Yohani 13:1-38
13 Nihinatthi niira na Paasikha, Yesu aanisuwela wira yaahiphiya ewoora awe ya okhuma olumwenku ola orowaka wa Tiithi. Okhala wira aanaaphenta atthu awe yaari moolumwenkuni, owo khaahiyerenrye waaphenta mpakha wookiseryani.
2 Okathi yaalya aya, Diabo iira ohenle ene vamurimani va Yuda Isikaryoti, mwaana a Simoni, muupuwelo wa onvariha Yesu.
3 Vano, Yesu aanisuwela wira Tiithi aahinvaha itthu sotheene mmatatani mwawe. Aanisuwela-tho wira aakhuma wa Muluku ni aamutthikela wa Muluku.
4 Okathi owo Yesu aahivenya vameesa, orula malaya awe a ota. Nave aahikuxa etuwalya otthukwelela muyuununi mwawe.
5 Vano, aahiitthela maasi mpasiyani, onapacerya orapiha inawu sa awiixutti awe, ni onapuputtha ni etuwalya aatthukwelenle awe muyuununi mwawe.
6 Yaaphiyale aya ekwaha ya Simoni Pedru, owo aahimukoha Yesu wira: “Pwiya, munrowa orapiha inawu saka?”
7 Yesu aahimwaakhula oriki: “Etthu kinivara aka, nyuwo khamunisuwela niinaano-va, munrowa osuwela ohoolo”.
8 Pedru aahimuhimeerya wira: “Tthiri, miyo nkinoohiyani murapihaka inawu saka”. Yesu aahimuleela wira: “Kaahirapihe-ru inawu sanyu, nyuwo khamuniwerya okhala ni miyo”.
9 Simoni Pedru aahimuhimeerya Yesu wira: “Pwiya, weeso muhirapihe inawu saka paahi, nave-tho, murapihe matata aka ni muru aka”.
10 Yesu aahimuhimeerya wira: “Ole orampe, erutthu awe yotheene ti yooreera, khonireerela-tho orapiha etthu ekina, sihikhanle inawu sawe paahi. Nave nyuwo mooreera, masi ohiya otheene anyu”.
11 Tthiri Yesu aanimusuwela ole aarowa onvariha. Tivo aahimmye awe wira: “Khahiyo wira otheene anyu mooreera”.
12 Siiso, vaamalihale awe orapiha inawu saya, Yesu aahiwara malaya awe a ota, khutthikela vameesa, onaakoha oriki: “Nyuwo munnisuwela etthu ewiirenlyaakani?
13 Nyuwo munnikihimya okhala ‘Mwiixuttihi’ ni ‘Pwiya’, nto enihimya anyu ekeekhai. Tthiri miyo ka Mwiixuttihi ni Pwiya.
14 Tivonto, akhala wira miyo, kiri Pwiya ni Mwiixuttihi, koorapiha inawu sanyu, nyuwo-tho muhaana* orapihanaka inawu.
15 Tthiri miyo kihoovahani nthoonyeryo, wira nyuwo-tho mwiireke siisaale kiwiirenlyaakani.
16 Tthiri, kinooleelani ekeekhai wira, namuteko khahiyo muulupale onvikana patarau awe, aahiiso mutthu orummwale khahiyo muulupale onvikana ole omurumme.
17 Vano nyuwo moosuwela itthu iya, masi munrowa ohakalala vakhala wira munimweettela.
18 Miyo nkinoohimyani otheene anyu, maana kinnaasuwela ale kaathanlale aka. Vano eyo ehiiraneya wira emaliheriwe yoolempwa enihimya wira: ‘Ole aalya ni miyo, ookirukunuwela’.
19 Kinooleelani wira etthu ela enimwiiraneya, nto okathi munrowa anyu woona ekiiraneelaka, munoosuwela wira yoolepa eyo yaakihimya yoomi.
20 Tthiri, kinooleelani ekeekhai wira, ole onimwaakhela mutthu kimurumme aka, onikaakhela-tho miyo. Nave ole onikaakhela miyo, onimwaakhela-tho Ole okirumme”.
21 Nuumala ohimya itthu iya, Yesu aahixanka vanceene, ni aahihimya wira: “Tthiri, kinooleelani ekeekhai wira, mmosa a nyuwo onookivariha”.
22 Awiixutti yaahipacerya owehana, ahimusuwelaka ti pani Yesu aamuhimya awe.
23 Mwiixutti mmosa, yoowo Yesu amphenta awe, aari vameesa omwaattamenle ene Yesu.
24 Vano, Simoni Pedru aahinvaha esinaale ni muru mwiixutti owo, oriki: “Ti pani onimuhimya awe?”
25 Mwiixutti owo aahimwaattamela Yesu, onamukoha wira: “Pwiya, ti pani owo?”
26 Yesu aahaakhula oriki: “Ti yoole onrowa aka onvaha epetaaso ya ephaawu kinrowa aka orerya mutixelani”.* Nto, nuumala orerya ephaawu eyo, aahikuxa, onvaha Yuda, mwaana a Simoni Isikaryoti.
27 Nuumala Yuda waakhela epetaaso eyo ya ephaawu, Satana aahimukela. Siiso, Yesu aahimuhimeerya wira: “Etthu enrowa anyu opaka, mpake voowaakuveya”.
28 Masi, atthu ale yaari vameesa, khiyaasuwenle xeeni Yesu aamwiirenle awe siiso.
29 Okhala wira Yuda taakhapelela musurukhu waarumeeliwa ni awiixutti, akina yuupuwela wira Yesu aamurumme othuma itthu saarowa orumeeliwa okathi wa niira, aahiiso aahaana waavaha etthu alipa-oohaawa.
30 Nto nuumala Yuda waakhela epetaaso ya ephaawu, aahikhumela ota voowaakuveya. Okathi ole waari ohiyu.
31 Siiso, nuumala Yuda okhumela ota, Yesu aahihimya wira: “Vano Mwaana a mutthu onoovuwihiwa, nave-tho Muluku onoovuwihiwa mwaha wa Mwaana.
32 Muluku mwaneene ononvuwiha Mwaana a mutthu, nave onoopaka eyo voohipisa.
33 Anaaka oophentiwa, miyo kinookhala ni nyuwo okathi vakhaani. Nyuwo munookaavya. Vano kinoohimeeryani nyuwo-tho, etthu yeele kaahimenrye aka ayuda, kiiraka: ‘Opuro kinrowa aka, nyuwo khamunwerya ophiya’.
34 Miyo kinnoovahani yooruma esya:* Mphentaneke mukina ni mukhwaawe. Siisaale koophentalyaakani, ni nyuwo-tho mphentaneke mukina ni mukhwaawe.
35 Atthu otheene anoosuwela wira mwa awiixutti aka, mwaaphentanaka mukina ni mukhwaawe”.
36 Simoni Pedru aahimukoha Yesu oriki: “Pwiya, munrowa vai?” Nto Yesu aahimwaakhula wira: “Opuro onrowa aka, nyuwo khamunwerya okitthara niinaano-va, masi munookitthara ohoolo”.
37 Pedru aahimuhimeerya wira: “Pwiya, xeeni kihinwerya aka woottharani niinaano-va? Miyo koolikanana wookhwelani”.
38 Yesu aahimwaakhula oriki: “Kiireke tthiri moolikanana okikhwela? Tthiri, kinooleelani ekeekhai wira, muthupi ohinatthi wiipa, nyuwo munookikhootta ikwaha tthaaru”.
