Wiisuupulula 1:1-20
1 Ala moolumo a itthu Yesu Kristu oonihenrye* awe okathi ola. Yesu aahivahiwa itthu iyo ni Muluku, wira owooniherye arumeyi a Muluku itthu saarowa wiiraneya voohipisa. Yesu owo aahiruma nlaikha nawe orowa wa Yohani, yoowo ori murumeyi a Muluku,* wira namuleele ele enithoonyerya aya itthu sinrowa wiiraneya.
2 Yohani owo aahikhalela onamoona nuulumo na Muluku, ni aahimukhalela onamoona Yesu Kristu. Tthiri, owo aahikhalela onamoona itthu sotheene aawenhe awe.
3 Oohakalala tuule onisoma moolumo ala voowiiwanyeya, ni ale aniiwa moolumo a eprofesia ela, ni aneettela itthu sotheene silempwale muumu, okhala wira okathi othanliwe, ohaattamela.
4 Miyo, Yohani, kinnilepela miloko 7 siri eprovinsia ya wAsia:
Oreera murima wuulupale ni murettele wa “Muluku, yoowo onikhala vano, ni aakhanle, ni onirwa”, ni wa minepa 7 siri ohoolo wa ehice awe,
5 ni wa Yesu Kristu, “Namoona Oororomeleya”, “yoowo opacenrye ohihimuxiwa mookhwaani”, ni ori “Namalamulela a mamwene a mulaponi”, okhale ni nyuwo.
Ole onniphenta ni onooponle itampi sahu ni ephome awe,
6 ni onikhalinhe mamwene ni anamukuttho a Muluku awe ni Tiithi awe, ti yoowo oniphwanela ovuwihiwa ni ovahiwa owerya mahiku otheene. Amen.
7 Moone! Owo onimoorwa ni meeku, nave atthu otheene anonweha, hata ale yaamuhomme. Mahimo otheene a mulaponi anrowa wiimana vapeeto,* ariipiwe ene murima mwaha wa yoowo. Aayo, eyo enimwiiraneya tthiri. Amen.
8 Yehova Muluku, onihimya wira: “Miyo ka Oopacerya ni Ookiserya.* Miyo ti yoole onikhala vano, ni aakhanle, ni onirwa. Miyo ka Muluku Oowerya Sotheene”.
9 Miyo, Yohani, munninyu ni ole onihaawa vamosa ni nyuwo, ni onrowa olamulelaka ni nyuwo moomweneni, ni onivilela mwaha woomutthara Yesu, kaari esisiro eniihaniwa Patmo, mwaha wa omulaleya Muluku, ni olavula ekeekhai ya Yesu.
10 Munepa woowaarya waahikooniherya itthu saarowa wiiraneya nihiku na Apwiya. Nto, kaahimwiiwa mutthu aakhuwela ottuli waka ni nsu naalikana ni nlope,
11 oriki: “Mulepe murooluni itthu muniweha anyu, muroihe eroolu eyo wa miloko iya 7: wEefeso, wEsimirna, oPeergamo, oTiyatira, oSardi, oFiladelfia ni oLawodiseya”.
12 Vano, kaahirukunuwa wira kinwehe ole aakilavuliha, nto nuumala orukunuwa, kaahiweha mithuko* 7 sa eweero.
13 Eriyari ya mithuko,* kaahinweha mutthu aalikana ni mwaana a mutthu, owanre ene nlaya naaphiya munawuni mwawe, ni aahiitthukwelela vapeeto* vawe ni ekuwo ya eweero.
14 Nave-tho, ikharari sa mmuruni mwawe, saari sootteela vanceene, ni otteela waya waari ntoko eneevi. Maitho awe, yaalikana ni mooro onivarela.
15 Inawu sawe, saanaarya ntoko ekoopiri enitotoxiwa vaikho, ni nsu nawe naalikana ni onyakula wa maasi manceene anivira.
16 Ntata nawe noolopwana, aahikuxa itheneeri 7, nave mwaano mwawe aanikhuma xoowa* oowiitha, oorakama ni onithikila ninno-ninno. Owiitho wawe, waalikana ni nsuwa nnaarya vanceenexa.
17 Nuumala onweha, kaahimorela vamettoni vawe, kinakhala ntoko kaarimookhwa.
Nto aahikiixaatherya ntata nawe noolopwana, onahimya wira: “Muhoove. Miyo ka Oopacerya ni Ookiserya,
18 ni ti yoomi kinikhala. Miyo kaahikhwa, masi vano kinnikhala mahiku otheene ni voohimala. Nave kookhalana ixaavi sa wookhwaani ni sa Mahiye.*
19 Vano, mulepe itthu moonale anyu, ni itthu siniiraneya vano, ni iye sinrowa wiiraneya nuumala itthu iya.
20 Itheneeri 7 moonale anyu ntata naka noolopwana, ni mithuko* 7 sa eweero, ti esiiri ya Muluku. Esiiri eyo tiila: Itheneeri 7, sinithoonyerya anamitthaka* a miloko 7, nave mithuko* 7 sinithoonyerya miloko 7.
Inoota
^ Aahiiso, “okhununle awe”.
^ Aahiiso, “murumeyi a Yesu”.
^ Aahiiso, “vatthirima”.
^ Ekereku, “Alfa ni Omega”. Moolumo ala manli, “Alfa” ni “Omega”, anithoonyerya nuulumo noopacerya ni nookiserya na alfapeeto a ekereku.
^ Muthuko owo, waari wa eyuuma ni waahikhalana mavatta 7, yaapwehiwa ixamaniiya.
^ Muthuko owo, waari wa eyuuma ni waahikhalana mavatta 7, yaapwehiwa ixamaniiya.
^ Aahiiso, “vatthirima”.
^ Aahiiso, “espaata”.
^ Nwehe Moolumo Ootthokiheriwa.
^ Muthuko owo, waari wa eyuuma ni waahikhalana mavatta 7, yaapwehiwa ixamaniiya.
^ Ekereku, “malaikha”.
^ Muthuko owo, waari wa eyuuma ni waahikhalana mavatta 7, yaapwehiwa ixamaniiya.
