1, 2. (a) Exeeni yaariipiha murima atthu, mahiku a Eliya? (b) Yoweeha xeeni yamphannye Eliya omwaako Karmelo?

ELIYA aaweha muttitthi wa atthu yaawela mwaako Karmelo vohaawela. Hata vaari vooriipela mwaha wookhala vaasiisu, vaaniweryaneya woona moota atthu saaxankale aya mwaha wa ohaawa ni othowa wa soolya. Tthiri ohirupa epula wa iyaakha tthaaru nnimeya wahaakumiherya ohaawa.

² Masi eriyari aya yaahikhala maprofeta a Bayali ootakhala oowiiraka 450, yaawo yaari oowiitthuna yahaasiveliwa onweha profeta a Yehova, Eliya. Okathi owo, Pwiyamwene Yezabeli iira owiivakanse ene arumeyi anceene a Yehova, masi Eliya aahilipiherya ovikaniha okhootta omukokhorela Bayali. Masi aarowa wiiraka siiso mpakha silini? Pooti wira anamukuttho ale yuupuwela wira mutthu mmosa paahi khaarowa owerya waaxintta atakhali ale. (1 Mam. 18:4, 19, 20) Mwene Akhabi taahoolela atthu ale. Nave owo khaasiveliwa onweha Eliya.

3, 4. (a) Woonasa wene, xeeni Eliya aarya awe oowoova okathi nsuwa naawela aya? (b) Makoho xeeni ninrowa ahu othokorerya?

³ Nihiku nle naarowa okhala noohilikana ni nikina wa profeta ole aari mekhawe. Eliya oriki waaweha atthu ale, aanisuwela wira vano yaarowa omusuwela saana ovikana khalai, ti pani aari oowerya, eriyari ya Muluku ni atthu ale ootakhala. Nto Eliya oona sai okathi nsuwa naatepa aya owela? Okhala wira “ari mutthu ntoko hiyo”, nto Eliya aanoova. (Mmusome Yakobo 5:17.) Masi yookhala etthu emosa ekhanle ahu ookupali: Orukureriwe ene ni atthu ale oohaamini, ni anamukuttho ootakhala, vamosa ni mwene ole oomwareya, Eliya oona wira khaarina mutthu oomukhaliherya.—1 Mam. 18:22.

⁴ Masi exeeni, yaawiirihale aIsarayeli waaphwanya mixankiho iye? Niireke yowiiraneya ela ennookhaliheryani? Muthokorerye ntakiheryo nooloka na waamini wa Eliya ni mureerelo oniphwanya ahu olelo-va.

5, 6. (a) Ekhotto xeeni aIsarayeli yaawana aya? (b) Moota xeeni mwene Akhabi aatepenxe awe onveeha Yehova?

⁵ Okumi awe wotheene Eliya aahiwoona atthu ahicalelaka okokhorela wekeekhai, nnaamwi okokhorela iwo waari wootthuneya wa atthu a elapo awe; masi khaarina moota woolokiherya. Okathi owo, aIsarayeli yiira awanaka ekhotto mahiku manceene, eriyari ya okokhorela wa  ekeekhai ni wa ethiru, eriyari ya atthu a Yehova Muluku, ni maloko makina yaakokhorela ilatarato. Mahiku a Eliya ekhotto ele yaamutepa.

⁶ Mwene Akhabi aahinveeha vanceene Yehova. Owo aamuthenle Yezabeli, mwaana a mwene a oSidoni. Yezabeli aahilakela wira okokhoreliwa wa Bayali omwareele mulaponi motheene mwaakhala aIsarayeli ni aaphavela omala-maliha okokhoreliwa Yehova. Akhabi mowaakuveya aahipahuliwa ni mwaarawe. Nto aahiteka etemplo ni altari wira okokhoreliweke Bayali, nto owo taahoolela okokhoreliwa wa muluku ole.—1 Mam. 16:30-33.

7. (a) Exeeni yooniherya wira okokhoreliwa Bayali waari wootepa otakhala? (b) Voohimya sa okathi waavinre epula ehirupaka mahiku a Eliya, xeeni vanihimya ahu wira ele Biibiliya enihimya awe enniiraneya tthiri? (Nwehe  ekaaxa.)

⁷ Xeeni okokhoreliwa Bayali waarya aya etthu yooveeha? Mwaha woowi aahahapuxa aIsarayeli anceene, khumuliyala Muluku aya eekeekhai. Nave-tho yaari etiini yoohiloka ni yootakhala. Okokhoreliwa Bayali waahela mpuwa alopwana ni athiyana yaasiveliwa orupihana woohiloka, ifesta sa atthu oohiisumaaliha, ni waapaha anamwane. Mwaha waivaavo, Yehova aahimuruma Eliya orowa omuleela Akhabi wira khiyaarowa orupa epula mpakha okathi Muluku aarowa awe ohimya wira enoorupa. (1 Mam. 17:1) Nuuvira iyaakha, Eliya aahirowa omuleela Akhabi wira aathukumanye atthu ni maprofeta a Bayali vamwaako Karmelo. *

8. Exeeni eniixutta ahu voohimya sa okokhoreliwa Bayali olelo-va?

⁸ Masi ekhotto ele enitaphulela exeeni wa hiyo olelo-va? Akina pooti wuupuwelaka wira yowiiraneya ela voohimya sa okokhoreliwa wa Bayali khenivareleya muteko olelo, okhala wira awo khaniweha itthu ntoko itemplo ni altari a Bayali eriyari aya. Masi yowiiraneya ela khahiyo ntoko itthu sa khalai paahi. (aRom. 15:4) Nuulumo noowi “Bayali” nintaphulela “mwaneene” wala “pwiya”. Yehova aahaahimeerya atthu awe wira yaahaana omuthanla Yehova okhala “bayali” aya, niire so, mwaneene wala iyaya. (Yes. 54:5) Vano khamunikupali wira atthu anceene annaarumeela amuluku akina, ohiya omurumeela Muluku Oowerya-Sotheene? Nnaamwi atthu akina arumeelaka okathi aya munceene yaavyaka musurukhu, muteko, otthekula, orupihana woohiloka, wala waakokhorela amuluku anceene eethiru, ohiya omurumeela Yehova, etthu enithanla aya tekhanle pwiya wala mwaneene ikumi saya. (Math. 6:24; mmusome aRoma 6:16.) Nto, sowiira ni soolema sa omukokhorela Bayali sinootepa olelo-va. Wuupuwelela mwaha ole waakhumelenle eriyari ya Yehova ni Bayali, onoonikhaliherya omuthanla mwa miruku ole okhanle pwiya a ikumi sahu.

9. (a) Xeeni mwaako Karmelo aarya awe opuro wooreerela wooniherya ohifai wa muluku Bayali? (Nwehe enoota.) (b) Eliya aahimyale exeeni wa atthu ale?

⁹ Vasulu vamwaako Karmelo, vanniweryaneya owehaka ekhato yuulupale ya muro Kixoni, waattamela Ephareya Yuulupale (Ephareya Mediteraaneo), ni mwaako wa Libano, oryeene ottaiwene epantte onikela epheyo. * Masi, okathi nsuwa naapacerya ya owela nto vaanooneya ohiloka wa makhalelo a elapo ele. Elapo yeele khalai yaari yooruwerya Yehova aavahale awe anaawe Abrahamu, vano yaari yootepa wuuma ni ovya nsuwa. Vano yaari etthaya yahaaruwerya ni yowuuma mwaha wa ohiiwelela wa atthu a Muluku. Nuumala atthu ale othukumana, Eliya aahiwaattamela khuhimya so: “Mpakha lini muniphavelanyu ovara itthu  pili? Apwiya yakhalá Muluku, weso mwatthare, masí Bayali akhalá muluku, mmutthareke yowo!”—1 Mam. 18:21.

10. Moota xeeni atthu mahiku a Eliya ‘yaphavela aya ovara itthu pili’, nto ekeekhai xeeni yuulupale yaaliyanle aya?

¹⁰ Eliya aaphavela ohimya exeeni vaavo aalavunle awe masu ani: “Mpakha lini muniphavelanyu ovara itthu pili”? Atthu ale khayuupuwela wira yaahaana opaka yoothanla ya omukokhorela Yehova wala Bayali. Yoona wira yaahaana opaka itthu soopiili: ovikaniha okhalana murettele ni Bayali avaraka soolema sawe, okathi omosaru avekelaka okhaliheriwa ni Yehova Muluku. Yuupuwela wira Bayali aamureeliha itthu saaphatteya aya mmatta, wala mihuwo saya, masi Yehova wala “Yahvéh ànakhotto” aarowa waakhaliheryaka okhottoni. (1 Sam. 17:45, Biblya Exirima) Masi yaahiliyala nlamulo nimosa nuulupale, ekeekhai yeeyo anamunceene olelo ahinisuwelexa aya wira: Yehova khoninvaha mutthu mukina okokhoreliwa wawe. Yehova onitthuneya okokhoreliwaka owo paahi. Tthiri owo toniphwanela. Nto ole onihimya wira onnimukokhorela Yehova masi khiyaakokhorela amuluku akina, mutthu owo khonataana ni Muluku, nto onlikana ni omuruwana!—Mmusome Okhuma 20:5.

11. Moota xeeni otthara masu a Eliya omwaako Karmelo annikhaliherya aya wiitokosa, ni woona etthu yootepexa otthuneya mwa okokhorela wahu?

¹¹ Atthu a wIsarayeli ‘yaphavela ovara itthu pili’, okhalaka ntoko mutthu onitthara iphiro piili okathi omosaru. Anamunceene olelo-va, annivara etthu emosaru vaavo vaneemya aya okumi aya weettihiwaka ni itthu sikina, anahiya omukokhorela Muluku. Otthara yoolopola ela yuulupale ya Eliya ya ohiphavela ovara itthu piili, onoonikhaliherya wiitokosa, ni woona etthu yootepexa otthuneya mwa okokhorela wahu.

12, 13. (a) Yoowehererya xeeni Eliya aakumihenrye awe? (b) Ninrowa wooniherya sai wira ninnimuroromela Yehova ntoko Eliya?

¹² Nuumala-vo Eliya aahiphavela oweehererya wira osuweliwe Muluku eekeekhai. Anamukuttho a Bayali yaahaana ompaka altari wira yavahe mukuttho; nuumala-vo yaahaana onvekela muluku aya wira oruuhe mooro waarowa opaha mukuttho ole. Nave Eliya ampaka etthu emosaru. Owo aahimyale so: “Muluku onrowa onakhulela, khumoriha moro, yowo ti Muluku èkhweli”. Eliya aanimusuwela ole aari Muluku eekeekhai. Waamini wawe wuulupale waahimwiiriha waahiya maprofeta ale attottelaka muraarelo khula etthu. Tivonto aaheemya wira maprofeta ale a Bayali apacerye ovaha mukuttho aya. Nto yaahimuthanla mwaanyompe aya wira avahe mukuttho nto anapacerya onvekela muluku aya Bayali. *—1 Mam. 18:24, 25.

 ¹³ Okathi ahu ola khisiniireya miiriirya ntoko khalai. Hata vari siiso, Yehova khoturuken’ye. Nto hiyo pooti omuroromela ntoko siirale awe Eliya. Mwa ntakiheryo, akhala wira atthu akina anivaanyiha ele Biibiliya enihimya awe, khivanitthuneya woova, nto nihaana onvaha okathi wira ohimye itthu sinikupali awe. Masi ntoko Eliya, nihaana onvekela Muluku eekeekhai wira ophuke mwaha owo. Opaka eyo, onoonikhaliherya ohiiroromela masi okupali masu yuupuxeriwe ni Muluku yaawo annikhaliherya ‘wavanyiha ale anvonya’.—2 Tim. 3:16.

14. Eliya aaramunse sai maprofeta a Bayali, nto aaphavela wooniherya exeeni?

¹⁴ Maprofeta ale yaahiilokiherya wira avahe mukuttho aya aromolaka nsina na muluku aya Bayali. Yiiraka so: “Bayali nyu, munakhule”. Nto yaanikhuwela ikwaha sinceene alavulaka masu mamosaru. Nto Biibiliya onihimya wira: “khavo awakhunle”. Othana eriyari, Eliya aahikelela waatheya, aahimeeryaka wira atepeke orunya owehasa wene pooti wira Bayali aatteliwe miteko, wala aamurupa, nto atthu ale yaahaana onvenxa vaarupa awe. Eliya aanaatumererya atakhali ale wira ‘atepeke orunya n’ukhuwela’. Tthiri Eliya khaasiveliwa ni anawoothe ale yaamukokhorela Bayali, nto aaphavela wira atthu asuwele wootha wa maprofeta a Bayali.—1 Mam. 18:26, 27.

15. Etthu yawiiranenle anamukuttho a Bayali enooniherya exeeni voohimya sa waakokhorela amuluku eethiru, voohikhala Yehova?

¹⁵ Anamukuttho a Bayali, yaanikhuwela alipiheryaka “yahitepa orunya, yahipajerya wipophela ntoko salimalelaya, yithikilaka ni tukuthi ni mavaka khiyakhòwa ephome mwerutthuni mwaya mothene”. Masi yaakhuwela mahala! ‘Khanìwanyeya nsu, khavo awakhunle, khivo yakhumelenle’. (1 Mam. 18:28, 29) Tthiri Bayali ari muluku eethiru. Owo aaroopakeleliwa ni Satana wira aawokeke atthu a Yehova. Ela enooniherya wira mutthu onihiya omurumeela Yehova onaakokhorela amuluku akina, onikumiherya okhulumuwa, wala ehaaya.—Musome Esalimo 25:3; 115:4-8.

16. (a) Atthu yuupuwela exeeni okathi Eliya aatthikenle awe omuteka altari a Yehova va mwaako Karmelo? (b) Eliya oonihenrye sai wira aanimuroromela Muluku awe?

¹⁶ Vahaleelaka wiila, waahiphiya okathi wira Eliya ovahe mukuttho. Owo aahimutekela Yehova altari, yoowo aanyaanyiwa ni ale yaamukokhorela Bayali. Aahirumeela maluku 12, wira maloko 10 a nloko na Isarayeli asuweleke wira nlelo Nlamulo nle naanivara muteko. Vano aahipweha  mukuttho ni aahirumiha wira yiittheliwe maasi akumihiwaka ophareya ya oMediteraaneo yaattamenle opuro ole. Owo aahithipa nlitti wira akeleke maasi manceene. Okathi waavahiwa mukuttho wa Bayali, Eliya khaavekenle itthu sinceene atthu ale, masi okathi woovaha mukuttho wa Yehova aahirumiha itthu sinceene okhala wira Eliya aanimuroromela vanceene Yehova wira aamukumiherya mooro.—1 Mam. 18:30-35.

17. Exeeni enooniherya wira nivekelo na Eliya naari nootthuneya, nto nimutakihe sai okathi onivekela ahu?

¹⁷ Nuumala itthu sotheene olokiheriwa, Eliya aahipaka nivekelo. Nivekelo nno naari nowiiwanyeya, nohaattiheriwa itthu, aahimyale etthu yaatthuneya okathi ole. Etthu yoopacerya ni yootepa otthuneya, Eliya aaphavela wooniherya wira Yehova paahi, ohiya Bayali; taari “Muluku a Isarayeli”. Yanenli, aaphavela wira atthu ootheene asuwele wira owo aari murumeyi a Yehova; nto ovuwa ni nttittimiho notheene, aahaana ovahiwa Muluku. Mwa itthu iyo piili sinnooniherya wira nlelo aaniphavela mureerelo wa atthu a nloko nawe, maana aaphavelexa omoona Yehova ‘orukunuxaka mirima sa atthu ale’. (1 Mam. 18:36, 37) Nnaamwi saakhumelenle mixankiho sinceene mwaha wa ohiroromeleya waya, Eliya nlelo aanaaphenta. Okathi onivekela ahu niireke vaamureerela wiiyeviha ntoko Eliya, nivaraka ele Muluku eniphavela awe, ni owoonela othunku ale anitthuneya okhaliheriwa?

18, 19. (a) Yehova aakhunle sai nivekelo na Eliya? (b) Exeeni Eliya aarumme awe atthu opaka, nto xeeni anamukuttho a Bayali yahaaphwanela aya omoreliwa ikharari?

¹⁸ Ohinatthi Eliya opacerya ovekela, pooti wira atthu yaanuupuwela wira Yehova khaarowa waakhula ntoko siiren’ye aya ni Bayali. Masi nuumala Eliya ovekela khuuvo-tho uupuwela siiso. Biibiliya onihimya so: “Moro w’Apwiya wahimorela vathí, khupaha enama n’ikhuni ni maluku ni ntthupi, khuwelelihaka màsi yari mulittini”. (1 Mam. 18:38) Tthiri waari waakhuliwa wootepexa wooneya! Vano atthu yoonenle sai?

¹⁹ Yoonakaru siiso atthu ale yaahikhuwela yiiraka: ‘Tthiri Yehova Muluku! Yehova tokhanle Muluku a ekekhai!’ (1 Mam. 18:39) Vano yaahimusuwela Muluku eekeekhai. Hata vari siiso atthu ale khiyooniherya waamini. Tthiri, okupali paahi wira Yehova tori Muluku eekeekhai, nuumala woona mooro waakhumale wiirimu ntoko waakhuliwa wa nivekelo na Eliya, khahiyo waari wooniherya waamini wekeekhai. Tivonto, Eliya aahaatumererya atthu wooniherya enamuna ekina ya  waamini. Aahahimeerya wira yaahaana opaka etthu yaakhanle aya oopaka okhuma khalai, eyo piiyo, weettela Sooruma sa Yehova. Sooruma sa Muluku saahimya wira maprofeta oowoka ni ale yaakokhorela amuluku a ethiru yaahaana wiiviwa. (Otum. 13:5-9) Anamukuttho a Bayali yaari awanani a Yehova Muluku, nto yaanipaka itthu volakelela avaanyihaka soolakela sawe. Niireke yaanireerela omoreliwa ikharari? Niireke atthu ale yaahaamorela ikharari anamwane ale oohittheka yaapahiwa wira ovahiwe mukuttho Bayali? (Musome Miruku 21:13; Yer. 19:5) Tthiri atthu ale khiyaaphwanela omoreliwa ikharari! Tivonto Eliya aarumme awe wira yiivakasiwe otheene aya, vano khiiviwa.—1 Mam. 18:40.

20. Olelo-va, etthu xeeni eniwuukhula atthu akina animutokosa Biibiliya, voohimya sa Eliya owiiva anamukuttho a Bayali?

²⁰ Mahiku ala, atthu akina animutokosa Biibiliya pooti ohimyaka wira wiiviwa wa anamukuthto a Bayali yaari etthu yoohiloka. Akina anoona wira eyo enoowiiriha anatiini akina ootakhala, owiivaka atthu mwaha wootakiha etthu yiiraneyale omwaako Karmelo. Tthiri vooriipiha murima, olelo-va aakhala anatiini ootakhala aniwiiva atthu. Masi Eliya khahiyo aari mutthu ootakhala. Owo aamukhaliherya Yehova ni aapakale ottharihelaka exariya. Ohiya-vo, maKristau eekeekhai annisuwela wira khanrowa omutakiha Eliya, ni khanirumeela ekatana wira awiive atthu ootakhala. Masi, awo anneettela ele yaahimyale Yesu, wa Pedru, enivareleya muteko wa maKristau otheene wira: “Mwixathi ekatan’anyu mwaryaya, okhala wira othene ale anrumela ekatana, anokhwa ekatana yeyo”. (Math. 26:52) Yehova onrowa omurumeela Mwanawe wira aaphukele atthu mwa xariya.

21. Xeeni ntakiheryo na Eliya niryaaya nootthuneya otthara Makristau otheene olelo?

²¹ Makristau eekeekhai aahaana wooniherya waamini waya mwa enamuna enikhala aya. (Yoh. 3:16) Enamuna emosa ti otakiha waamini wa atthu oororomeleya ntoko Eliya. Owo aamukokhorela Yehova paahi, ni aatumererya akina opaka etthu emosaru. Moolipa murima owo aahooniherya okhala ethiru okokhorela wa etiini yoowoka ya Satana, yeeyo yaaphavela waahapuxa atthu a Yehova. Nto wira olokiherye mixankiho sotheene, Eliya aamuroromela Yehova paahi ohiya osuwela wawe, wala murima awe. Eliya aahaakiherya okokhorela wekeekhai. Nto ootheene ahu nrowe nitakihe waamini wawe.