Ekereku, “ekwatrante yookiserya”.
^ Aahiiso, “mukumihe”.
^ Nwehe Moolumo Ootthokiheriwa.
^ Ekereku, “ninnookwattulihani”.
^ Ekereku, “ninnookwattulihani”.
^ Nwehe Moolumo Ootthokiheriwa.
^ Ekereku, porneía. Nwehe Moolumo Ootthokiheriwa.
^ Eyo piiyo, Muluku.
^ Aahiiso, “mmutheteerye”.
^ Aahiiso, “muhaareryeke ettuli; muhaahuluweke; muhaakhootteleke”.
^ Eyo piiyo, okopha voohilipelela oliva ovikana ele ekomphe awe.
