Miruku 21:1-31
21 Murima wa mwene, onlikana ni maphattuwelo a maasi ari mmatatani mwa Yehova.
Owo onniroiha opuro onimusivela.
2 Mutthu onoona wiira iphiro sawe sootheene ti sooloka,Masi Yehova tonitokosa mirima.
3 Opaka etthu yooloka ni ya xariya,Ennimusivela vanceene Yehova ovikana mukuttho.
4 Maitho oowiixinnuwiha a atakhali ni murima aya woowiisoona,Ti muthuko oneettiha iphiro saya, nave itthu iyo etampi.
5 Apalano a mutthu orina ankhili anneetta saana,Masi atthu ootheene ookhummwa murima, anoohaawa.
6 Ophwanya mihakhu ni wootha, onlikana ni etthapwe enlakaseya,Ni onlikana ni muraakho oniiva.*
7 Atakhali anoomala-mala mwaha wa otakhala waya,Okhala wiira awo annikhootta opaka itthu attharaka exariya.
8 Ephiro ya mutthu orina mulattu ti yoohiloka,Masi miteko sa mutthu ooloka ti sooreera.
9 Fataari okhala vakantu vasulu va empa,Ohiya okhala empa emosa ni muthiyana oomusivela onyakulihana.
10 Mutthu ootakhala oniphavela etthu yootakhala;Owo khonimureerela murima mukhwaawe.
11 Okathi mutthu ooveeha onihukhummwa awe, ole ohinsuwela itthu sinceene onnikhalana ankhili.Nave okathi mutthu orina ankhili oniixuttihiwa awe, onnikhalana osuwela.*
12 Naxariya onniweha etthoko ya mutakhali,Nave onniiriha etthoko ya atakhali opwetexiwa.
13 Ole onikhootta owiriyana okhuwela wa mulipa-oohaawa,Nave okathi owo onrowa awe okhuwela, khonrowa waakhuliwa.
14 Itthu sinivahiwa wiiphiini sinnimaliha onanariwa,Nave mutthu onikunyariwa wiiphiini onnikumiherya onanariwa vanceene.
15 Opaka itthu mwa xariya onnimuhakalaliha naxariya,Masi etthu yoowoopiha para ale anipaka itthu sootakhala.
16 Mutthu onihiya ephiro ya ankhili,Onoomumula ni ale akhwiiye.
17 Ole onimusivela otthekula, onoohaawa,Ole enimusivela eviinyu ni makhura, khonrowa othaaciri.
18 Mutakhali onrumeeliwa wiira omoopole naxariya,Nave mutthu ohinroromeleya, onrumeeliwa wiira omoopole mutthu oororomeleya.
19 Fataari okhala moothakoni,Ohiya okhala ni muthiyana oonyakulihana ni oonyoonyiha.
20 Etthoko ya musuweli, sookhala mihakhu sa efaita yinceene ni makhura,Masi mulolo khonirumeela saana* itthu orina awe.
21 Ole oniphavela exariya ni ophenta woororomeleya,Onoophwanya okumi, exariya ni ovuwa.
22 Mutthu orina ankhili onoowerya owela* exiri ya epooma ya atthu oowerya,Nave onoopwetexa ixiri soolipa awo aniroromela aya.
23 Ole onikasoopa nlumi nawe,Onnisyaka mixankiho.
24 Wiixinnuwiha, wiikuxererya ni wiisoona, moolumo anivahiwa mutthu onipaka itthu moowiikuxererya,Ohuupuwelaka etthu enipaka awe.
25 Itthu simphavela awe mutthu oolosowa sinoomwiiva,Okhala wiira onnikhootta ovara muteko.
26 Owo onniviriha nihiku ntero ophavelaka vanceene,Masi mutthu ooreera murima onnivaha ni murima wootheene.
27 Mukuttho wa mutthu ootakhala khorina efaita,
Onnitepa ohikhalana efaita aavahaka ni muupuwelo wootakhala!*
28 Namoona oowootha onimookhwa,Masi mutthu onisuwela owiriyana oratteene, onoovahaka onamoona mahiku ootheene.
29 Mutakhali onnooniherya owiitho wawe wiira khonuuliwa muru,Masi ephiro ya naxariya ti yooloka.
30 Khakhanle ankhili, nnakhala miruku aahiiso osuwela, siniwerya onvirikanya Yehova.
31 Ekhavalo ennilokiheriwa para nihiku na ekhotto,Masi Yehova tonoopola.
Inoota
^ Aahiiso, woonasa wene: “para ale aniphavela okhwa”.
^ Aahiiso, “onnisuwela yoopaka”.
^ Eheeperi, “onnimirya”.
^ Aahiiso, “okuxa”.
^ Aahiiso, “ni mweettelo woowuuliha muru!”
