Miruku 12:1-28
12 Ole onimusivela ottaruxiwa onniphenta osuwela,Masi ole oninyokha ottaruxiwa khonuupuwela saana.
2 Atthu ooreera murima anneemereriwa ni Yehova,Masi Muluku onnimulamula mutthu onipaka itthu sootakhala.
3 Mutthu khonwerya okhala ni murettele opakaka itthu sootakhala,Masi anaxariya anrowa olikanaka ni mwiri ohinweryaneya opheliwa.
4 Muthiyana ooloka onnimwiiriha iyawe ottittimihiwa,Masi muthiyana onipaka itthu soowuuliha muru, onlikana ni eretta eninttiha makhuva a iyawe.
5 Miyuupuwelo sa anaxariya ti sooloka,Masi malakiheryo a atakhali toowoototha.
6 Moolumo a atakhali muraakho oniiva,Masi eyano ya naxariya ennimwaakiherya itthu soowoopiha.
7 Okathi atakhali anipwetexiwa aya, annihiya okhala,Masi etthoko ya anaxariya khenipwetexiwa.
8 Mulopwana onilavula ni ankhili, onnittottopeliwa,Masi mutthu orina murima wootakhala onoothanyiwa.
9 Fataari okhala mutthu ohinooneliwa vatthu orina ene namuteko mmosa,Ovikana okhala mutthu oowiivuwiha ohirina etthu yoolya.
10 Naxariya onnikhapelela inama sawe sa vate,Masi mutakhali onuupuwela wiira toomoriwa ikharari, ori ene mutakhali.
11 Ole onlima ematta onookhalana yoolya yoowaatta,Masi ole onitthimakela itthu sihirina efaita khonuupuwela saana.*
12 Mutthu ootakhala murima onnikhalela nrima enama enivariwa ni atthu ootakhala,Masi mutathaari wa anaxariya onniimiha mihokorokho.
13 Mutthu ootakhala onnimorela vantaphani mwaha wa moolumo awe oohiloka,Masi naxariya onnoopowa mmaxakhani.
14 Ele mutthu onihimya awe, pooti omwiiriha itthu omweettela saana,Nave owo onootthuveliwa mwaha wa miteko sawe.
15 Mutthu ohirina ankhili onoona wiira iphiro sawe ti sooloka,Masi mutthu orina ankhili onneemererya miruku.
16 Mutthu ohirina ankhili waakuva onanariwa,Masi mutthu a ankhili onnivilela oveehiwa.
17 Namoona oororomeleya onnilavula ekeekhai,Masi namoona oowootha onilavula itthu soowootha.
18 Moolumo oohuupuweliwa anlikana ni ovulalihiwa ni espaata,*Masi moolumo a* atthu a ankhili annaapenuxa atthu.
19 Moolumo eekeekhai anookhala mahiku ootheene,Masi moolumo oowoothiwa ankhala okathi vakhaani.
20 Atthu anuupuwela opaka itthu sootakhala, vamurimani vaya wookhala wootha,Masi atthu anikhaliha murettele, annitteeliwa murima.
21 Khiivo etthu yootakhala enrowa omukhumelela naxariya,Masi atakhali anoophwanya maxakha manceene.
22 Yehova onnimunanara vanceene mutthu oowootha,Masi onnisiveliwa ni atthu anipaka itthu moororomeleya.
23 Mutthu a ankhili onniipithiha etthu enisuwela awe,Masi mutthu ohirina ankhili onnilaleya moolumo a elolo.
24 Atthu a ankhili anrowa olamulelaka,Masi atthu oolosowa anrowa ovaraka miteko sookhanyereriwa.
25 Oxankiheya onnimwiiriha mutthu oriipiwa murima,Masi moolumo ooreera annitteeliha murima.
26 Anaxariya annikhapelela opuro anilyiha aya inama saya,Masi atthu ootakhala annihapuxiwa ni mweettelo aya.
27 Mutthu oolosowa* khonixaya,Masi ankhili etthu ya efaita yinceene para mutthu.
28 Ephiro ya xariya enniphwanyiha okumi,Ephiro eyo khenroiha wookhwaani.
Inoota
^ Eheeperi, “khorina murima”.
^ Aahiiso, “xoowa”.
^ Eheeperi, “nlumi na”.
^ Aahiiso, “oowoolowa”.
