Otheene ahu ninnitthuneya okhalana musurukhu wira nikhaliheryeke etthoko ahu. (Miruku 30:8) Maana owo onnikhaliherya. (Musuweli 7:12) Ntoko atthu oothelana, pooti okhala vooxankiha olavula sa musurukhu. Masi muheemye wira musurukhu okumiherye mixankiho mukasamentoni mwanyu. (aÉfeso 4:32) Anamathelana ahaana ororomelana ni wiiwanana vaavo anithanla aya moota woorumeela musurukhu.

ELE BIIBILIYA ONIHIMYA AWE: “T’ani a nyuwo, àphavelaka oteka empa yorekama, ahinapajerya okilathi, khupuwela musurukhu orinawe okumiha, wira asuwele waphiyeryaka omalihana?” (Luka 14:28) Nto ti vootthuneya ovaanela moota munrowa anyu orumeela musurukhu anyu. (Amosi 3:3) Muupuwelele itthu sinitthuneya vamosa ni musurukhu oniwerya anyu othumana. (Miruku 31:16) Mwaha wookhalana musurukhu, khonitaphulela wira muhaana othuma khula etthu eniphavela anyu. Musyake okopha-kopha. Murumeeleke musurukhu orina anyu paahi.—Miruku 21:5; 22:7.

ELE EKHANLE ANYU OOPAKA:

• Akhala wira munnikhalana musurukhu mukina wanikisa wa mweeri, muvaanele moota munrowa anyu orumeela

• Akhala wira vannooxankihani oliva musurukhu okomphe anyu, mumpake palano wira nvukule itthu munithuma anyu. Mwa ntakiheryo, nyuwo pooti olokiherya yoolya anyu, ohiya othuma yoolokiheriwa ene

ELE BIIBILIYA ONIHIMYA AWE: ‘Nvareke itthu sotheene moororomeleya, ohiya paahi vamaithoni va Yehova, masi-tho vamaithoni va atthu’. (2 aKorinto 8:21) Muroromeleyeke wa ole othelanne anyu voohimya sa musurukhu onaakhela anyu ni ole onirumeela anyu.

Mmukoheke ole othelanne anyu okathi munipaka anyu soothanla suulupale voohimya sa musurukhu. (Miruku 13:10) Ovaanela voohimya sa musurukhu onookhaliherya ekasamento anyu wira ekhalane murettele. Nto muhuupuweleke wira musurukhu oniphwanya anyu ti wawinyu paahi, masi ti wa etthoko yotheene.—1 Timótheyo 5:8.

ELE EKHANLE ANYU OOPAKA:

• Mwiiwanane voohimya sa musurukhu yoowo khuta mutthu okhanle awe oorumeela voohitthuneya omukoha mukhwaawe

• Muhilipeleleke okhuma muxankiho wira nvaanele voohimya sa musurukhu