Miteko 14:1-28
14 Vano wIkoonio, Paulo ni Baarnaba yaahikela musinagoga* mwa ayuda, nave yaahilavula saana, mpakha muttitthi muulupale wa ayuda ni akereku waamini.
2 Masi ayuda ale yahaaminni, yaahaawoka* ale yahaakhanle ayuda, khuwiiriha waanyokha anna.
3 Siiso, awo yaahiviriha okathi munceene opuro ole, ni Yehova aahaavaha owerya wira alavuleke ahoovaka etthu. Nave, aahaarumeela wira apakeke miiriirya ni miteko sootikiniha, wira alipiherye ihapari yaalaleerya aya. Ehapari eyo, yaahimya oreera murima wuulupale wa Muluku.
4 Nto, atthu a epooma ele yaahikawanyeya. Akina yaakhaliherya ayuda, nave akina yaamukhaliherya Paulo ni Baarnaba.
5 Atthu yahaakhanle ayuda, vamosa ni ayuda ni anamalamulela aya, yaahiiwanana omuhaaxa Paulo ni Baarnaba ni waavonyakasa maluku.
6 Vano, arummwa ale yaahiiwa etthu eyo, nto yaahitthyawa arowaka ipooma sa oLikawonia, siniihaniwa Liistra ni Derbe, vamosa ni mittetthe soowaattamela.
7 Weiwo-tho, awo yaanilaleya ihapari sooreera.
8 Epooma ya oLiistra, aahikhala mulopwana mmosa aarakanle metto. Owo aayariwe oorakala ene, nto khaatonko weetta.
9 Vano mulopwana owo aahikilaathi onanwiriyana Paulo olavulaka. Paulo aahinwehexexa oratteene, ni aahoona wira mulopwana ole aahikhalana waamini ni aanikupali wira ampenuxiwa.
10 Nto Paulo aahilavula ni nsu noowiiwanyeya, oriki: “Mweemele!” Siiso, mulopwana ole aahitupha, eemela, onapacerya weetta.
11 Okathi muttitthi wa atthu woonale aya ele Paulo aapanke awe, waahikhuwela ni nttaava na eLikawonia, wiiraka: “Amuluku ahiikhaliha ntoko atthu, ni aanikhuruwela!”
12 Vano awo yaahipacerya omwiihana Baarnaba, Zeu, masi Paulo yaamwiihana Herme, okhala wira taalavula vanceene.
13 Etemplo ya muluku Zeu, yaahaattamela mikhora sa epooma. Vano namukuttho a muluku Zeu, aahiruuha vamukhora wa epooma, inyompe ni ikhara sa ifilori. Namukuttho ole vamosa ni atthu, yaaniphavela omuhelela mikuttho Paulo ni Baarnaba.
14 Masi, okathi arummwa Baarnaba ni Paulo yaasuwenle aya eyo, yaahikhera malaya aya, ni yaahirowa vaari muttitthi, anakhuwela yiiraka:
15 “Alopwana, xeeni munipaka anyu itthu iya? Hiyo-tho na atthu ntoko nyuwo. Nave ninnihaawa ntoko nyuwo. Hiyo nnoolaleeryani ihapari sooreera, wira muhiye itthu iya seethiru, mmukokhoreleke Muluku mukumi, yoowo opattunxe erimu, elapo, ephareya ni itthu sotheene sinikhala mapuro awo.
16 Khalai, owo aaheemererya wira maloko otheene yeetteleke iphiro saya.
17 Hata vari siiso, owo aahiisuweliha wa atthu awo, owiirelaka itthu sooreera, aavahaka epula ni oruwerya vanceene. Nave aahaavaha yoolya yinceene ni aahaatteeliha murima”.
18 Nnaamwi yaalavunle itthu iye, arummwa ale yaahaana wiimananiha vanceene, wira yaahiihe atthu ale waahelela mukuttho.
19 Vano, yaahiphiya ayuda yaakhuma wAntiyokiya ni wIkoonio, anapacerya waawoka* atthu. Nto awo yaahinvonyakasa maluku Paulo, ampurulela ota wa epooma, yuupuwelaka wira aahikhwa.
20 Masi okathi awiixutti yaamurukurenrye aya, Paulo aaheemela, onarowa opooma. Mmeeloni mwaya, aahikhuma ni Baarnaba anarowasa oDerbe.
21 Nuumala olaleya ihapari sooreera epooma ele, ni waapaka awiixutti anceene, awo yaahitthikela oLiistra, wIkoonio ni wAntiyokiya.
22 Weiwo, awo yaahaalipiha awiixutti, yaatumereryaka wira alipiheke waamini waya. Nave yaahaahimeerya wira: “Nihaana ohaawa vanceene nihinatthi okela Moomweneni mwa Muluku”.
23 Ohiya-vo, awo yaahaathanla axitokweene khula muloko. Yaahivekela, yaahitthukwa ni yaahaavahererya mmatatani mwa Yehova, yoowo yaamwaamini aya.
24 Nuumala-vo, yaahirowa oPisiidia, khuphiya oPanfiilia.
25 Nave, vaamanle aya olaleya nuulumo na Muluku oPerxe, yaahikhuruwela wAtaliya.
26 Nto yaahiwela ekalawa anatthikela wAntiyokiya, weiwo anna yanvekenle aya Muluku wira omooniherye Paulo ni Baarnaba oreera wawe murima wuulupale, wira awerye ovara muteko, yoowo vano yaamalinhe aya.
27 Vaaphiyale aya, yaahithukumanya muloko wotheene, anahimya itthu sinceene Muluku aapanke awe, aarumeelaka awo. Nave, yaahihimya moota Muluku aatthukulenle awe mukhora atthu yahaakhanle ayuda, wira yaamini.
28 Nto, yaahikhala ni awiixutti okathi munceene.
