Wiisuupulula 14:1-20
14 Nuumala-vo, miyo kaahinweha Mwaapwittipwitthi eemenle ene vamwaako Siyoni. Yaahikhala ni yoowo atthu 144.000, yaawo alempwale nsina nawe ni nsina na Tiithi awe vayuuci vaya.
2 Nto, kaahiiwa nsu naakhuma wiirimu, nenlo naalikana ni oruma wa maasi manceene, ni okukutteya wuulupale. Nave, nsu nlo kaiwale aka, naalikana ni alipa-oowiipa, aniipa attharihelaka ni aviola* aya.
3 Awo yaaniipa nsipo, nenlo naakhala ntoko nsipo na niinaano, ohoolo wa ehice, ni wa soopattuxiwa sikumi ixexe, ni wa axitokweene. Khuuvo aawerya wiixutta nsipo nlo, ahikhanle atthu ale 144.000, yaawo Muluku aathumme awe elapo ya vathi.
4 Awo khainanarinhe ni athiyana. Veekeekhai, khatonko orupa ni athiyana. Awo ti yaale ahinihiya omutthara Mwaapwittipwitthi, khula opuro onirowa awe. Muluku ohaathuma eriyari ya apinaatamu, ntoko milipu sinivahiwa Muluku ni Mwaapwittipwitthi.
5 Mwaano mwaya khophwanyiwe wootha. Awo kharina nthowa.
6 Nave, kaahiweha nlaikha nikina naavava osulu-sulu, nenlo naarina ihapari sooreera sihinimala, wira naalaleerye atthu anikhala mulaponi, atthu a maloko otheene, ni a mahimo otheene, ni a mattaava otheene, ni a makhuli otheene.
7 Nlo naanihimya ni nsu noorunya, niiraka: “Mmooveke Muluku ni munvuwiheke yoowo, okhala wira yoophiya ewoora ya ophukela wawe. Tivo, mmukokhoreleke Ole opattunxe erimu ni elapo ni ephareya, ni mapuro aniphattuwa maasi”.
8 Nuumala-vo, naahikhumelela nlaikha na nenli, nnahimya wira: “Oomora! Babilonia Muulupale oomora, yoowo owiirinhe atthu a maloko otheene, owurya eviinyu ya ophavela wawe vanceene orupihana woohiloka!”*
9 Naahikhumelela nlaikha na neeraru, nnahimya ni nsu noorunya, wira: “Akhala mutthu onrowa okokhorela enama yoowali ni elatarato aya, ni oheliwa ekanyeryo vayuuci vawe aahiiso ntata nawe,
10 mutthu owo onoowurya eviinyu ya Muluku, eyo piiyo, oviruwa wawe. Eyo ti eviinyu yoohitakaaheriwa etthu, yeeyo Muluku onihela awe mukaalisini mwa oviruwa wawe. Nave, mutthu owo onoohaaxiwa ni mooro, ni enxoofere, ohoolo wa malaikha oowaarya ni wa Mwaapwittipwitthi.
11 Mwiixi wa ohaaxiwa waya, onrowa owelaka osulu mahiku otheene ni voohimala. Nave, ale anikokhorela enama yoowali ni elatarato aya, ni aheliwe ekanyeryo ya nsina naya, khanrowa ophumuryaka othana ni ohiyu.
12 Tivo, ale oororomeleya,* yaawo aneettela sooruma sa Muluku, ni ahinihiya omwaamini Yesu, ahaana ovilela”.
13 Nave, kaahiiwa nsu naakhuma wiirimu, nihimyaka wira: “Mulepe moolumo ala: Okhuma okathi ola orowa ohoolo, awiixutti a Pwiya* anikhwa, anrowa okhala oohakalala. Aayo, munepa woowaarya onihimya wira awo ahaana ophumurya miteko saya soolipa, okhala wira itthu apanke aya sinimwaatthara”.
14 Vano kaahiweha neeku nootteela, nto vaneekuni-vo, aahikilaathi mutthu aalikana ni mwaana a mutthu, yoowo aawanre ekhara ya eweero vamuru vawe, ni aakunxe mmatatani mwawe ecampeya* yoowiitha.
15 Nlaikha nikina naahikhuma mutemplo,* nimwiihanaka ni nsu noorunya ole aakilanthi vaneekuni, niiraka: “Muhephe ipyo sa mulaponi ni ecampeya* anyu, okhala wira soottokottha saana, nave woophiya okathi aya woohemphwa”.
16 Nto ole aakilanthi vaneekuni, aahihepha ipyo sa mulaponi ni ecampeya* awe.
17 Nave-tho, naahikhuma nlaikha nikina mutemplo* ya wiirimu. Nlo naahikuxa-tho ecampeya* yoowiitha.
18 Naahikhuma-tho nlaikha nikina valtaari, nenlo naarina owerya wa weettiherya mooro. Naahimwiihana ni nsu noorunya ole aakunxe ecampeya* yoowiitha, niiraka: “Mpacerye orumeela ecampeya* anyu yoowiitha, wira muhephe maphara a ewuuva ya mulaponi, okhala wira ewuuva eyo yoottokottha”.
19 Vano nlaikha nle naahipacerya orumeela ecampeya* aya valaponi, naahihepha ewuuva ya mulaponi, nave naahirihela ewuuva eyo nipuro nuulupale naanyakattiwa ewuuva ya onanariwa wa Muluku.
20 Ewuuva eyo yaanyakattiwe ota wa epooma. Nto opuro yaanyakattiwa aya, yaahikhuma ephome. Orakamela waya musulu waahiphiya mpakha iyano sa ikhavalo, nave orakamelana waya waari etthu yoowiiraka ikiloomo 296.*
Inoota
^ Ekaruma ya isipo ya khalai, yeeyo enivirikana ni aviola a mihiku ala.
^ Ekereku, porneía. Nwehe Moolumo Ootthokiheriwa.
^ Ekereku, “ale oowaarya”.
^ Aahiiso, “ale yiiranne ni Pwiya”.
^ Aahiiso, “efonso”.
^ Eyo piiyo, Nipuro Noowaaryexa na etemplo.
^ Aahiiso, “efonso”.
^ Aahiiso, “efonso”.
^ Eyo piiyo, Nipuro Noowaaryexa na etemplo.
^ Aahiiso, “efonso”.
^ Aahiiso, “efonso”.
^ Aahiiso, “efonso”.
^ Aahiiso, “efonso”.
^ Ekereku, “Istaatio 1.600”. Estaatio emosa, yaarina imeeturu 185.
