1, 2. (a) Marukunuxo xeeni Yosefe ni etthoko awe yaarowa aya opaka? (b) Ehapari xeeni yoohiloka Yosefe aarowa awe omuleela mwaarawe?

YOSEFE aahipweha muritti mukina vabuuruni. Nlelo oBethelehemu waari ohiyu. Tivonto aaniwehaweha ipantte sikina olokiheryaka miritti sawe vasulu va buuru. Tthiri, Yosefe aanuupuwela moota saarowa awe weetta mukwaha ole woorakama woorowa wEjiitu! Niireke nto emusi awe yanwerya olimalela okhala elapo ekina, olavula nttaava nikina, ni soolema isya?

² Khivaakhweyale omuleela ihapari iye Maria mwaarawe amphenta awe, masi Yosefe aahilipiha murima khumuleela. Aahimuleela ele yaalohale awe oleelihiwaka ni nlaikha naarumiwe ni Muluku wira: mwene Herodi omphavela omwiiva mwaana ole! Nto yaahaana okhuma voohipisa. (Mmusome Matheyo 2:13, 14.) Maria aahixanka vanceene. Exeeni yaarowa omwiiriha mutthu ophavela omwiiva mwanaya ohirina nthowa? Maria ni Yosefe khiyaawerya woona nthowa naya. Masi yaanimuroromela Yehova, tivonto yaalakenle aya orowa wEjiitu.

3. Mutthokiherye etthu yaamwiirinhe Yosefe ni etthoko awe okhuma oBethelehemu. (Nwehe-tho elatarato.)

³ Atthu oBethelehemu ariki orupa voohisuwela etthu yaarowa wiiraneya, Yosefe, Maria ni Yesu, yaahikhuma ohiyu. Arowaka mpantta wa okuusini vapaceryaka okokola, Yosefe onnixanka voohisuwela yaarowa okhumelela. Nto kalapintero pure aarowa owerya sai waakiherya emusi awe wa ikuru sootepexa otakhala? Niireke anweryaka ophwanya eyoolya yoophiyerya wa emusi awe? Niireke anwerya ovara saana muteko muulupale aavahiwe awe ni Yehova, wa omukhapelela mwaana ole a vameekhaawe? Tthiri Yosefe aahikhalana mixankiho suulupale. Okathi onithokorerya ahu moota Yosefe aawenrye awe owanana mixankiho iyo, ninrowa oweha nthowa naya anamuyari olelo, ni otheene ahu, vanitthuneya ahu otakiha waamini wa Yosefe.

4, 5. (a) Marukunuxo xeeni maalupale yaamukhumelenle Yosefe? (b) Nlaikha naamulipinhe sai Yosefe wira eemererye eparakha ele yuulupale?

⁴ Myeeri sinceene ottuli, Yosefe oryeene muttetthe awe oNazarethi, aahoona wira okumi awe waahiturukeya nuumala omwaakamela  mwaana a Eli. Yosefe, aanisuwela wira Maria aari a murima saana ni oowaamini. Nto khusuwela wira Maria oorupala! Khulakela omuhiya, vohimooniha ehaaya. * Masi moolohani, nlaikha naahimuleela wira Maria aarupanle ni ikuru sa munepa wootteela wa Yehova. Nlaikha nne naahimuleela-tho wira mwaana owo, aarowa ‘owòpola atthu awe soottheka saya’. Ohiya-vo, naahimulipiha Yosefe nriki: “Muhòvelelé omwakhela Maria okhala mwar’inyu”.—Math. 1:18-21.

⁵ Yosefe, mulopwana ooreera murima ni oowiiwelela, aahipaka sotheene ntoko saahimyale aya nlaikha. Owo aaheemererya muritti wa omuhuwa ni omukhapelela mwaana, nnaamwi ahaakhanle awawe, masi mwaana owo aari ootthuneya vamaithoni va Muluku. Ohoolo waya, iiwelelaka yooruma ya Mwene a oRoma, Yosefe ni amwaarawe, yaahirowa oBethelehemu wira yailepihe, nnaamwi mwaarawe aarupanle. Tivonto Maria aayanre awe oBethelehemu.

6-8. (a) Itthu xeeni saamwiirihale Yosefe ni etthoko awe othaama-tho orowaka elapo ekina? (b) Exeeni enooniherya wira Satana taarumihale “etheneri” ele? (Nwehe-tho enoota.)

⁶ Yosefe ni emusi awe, khaatthikenle oNazarethi. Ohiya-vo, yaamakale oBethelehemu, muttetthe wa ikiloomo 10 orowaka oYerusalemu. Yaari atthu oohaawa, masi Yosefe aanipaka khula etthu yaawerya awe wira omuthokorerye Maria ni Yesu mwa itthu sootakhala. Mwa okathi vakhaani awosa yaakhala empa yaamukhaani. Masi nuumala Yesu wunnuwa vakhaani, owehasa wene orineene eyaakha emosa, okumi aya waahiturukeya-tho.

⁷ Egrupu emosa ya axilopwana anisoma itheneeri, yaahirwa akhumaka onikhuma nsuwa, owehasa wene oBabilonia, elapo yoorakamela. Awo yaatthanre “etheneri” mpakha ophiya waari Yosefe ni Maria; yaatthuna omoona mwaana aarowa okhala mwene a aYuda. Alopwana ale yaari atthu oottittimiha vanceene.

⁸ Hata yaasuwela aahiiso ohisuwela, alopwana ale yaahimukumiherya maxakha Yesu. “Etheneri” yaawehale aya, yaaroihale oYerusalemu, ohiya oBethelehemu. * Khurowa omuleela Mwene ootakhala Herodi ariki aniphavela omoona mwaana aarowa okhala mwene a aYuda. Nto masu awo, yaahimwiiriha Herodi oviruwa mwaha wa nrima.

9-11. (a) Yehova oonihenrye sai wira toowerya onvikana Herodi ni Satana? (b) Mukwaha woorowa wEjiitu onivirikana sai ni itthu sinihimmwa ni iliivuru sowuncereriwa mBiibiliyani?

⁹ Etthu yoohakalaliha okhala wira, Yehova orina ikuru onvikana Herodi, ni Satana, aahimukhapelela mwaana ole. Yiiraneyale sai? Nuumala alopwana ale ophiya opuro waari Yesu, khumoona mwaana ole onari ni ameyawe, yaahinvaha itthu sinci saaruuhale aya, voohiveka  oliviwa etthu. Tthiri Yosefe ni Maria, vanaavila okupali wira vootutuxerya yaahikhalana itthu sa musurukhu munceene ntoko eweero, erupani ni miira. Asuweli ale, yaaniphavela orowa omuleela Mwene Herodi, opuro waari awe mwaana ole masi Yehova aahakhoottiherya. Moolohani, Yehova aahaalopola wira yaahaana otthika masi attharaka ephiro ekina.—Mmusome Matheyo 2:1-12.

¹⁰ Nuumala asuweli ale orowa, nlaikha na Yehova nahimukhumelela Yosefe khumuhimeerya wira: “Nvenyé, mmukuxe Mwana n’ame awe, mutthyawele wEjitu. Mwakhaleke weiwo mpakha miyo wohimeryani, mana Herodi onrowa omphavela Mwana, wira amwive”. (Math. 2:13) Ntoko soonale ahu wanipacerya wa muru ola, Yosefe aahiiwelela naananoru. Aahimukuxa mwaana ole khumukhapelela saana voovikana etthu ekina, nave aahivenya ni etthoko awe khurowa wEjiitu. Nto itthu Yosefe saavahiwe awe ni asuweli yaamuxukuryale, saarowa okhaliherya etthoko awe wEjiitu.

¹¹ Mukwaha ole waari woorakama, woovila ni wookhulumula. Nnaamwi ohoolo waya iliivuru sowuncereriwa mBiibiliyani, sihimyaka itthu sowoothereriwa khuyakhala ntoko wira mukwaha woorowa wEjiitu waari wooreerexa; sihimyaka wira mwa miiriirya, Yesu aahikhuveiha mukwaha ole, ni aahaakhoottiherya alavilavi owiiyerya, nave aahiiriha miri omuuramela Maria wira arukule mihokorokho. *

12. Anamuyari anaahuwa anamwane elapo ela yoohiloka aniixutta exeeni sa Yosefe?

¹² Anamuyari anoowerya oxutta itthu mwa soohimya sa Yosefe. Owo aahiivahererya moomalela ovaraka muteko, ni aahimananiha wira okhapelele etthoko awe. Tthiri Yosefe aanithokorerya emusi awe ntoko muteko wa Yehova. Olelo-va, anamuyari annaahuwa anaaya elapo ela yootakhala, ni eneettihiwa ni Satana, yoowo oniphavela waahonona amiravo. Anamuyari anceene, ntoko Yosefe, annilakela waakhapelela anaaya wira ahipahuliwe!

13, 14. Xeeni Yosefe ni Maria ahalaka orowa okhala ni emusi aya oNazarethi?

¹³ Vanikhala ntoko wira emusi ele khiyaapisale wEjiitu, okhala wira voohipisa, nlaikha naahimuleela Yosefe wira Herodi aahikhwa. Nto Yosefe, aahikuxa etthoko awe atthikelaka elapo awe. Vano yahiiraneya eprofesia yaalavuliwe khalai wira: “Komwihana Mwan’aka wEjitu”. (Math. 2:15) Yosefe aahikhaliherya wiiraneya wa eprofesia ele. Masi epooma xeeni yaarowa awe okhalaka vano?

 ¹⁴ Yosefe aari mutthu a ankhili. Owo aanimoova Arikilawo yoowo aamuranttenle Herodi, nave aari mutthu ootakhala ni aaniwiiva atthu. Ottharaka malakiheryo a Muluku, Yosefe aahikuxa emusi awe orowaka epantte onikela epheyo, woorakamelana oYerusalemu, elapo ya oGalileya, muttetthe wa oNazarethi. Muttetthe yoole, Yosefe ni Maria ti yaahuwale aya anaaya.—Mmusome Matheyo 2:19-23.

15, 16. Muteko wa Yosefe waari sai, nto ikaruma xeeni owehasa wene saarumeela awe?

¹⁵ Okumi aya waari wohaattiheriwa itthu, masi waari woovila. Okathi onihimmwa awe Yosefe okhala kalapintero, Biibiliya onnirumeela nuulumo nimosa nnihela muhina miteko sotheene sinivariwa sirumeeliwaka ithaapwa, ntoko wiikittha miri ni oteexa, olokiherya wira irumeeliweke nipuro nintekiwa inupa, apakiti, iponti saamukhaani, ikarosa, maroota, ikaruma soteexerya miritti, ni ikaruma sotheene sinirumeeliwa ni alimi. (Math. 13:55) Tthiri waari muteko woovila. Kalapintero a khalai, okhala wene aavaraka vapuwani vawe, wala efisina yowaattamela.

¹⁶ Yosefe aanirumeela ikaruma sinceene, sikina owehasa wene aahiyeriwe awe ni paapa awe. Pooti wira aanirumeela esquadro, eprumo, exiixi ya liinya, maxatto, mpattho, maritelo, enyutto, ikoola soovirikana, owehasa wene ni ipereku, vanaamwi sahaakhweya othuma okathi ole.

17, 18. (a) Yesu aaxuntte exeeni wa Yosefe yoowo aari ntoko tiithi awe? (b) Xeeni Yosefe aimananiha awe vanceene ovara muteko?

¹⁷ Vano nkahaya muupuwele, Yesu nlelo oryeene mmiravo, owehaka muteko wa Yosefe yoowo aari ntoko tiithi awe. Maitho awe awehaka saana, Yesu aanimoona Yosefe ovaraka muteko, ni aanoona ikuru saarina awe orumeelaka matata, ni osuwela wawe ovara muteko. Pooti wira Yosefe aapacenrye omwiixuttiha mwanawe ovara miteko sookhweya, ntoko owaka ithaapwa orumeelaka esapala yowuuma ya ehopa. Pooti wira Yosefe aahimukhaliherya Yesu osuwela ovirikana waakhanle wa ithaapwa saarumeela awe, ohela muhina mwiri ntoko carvalho, olivera, ni miri sikina.

¹⁸ Yesu aahiixutta-tho wira matata yaale yaarina ikuru sa wiikittha miri, omana etthu ni martelo, omana ithaapwa, yaari-tho matata yaale Yosefe yaarumeela awe vomphenta Yesu ni maama awe, waahela  muhina axinnawe. Tthiri nuuvira okathi Yosefe ni Maria yaahikhalana anamwane 6 omuhiya Yesu. (Math. 13:55, 56) Tivonto Yosefe, aahaana ovara muteko wira alyihe etthoko awe.

19. Moota xeeni Yosefe aakhalihenrye awe etthoko awe mmukhalelo wa omunepani?

¹⁹ Hata vari siiso, Yosefe aanisuwela wira etthu yuulupale, waari okhapelela etthoko awe mmukhalelo wa omunepani. Nto aaniviriha okathi munceene owiixuttihaka anaawe, voohimya sa Yehova Muluku ni malamulo Awe. Nto khula okathi, Yosefe ni Maria, aanaakuxa anaawe anarowa osinagoga wa muttetthe yoole, opuro yoowo waasommwa ikano ni otthokiheriwa. Pooti wira sookhala itthu sinceene Yesu aaphavela awe otthokiheriwa nto Yosefe aaniimananiha wira omukhaliherye wiixutta itthu sinceene sa omunepani. Yosefe aanikuxa etthoko awe anarowa opuro waapakiwa ifesta sa olompa oYerusalemu. Khuta mwaakha, pooti wira Yosefe aanirumeela isumana piili, eettaka ikiloomo 120 orowa ni otthika, wira iirele mpantta niira na Paasikha.

20. Moota xeeni imusi sa eKristau sinitthuneya aya omutakihaka Yosefe?

²⁰ Mahiku ala, imusi sa eKristau, sinnipaka etthu emosaru. Anniimananiha wira yaakhaliherye anaaya awooniheryaka wira itthu somunepani, ti etthu yootepa otthuneya, ohiya mihakhu. Awo anniilipiha vanceene wira amulompe Muluku vatthokoni, arowaka vamosa omithukumanoni sa eKristau, sa atthu vakhaani wala sa atthu anceene. Ntoko Yosefe, annisuwela wira khiivo etthu ekina yooloka ohikhanle waakhaliherya anaaya mmukhalelo wa omunepani.

21. Paasikha aapakiwa sai okathi wa Yosefe, nto okathi xeeni Yosefe ni Maria yoonale aya wira Yesu kheetta ni awosa?

²¹ Yesu orineene iyaakha 12, Yosefe aahikuxa etthoko awe, onarowa oYerusalemu. Waari okathi wa Niira na Paasikha, nto imusi sinceene saneetta vamosa, mukwaha woorakama siviraka mmathalani okathi waaphuwa miri. Okathi waattamela aya mittetthe soovila weetta, waattamela oYerusalemu, yaaniipa masipo yaamakela wiipiwa, nsipo na mawelelo. (Esal. 120-134) Woonasa wene epooma ele, yaahisareya atthu anceene. Nuumala ifesta iye, atthu otheene yaanitthikela omuttettheni waya. Yosefe ni Maria, woonasa wene yaatteliwe ene miteko soovara, yuupuwela wira Yesu aari ni atthu akina mukwaha yoole, khino ni amusi akina. Masi nuuvira nihiku nimosa yeettaka ekhumaka oYerusalemu, yaahoona wira Yesu khakhanle vamosa ni atthu ale, vano yaahixanka!—Luka 2:41-44.

22, 23. Yosefe ni Maria yaapakale exeeni nuuweha wira mwanaya aahirimeela, nto Maria aalavunle exeeni nuumala omphwanya Yesu?

 ²² Axankale ene, Yosefe ni Maria yaahitthikela oYerusalemu, amwaavyaka Yesu. Nkuupuwelani epooma ele vano yaari yoohaatta atthu ni yoothanyeya, nto Yosefe ni Maria yaahaana weetta mphironi, amwiitthanaka mwanaya. Nto mmiravo ole aari vai? Nuuvira mahiku mararu, niireke Yosefe aahipacerya othanana mwaha wowuupuwela wira aahooceela othokorerya saana muteko aavahiwa awe ni Yehova? Wookiseryani waya awo yaahirowa omwaavya otemplo. Awo yaahimwaavya khuta opuro, mpakha ophiya nipuro naathukumana asuweli, alipa-oowiixuttiha Nlamulo, nto ti weiwo Yesu aaryaawe. Vano nkuupuwelani moota Yosefe ni Maria sarya aya oohakalala nuumala omphwanya!—Luka 2:45, 46.

²³ Yesu aawiriyana asuweli ni waapaka makoho manceene. Nto  atthu ale yaanitikinihiwa ni ankhili a Yesu, ni enamuna yaakhula awe. Nto vano Maria ni Yosefe, yaahitikhina nuumala omphwanya Yesu. Moolumo alempwale mBiibiliyani anooniherya wira Yosefe khahimyale etthu. Masi masu a Maria annooniherya etthu yena ni aiyawe yuupuwela aya; aahimyale so: “Mwan’aká, munìrelenle-ni sisa? Atith’inyu ni miyo nowavyani nìniwene murima n’uxanka”.—Luka 2:47, 48.

24. Biibiliya onooniherya sai wira waahuwa anamwane onnikumiherya mixankiho suulupale?

²⁴ Ni masu ala vakhaani, Nuulumo na Muluku, ninnooniherya wira omuhuwa mwaana khahiyo etthu yookhweya, hata mwaana oomalela! Olumwenku ola wootakhala, anamuyari annixankiheya vanceene “mmuupuweloni”, masi anoowerya omaaliheya okhala wira Biibiliya onnihimya mixankiho simosaru siniwanana aya.

25, 26. Yesu aawaakhunle sai anamuyari awe, nto woonasa wene Yosefe oonenle sai masu a Yesu?

 ²⁵ Yesu aari opuro yoole oona awe wira valaponi taari opuro womwaattamela Yehova, Tiithi awe a wiirimu, ottottelaka mureerelo sotheene saiwa awe. Tivonto aahimyale awe wa anamuyari awe oriki: “Mwakiphavelela-ni? Khimwasuwela wira kihana othokorerya itthu s’Atithi aka?”—Luka 2:49.

²⁶ Tthiri, Yosefe aahuupuwelela ikwaha sinceeene masu ale a Yesu. Woonasa wene, vaanimusivela wuupuwela wira wiimananiha wawe omwiixuttiha saana Yesu, waahimwiiriha omusuwela saana Yehova Muluku. Okathi owo Yesu oryeene mmiravo, nuulumo noowi “tithi”, naahikhalana yootaphulela yuulupale ni ya vameekhaaya, otepexa wene, mwaha wa iyaakha iye saavirihale awe ni Yosefe.

27. Ntoko tiithi, eparakha xeeni murina anyu, nave xeeni vanitthuneya anyu wuupuwelela ntakiheryo na Yosefe?

²⁷ Akhala wira nyuwo mwa tiithi, munnoona wira mookhalana eparakha ya waakhaliherya aniinyu woona ele enitaphulela aya okhala tiithi oophenta ni ookhapelela? Hata mwaahuwaka anamwane oowaaphwanya, muhaana wuupuwelela ntakiheryo na Yosefe, nto mmooneke khuta mwaana okhala afaita. Mwaakhaliheryeke omwaattamela Tiithi a wiirimu, Yehova Muluku.—Mmusome  aÉfeso 6:4.

28, 29. (a) Masu ari va Luka 2:51, 52 anooniherya exeeni voohimya sa Yosefe? (b) Yosefe aamukhalihenrye sai mwanawe wunnuwa mwa miruku?

²⁸ Hata Biibiliya olavulaka itthu vakhaani voohimya sa okumi wa Yosefe, hiyo nnoowerya wiixutta etthu. Mwa ntakiheryo Biibiliya onnihimya wira Yesu aanivikaniha ‘owiwelela’ anamuyari awe. Nave onnihimya-tho wira owo “aninnuwa mosuwelani ni mwerutthuni, anitepa osiveliwa ni Muluku n’atthu”.  (Mmusome Luka 2:51, 52.) Masu ala anooniherya exeeni sa Yosefe? Itthu sinceene. Nihiixutta wira Yosefe aahivikaniha okhapelela etthoko awe, okhala wira mwanawe ole oomalela, aanittittimiha okhulupale wa Yosefe ni omwiiwelela.

²⁹ Nihoona-tho wira ankhili a Yesu yaanitepa wunnuwa. Eyo enooniherya wira Yosefe aahivara saana muteko awe womwiixuttiha Yesu. Mahiku ale, yaahikhala yoolema yaasivela aYuda anceene. Nave olelo-va, vanniweryaneya ophwanya ni osoma yoolema eyo. Yaahimya wira: atthu ahinivara etthu tanikhalana miruku, masi kalapintero, mulimi, ole onihana iyuuma, otheene aya ‘khaniwerya ohimya exariya, hata waaphukela akina; aahiiso okhala nipuro ninlavuliwa malikanyiho’. Ohoolo waya, Yesu aahooniherya wira yoolema ele yaari yeethiru. Oryeene mwaana, owo aaniwoona atithi awe yaamuhuwa, amwiixuttihaka mwa miruku, voohimya sa ‘exariya ni ophuka’ wa Yehova. Voohaaniherya, aaniixuttihiwa ikwaha sinceene.

30. Moota xeeni Yosefe ohiiye awe ntakiheryo nooloka voohimya sa ale anihoolela itthoko mahiku ala?

³⁰ Nave pooti oweha moota Yosefe aamukhalihenrye awe Yesu mwa werutthuni. Nto mwaha wookhapeleliwa saana okhuma enamwane awe, owo aahinnuwa ni mukhalelo wooloka ni woolipa. Ohiya-vo, Yosefe aahimwiixuttiha saana mwanawe, muteko aavara awe. Yesu khahiyo wira aasuweliwa paahi okhala mwaana a kalapintero, masi aanisuweliwa-tho okhala, “kalapintero”. (Mar. 6:3) Wiixuttiha wa Yosefe waahikhumela saana. Ahooleli a itthoko, annitthara ntakiheryo na Yosefe, yaakhapelelaka anaaya vookhalela, ni waakhaliherya wira okathi oninnuwa aya akhale a saana.

31. (a) Woonasa wene Yosefe okhwiiye okathi xeeni? (Muhele muhina  ekaaxa.) (b) Ntakiheryo xeeni Yosefe ohiyale awe wira nitthariweke?

³¹ Nuumala Yesu obatiziwa orineene iyaakha siniphiyerya 30, Biibiliya khonimulavula-tho Yosefe. Masi vanihimmwa wira Maria aari naamukhweli okathi Yesu aapaceriha awe muteko woolaleerya. (Nwehe ekaaxa eni: “ Yosefe Okhwiiye Liini?”) Hata vari siiso, miteko sa Yosefe khasinliyaleya; maana oovaha ntakiheryo nooloka ntoko tiithi ooreera murima aakhapelenle etthoko awe, alyihaka etthoko awe ni aari oororomeleya mpakha wanikisa. Khula tiithi, hata muhooleli a etthoko wala muKristau mukina, onimwiira saana otakiha waamini wa Yosefe.