Miteko 5:1-42
5 Vano, mulopwana mmosa aihaniwa Ananiya, vamosa ni mwaarawe aihaniwa Safira, yaahitumiha ematta aya.
2 Masi, aahiiwanana ni mwaarawe ovukula musurukhu mukina, nto musurukhu mukina aahaavahererya arummwa.
3 Pedru aahimukoha wira: “Nyuwo Ananiya, xeeni muhalaka weemererya wira Satana owiiriheni owoka munepa woowaarya, khuvukula musurukhu mutuminhe anyu ematta?
4 Muhinatthi otumiha ematta eyo, kiira yaari yawinyu? Hata nuumala otumiha, nyuwo mwanwerya orumeela musurukhu owo ntoko mwaaphavela anyu. Xeeni muhalaka wuupuwela vamurimani vanyu etthu siisa? Nyuwo khimwaawonke atthu, masi munwonke Muluku”.
5 Nuumala wiiwa moolumo awo, Ananiya aahimora, khukhwa. Nave atthu otheene yaiwale eyo, yaahoova vanceene.
6 Vano, yaahirwa amiravo, anvitikelela ekuwo, amuteexerya ota, anarowa onvitha.
7 Nuuvira etthu yoowiiraka iwoora tthaaru, mwaarawe Ananiya aahirwa. Owo khaasuwela etthu yaakhumelenle.
8 Pedru aahimukoha wira: “Mukileele, niireke musurukhu wotheene nyuwo ni aiyanyu mutuminhe anyu ematta ti yoola?” Nto, Safira aahaakhula oriki: “Aayo, ti yoowo”.
9 Siiso, Pedru aahimuleela wira: “Xeeni oowanli anyu muhalaka wiiwanana owoka munepa wa Yehova? Amiravo yaaronwe waavitha aiyanyu ari vamukhora-vo. Nto awo anrowa wookuxani”.
10 Niinaano-ru, Safira aahimora ohoolo wa Pedru, khukhwa. Okathi amiravo yaakenle aya, yamphwannye okhwiiye ene. Awo yaahimuteexerya ota, anarowa onvitha waattamela yaavithiwe aiyawe.
11 Nuumala wiiraneya itthu iya, awiixutti otheene a oYerusalemu ni atthu otheene yaiwale, yaahoova vanceene.
12 Nave-tho, arummwa yaanipaka miiriirya sinceene ni yaanivara miteko sootikiniha, eriyari ya atthu. Otheene aya yaanithukumana Niphiryo na Salomoni.
13 Tthiri, atthu akina yaanoova otakaahana naawo. Masi anamunceene yaanaattottopela awiixutti.
14 Ohiya-vo, alopwana ni athiyana anceene, yaahimwaamini Pwiya, ni yaahikhala awiixutti.
15 Atthu awo, yaanaaruuha aretta aya iphiro suulupale, anawaatalela vakhaamani ni vattheereni, wira okathi Pedru aavira awe, eruku awe yaaphwanye aretta akina.
16 Nave-tho, mittitthi sa atthu saakhuma ipooma saattamenle oYerusalemu, saanirwa, saatenxe ene aretta ni ale yaavariwe ni malaikha ootakhala. Nto otheene aya, yaanipenuxiwa.
17 Masi namukuttho muulupale, vamosa ni otheene ale aarina awe, yaawo yaari a ekrupu ya etiini ya asaduki, yaaheemela, asareyale ene nrima.
18 Vano, awo yaahaavara arummwa, yaarihela mukhatteya mwa epooma ele.
19 Masi ohiyu, nlaikha na Yehova naahitthukula mikhora sa ekhatteya, naakumiherya ota, naaleela wira:
20 “Murowe mutemplo, mwaaleeleke atthu ihapari sooreera sa okumi onirwa”.
21 Nuumala wiiwa eyo, arummwa yaahikela mutemplo voosiisu ene, anapacerya wiixuttiha.
Vano, okathi aaphiyale awe namukuttho muulupale vamosa ni atthu aarina awe, yaahiruma othukumana eSineedrio* yotheene, ni makhulupale a nloko na Isarayeli. Nave yaahaaruma makwarta wira yaarowele arummwa mukhatteya, yaaruuhe vaavale.
22 Masi okathi makwarta yaaphiyale aya okhatteya, khiyaaphwannye arummwa. Tivo, yaahitthika anahimya wira:
23 “Niphwannye ekhatteya ewaliwe ene oratteene ni makwarta yeemenle ene vamukhora. Masi nuumala otthukula, khinimphwannye-mo mutthu”.
24 Okathi muhooleli a mutemplo ni makhulupale a anamukuttho yaiwale aya moolumo awo, yaahixanka vanceene, mwaha wa ele yaarowa okhumelela muhoolo.
25 Masi, aahirwa mutthu mmosa onaaleela wira: “Mooneke! Alopwana ale mwaarihenle anyu mukhatteya, ari mutemplo awiixuttihaka atthu”.
26 Vano, muhooleli a mutemplo ni makwarta awe, yaahaarowela, yaaruuha. Masi khiyaawirinhe etthu yootakhala, okhala wira yaanoova ovonyiwa maluku ni atthu.
27 Siiso, yaahaaruuha, aweemexa muSineedrio.* Nto muulupale a anamukuttho,
28 aahiira: “Hiyo nihoorumani oratteene wira muhitthikele-tho wiixuttiha murumeelaka nsina* nla. Masi nyuwo moosariha soowiixuttiha sanyu oYerusalemu, nave muniphavela oniphwanyiha mulattu mwaha wa okhwa wa mulopwana ola”.
29 Pedru ni arummwa akina, yaahaakhula wira: “Hiyo nihaana omwiiwelela Muluku,* ohiya atthu.
30 Muluku a amuhavinre ahu oomuhihimuxa Yesu, yoowo mwaamwiivale anyu, mmukhomelaka vamwirini.
31 Muluku onvuwiha, omukhaliha moono awe woolopwana. Oomuthanla wira owoopole atthu ni aavahe okumi. Muluku oopaka eyo, wira atthu a wIsarayeli arukunuxe murima ni aleveleliwe itampi.
32 Nave, hiyo vamosa ni munepa woowaarya, yoowo Muluku aavanhe awe ale animwiiwelela,* ninnikhalela onamoona itthu iyo”.
33 Okathi yaiwale aya eyo, yaahinanariwa vanceene, anaphavela owiiva.
34 Masi, nfarisi mmosa aihaniwa Gamaliyeli, aaheemela muSineedrio.* Owo aari mulipa-oowiixuttiha Nlamulo, aattittimihiwa ni atthu otheene. Nto aahiruma wira atthu ale akumiheriwe ota vakhaani.
35 Vano Gamaliyeli, aahilavula oriki: “Nyuwo makhulupale a wIsarayeli, muupuwele oratteene muhinatthi owiiriha etthu alopwana ale.
36 Mwa ntakiheryo, mahiku vakhaani avinre, aahikhumelela Teuda, yoowo aihimya okhala mukhulupale. Nto, atthu oowiiraka 400, yaahimutthara. Masi aahiiviwa, vano ale yaamutthara, yaahitthyawa, nave ekrupu aapanke awe, yaahimala-mala.
37 Nuumala-vo, aahikhumelela Yuda mugalileya, okathi yaarepeliwa aya atthu. Nto atthu anceene yaanimutthara Yuda owo. Mulopwana owo aahikhwa, vano otheene ale yaamutthara, yaahimwara-mwareya.
38 Tivonto, nuupuwela itthu siniiraneya mahiku ala, kinooleelani wira muhiwiirihe etthu atthu ala, masi mwaataphule. Vakhala wira ele aniphavela aya opaka aahiiso anipaka aya ti ya pinaatamu, enoomala.
39 Masi vakhala wira ti ya Muluku, nyuwo khamunwerya omaliha. Phoole! Woonasa wene, munrowa owanaka ni Muluku”.
40 Siiso, yaahiiwelela miruku sawe, awiihana arummwa, yaawaxula,* ni yaaruma wira ahitthikele-tho olavula mwa nsina na Yesu. Nuumala-vo, yaahaahiya arowaka.
41 Vano, arummwa yaahikhuma oSineedrio,* atteeliwe ene murima, okhala wira yaahoona okhala eparakha ohaawa, mwaha wa nsina na Yesu.
42 Nave, khula nihiku, awo yaaniixuttiha ni olaleya voohihiyererya ihapari sooreera saamuhimya Kristu, Yesu, mutemplo ni mmaitthokoni.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nnihimmwa nsina na Yesu.
^ Aahiiso, “omwiiwelela Muluku ntoko namalamulela”.
^ Eyo piiyo, omwiiwelela ntoko namalamulela.
^ Nwehe Moolumo Ootthokiheriwa.
^ Aahiiso, “yaamana”.
^ Nwehe Moolumo Ootthokiheriwa.
