Yohani 8:12-59
8 12 Yesu aahilavuna-tho atthu awo, oriki: “Miyo ka muthuko wa olumwenku. Ole onikitthara, tthiri khonrowa weettaka mweepiphini, masi onookhalana muthuko oniphwanyiha okumi”.
13 Vano afarisi yaahimuhimeerya Yesu wira: “Nyuwo muniikhalela onamoona mmensinyu. Onamoona anyu khahiyo weekeekhai”.
14 Yesu aahiwaakhula oriki: “Hata kiikhalelaka onamoona mmensaka, onamoona aka ti weekeekhai, maana kinnisuwela kikhumme aka ni kinrowa aka. Masi nyuwo khamunisuwela kikhumme aka, nnakhala kinrowa aka.
15 Nyuwo muniphukela muttharaka muupuwelo wa atthu. Miyo nkinimphukela mutthu.
16 Hata kiphukelaka, ophukela waka ti weekeekhai, okhala wira nkikhanle mekhaka, masi Tiithi, yoowo okirumme, ori ni miyo.
17 Nave-tho, Munlamuloni mwanyu voolempwa wira: ‘Yakhala anamoona anli, mwaha owo ti weekeekhai’.
18 Miyo kinniikhalela onamoona mmansaka, nave Tiithi, yoowo okirumme, onnikikhalela onamoona”.
19 Vano awo yaahimukoha wira: “Tiithi inyu ori woowi?” Nto Yesu aahiwaakhula oriki: “Nyuwo khamunikisuwela, nnakhala khamunimusuwela Tiithi aka. Vaakhanle wira munnikisuwela, nave mwammusuwela Tiithi aka”.
20 Yesu aalavunle moolumo ala ori ene opuro waari ikaaxa saaheliwa musurukhu, okathi iixuttiha awe mutemplo. Masi, khuuvo anvanre, okhala wira ewoora awe khiyaaphiyale.
21 Vano Yesu aahaahimeerya-tho wira: “Miyo kinoorowa, nto nyuwo munookaavya. Masi munimookhwa nlelo murina ene etampi. Opuro kinrowa aka, nyuwo khamuniwerya ophiya”.
22 Ayuda yaahipacerya ohimya wira: “Xeeni onihimya awe wira: ‘Opuro kinrowa aka, nyuwo khamuniwerya ophiya’? Niireke onrowa wiixiiva?”
23 Yesu aahaahimeerya-tho wira: “Nyuwo mwa atthu a vathi vaava, masi miyo kinikhuma osulu. Nyuwo mwa atthu a olumwenku ola, miyo nkihiyo a olumwenku ola.
24 Tivo, koohimenryaakani wira: Nyuwo munimookhwa nlelo murina ene etampi. Tthiri mwaahikupaliki wira miyo ti yoole aakela orwa, weeso munimookhwa nlelo murina ene etampi”.
25 Nto awo yaahimukoha ariki: “Nyuwo mwa pani?” Yesu aahiwaakhula oriki: “Kinihonona okathi aka mahala ene kaalavulaka ni nyuwo.
26 Miyo kihaana itthu sinceene soohimya mwaha wa nyuwo ni sookhala myaha sinceene kinrowa aka ophuka. Mweekeekhai, Ole okirumme onnilavula ekeekhai. Nave, miyo kinnilavula moolumwenkuni itthu sotheene kimwiiwale aka”.
27 Atthu awo khiyaasuwela wira aamuhimya Tiithi awe a wiirimu.
28 Yesu aahaahimeerya wira: “Nuumala omweemexa* Mwaana a mutthu, nto nyuwo munookisuwela. Nave munoosuwela wira nkinipaka etthu voowiikuxererya, masi kinlavula itthu Tiithi okiixuttihale awe.
29 Ole okirumme ori ni miyo. Owo khokihiyale mekhaka, okhala wira okathi wotheene kinnivara itthu sinimusivela”.
30 Okathi aalavula awe itthu iya, atthu anceene yaanimwaamini.
31 Nto Yesu aahilavula ni ayuda ale yaamukupali, oriki: “Nyuwo mwaahihiye otthara moolumo aka, munookhala tthiri awiixutti aka,
32 nave munoosuwela ekeekhai, nto ekeekhai eyo enimootaphulani”.
33 Awo yaahimukoha yiiraka: “Hiyo na nloko na Abrahamu, ni khanitonko okhala ipottha sa mutthu. Munihimya sai wira: ‘Munootaphuliwa’?”
34 Vano Yesu aahiwaakhula oriki: “Tthiri, kinooleelani ekeekhai wira, ole onimakela opaka etampi, onnikhala epottha ya etampi.
35 Nave-tho, epottha khenikhala vatthokoni mahiku otheene. Masi mwaana, onnikhala vatthokoni mahiku otheene.
36 Tivo, Mwaana ootaphulani, nyuwo munookhala ootaphuwa tthiri.
37 Miyo koosuwela wira mwa nloko na Abrahamu. Masi nyuwo munniphavela okiiva, okhala wira khamuneemererya itthu siniixuttiha aka.
38 Miyo kinilavula itthu koonale aka okathi kaari aka ni Tiithi aka, masi nyuwo munipaka itthu mmwiiwale anyu tiithi inyu”.
39 Nto awo yaahimwaakhula Yesu, ariki: “Tiithi ahu ti Abrahamu”. Vano Yesu aahaahimeerya wira: “Vaakhanle wira mwa anamwane a Abrahamu, mwaarowa ottharaka ntakiheryo na Abrahamu.
40 Masi vano nyuwo muniphavela okiiva yoomi, koohimenryeni ekeekhai kimwiiwale aka Muluku. Abrahamu khaarowa opaka etthu siiso.
41 Nyuwo munivara miteko sa tiithi inyu”. Awo yaahimuhimeerya Yesu wira: “Hiyo khanihiyo anamwane ooraruiwa.* Nrina Tiithi mmosa paahi, Muluku”.
42 Nto Yesu aahaaleela wira: “Vaakhanle wira Muluku tori Tiithi inyu, nyuwo mwaamukiphentaka, okhala wira miyo kihoorwa-va, kikhumaka wa Muluku. Nkirwiiye kihirummwale, masi Owo tokirumme.
43 Nyuwo khamuniphavela weemererya itthu siniixuttiha aka, tivonto, khamuniwerya wiiwexexa moolumo aka.
44 Diabo tori tiithi inyu, nave nyuwo muniphavela opaka itthu sinimusivela tiithi inyu. Okhuma okathi aamoothenrye awe Muluku,* owo ookhala nawiive, ni oohiya weettela ekeekhai, okhala wira ekeekhai khenimusivela. Okathi onootha awe, onilavula itthu sinikhuma vamurimani vawe, maana owo nawoothe ni topacenrye wootha.
45 Masi miyo kinooleelani ekeekhai, nto nyuwo khamunikikupali.
46 Ti pani a nyuwo okhanle oowooniherya wira koopaka etampi? Nto kaalavulaka ekeekhai, xeeni muhinikikupali anyu?
47 Ole ori a Muluku, onniiwa moolumo a Muluku. Nyuwo khamuniiwa, okhala wira khamuhiyo a Muluku”.
48 Ayuda yaahimukoha ariki: “Niireke toko nnimootha, naahimyaka wira nyuwo mwa musamariya, nave mookhalana nlaikha nootakhala?”
49 Yesu aahiwaakhula oriki: “Miyo nkirina nlaikha nootakhala, masi kinnimuttittimiha Tiithi aka. Nyuwo munookiveeha.
50 Miyo nkiniphavela wiivuwiha mmansaka. Muluku toniphavela wira kivuwihiwe, nave Owo tori mphuki.
51 Tthiri, kinooleelani ekeekhai wira, akhala mutthu oneettela moolumo aka, khonikhala-khala okhwaaka”.
52 Nto ayuda yaahimuhimeerya Yesu wira: “Vano noosuwela wira mookhalana nlaikha nootakhala. Abrahamu ohookhwa, nave-tho maprofeta ahookhwa, masi nyuwo munihimya wira: ‘Akhala mutthu oneettela moolumo aka, khonikhala-khala okhwaaka’.
53 Niireke nyuwo mwa muulupale onvikana tiithi ihu Abrahamu? Owo ohookhwa, nave-tho maprofeta ahookhwa. Nyuwo munuupuwela wira mwa pani?”
54 Yesu aahiwaakhula oriki: “Vakhala wira kiniivuwiha mmansaka, ovuwa waka ti weethiru. Tiithi aka tonikivuwiha, yoowo munimuhimya anyu okhala Muluku anyu.
55 Nyuwo khamunimusuwela, masi miyo kinnimusuwela. Kaahimmye wira nkinimusuwela, kaarowa okhala nawoothe, ntoko nyuwo. Miyo kinnimusuwela ni kinneettela moolumo awe.
56 Tiithi inyu Abrahamu, aanilipelela otteeliwe ene murima, nihiku kaakela aka orwa. Owo aahiweha mmuupuweloni mwawe, ni aahitteeliwa murima”.
57 Nto ayuda yaahimukoha wira: “Nyuwo nlelo khamurina iyaakha 50, nto vaniweryaneya sai onweha Abrahamu?”
58 Yesu aahiwaakhula wira: “Tthiri, kinooleelani ekeekhai wira, Abrahamu ohinatthi oyariwa, miyo kiira kikhanle ene”.
59 Vano, atthu ale yaahittotta maluku wira anvonyakase Yesu. Masi owo aahiipitha, khikhuma mutemplo.
Inoota
^ Eyo piiyo, omuthomeya vamwirini.
^ Aahiiso, “a orupihana woohiloka”. Ekereku, porneía. Nwehe Moolumo Ootthokiheriwa.
^ Aahiiso, “Okhuma woopaceryani”.
