Yohani 20:1-31
20 Nihiku noopacerya na esumana,* oxaka, nlelo variipale ene, Maria Madalena aahirowa omahiye, khiweha wira nluku naattiyelaniwe mahiye, naahikumihiwa.
2 Nto, owo aahitthimaka onarowa okumana ni Simoni Pedru ni mwiixutti mukina, yoowo Yesu amphenta awe, onaahimeerya wira: “Apwiya aakuxiwa mmahiye, nto khanisuwenle apwehiwe aya”.
3 Vano Pedru ni mwiixutti mukina, yaahirowa omahiye.
4 Oowanli aya yaahipacerya otthimaka hoothe, masi mwiixutti owo mukina aahitthimaka vanceene onvikana Pedru, khupacerya ophiya omahiye.
5 Mwiixutti owo mukina, aahuurama, aahithurumela mmahiye, oweha ikuwo sa eliinyu paahi. Nto khaakenle mmahiye-mme.
6 Vano, Simoni Pedru, yoowo aahanle ottuli, aahiphiya, khukela mmahiye. Nave owo aahiweha ikuwo sa eliinyu, saahanle mmahiye-mme.
7 Ekuwo yaavitikeleliwe muru wa Yesu, khiyaakhanle vamosa ni ikuwo sikina. Masi yaahikhuniwa, epwehiwa nipuro nikina.
8 Nave mwiixutti ole mukina aapacenrye ophiya omahiye, aahikela, khiweha, ni okupali.
9 Tthiri, awo yiira nlelo ahinatthi wiiwexexa oratteene soolempwa sinihimya wira Yesu, aahaana ohihimuxiwa mookhwaani.
10 Nto awiixutti ale yaahitthikela owannyeya.
11 Masi, Maria aahanle eemenle ene ota waattamela mahiye, inlaka. Inlaka siisaale, aahithurumela mmahiye,
12 aahiweha malaikha manli yaawanre ikuwo sootteela, akilanthi ene opuro waapwehiwe murutthu wa Yesu. Nlaikha nimosa naari waamuru, nikina naari waametto.
13 Malaikha awo, yaahimukoha wira: “Muthiyana, muninlela-ni?” Maria aahiwaakhula oriki: “Ookhala mutthu omukunxe Pwiya aka, nto nkinsuwela ompwehale awe”.
14 Nuumala ohimya siiso, Maria aahirukunuwa, khimoona Yesu eemenle ene, masi khaasuwenle wira aari Yesu.
15 Nto Yesu aahimukoha wira: “Muthiyana, muninlela-ni? Ti pani munimwaavya anyu?” Maria, uupuwelaka wira aari mulipa-aakhapelela exarti, aahimuhimeerya wira: “Atokweene, vakhala wira ti iwo akunxe murutthu awe, akileele apwenhe aya, nto miyo kinoorowa okuxa”.
16 Yesu aahimuhimeerya wira: “Maria!” Okathi Maria aarukununwe awe, aahimwaakhula ni eheeberi, iiraka: “Raboni!” (yeeyo enitaphulela “Mwiixuttihi!”)
17 Yesu aahimuleela wira: “Muhikivarexexe, okhala wira nlelo nkironwe wa Atiithi. Masi murowe mwaaleele axinnaka wira: ‘Miyo kinrowa wa Tiithi aka, yoowo-tho okhanle Tiithi inyu; kinrowa wa Muluku aka, yoowo-tho okhanle Muluku anyu’”.
18 Maria Madalena aahirowa waaleela awiixutti ihapari iye, oriki: “Konweha Pwiya!” Nave aahaahimeerya itthu Yesu aamulenle awe.
19 Makaaripi, a nihiku nenne noopacerya na esumana,* awiixutti a Yesu yaari mpaani, mikhora siwaliwe ene, mwaha woowi yaaniwoova ayuda. Vano, Yesu aahirwa, eemela eriyari aya, onaahimeerya wira: “Murettele okhale ni nyuwo”.
20 Nuumala ohimya siiso, Yesu aahiwooniherya matata awe ni mpararini mwawe. Vano awiixutti yaahitteeliwa murima mwaha wa onweha Pwiya.
21 Yesu aahaahimeerya-tho wira: “Murettele okhale ni nyuwo. Siisaale Tiithi okirumme awe, nave miyo kinnoorumani nyuwo”.
22 Nuumala ohimya siiso, Yesu aahiwiiseelela, onaahimeerya wira: “Mwaakhele munepa woowaarya.
23 Akhala wira munoomulevelela mutthu opanke etampi, Muluku oomulevelela. Akhala wira khamunimulevelela mutthu opanke etampi, Muluku khomulevelenle”.
24 Masi Tome, yoowo aihaniwa Maphapo, ni aari-tho mmosa a arummwa 12, khakhanle ni awiixutti akina okathi Yesu aarwiiye awe.
25 Vano awiixutti akina yaahimuhimeerya wira: “Nonweha Pwiya”. Masi Tome aahiwaakhula oriki: “Miyo kaahiwehe-ru mmatatani mwawe makhwatta a ipereku aathorolaniwe awe, nave kaahikelihe-ru ekatha aka mmakhwattani-mmo, ni kaahivare-ru ni ntata naka opuro aahommwale awe mpararini mwawe, nkinikupali hata vakhaani”.
26 Nuuvira mahiku 8, awiixutti yaari-tho mpaani, nave Tome aari vamosa naawo. Nnaamwi mikhora saawaliwe, Yesu aahirwa, eemela eriyari aya, onahimya wira: “Murettele okhale ni nyuwo”.
27 Nto Yesu aahimuhimeerya Tome wira: “Muhele-va ekatha anyu, moone matata aka. Muhele ntata nanyu mpararini mwaka, nto muhihoveryeke,* mukupaliki”.
28 Vano, Tome aahimuleela Yesu wira: “Pwiya aka ni Muluku aka!”
29 Yesu aahimwiirela wira: “Nyuwo munikupali mwaha woowi mookiweha? Oohakalala taale anikupali, hata ahiwenhe”.
30 Tthiri, Yesu aahipaka miiriirya sinceene ohoolo wa awiixutti, seiyo sihilempwale eroolu yeela.
31 Masi itthu iya, soolempwa wira nyuwo mukupali wira Yesu ti Kristu, Mwaana a Muluku; nave mwaha wa okupali weiwo, mphwanye okumi mwa nsina nawe.
Inoota
^ Nwehe enoota ya Matheyo 28:1.
^ Nwehe enoota ya Matheyo 28:1.
^ Ekereku, “muhikhaleke mutthu oohikupali”.
