Miteko 24:1-27
24 Nuuvira mahiku mathanu, namukuttho muulupale Ananiya aahiphiya oKesareya. Owo aari ni makhulupale a ayuda ni mulipa-oniwaakiha atthu omilattuni, aihaniwa Teertulo. Awo yaahirowa wa kuvernatoro Feelexi, omuleela mulattu yaarina aya ni Paulo.
2 Okathi Teertulo aaleeliwe awe wira olavuleke, aahipacerya omuhimyana itthu Paulo ohoolo wa kuvernatoro Feelexi, oriki:
“Hiyo ninnooxukhurelani, maana ninnikhala ni murettele. Nave, okhala wira munnilamulela ni ankhili, elapo ahu ela ennikhala saana.
3 Nyuwo mukhulupale Feelexi! Okathi wotheene ninnixukhurela itthu sotheene munipaka anyu mapuro otheene.
4 Vano nkiniphavela woopisihani, tivo kinooxonttelani wira munireerele murima, muniwiriyane okathi vakhaani.
5 Hiyo nihoona wira mulopwana ola onnikumiherya onyakulihana,* ni onniwiiriha ayuda anikhala ilapo sotheene, omurukunuwela kuvernu. Ohiya-vo, ola tonihoolela ekrupu eniihaniwa ‘aNazarethi’.
6 Nave-tho aaheererya ohittittimiha etemplo, tivo, hiyo naahinvara.
7 *——
8 Mwamukoha vale, munimoona wira ninlavula ekeekhai”.
9 Nave-tho, ayuda yaahaakhulela ahimyaka wira ele yaalavuliwe yaari ekeekhai.
10 Okathi kuvernatoro Feelexi anvahale awe esinaale Paulo wira olavuleke, owo aahihimya wira:
“Koosuwela wira okhuma khalai, nyuwo munniphuka myaha sa nloko nla. Tivonto, kinnihakalala wiixaakiha ohoolo wanyu.
11 Okhuma vaavale kaaronwe aka omukokhorela Muluku oYerusalemu mpakha-va, khavinre mahiku 12. Nyuwo pooti okoha, mwaphavela osuwela vaari siiso.
12 Khuuvo okiphwannye kinyakulihanaka ni mutthu mutemplo, nnakhala kaathukumanyaka atthu ootakhala musinagoga* aahiiso mpooma.
13 Nave, awo khaniwerya wooniherya tthiri wira itthu sotheene anihimya aya wira koopaka, ti seekeekhai.
14 Masi etthu enisuwela aka tiila: miyo kinitthara enamuna ya omukokhorela Muluku, yeeyo awo anihimya aya okhala etiini esya. Siiso, miyo kininvarela muteko Muluku a amuhavinre ahu, ni kinnikupali itthu sotheene sihimmwale ni Nlamulo ni soolempwa sa Maprofeta.
15 Nave, kookhalana nlipelelo nimosa-ru atthu ala arina aya, wira Muluku onrowa waahihimuxa anaxariya ni ale ahikhanle anaxariya.
16 Tivonto, okathi wotheene kinniimananiha okhalana murima* wooreera* ohoolo wa Muluku ni ohoolo wa atthu.
17 Siiso, nuuvira iyaakha sinceene, kaahirowa oYerusalemu ovaha musurukhu wira kaakhaliherye atthu a nloko naka, ni onvaha mikuttho Muluku.
18 Okathi kaapaka aka itthu iyo, awo yaahikiphwanya mutemplo kiireerihale ene. Masi nkaakhanle ni muttitthi nnakhala nkaakumiherya onyakulihana. Vano yaahikhala weiwo ayuda akina, yaakhuma eprovinsia ya wAsia.
19 Awo yaakiphwanyanne mulattu, yaahaana okhala vaava, wira ahimye ohoolo wanyu.
20 Aahiiso, atthu ala ari vaava, ahimye akhala wira yaahikiphwanyana etthu yootakhala, okathi yaakiphukela aya ohoolo wa eSineedrio.*
21 Masi etthu emosa kaahimmye aka kikhuwelaka, okathi keemenle aka ohoolo waya, tiila: ‘Miyo kimphukeliwa-va, mwaha wa nlipelelo na ohihimuxiwa wa alipa-ookhwa!’”
22 Okhala wira kuvernatoro Feelexi aanisuwela saana myaha sa ephiro ya Apwiya, aahinteererya mwaha ole, onahimya wira: “Miyo kinoophuka mwaha ola, kumantanti a atoropa, Lisia, aphiya vale”.
23 Nto aahimuruma mukhulupale a anakhotto wira omutthukwele Paulo, masi omweemereryeke opaka itthu sikina ni oxukuriweke ni apatthani awe wira amukhaliheryeke.
24 Vaavirale aya mahiku vakhaani, Feelexi aahirwa ni mwaarawe, aihaniwa Drusila, yoowo aari muyuda. Vano aahiruma wiihaniwa Paulo, wira omwiiwe olavulaka itthu aakupali awe sa Kristu Yesu.
25 Masi, okathi Paulo aalavula awe myaha ntoko exariya, wiihiiha ni ophukeliwa onirwa, Feelexi aahoova, onahimya wira: “Vano muroweke, masi kakhalana okathi, kinooruma wira mwiihaniwe”.
26 Nave Feelexi aanilipelela wira Paulo aamunvaha musurukhu. Tivonto aamakela awe omwiihana, onavaanelana.
27 Nuuvira iyaakha piili, Feelexi aahirantteliwa ni Porsio Festo. Nto okhala wira Feelexi aaphavela waasiveliha ayuda, aahimuhiya Paulo mukhatteya.
Inoota
^ Ekereku, “ekwerere”.
^ Eversiikulu ela enniphwanyaneya aBiibiliya akina, masi kheniphwanyaneya soolempwa ni matata sinceene sootthuneya sa ekereku.
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Aahiiso, “ohirina nthowa”.
^ Nwehe Moolumo Ootthokiheriwa.
