Ntoko Anamoona a Yehova, ninniimananiha weettela enamuna ya ekristau Yesu iixuttinhe awe ni arummwa awe yeettela aya. Mwaha ola, onootthokiherya sookupali sahu suulupale.

1.   Muluku. Nimmukokhorela Muluku Oowerya Sootheene ni ekeekhai, yoowo ori Mpattuxa, ni nsina nawe oniitthaniwa Yehova. (Esalimo 83:19; Wiisuupulula 4:11) Nave aanisuweliwa okhala Muluku a Abrahamu, a Moise ni a Yesu.—Okhuma 3:6; 32:11; Yohani 20:17.

2.   Biibiliya. Ninnikupali wira Biibiliya uupuxeriwe ni Muluku arooheliwa aka apinaatamu. (Yohani 17:17; 2 Timootheyo 3:16) Sookupali sahu sinnivarihana ni iliivuru sootheene 66 sa mBiibiliyani, iyo sinihela muhina “Waataana wa Khalai” ni “Waataana wa Naanaano”. Prusoore Jason David BeDuhn aahimyaka Anamoona a Yehova aalempe wira: “Itthu sinikupali aya ni mweettelo aya sinnivarihana ni Biibiliya, moohivirikanya itthu silempwale-mo”. *

    Nnaamwi nimukupaliki Biibiliya ootheene, ninnisuwela wira ipantte sikina siri mBiibiliyani itthu siiraneyale masi ipantte sikina silempwale mwa nthoonyeryo aahiiso arumeeliwaka malikanyiho.—Wiisuupulula 1:1.

3.   Yesu. Ninnitthara soowiixuttiha ni ntakiheryo na Yesu Kristu, nave ninnimuttittimiha ntoko Moopoli ni Mwaana a Muluku. (Matheyo 20:28; Miteko 5:31) Nave, hiyo na makristau. (Miteko 11:26) Masi, nihiixutta mBiibiliya wira Yesu khahiyo Muluku Owerya Sootheene ni wira khiivo yoolepa enikhaliherya mwiixuttiho wa Amuluku Araru, eyo piiyo, wira Tiithi, Mwaana ni munepa woowaarya Muluku mmosaru.—Yohani 14:28.

4.   Omwene wa Muluku. Nave ninnikupali wira omwene wa Muluku, khahiyo etthu eri vamurimani va mutthu masi ekuvernu eri wiirimu. Omwene owo onoopwetexa ikuvernu sa apinaatamu nave onimwiiriha yootthuna ya Muluku wiiraneya valaponi-va. (Daniyeli 2:44; Matheyo 6:9, 10) Eyo enrowa wiiraneya moohipisa, maana iprofesia sa mBiibiliyani sinooniherya wira ninkhala “mahiku ookiserya”.—2 Timootheyo 3:1-5; Matheyo 24:3-14.

    Yesu tori Mwene a Omwene wa Muluku wiirimu. Owo opacenrye olamulela mwaakha wa 1914.—Wiisuupulula 11:15.

5.   Woopowa. Ninnikupali wira vanniweryaneya woopoliwa etampi ni okhwa paahi ni mukuttho wa Yesu. (Matheyo 20:28; Miteko 4:12) Wira noopoliwe etampi ni okhwa, nihaana wooniherya omwaamini Yesu, ottharuwa mweettelo ahu ni opatisiwa. (Matheyo 28:19, 20; Yohani 3:16; Miteko 3:19, 20) Waamini ohaana wooneyaka ni miteko. (Yakobo 2:24, 26) Nto khaninrowa woopowa paahi mwaha wa miteko sahu, masi mwaha wa “oreera murima wuulupale wa Muluku”.—aGalasia 2:16, 21.

6.   Wiirimu. Yehova Muluku, Yesu Kristu, ni malaikha oororomeleya anikhala wiirimu. * (Esalimo 103:19-21; Miteko 7:55) Atthu vakhaani paahi, eyo piiyo, 144.000, anoohihimuxiwa wira arowe wiirimu yalamuleleke vamosa ni Yesu Moomweneni mwa Muluku.—Daniyeli 7:27; 2 Timootheyo 2:12; Wiisuupulula 5:9, 10; 14:1, 3.

7.   Elapo. Muluku oopattuxa elapo wira apinaatamu akhaleke mahiku ootheene. (Esalimo 104:5; 115:16; Musuweli 1:4) Muluku onimwaatthuvela atthu owiiwelela aavahaka okumi wooloka ni woohimala mparayiisu valaponi.—Esalimo 37:11, 34.

8.   Otakhala ni Ohaawa. Otakhala ni ohaawa opacenrye nuumala nlaikha nimosa omurukunuwela Muluku. (Yohani 8:44) Nuumala nlaikha nlo omurukunuwela Muluku, naahitthaniwa okhala “Satana” ni “Diabo”. Nave aahiwiiriha anamathelana oopacerya omurukunuwela Muluku, nto eyo yookumiherya mixankiho sinceene osuulu wa Adamu. (Maphattuwelo 3:1-6; aRoma 5:12) Wira Muluku ooniherye wira Satana nawoothe, oohiya ohaawa wiiraneyaka, masi Muluku onoomaliha otakhala ni ohaawa.

9.   Okhwa. Atthu anikhwa annihiya okhala. (Esalimo 146:4; Musuweli 9:5, 10) Awo khanihaaxiwa omooroni.

    Muluku onimwaahihimuxa atthu ibilyau sinceene akhwiiye. (Miteko 24:15) Nto ale anrowa okhootta wiiwelela malamulo a Muluku nuumala ohihimuxiwa, anoopwetexiwa voohikhalana-tho nlipelelo nootthikela okhala akumi.—Wiisuupulula 20:14, 15.

10.   Emusi. Hiyo ninniiwelela malakiheryo a Muluku voohimya sa ekasamento, wira mulopwana ni muthiyana athelanne ahaana omwalana paahi vakhala wira mmosa orooraruwa. (Matheyo 19:4-9) Nave ninnikupali wira miruku siri mBiibiliyani sinnikhaliherya imusi okhumela saana.—aEefeso 5:22–6:1.

11.   Okokhorela wahu. Khaninkokhorela mwiikimanyo aahiiso ilatarato sikina. (Otumererya 4:15-19; 1 Yohani 5:21) Okokhorela wahu onihela muhina itthu iya:

    •   Onvekela Muluku.—aFilipi 4:6.

    •   Omusoma Biibiliya.—Esalimo 1:1-3.

    •   Wuupuwelela itthu nniixutta ahu mBiibiliyani.—Esalimo 77:13.

    •   Ninnithukumana wira nivekele, omusoma Biibiliya, wiipa, ni olipihana mukina ni mukhwaawe.—aKolosi 3:16; aHeeberi 10:23-25.

    •   Olaleya “ihapari . . sooreera sa Omwene”.—Matheyo 24:14.

    •   Waakhaliherya atthu akina ni itthu sinaathowa.—Yakobo 2:14-17.

    •   Otekiwa ni olokiheriwa Ipa sa Omwene ni ipa sikina sinirumeeliwa wira ovariwe muteko woomwiixuttiha Biibiliya ilapo sootheene.—Esalimo 127:1.

    •   Ninnaakhaliherya atthu okathi sinikhumelela aya ihasara sa ephattu.—Miteko 11:27-30.

12.   Mutthenkeso ahu. Mutthenkeso ahu onihela muhina miloko sinceene ni khula muloko aakhala axitokweene aniweherya. Masi axitokweene awo khahiyo makhulupale ni khaniliviwa musurukhu. (Matheyo 10:8; 23:8) Khoniliviwa tiisimu ni okathi wa mithukumano ahu khenivirihiwa ephace. (2 aKorinto 9:7) Miteko sahu sootheene sinikhaliheriwa ni misonkheryo sinivahiwa moohikhanyereriwa.

     Nikhuuru Noolamulela, eyo piiyo, egrupu yaamukhaani ya makristau arina waamini woolipa anirumeela oseedi ya olumwenku wootheene, annaavaha malakiheryo Anamoona a Yehova ilapo sootheene.—Matheyo 24:45.

13.   Wuuraana wahu. Ootheene ahu ninkupali itthu simosaru. (1 aKorinto 1:10) Nave naatthu oowiiraana, nnaamwi niri ene a ilapo, iraasa, ni makhalelo oovirikana. (Miteko 10:34, 35; Yakobo 2:4) Nnaamwi niri ene oowiiraana khula mutthu ookhalana ediretu yoopaka soothanla sawe. Nave khula Namoona a Yehova onnipaka soothanla ottharaka murima awe wiixuttihiwe ni Biibiliya.—aRoma 14:1-4; aHeeberi 5:14.

14.   Mweettelo ahu. Ninniimananiha wooniherya niphento ni itthu sootheene nimpaka ahu. (Yohani 13:34, 35) Ninnikhootta itthu sootheene Muluku oninyokha awe, ohela muhina orumeela ephome mwa enamuna yoohiloka. (Miteko 15:28, 29; aGalasia 5:19-21) Naatthu a murettele nave khanniirela mpantta ikhotto. (Matheyo 5:9; Yesaya 2:4) Ninnaattittimiha ale anihoolela elapo, nave ninniiwelela malamulo aya, vakhala wira malamulo awo khanivonyola malamulo a Muluku.—Matheyo 22:21; Miteko 5:29.

15.   Moota ninwoonela ahu atthu akina. Yesu aahimmye so: “‘Mumphenteke mukhwiinyu ntoko muniiphenta anyu’”. Aahihimya-tho wira makristau “khaniirela mpantta olumwenku”. (Matheyo 22:39; Yohani 17:16) Nave ninniimananiha ‘waakhaliherya atthu otheene’, masi khanniirela mpantta myaha sa epoliitika nnakhala otakaahana ni itiini sikina. (aGalasia 6:10; 2 aKorinto 6:14) Ninnittittimiha soothanla sa atthu akina.—aRoma 14:12.

 Mwaaphavelaka osuwela itthu sinceene voohimya sa Anamoona Yehova, nyuwo pooti orowa esaite ahu JW.ORG, olikarela ofiliyaali wahu, orowela mithukumano sahu Empa ya Omwene muttetthe munikhala anyu, aahiiso ovaanela ni mmosa a Anamoona a Yehova a muttetthe anyu.