Matheyo 6:1-34
6 “Mwiipasoope wira muhivareke miteko sooreera vamaithoni va atthu, mphavelaka wooniwa naawo. Mwiira siiso, Tiithi inyu ori wiirimu, khonrowa wootthuvelani.
2 Tivo, okathi munaavaha anyu itthu sooreera alipa-oohaawa, muhoopeke nlope* ntoko siniira aya anawoothe musinagoga* ni mphironi, aphavelaka ovuwihiwa ni atthu. Kinooleelani ekeekhai wira: awo ahaakhela etthuvo aya yoomalela.
3 Nto nyuwo, okathi munaavaha anyu itthu sooreera alipa-oohaawa, muhihiye ntata nanyu noothiyana, nsuwelaka ele ntata nanyu noolopwana enipaka aya,
4 wira soovaha sanyu sihisuweliwe. Nto Tiithi inyu, yoowo oniweha itthu sotheene, onimootthuvelani.
5 “Nave, okathi onivekela anyu, muhikhaleke ntoko anawoothe, maana awo waasivela ovekela yeemenle ene musinagoga* ni munikumana iphiro suulupale, aphavelaka wooniwa ni atthu. Kinooleelani ekeekhai wira: awo ahaakhela etthuvo aya yoomalela.
6 Masi okathi onivekela anyu, muroweke mpaani mwanyu, nwaleke mukhora, munvekeleke Tiithi inyu, ohinooneya. Vano, Tiithi inyu, yoowo oniweha itthu sotheene, onimootthuvelani.
7 Mwaavekelaka, muhimakeleke oromola moolumo mamosa-ru, ntoko aniira aya atthu a mulaponi, maana anuupuwela wira Muluku onimwaawiriyana, mwaha wooromola moolumo manceene.
8 Tivo, muhikhaleke ntoko awo, okhala wira Tiithi inyu, onnisuwela sinoothowani, hata muhinatthi onvekela.
9 “Nto, nvekeleke so:
“‘Tiithi ihu muri wiirimu, nsina nanyu nitteelihiwe.*
10 Omwene anyu orwe. Ele eniphavela anyu yiireye vathi-va, ntoko wiirimu.
11 Munivahe olelo, yoolya* ahu ya nihiku nla.
12 Nave, munlevelele soottheka* sahu, ntoko hiyo nnaalevelela ahu ale annitthekela.*
13 Nto muhinihiye nimoraka okathi oneehereriwa ahu, masi munaakiherye Mutakhali’.
14 “Vakhala wira munimwaalevelela ale anootthekelani, nave Tiithi inyu ori wiirimu, onimoolevelelani.
15 Vakhala wira khamunaalevelela ale anootthekelani, nave Tiithi inyu ori wiirimu, khonoolevelelani.
16 “Okathi munitthukwa anyu, owiitho wanyu ohooneyeke wira mooriipiwa murima, ntoko aniira aya anawoothe, aphavelaka wooniwa ni atthu. Kinooleelani ekeekhai wira: awo ahaakhela etthuvo aya yoomalela.
17 Masi mwaatthukwaka, mukuseke owiitho ni muheleke makhura mmuruni mwanyu,
18 wira atthu ahisuweleke wira murootthukwa, masi osuweleke Tiithi inyu paahi, yoowo oniweha itthu sotheene. Vano, Tiithi inyu, yoowo oniweha itthu sotheene, onimootthuvelani.
19 “Muhiye wiithukumanyerya mihakhu vathi-va, vaava oweexe ni mukwitha* sinihonona aya, ni alatarau anikela aya, aniiya.
20 Masi mwiithukumanyeryeke mihakhu wiirimu, weiwo oweexe nnakhala mukwitha* sihinihonona aya, ni alatarau ahinikela aya, aniiya.
21 Tthiri, vaavo vari muhakhu anyu, vaavo-tho tonrowa aya okhala murima anyu.
22 “Muthuko wa erutthu, niitho. Tivonto, akhala wira niitho nanyu ninluluwanya itthu sooreera paahi, erutthu anyu yotheene enrowa waaryaka.*
23 Masi, niitho nanyu natakhala,* erutthu anyu yotheene enoosareya epiphi. Nto, vakhala wira murina epiphi, ohiya waarya, weeso epiphi eyo khereere wunnuwa!
24 “Khaavo oniwerya waavarela muteko mapatarau manli, maana onoomunyokha mmosa, omphenteke mukina, aahiiso ononvarexexa mmosa omuthanyeke mukina. Nyuwo khamunwerya onvarela muteko Muluku, vamosa ni Mihakhu.
25 “Tivonto, kinooleelani wira: Muhiye oxanka mwaha wa ikumi sanyu, muupuwelaka etthu yoolya ni yoowurya, aahiiso etthu yoowara. Niireke okumi khorina efaita yuulupale ovikana yoolya ni yoowara?
26 Nkaaweheeni saana axipalame:* khanaala, nnakhala khanihepha, hata kharina ntatha. Vano, Tiithi inyu ori wiirimu, onnaaphwanyiha yoolya. Ankhi nyuwo, niireke khamurina efaita waavikana awo?
27 Ti pani a nyuwo oniwerya orakamiha vakhaani okumi awe mwaha wa oxankiheya?
28 Nave-tho, xeeni oxankelaka soowara? Mwiixutteke etthu ni moota ifilori sa mmatta sininnuwa aya. Iyo khasinvara muteko, nnakhala khasintthava ikuwo.
29 Masi, kinooleelani wira hata mwene Salomoni, ni ovuwa wawe wotheene, khonaware ntoko ifilori iya.
30 Vano, vakhala wira Muluku onniwariha siisa malaxi a mmatta, yaawo anikhala olelo, meelo khupahiwa, niireke khonrowa otepa woowarihani nyuwo, atthu oowaamini vakhaani?
31 Nto, muhixankeke mwiiraka: ‘Ninrowa olya exeeni?’, ‘Ninrowa owurya exeeni?’ aahiiso ‘Ninrowa owara exeeni?’
32 Tthiri, iya ti itthu siniphavelexiwa ni atthu a mulaponi. Tiithi inyu ori wiirimu, onnisuwela wira itthu iya sotheene sinnoothowani.
33 “Tivonto, khula okathi, muheleke opuro woopacerya Omwene ni exariya ya Muluku. Vano, itthu iya sikina sotheene, munimuncereriwa.
34 Siiso, muhixankeleke nihiku na meelo, maana meelo sinookhala mixankiho saya. Khula nihiku nookhalana mixankiho saya.
Inoota
^ Aahiiso, “nipetta”.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “nithokoreriweke okhala noowaarya”.
^ Ekereku, “ephaawu”.
^ Ekereku, “okopha”.
^ Ekereku, “annikophela”.
^ Aahiiso, “murawa”.
^ Aahiiso, “murawa”.
^ Aahiiso, “osareya waarya”.
^ Aahiiso, “nakhalana nrima”.
^ Aahiiso, “axinuuni”.
